Exodus

4 Mahse, Mosia chuan: “Anni chuan min ring lovin ka thusawite âwih lo ta se, engtin nge ni ang? ‘Jehova i hnênah a rawn inlâr lo,’ an ti mai âwm si a,” tiin a chhâng a. 2 Jehova chuan: “I thil ken kha eng nge?” tiin a zâwt a. Ani chuan: “Tiang,” a ti a. 3 Pathian chuan: “Leiah khân paih rawh,” a ti a. Leia a han paih chuan rûlah a lo chang a; chu veleh, Mosia chu a tlânchhe ta a. 4 Jehova’n Mosia hnênah: “A meiah khân man rawh,” a ti a. A meia a han man chuan tiangah a lo chang leh a. 5 Tichuan, Pathianin: “Hei hi an pi leh pute Pathian, Abrahama Pathian, Isaaka Pathian leh, Jakoba Pathian Jehova chu i hnênah a rawn inlâr tih an rin theihna tûr a ni ang,” a ti a.

6 Jehova chuan: “I kut khân i âwm han zen teh,” a ti leh a. A âwm a han zen a, a phawrh chhuah chuan, a kut chu vûr ang maia vârin a lo phâr ta a. 7 Tichuan: “I kut khân i âwm han zen leh teh,” a ti a. A âwm a han zen leh a, a phawrh chhuah chuan, a tisa pângngai angin a lo awm leh ta a. 8 Pathian chuan: “An rin loh che a, chhinchhiahna hmasa zâwk pawh an pawm loh chuan, chhinchhiahna pahnihna chu an pawm ngei ngei ang. 9 Mahse, chhinchhiahna hmasa pahnih an pawm duh lohva i thusawi pawh an âwih duh loh chuan, Nile Lui tui thâlin leiah leih bua la; tichuan, thisenah a lo chang ang,” a ti a.

10 Mosia chuan Jehova hnênah: “Jehova, khawngaihin min hre thiam la, i chhiahhlawh hi mi ṭawng muang leh mi ṭawng bah tak ka ni a, min biak hma leh min biak hnuah pawh ṭawngkam thiam ka ni ngai lo,” a ti a. 11 Jehova chuan: “Mihring kâ hi tu siam nge ni a, ṭawng thei lo te, bengngawng te, mit vâr te, mit delte pawh hi tu siam nge ni? Kei Jehova hi ka ni lo vem ni? 12 Chuvângin, kal la, thu i sawi hunah ka awmpui che ang a, i sawi tûrte chu ka hrilh zêl ang che,” a ti a. 13 Mahse, ani chuan: “Jehova, min hre thiam la, khawngaihin mi dang i duh apiang tîr zâwk ta che,” a ti a. 14 Jehova chu Mosia chungah a thinrim ta hle a, a hnênah: “Levi mi i u Arona a awm a ni lâwm ni? Ṭawngkam thiam tak a ni tih ka hria. Tûnah hian nangmah hmu tûrin a lo kal mêk a. A hmuh hunah che chuan a hlim hle ang. 15 I hnêna ka sawite kha i hrilh chhâwng tûr a ni a, thu in sawi hunah ka awmpui che u ang a, in tih tûr chu ka hrilh zêl ang che u. 16 Ani chuan mite hnênah i tâna thu sawiin, i aiawha thusawitu a ni ang a, a tân Pathian ang i ni ang.* 17 He tiang hi i keng ang a, hei hian chhinchhiahnate i hmuhtîr ang,” a ti a.

18 Mosia chu a puzawn Jethroa hnênah lêt lehin: “Ka chhûngte an la dam leh dam loh hre tûra Aigupta rama kîr leh ka duh a, khawngaihin min remtihsak rawh,” a ti a. Jethroa chuan: “Thlamuang takin kal ta che,” a ti a. 19 A hnuah, Midian rama awm Mosia hnênah Jehova chuan: “Aigupta ramah kîr leh rawh. Nangmah thah tumtute kha an thi vek tawh e,” a ti a.

20 Mosia chuan a nupui fanaute chu sabengtung chunga chuantîrin, Aigupta ramah chuan a kîr leh a. Pathian dik tiang chu a keng bawk a. 21 Tichuan, Jehova’n a hnênah: “Aigupta rama i kîr leh hunah, thil mak tihtheihna ka pêk zawng zawng che kha Pharaoa hmaah i ti tûr a ni. Mahse, a thinlung a tihkhauh ka phalsak ang a, ka mite chu a chhuahtîr lo vang. 22 Pharaoa hnênah chuan, ‘Jehova’n: “Israel hi ka fapa, ka fa tîr a ni a. 23 Ka hrilh a che, ka rawng a bâwl theih nân ka fapa hi kaltîr rawh. I kaltîr duh loh chuan, i fapa, i fa tîr ngei kha ka tihlum ang,” a ti,’ tiin i sawi tûr a ni,” a ti a.

24 Riahhmun pakhat an thlen chuan, a hnênah Jehova inlârin tihhlum a tum ta a. 25 Zipori chuan lung hriam tak a la a, a fapa serh hmâwr vun chu tansakin a kê* a dehtîr a, a hnênah: “Thisena nem ngheh ka pasal i ni,” a ti a. 26 Tichuan, ani chuan a tihlum ta lo va. Zipori’n, “Thisena nem ngheh ka pasal,” tia a sawi chhan chu, chu serh tanna vâng chu a ni.

27 Tichuan, Jehova chuan Arona hnênah: “Mosia hmu tûrin thlalêrah kal rawh,” a ti a. Ani chu a kal a, Pathian dik tlângah Mosia chu a va hmu a, chibai bûk nân a fâwp a. 28 Mosia chuan amah tîrtu Jehova thusawi zawng zawngte leh chhinchhiahna hmuhtîr tûra a tih zawng zawngte chu Arona a hrilh a. 29 Chumi hnu chuan Mosia leh Arona chu an kal a, Israelte zînga hruaitu zawng zawngte chu an ko khâwm a. 30 Arona chuan Mosia hnêna Jehova thusawi zawng zawngte chu an hnênah a hrilh chhâwng a, chhinchhiahnate chu a hmuhtîr bawk a. 31 Anni chuan an ring ta a. Jehova’n Israelte a ngaihven tih leh an hrehawm tawrhte a hmu reng tih an hriat chuan, kûnin Pathian chibai an bûk ta a.