Genesis

45 Josefa chu a chhiahhlawh zawng zawngte hmaah chuan a insûm zo ta lo va. Tichuan, ring takin: “Min chhuahsan vek rawh u!” a ti a. A unaute hnêna a inhriattîr lai chuan a bulah mi dang tu mah an awm lo.

2 Tichuan, ring takin a ṭap ta a. Chu chu Aigupta mite’n an lo hria a. Pharaoa inah pawh chu chanchin chu a thleng a. 3 A tâwpah Josefa chuan a unaute hnênah: “Josefa kha ka ni. Ka pa a la dam em?” a ti a. Mahse, mak an tih êm avângin an chhâng hlei thei lo va. 4 A unaute hnênah: “Khawngaihin lo kal hnai rawh u,” a ti a. An kal hnai a.

Tichuan: “Kei hi Aigupta rama in hralh tâk, in unaupa Josefa kha ka ni. 5 Mahse, min hralh avâng khân lungngai lo ula, inmawhchhiat hek suh u; nunna chhanhim tûrin Pathianin in hmaah min tîr a ni. 6 Tûn hi ṭâm a tlâk kum hnihna a ni a, kum nga lo awm tûr chhûng hian ṭâm a la tla chhunzawm zêl ang a, lei leh emaw, buh seng emaw a awm lo vang. 7 Leia in thlah la bângte a vênhim theihna tûr leh, chhan chhuahna ropui tak hmanga a dam khawchhuahtîr theihna tûr che uin, Pathianin in hmaah min tîr a ni. 8 Chuvângin, Pharaoa thurâwn petu ber ni tûr te, a in chhûnga hotu ni tûr te, Aigupta ram zawng zawng chunga rorêltu ni tûrtea heta min tîrtu chu nangmahni ni lovin Pathian dik zâwk a ni.

9 “Ka pa hnênah haw thuai ula, ti hian hrilh ang che u, ‘I fapa Josefa chuan heti hian a ti: “Pathianin Aigupta ram pum pui hotuah min ruat a. Chuvângin, muangchâng lovin ka hnênah rawn chhuk thla thuai rawh. 10 I fapa te, i tupa te, i berâm rual te, i ran rual te, i thil neih zawng zawngte nên Gosen ramah, ka bul hnaiah i awm dâwn nia. 11 Chutah chuan ka châwm ang che, kum nga lai ṭâm kan la hma bâk si a. Chuti lo chuan, nang leh i chhûngte hi in lo rethei ang a, in thil neih zawng zawngte hi a boral vek ang,” tiin.’ 12 Hêng thute sawitu hi keimah ngei ka ni tih nangni leh ka nau Benjamina hian in mit ngeiin in hmu a. 13 Chuvângin, ka pa hnênah chuan Aigupta rama ka ropuina zawng zawng leh in thil hmuh zawng zawngte hi va hrilh ngei ang che u. Tûnah hian haw ula, ka pa chu rawn hruai thla vat ang che u,” a ti a.

14 Chutichuan, a nau Benjamina chu kuahin a ṭap a, Benjamina pawh chuan a nghâwnga kuahin a ṭap ve a. 15 A ute pawh chu fâwpin a ṭah a, chumi hnu chuan chanchinte an inzâwt a.

16 Josefa unaute an lo kal tih Pharaoa ina mite’n an hriat chuan, Pharaoa leh a chhiahhlawhte chu an lâwm hle a. 17 Tichuan, Pharaoa’n Josefa hnênah: “I unaute chu heti hian hrilh rawh, ‘In rante chu ei tûrte phurhtîrin Kanaan ramah haw ula, 18 in pa leh in chhûngte chu han hruai ula, ka hnênah lo kal rawh u. Aigupta rama thil ṭhate hi ka pe che u ang a, he rama thil thar chhuah ṭha ber berte hi in ei dâwn nia,’ tiin. 19 Chu bâkah, heti hian hrilh ang che: ‘In pa leh in nupui fanaute hruai nân Aigupta rama tawlailîrte hi keng rawh u. 20 In thil neihte chu ngaihtuah buai duh suh u. Aigupta rama thil ṭha ber berte hi in ta a ni,’ tiin,” a ti a.

21 Israela fapate chuan chutiang chuan an ti a, Pharaoa thupêk angin Josefa chuan tawlailîrte leh haw kawnga an ei tûrte a pe a. 22 An vaiin thawmhnaw thar pakhat ṭheuh a pe a, Benjamina erawh chu tangkaraw pawisa 300 leh thawmhnaw thar panga a pe thung a. 23 Chu bâkah, a pa hnênah chuan Aigupta rama mi thil ṭha tinrêng phur sabengtung sâwm leh, a pain zin kawnga a mamawh tûr buh leh chhang leh thil dangte phur sabengtung nu sâwm a thawn a. 24 Tichuan, a unaute chu a kaltîr a, an kal dâwnah chuan: “Kawngah han inhnial buai suh ang che u,” tiin a hrilh a.

25 Tichuan, Aigupta ram aṭang chuan an chho va, Kanaan rama an pa Jakoba hnên chu an thleng a. 26 A hnênah: “Josefa kha a la dam a, Aigupta ram pum puia rorêltu a ni,” tiin an hrilh a. Amaherawhchu, an thusawi a âwih loh avângin engtin mah a chhâng lo. 27 Mahse, an hnêna Josefa thusawi zawng zawngte an hrilh hnuah leh amah phurhna tûra Josefa’n tawlailîr a thawnte a hmuh hnuah chuan, an pa Jakoba chu a hlim ta hle a. 28 Mak ti taka au chhuakin: “In thusawi chu a dik ngei a nih hi! Ka fapa Josefa chu a la dam a, ka thih hmain amah hmu tûrin ka kal dâwn e!” a ti a.