Exodus

34 Jehova chuan Mosia hnênah: “A hmaa mi ang bawk kha lungphêk pahnih chher la, i paih keh tâk lungphêk hmasa zâwka inziak ang chiah kha ka ziahsak leh ang che. 2 Zîngah Sinai Tlânga chho tûrin inring la, tlâng chhîpah chuan ka hmaah lo ding ang che. 3 Tu mah i rualin an chho tûr a ni lo va, tlângah chuan tu mah an awm tûr a ni lo. Tlâng chhehvêlah chuan berâm rual emaw, ran rual emaw pawh an tla tûr a ni hek lo,” a ti a.

4 Tichuan, Mosia chuan a hmaa mi ang bawk kha lungphêk pahnih a chher a, Jehova’n thu a pêk ang chiahin zîng takah a tho va, Sinai Tlângah chuan a chho va, lungphêk pahnih pawh chu a keng bawk a. 5 Jehova chu chhûmah chuan a lo chhuk a, Mosia bulah chuan dingin Jehova hming chungchâng a hrilh a. 6 Jehova chuan Mosia chu a hmaah kal pêlin: “Jehova chu, Jehova chu, Pathian zahngaihna leh khawngaihnaa khat, zaidam tak, hmangaihna rinawm leh thutak* ngah, 7 mi sâng tam takte chunga hmangaihna rinawm lantîr ṭhîn, dik lohna te, bawhchhiatna te, sualnate ngaidam ṭhîn, thil sual titu erawh chu hrem lohva chhuah ngai lo, pate dik lohna avânga fate, tûte leh, chhuan thumna leh chhuan lina thlenga hrem ṭhîn a ni,” tiin a hrilh a.

8 Mosia chu hmanhmawh taka ṭhingṭhiin a kûn a. 9 Mosia chuan: “Aw Jehova, tûnah hian i lawm ka hlawh chuan mi luhlul tak kan ni chung pawh hian, Jehova, khawngaihin kan rualin kal ang che, kan dik lohna leh kan sualte ngaidam la, i rochanah min nei ang che,” a ti a. 10 Pathian chuan: “Hetiang hian thu ka thlung dâwn a ni: Nangniho zawng zawng hmaah hian lei pum pui leh hnam dang zawng zawng zînga la tih ngai loh thil ropui tak takte ka ti dâwn a, in chhehvêla chêng hnam zawng zawngin Jehova thiltih chu an hmu ang, in tâna ka thiltih tûr chu mak ropui tak a ni dâwn a ni.

11 “Vawiina thu ka pêk che u hi ngun takin ngaithla rawh u. In hma aṭangin Amor mi te, Kanaan mi te, Hit mi te, Periz mi te, Hiv mi te, Jebus mite ka hnawt chhuak dâwn a ni. 12 In va kalna tûr rama chêngte nêna thu thlung lo tûrin fîmkhur ang che u, in fîmkhur loh chuan in tân thang a ni mai ang. 13 An maichâmte tichhiain, an lungphunte tikeh sawm ula, an ban phunte* pawh kit ang che u. 14 Jehova chu amah chauh biak phûttu Pathian a nih avângin, pathian dang hmaah in kûn tûr a ni lo. Ani chu amah chauh biak phûttu Pathian a ni. 15 Chu rama chêngte nêna thu thlung lo tûrin fîmkhur rawh u, an pathiante biaa nawhchi an zawrh hunah leh an pathiante hnêna an inthawi hunah tu emawin sâwm che uin, a inthawina chu in ei palh ang e. 16 Chu bâkah, an fanute chu in fapate in neihtîr ang a, an fanute chuan an pathiante biain nawhchi an zuar ang a, in fapate pawh an pathiante biain nawhchi an zawrhtîr ang.

17 “Pathian lem chhûngin in siam tûr a ni lo.

18 “Chhang Dawidim Telh Loh Kût in hmang tûr a ni. Thu ka pêk ang chiah che u khân chhang dawidim telh loh in ei tûr a ni a, Abib* thlaah Aigupta ram aṭanga in lo chhuah avângin, Abib thlaa hun ka ruatah chutiang chuan in ti tûr a ni.

19 “Mipa fa piang hmasa ber chu ka ta a ni a, in ran rual zînga bâwng pa emaw, berâm pa emaw pawh ni se, a piang hmasa berte chu ka ta a ni. 20 Sabengtung piang hmasa ber chu berâmin in tlan tûr a ni a, in tlan loh chuan a nghâwng in titliak tûr a ni. In fa tîr mipa zawng zawngte chu in tlan tûr a ni. Ka hmaah tu mah kut ruakin in rawn inlan tûr a ni lo.

21 “Ni ruk chhûng hna in thawk thei ang a, ni sarihnaah erawh chuan in châwl tûr a ni. Leileh lai leh buh seng lai pawh ni se in châwl tûr a ni.*

22 “In buh thar chhuah hmasa ber hmangin Chawlhkâr Kût in hmang tûr a ni a, kum tâwpah Pâwl Kût* in hmang bawk tûr a ni.

23 “Mipa zawng zawng chu kum khatah vawi thum Lalpa dik tak, Israelte Pathian Jehova hmaah an inlan ṭhîn tûr a ni. 24 Hnamte chu in hma aṭangin ka hnawt bo vang a, in ram luah chin pawh ka tizau vang. In Pathian Jehova hmaa inlan tûra kum khata vawi thum in kal laiin, in ram chu tu mahin lâk an tum lo vang.

25 “Ka hnêna thil in hlan hunah ran thisen leh chhang dawidim telh in hlân kawp tûr a ni lo va. Kalhlên Kût inthawina sa chu a tûk zîng thlengin in dah tûr a ni lo.

26 “Lova in thar chhuah zînga a ṭha ber berte chu in Pathian Jehova inah in rawn keng tûr a ni.

“Kêl no sa chu a pui hnutetuiin in chhûm tûr a ni lo,” a ti a.

27 Jehova vêk chuan Mosia hnênah: “Hêng thute ṭanchhan hian nang leh Israel mite nêna thu ka thlun dâwn avângin, hêng thute hi ziak chhuak rawh,” a ti a. 28 Tlângah chuan Mosia chu Jehova bulah ni 40 leh zan 40 a awm a. Eng mah a ei lo va, tui pawh a in hek lo. Lungphêkahte chuan thuthlunna thu, Thupêk Sâwmte chu A* ziak a.

29 Tichuan, Mosia chu Sinai Tlâng aṭang chuan Thuhriattîrna lungphêk pahnih kengin a lo chhuk a. Pathian nên an inbiak avângin a hmêl a lo êng ta tih tlâng aṭanga a lo chhuk lai chuan a hre lo va. 30 Arona leh Israel mi zawng zawngin Mosia hmêl a êng tih an hmuh chuan amah an pan hnai ngam lo va.

31 Mahse, Mosia’n anni chu a ko va. Tichuan, Arona leh Israel mite zînga hruaitu zawng zawngte chu a hnênah an lo kal a, ani chuan a lo bia a. 32 Chumi hnu chuan, Israel mi zawng zawngte chu a bulah an lo kal a, ani chuan Sinai Tlânga Jehova’n thu a pêk zawng zawngte chu a lo hrilh a. 33 Mosia chuan anmahni a biak zawh apiangin hmai khuhnain a hmai a khuh ṭhîn a. 34 Mahse, Jehova be tûra a luh apiangin, Mosia chuan a hmai khuhna chu a chhuah leh hma loh a hlîp thla ṭhîn a, an inbiak zawh chuan kal chhuakin, Israel mite hnênah thupêk a dawnte chu a puang chhuak leh ṭhîn. 35 Israel mite chuan Mosia hmêl êng chu an hmu ṭhîn a; tichuan, Pathian be tûra a luh leh hma loh chu Mosia chuan hmai khuhnain a hmai chu a khuh leh ṭhîn.