Genesis

30 Rakili chuan a pasal Jakoba chu fa a hrinsak theih loh avângin a u Leaii chu a thîk ṭan ta a; chuvângin, Jakoba hnênah: “Fa min pe rawh, a nih loh chuan ka thi mai ang,” a ti a. 2 Jakoba chu Rakili chungah chuan a thinrim ta hle a, a hnênah: “Fa nei thei lova siamtu che Pathian ka ni em ni?” a ti a. 3 Rakili chuan: “Ka chhiahhlawh Bilhaii aṭanga fa ka neih theihna tûrin ani chu mutpui rawh,” a ti a. 4 Tichuan, a chhiahhlawh Bilhaii chu nupui atân a pe a, Jakoba chuan a lo mutpui a. 5 Bilhaii chu a rai ta a, fapa a hring a. 6 Rakili chuan: “Pathianin ka ṭawngṭaina ngaithlain fapa min pe a, dik takin ro min rêlsak ta!” tia sawiin a hmingah Dana* a phuah a. 7 Bilhaii chuan fapa a hring leh a. 8 Rakili chuan: “Theih tâwp chhuahin ka unaunu ka buan a, ka hneh ta ngei bawk e!” tia sawiin a hmingah Naphtalia* a phuah a.

9 Leaii’n fa a nei chhunzawm tawh rih lo tih a inhriat chuan, a chhiahhlawh Zilpaii chu Jakoba nupui atân a pe a. 10 Ani chuan Jakoba chu fapa a hrinsak a. 11 Leaii chuan: “Ka va han vânnei êm!” tiin a hmingah Gada* a phuah a. 12 A hnuah Zilpaii chuan Jakoba chu fapa a hrinsak leh a. 13 Leaii chuan: “Ka va han hlim tak êm! Hmeichhiate* chuan ka hlimzia an sawi ngei ang,” tia sawiin a hmingah Asera* a phuah a ni.

14 Tin, Reubena chuan buh seng hun laia a kal kualna lamah naupai theihna nia an ngaih thei rah* a hmu a. A lo va, a nu a hawnsak a. Rakili chuan Leaii hnênah: “Khawngaihin i fapa thei lo hawn kha min sem ve rawh,” a ti a. 15 Chu veleh, Leaii chuan: “Ka pasal min lâksak hi duh tâwk lovin, ka fapa thei min hawn leh zêl pawh min lâksak i tum a ni maw?” a ti a. Rakili chuan: “A nih chuan, i fapa thei hawn chu min sem ve la, zâninah ka pasal i mutpui ve thung dâwn nia,” tiin a chhâng a.

16 Tlaia lo aṭanga Jakoba lo haw chu Leaii’n lo hmuakin: “Ka fapa thei hawna ka thleng tawh che avângin zânin chu min mutpui a ngai ang,” a ti a. Chumi zân chuan a mutpui ta a. 17 Pathianin Leaii ṭawngṭaina chu a chhâng a, ani chu lo raiin Jakoba chu fapa pangana a hrinsak a. 18 Leaii chuan: “Ka pasal hnênah ka chhiahhlawh ka pêk avângin Pathianin hlawh min pe a nih hi!” tia sawiin a hmingah Isakara* a phuah a. 19 A hnuah, Jakoba chu Fapa parukna a hrinsak leh a. 20 Ani chuan: “Pathianin min tihausa ta! Ni e, min tihausa ta hle mai. Tûnah chuan fapa paruk ka hrinsak tâk avângin ka pasalin min ngaithei lehzual tawh ang,” tia sawiin a hmingah Zebuluna* a phuah a. 21 Chumi hnu chuan fanu a nei a, a hmingah Dinaii a phuah a.

22 Pathianin Rakili pawh chu a hre reng a, a ṭawngṭaina chhânsakin fa nei theiin a siam ta a. 23 Tichuan, a rai a, fapa hringin: “Pathianin ka hmingchhiatna min lâk bosak ta!” a ti a. 24 Chuvângin: “Jehova’n fapa dang min pêk belh a nih hi!” tia sawiin a hmingah Josefa* a phuah a.

25 Rakili’n Josefa a neih hnu chuan Jakoba’n Labana hnênah: “Ka chhûngte awmna ka ram lamah min hawtîr tawh rawh. 26 I hna ka thawh chhan ka nupui leh ka fate pawh hi hruai min phalsak bawk rawh. I tâna ka thawhrimzia chiang taka i hriat kha,” tiin a dîl nghâl a. 27 Labana chuan: “Nangmah avângin Jehova’n mal mi sâwm tih aienna aṭangin ka hria a; chuvângin, kal lo hrâm rawh,” a ti a. 28 Labana vêk chuan: “I hlawh phût zât min hrilh la, ka pe ang che,” a ti bawk a. 29 Jakoba chuan a hnênah: “I tâna ka thawhrimzia leh i ran rualte ka enkawl ṭhatzia pawh i hria e. 30 Ka lo kal hma kha chuan ran rual tlêm tê chauh i nei a, ka lo thlen hnuah erawh Jehova’n malsâwm chein i ran rualte hi nasa takin an lo pung ta a nih hi! Mahse, tûnah chuan ka chhûngkaw tâna thawh ve ka duh tawh a ni,” a ti a.

31 Labana’n: “Eng nge ka pêk ang che?” tia a zawh chuan, Jakoba chuan: “Eng mah dang min pêk a ngai lo vang! He thil pakhat chauh hi min tihsak la, i ran rualte hi ka vêng zêl ang. 32 Vawiinah hian i ran rualte chu va en chhuak vek ila. Berâm zînga a de ṭhet ṭhet leh rawng dangin a ṭial te, berâm pa tuai zînga a uk zawng zawng te, kêl nu zînga rawng dangin a ṭial te leh a de ṭhet ṭhette chu dah hrang la, chûngte chu tûn aṭang chuan ka hlawh a ni tawh ang. 33 Ka ran rualte en tûra i lo kal hunah dik taka thil ka tihzia chu nangmah ngeiin i hmu ang a, kêl nu zînga a de ṭhet ṭhet te, rawng dangin a ṭial te, berâm pa tuai zînga a ukte tih loh ka hnêna awm i hmuh chuan, chûngte chu ka rûk angin i ngai thei ang,” a ti a.

34 Labana chuan: “A ṭha alâwm, i sawi ang chuan ni rawh se!” a ti a. 35 Chumi nî chuan, Labana chuan kêl pa leh kêl nu zînga a râng te, rawng dangin a ṭial te, a de ṭhet ṭhet te, rawng vâr tel tawh phawt te, berâm pa tuai zînga a uk awm apiangte chu a dah hrang a, a fapate chu a enkawltîr ta a. 36 Chumi hnu chuan, Jakoba awmna aṭanga ni thum kal vêla hlaah a awm hrang ta a, Jakoba chuan Labana ran rual la bângte chu a vêng chhunzawm zêl a.

37 Ani chuan tiang atâna hman tâwk vêl storax thing te,* almond thing te, plane thingte* a sât a, a tak vâr lang thei tûrin a hâwng a khawk vek a. 38 Ran rualte tui in tûra an lo kal huna an hur theihna tûrin, tui luan kawrte leh ran tui pêkna kuangahte chuan a hâwng a khawh sa tiangte chu ran rual hmaah a dah a.

39 Ran rualte chu tiang hmaah chuan an hur ta ṭhîn a; tichuan, an note chu a râng te, a de ṭhet ṭhet te, rawng danga ṭialte a lo ni ta ṭhîn a ni. 40 Jakoba chuan berâm pa tuaite chu dah hrangin Labana ran rual hmuh theihah a rângte leh a ukte chu a dah a. Tin, a ran rualte chu Labana ran rualte nên an tlat pawlh loh nân a dah hrang bawk a. 41 Ran rual zînga a chak ṭhate an lo hur chuan tiang bula chî an thlah theih nân, ran tui pêkna kuangah chuan ran rualte hmuh tûrin tiang chu a dah ṭhîn a. 42 Ran chak lote an hur lai erawh chuan tiang chu a dah ngai lo. Chutiang chuan ran chak lo apiangte chu Labana ta an lo ni a, a chak ṭha apiangte chu Jakoba ta an lo ni ta a ni.

43 Jakoba chu a lo hausa ta hle a. Ran rual tam tak bâkah, chhiahhlawh mipa leh hmeichhia te, sanghâwngsei te, sabengtungte a nei bawk a ni.