Leviticus

23 Jehova chuan Mosia hnênah: 2 “Israel mite chu bia la, an hnênah, ‘Jehova tâna hunbi nei kûtte chu inkhâwmpui thianghlim angin in hmang tûr a ni. Chûng hunbi nei kûtte chu hêngte hi a ni:

3 “‘Ni ruk chhûng hna in thawk thei ang a, a ni sarihna erawh chu inkhâwmpui thianghlim, sabbath chawlh hmakna nî a ni ang. Chumi nî chuan eng hna mah in thawk tûr a ni lo va, in awmna hmun apiangah Jehova tân sabbath in serh tûr a ni.

4 “‘Hêng hi Jehova tâna hunbi nei kût, a hun ruata inkhâwmpui thianghlim in hman tûrte chu a ni: 5 Thla khatna ni 14-na, ni tlâk hnuah Jehova tân Kalhlên Kût in hmang tûr a ni.

6 “‘Chumi thla vêk ni 15-na chu Jehova tâna Chhang Dawidim Telh Loh Kût a ni ang a, ni sarih chhûng chhang dawidim telh loh in ei tûr a ni. 7 A ni khatnaah inkhâwmpui thianghlim in hmang ang a. Hna rum rêng rêng in thawk tûr a ni lo. 8 Chûng ni sarih chhûng chuan Jehova hnênah meia thilhlan in hlân ziah tûr a ni a. A ni sarihnaah inkhâwmpui thianghlim in hmang tûr a ni. Hna rum rêng rêng in thawk tûr a ni lo,’ tiin hrilh ang che,” a ti a.

9 Jehova chuan Mosia chu be chhunzawmin, a hnênah: 10 “Israel mite chu bia la, ‘Ram ka pêk tûr che u in thlen a, chuta in thil thar chhuahte in seng hunah in thil thar chhuah hmasak ber aṭangin barli têl khat puithiam hnênah in rawn la tûr a ni. 11 Tichuan, pawm in hlawh theihna tûrin puithiam chuan Sabbath zawh ni tûkah barli têl khat chu Jehova hmaah a thên ang. 12 Chumi nîah chuan, Jehova hnênah hâlral thilhlan atân berâm pa tuai hrisêl ṭha tak kum khat aia upa lo in hlân tûr a ni. 13 Chumi rual chuan, chhangphut thilhlan Jehova tâna thil rimtui tak meia thilhlan atân chhangphut dip ṭha tak epha hmun sâwma ṭhena hmun hnih* hriak nêna chawhpawlh in hlân tûr a ni a, in tûr thilhlan atân uain hin* hmun lia ṭhena hmun khat in hlân bawk tûr a ni. 14 Chumi nî, in Pathian hnêna thilhlante in rawn ken nî a thlen hma loh chuan chhang emaw, buh meia tihro emaw, buh thar emaw in ei tûr a ni lo. Chu chu in awmna hmun apiangah, in chhuan zawng zawng thlenga kumkhaw dân tûr a ni.

15 “‘Thên thilhlan atâna barli têl khat in rawn hlan nî, Sabbath zawh ni tûk aṭang chuan sabbath vawi sarih in chhiar tûr a ni a. Chawlhkâr tina nîte chu a kim thlap tûr a ni. 16 Sabbath vawi sarih zawh tûk, ni 50-naah chuan Jehova hnênah chhangphut thilhlan thar in hlân tûr a ni. 17 In awmna hmun aṭangin thên thilhlan atân chhangphut dip ṭha tak epha hmun sâwma ṭhena hmun hniha* siam chhang hlâwm hnih in rawn la tûr a ni. Dawidim telh tûr a ni a, Jehova hnênah in thil thar chhuah hmasak ber aṭangin in rawn hlân tûr a ni. 18 Chhang hlâwm rual chuan berâm pa pasarih kum khata upa ṭheuh leh bâwng pa tuai pakhat leh berâm pa pahnih in hlân tel tûr a ni. Chûngte chu Jehova hnêna hâlral thilhlan atân a ni a. Chumi rual chuan chhangphut thilhlan leh in tûr thilhlan hlan tel tûr a ni. Chu chu Jehova tâna thil rimtui tak, meia thilhlan a ni ang. 19 Tin, sual thawina thilhlan atân kêl pa tuai pakhat leh remna thilhlan atân berâm pa pahnih kum khata upa ve ve in hlân tûr a ni. 20 Puithiam chuan berâm pa pahnih chu thil thar chhuah hmasak ber aṭanga siam chhang hlâwm rual chuan Jehova hmaah thên thilhlan atân a thên ang. Chûngte chu Jehova tâna thil thianghlim, puithiam chanpual tûr a ni. 21 Chumi nî chu inkhâwmpui thianghlim neihna nîah in puang tûr a ni a, hna rum rêng rêng in thawk tûr a ni lo. Chu chu in awmna hmun apiangah, in chhuan zawng zawng thlengin kumkhaw dân tûr a ni ang.

22 “‘Buh leh bâl in seng hunah vau hrûl thlengin in seng fai vek tûr a ni lo va, in lâk hmaih pawh in zawng tûr a ni lo. Mi rethei leh ram dang mite tân in hnutchhiah tûr a ni. Kei hi in Pathian Jehova ka ni,’ tiin hrilh rawh,” a ti a.

23 Jehova vêk chuan Mosia hnênah: 24 “Israel mite chu, ‘Thla sarihna, a ni khatnaah chuan in châwl hmak tûr a ni a. Chumi nî chu inkhâwmpui thianghlim neihna nî a ni tih in hriat theihna tûrin tawtawrâwt ham a ni ang. 25 Hna rum rêng rêng in thawk tûr a ni lo va, Jehova hnênah meia thilhlan in hlân tûr a ni,’ tiin hrilh rawh,” a ti a.

26 Tin, Jehova chuan Mosia hnênah: 27 “Thla sarihna, a ni sâwmna erawh chu Inremna Nî a ni. Inkhâwmpui thianghlim in hmang tûr a ni a, in intihrehawm* tûr a ni a, Jehova hnênah meia thilhlan in hlân tûr a ni. 28 Chu nî chu in Pathian Jehova hmaa inremna in siamna nî a nih avângin eng hna mah in thawk tûr a ni lo. 29 Chumi nîa mahni intihrehawm* lo chu tihboral an ni ang a. 30 Hna thawk apiang pawh ka tiboral ang. 31 Hna rêng rêng in thawk tûr a ni lo. Chu chu in awmna hmun apiangah, in chhuan zawng zawng thlengin kumkhaw dân tûr a ni. 32 Chumi nî chu in tân sabbath chawlh hmakna nî a ni a. Chumi thla ni kuana tlai lamah chuan in intihrehawm tûr a ni. Sabbath chu tlai ni tlâk aṭanga a tûk tlai ni tlâk thlengin in serh tûr a ni,” a ti a.

33 Jehova chuan Mosia chu be chhunzawmin, a hnênah: 34 “Israel mite chu, ‘Thla sarihna ni 15-na aṭangin ni sarih chhûng Jehova tân Bâwkte Kût in hmang tûr a ni. 35 A ni hmasa berah chuan inkhâwmpui thianghlim in hmang tûr a ni a, hna rum rêng rêng in thawk tûr a ni lo. 36 Ni sarih chhûng chuan Jehova hnênah meia thilhlan in hlân ziah tûr a ni. A ni riatnaah chuan inkhâwmpui thianghlim in hmang tûr a ni a, Jehova hnênah meia thilhlan in hlân tûr a ni. Chu inkhâwmpui chu urhsûn taka hman tûr a ni a, hna rum rêng rêng in thawk tûr a ni lo.

37 “‘Chûngte chu Jehova tâna hunbi nei kût, inkhâwmpui thianghlima in puan tûrte chu a ni. Chumi hun chhûng chuan a ni ruat ang zêlin hâlral thilhlan te, chhangphut thilhlan te, in tûr thilhlante chu Jehova hnênah meiah in hlân tûr a ni. 38 Chûngte chu Jehova hnêna in pêk tûr Jehova sabbath-tea thilpêk te, in thutiam atâna thilhlan te, mahni duhthua in thilhlante bâka in hlan tûr chu a ni. 39 Ram chhûnga in thil thar chhuahte in seng zawh hnu, thla sarihna ni 15-naah chuan Jehova chawimawina kût ni sarih chhûng in hmang tûr a ni a. A ni khatna leh a ni riatna chu chawlh hmakna nî a ni ang. 40 A ni khatnaah chuan thing mawi tak tak rahte chu lovin, tûm hnah te, thing zâr hnah ngah chî te, ruama thing* hnahte sâtin ni sarih chhûng chu in Pathian Jehova hmaah hlim takin in awm tûr a ni. 41 Kum tin thla sarihnaah ni sarih chhûng Jehova chawimawina kût chu in hmang ṭhîn tûr a ni a. Hei hi in chhuan zawng zawng thlenga kumkhaw dân tûr a ni. 42 Ni sarih chhûng bûktêah in awm tûr a ni a. Israel mi zawng zawngte chu bûktêah an awm tûr a ni. 43 Chutiang chuan, in thlah lo la awm tûrte’n Aigupta ram aṭanga ka hruai chhuah lai che u khân, bûktêah ka awmtîr che u tih an hre thei ang. Kei hi in Pathian Jehova ka ni,’ tiin hrilh rawh,” a ti a.

44 Tichuan, Mosia chuan Jehova tâna hunbi nei kûtte chungchâng chu Israel mite a hrilh ta a.