Genesis

25 Abrahama chuan nupui dang a nei leh a, a hming chu Keturi a ni. 2 Ani chuan Zimrana te, Joksana te, Medana te, Midiana te, Isbaka te, Suaha te a hrinsak a.

3 Joksana chu Sheba leh Dedana te pa a ni a.

Dedana chu Assur-ho te, Letus-ho te, Leum-hote thlahtu a ni.

4 Midiana thlahte chu Epha te, Ephera te, Hanoka te, Abida te, Elda te an ni a.

Chûngte chu Keturi tu leh fate an ni.

5 A hnuah Abrahama chuan Isaaka chu a thil neih zawng zawng a pe a, 6 a hmeite laka a fapate hnênah pawh thil pêkte a pe bawk a. Anni chu a dam lai ngeiin a fapa Isaaka lak ata khawchhak lam ramah chuan a kaltîr ta hlawm a ni. 7 Abrahama chu kum 175 a dam a. 8 Tichuan, kum upa tak leh nun lungawithlâk tak neiin a thi a, a mite hnênah hruaiin a awm ta a ni.* 9 A fapa Isaaka leh Ismaela te chuan Mamre bula Hit mi Zohara fapa Ephrona lova Makpela pûkah an phûm a, 10 chu lo chu Abrahama’n Hetha fapate hnên aṭanga a lei kha a ni a. Chu hmunah chuan a nupui Sari bula phûm a ni ta a ni. 11 Abrahama thih hnuah Pathianin Isaaka chu mal a sâwm chhunzawm zêl a, ani chu Beer-lahai-roi bulah a awm a ni.

12 Hei hi Sari chhiahhlawh Aigupta mi Hagari’n Abrahama a hrinsak Ismaela chanchin a ni.

13 Hei hi Ismaela fapate hming, an thlahte’n hnam hminga an chhawmte chu a ni: Ismaela fa upa ber chu Nebaiotha a ni a, mi dangte chu Kedara te, Adbeela te, Mibsama te, 14 Misma te, Duma te, Massa te, 15 Hadada te, Tema te, Jetura te, Naphisa te, Kedema te an ni. 16 Chûng Ismaela fapa 12-te chu anmahni hnam ṭheuhva hruaitute an ni a. Anni chuan an chênna khuate leh puan in an kaihna hmunte chu an hming an chhawmtîr a ni. 17 Ismaela chu kum 137 a dam a. Tichuan a thi a, a mite hnênah hruaiin a awm ta a.* 18 A thlahte chuan Aigupta ram hnaih Sur khaw bula Havila aṭanga Assuria thlengin an luah a. Anni chu an unau zawng zawngte bul hnaiah an awm a ni.*

19 Hei hi Abrahama fapa Isaaka chanchin a ni.

Abrahama chu Isaaka pa a ni a. 20 Isaaka chuan kum 40 mi a nihin Rebeki nupuiah a nei a. Rebeki chu Paddan-aram rama Aramaean mi Bethuela fanu leh Labana nau a ni. 21 A nupui a chin avângin Isaaka chuan a nupuiin fa a neih theih nân Jehova hnênah a dîl ṭhîn a; Jehova’n a dîlna chu chhânsakin, a nupui Rebeki chu a rai ta a. 22 A fa paite chu an insual ṭhîn a. Chuvângin, “Hetianga hrehawm tawrh ai chuan thi ila ka tân a ṭha zâwk ang,” tia sawiin a dinhmun chu Jehova hnênah a thlen a. 23 Jehova chuan a hnênah: “I pum chhûngah hnam hnih an awm a, nangmah aṭangin mi chi hnih an lo chhuak ang. Hnam khat chu a dang aiin a chak zâwk ang a, a upa zâwkin a naupang zâwk rawng a bâwl ang,” a ti a.

24 Nau hrin hun a lo thlen chuan phîr a lo pai reng mai a. 25 A piang hmasa zâwk chu a taksa pum pui a sen vek a, hmul a ngah hle bawk a; chuvângin, Esauva* tiin a hming an phuah a. 26 A nau chu Esauva ke artui vuanin a lo piang a; chuvângin, a hmingah Jakoba* tiin a phuah a. Isaaka chu a nupuiin fa a hrin lai chuan kum 60-a upa a ni.

27 Naupangte an lo puitlin chhoh chuan, Esauva chu ram vâk mi, sa pêl thiam tak a lo ni a, Jakoba erawh chuan a hun tam ber puan inah a hmang ṭhîn a, ani chu sawisêl bo a ni. 28 Esauva’n a sa ei tûrte a pelhsak ṭhin avângin Isaaka’n ani chu a ngaina zâwk a, Rebeki erawh chuan Jakoba a ngaina zâwk thung. 29 Ṭum khat chu, Jakoba’n dailuah a chhum laiin Esauva ram vâk chu chau takin a lo haw a. 30 Esauva chuan Jakoba hnênah: “Ka chau lutuk,* khawngaihin i thil sen chhum kawi kha tlêm azâwng min rawn suah vat teh!” a ti a. Chuvângin, ani chu Edoma* tia koh a ni bawk a ni. 31 Jakoba chuan: “I fa tîr nihnain lei rawh!” a ti a. 32 Esauva chuan: “Ka thi lek lek a nih hi! Fa tîr nihna chuan ka tân eng ṭangkaina nge a neih?” tiin a chhâng a. 33 Mahse, Jakoba chuan: “Ka lakah chhia chham hmasa phawt rawh!” a ti leh a. Esauva chuan chhia chhamin a fa tîr nihna chu Jakoba hnênah a hralh ta a. 34 Jakoba chuan Esauva chu chhang leh dailuah chhum kawi a pe a, a eia a in zawh chuan a tho va, a kal chhuak leh ta a. Chutiang chuan, Esauva’n a fa tîr nihna chu a ngainêp a ni.