Leviticus

24 Jehova chuan Mosia a bia a, a hnênah: 2 “Khâwnvârte chu a alh reng theih nân oliv hriak fîr ṭha tak rawn la tûrin Israel mite chu thu i pe tûr a ni. 3 Arona chuan inbiakna puan ina Thuhriattîrna puanzâr pâwn lamah, khâwnvârte chu Jehova hmaah tlai aṭanga a tûk zîng thlenga a alh reng theihna tûrin a rem tûr a ni. Chu chu in chhuan lo awm tûr zawng zawng thlenga kumkhaw dân tûr a ni ang. 4 Jehova hmaah khâwnvârte chu a alh reng theihna tûrin rangkachak hlanga siam khâwnvâr dahnaah chuan a dah tûr a ni.

5 “Chhangphut dip ṭha takin chhang kual 12 siam ang che. Chhang kual tinte chu chhangphut epha hmun sâwma ṭhena hmun hnih zêla siam tûr a ni. 6 Chhangte chu rangkachak hlanga siam dawhkân chungah chuan Jehova hmaah tlar hnihin paruk ve vein i rem tûr a ni. 7 Chhang rem chungah chuan eng mah pawlh loh beraw* i dah ve ve tûr a ni a, chu chu Jehova hnêna meia thilhlan chhang aiawhtu a ni ang. 8 Sabbath nî apiangin rem ziah tûr a ni, chu chu kei leh Israel mite inkâra kumkhaw thuthlung a ni ang. 9 Chu chhang chu Arona leh a fapate chanpual a ni a, Jehova hnêna meia thilhlan aṭanga thil thianghlim tak a nih avângin hmun thianghlimah an ei tûr a ni. Chu chu kumkhaw dân tûr a ni ang,” a ti a.

10 Israel hmeichhe pakhat leh Aigupta mi pakhatin fapa an nei a, chu an fapa leh Israel mi pakhat awm hmun khuarnaah chuan an intibuai a. 11 Chu Israel hmeichhe fapa chuan Pathian hming sawichhiain, ânchhia a lawh a. Chuvângin, Mosia hnênah an hruai a, a nu chu Dan hnama mi Dibria fanu, Selomithi a ni. 12 Jehova thu tlûkna an hriat hma zawng chu pa chu an tântîr a.

13 Tichuan, Jehova’n Mosia hnênah: 14 “Anchhe lawhtu chu awm hmun khuarna pâwnah hruai chhuak ula, a thusawi hretu zawng zawngin a lu chungah kut nghat sela, pung khâwmho zawng zawngin dêng hlum rawh se. 15 Tin, Israel mite chu, ‘Tu pawhin a Pathian ânchhia a lawh chuan a thil sual tih mawh chu a phur ang. 16 Chuvângin, Jehova hming sawichhetu chu tihhlum ngei tûr a ni. Pung khâwmho zawng zawngin ani chu an dêng hlum ang. Ram dang mi, Pathian hming sawichhetu pawh chutiang bawk chuan tihhlum tûr a ni.’

17 “‘Tu pawhin tual a thah chuan ani chu tihhlum ngei tûr a ni. 18 Tu pawhin mi dang ran vulh a tihhlum chuan zângnadawm nân nunna aiah nunna a pe tûr a ni. 19 Tu pawhin a mihringpui a hliam chuan, a tih ang chiah chuan a chungah pawh tih ve tûr a ni. 20 Mi dang hliam a tawrhtîr ang chiahin ruh tliak aiah ruh tliak, mit aiah mit, hâ aiah hâ tawrhtîr ve tûr a ni. 21 Mi ran tihlumtu chuan zângnadawmna a pe tûr a ni a, mihring tihlumtu erawh chu tihhlum ve tûr a ni.

22 “‘Ram dang mi emaw, Israel mi emaw pawh ni se, angkhat rengin ro in rêlsak tûr a ni. Kei hi in Pathian Jehova ka ni,’ tiin hrilh rawh,” a ti a.

23 Mosia’n chûng thu chu Israel mite a hrilh a. Tichuan, ânchhe lawhtu chu awm hmun khuarna pâwn lamah hruaiin an dêng hlum ta a. Chutiang chuan, Jehova’n Mosia thu a pêk ang chiahin Israel mite chuan an ti a ni.