Exodus

3 Mosia chuan Midian ram puithiam a puzawn Jethroa berâm rualte chu a vêng ṭhîn a. Ni khat chu thlalêr thlang lamah berâm rualte chu khalh zêlin Pathian dik tlâng Horeb chu a thleng a. 2 Jehova vântirhkoh chu hnim buk alhah a hnênah a rawn inlâr a. A han en chian chuan hnim buk chu alh mah se, a kang lo tih a hmu a. 3 Tichuan, Mosia chuan: “Hnim buk a kan loh chhan hre tûrin thil thleng mak tak saw ka va enfiah teh ang,” a ti a. 4 Enfiah tumin a va pan tih Jehova’n a hmuh chuan, hnim buk aṭang chuan: “Mosi, Mosi!” tiin a au va. Ani chuan: “Eng nge ni ka Lalpa?” a ti a. 5 Pathian chuan: “Rawn hnaih tawh suh. I dinna kha hmun thianghlim a nih avângin i pheikhawk kha phelh rawh,” a ti a.

6 Pathian chuan sawi chhunzawmin: “Kei hi i pa Pathian, Abrahama Pathian, Isaaka Pathian leh, Jakoba Pathian ka ni,” a ti a. Chu veleh, Mosia chuan Pathian dik chu a en ngam loh avângin a hmai a khuh ta a. 7 Jehova vêk chuan: “Aigupta rama ka mite hrehawm tawrhna chu chiang takin ka hmu a, anmahni hna thawh luihtîrtute avânga an au thâwm pawh ka hre bawk a, hrehawm an tawrh nasatzia chiang takin ka hria a ni. 8 Aigupta mite kut aṭanga anmahni chhan chhuak tûrin ka zuk chhuk ang a, chu ram aṭang chuan Kanaan mi te, Hit mi te, Amor mi te, Periz mi te, Hiv mi te, Jebus mite ram, ram ṭha leh zau tak, khawizu leh hnutetui luanna ramah chuan ka hruai dâwn a ni. 9 Ngai teh, Israel mite au thâwm chuan ka hnên a lo thleng a, Aigupta mite’n râwng taka an hnuaichhiah dân pawh ka hmu bawk. 10 Ti teh, Pharaoa hnênah ka tîr ang che, nang hian ka mi Israelte chu Aigupta ram aṭangin i hruai chhuak dâwn a ni,” a ti a.

11 Mahse, Mosia chuan Pathian dik hnênah: “Pharaoa hnêna va kal a, Aigupta ram aṭanga Israel mite hruai chhuak tûrin tu nge maw ka nih le?” a ti a. 12 Pathian chuan: “I hnênah ka awm ang a, ka tîr che a ni tih i tâna chhinchhiahna chu hei hi a ni ang: Israel mite chu Aigupta ram aṭanga i hruai chhuah hnuah he tlângah hian Pathian dik in be dâwn a ni,” a ti a.

13 Mahse, Mosia chuan: “Israel mite hnênah va kalin, ‘In pi leh pute Pathianin in hnênah min tîr a ni,’ va ti ta ila, anni chuan, ‘Tu nge a hming?’ lo ti ta se, engtin nge ka chhân ang?” a ti a. 14 Pathian chuan: “Ka Duh Ang Apiang Chu Ka Ni Ang,” a ti a. Chu bâkah: “Israel mite hnênah chuan, ‘“Ka Ni Ang,” tia kohva chuan in hnênah min tîr a ni,’ i ti tûr a ni,” a ti bawk a. 15 Pathian vêk chuan Mosia hnênah:

“Israel mite hnênah chuan, ‘In pi leh pute Pathian, Abrahama Pathian, Isaaka Pathian leh, Jakoba Pathian Jehova chuan in hnênah min tîr a ni,’ i ti tûr a ni. Hei hi kumkhua atâna ka hming a ni a, chhuan zawng zawng thlenga min hriat reng dân tûr chu a ni. 16 Tûnah kal la, Israel upate chu ko khâwmin an hnênah, ‘In pi leh pute Pathian, Abrahama, Isaaka leh, Jakoba te Pathian Jehova chu ka hnênah a rawn inlâr a. Ani chuan: “In hrehawm tawrhnate leh Aigupta rama in chunga thil thlengte chu chiang takin ka hmu a. 17 Chuvângin, Aigupta mite kuta hrehawm in tawrhna ata hi chhan chhuak che uin, Kanaan mi te, Hit mi te, Amor mi te, Periz mi te, Hiv mi te leh, Jebus mite ram, khawizu leh hnutetui luanna ramah ka hruai ang che u,” a ti,’ tiin sawi ang che.

18 “Anni chuan i thusawi chu an lo âwih ngei ngei ang a, nang leh Israel upate chu Aigupta lal hnênah kalin, ‘Hebrai mite Pathian Jehova chuan min rawn bia a. Chuvângin, kan Pathian Jehova hnêna inthawina hlân tûrin thlalêrah ni thum* kan va thang min phalsak rawh,’ ti ang che u. 19 Mahse, kut chak takin a tih luih chauh loh chuan, Aigupta lal chuan in kal a phal dâwn lo tih chiang takin ka hria a ni. 20 Chuvângin, ka bân ka phar ang a, thil mak ropui tak tak ka tih tûrte hmangin Aigupta ram chu ka hrem ang. Chumi hnu chuan a kaltîr ang che u. 21 Chu bâkah, Israel mite chu Aigupta mite duhsak ka hlawhtîr ang a, in kal chhuah hun chuan kut ruak ngawtin in kal lo vang. 22 Hmeichhia zawng zawngte chuan an vêngte leh an ina chêng hnam dang hmeichhiate chu tangkarua leh rangkachaka siam thilte bâkah, thawmhnawte an dîl tûr a ni. Chûng chuan in fate in thuam ang a; chutiang chuan, Aigupta mite chu in rawk dâwn a ni,” a ti a.