Genesis

41 Kum hnih a liam hnu chuan, Pharaoa’n mumang a nei a. A mumangah chuan Nile Lui kamah a lo ding a. 2 Lui aṭang chuan bâwng pui thau leh nalh tak tak pasarih an lo chhuak a, lui kama hnimte chu an pet a. 3 A hnuah, Nile Lui aṭang vêk chuan bâwng pui dang pasarih chêr chhe tak tak an lo chhuak leh a. Lui kama bâwng pui thau tak takte bulah chuan an ding a. 4 Bâwng pui chêr chhe tak takte chuan bâwng pui thau nalh tak tak pasarihte chu an ei zo ta mai a. Chu veleh, Pharaoa chu a ṭhangharh a.

5 Tichuan, mu lehin mumang dang a nei leh a. A mumangah chuan buh vui lian ṭha tak tak pasarih awmna buh kûng pakhat a hmu a. 6 A hnuah, khawchhak thlîin a chhêm ro buh vui sîn chhe tak tak pasarih a hmu leh a. 7 Chûng buh vui sîn chhe tak takte chuan buh vui lian ṭha tak tak pasarihte chu an lem zo ta mai a. Chu veleh, Pharaoa chu harhin a mumang mai a ni tih a hre ta a.

8 A tûk zîngah chuan a rilru a buai ta hle a. Tichuan, Aigupta rama mitdawivaih thiam leh mi fing zawng zawng chu a kohtîr a. An hnênah a mumangte chu a hrilh a; mahse, tu mahin Pharaoa mumang chu an hrilhfiah thei lo.

9 Chu veleh, Pharaoa hnêna no hlântu hotu chuan: “Vawiinah hian ka thil tihsual ka puang dâwn a ni. 10 Pharaoa chu a chhiahhlawh, kei leh chhang siamtu hotu chungah a thinrim hle a. Tichuan, vêngtu hotu ina tân inah min khung a. 11 Zan khat chu mumang kan nei a. Kan mumangte chuan awmze hran a nei ve ve bawk a. 12 Kan bulah chuan vêngtu hotu chhiahhlawh Hebrai tlangvâl pakhat a tâng ve a. A hnêna kan mumangte kan hrilh chuan min hrilhfiahsak ta ve ve a ni. 13 A hrilhfiah ang chiah chuan kan chungah a lo thleng a. Kei chuan ka hna ngai ka chelh leh a, chhang siamtu hotu erawh chu khai hlum a ni ta a ni,” a ti a.

14 Pharaoa chuan Josefa chu tân in* aṭangin rang takin a hruai chhuahtîr a. Josefa chu a inmêt fai a, a thawmhnawte a thlâk hnuah Pharaoa hnênah chuan a lût a. 15 Pharaoa chuan Josefa hnênah: “Mumang ka nei a, min hrilhfiah theitu an awm si lo. Mahse, mumang i hrilhfiah thei tih an sawi ka lo hria a,” a ti a. 16 Chu veleh, Josefa chuan Pharaoa chu chhângin: “Mumang hrilhfiah theitu chu kei ka ni lo, Pathianin Pharaoa ṭhatna tûrin thu a sawi zâwk ang,” a ti a.

17 Pharaoa chuan Josefa hnênah: “Ka mumangah chuan Nile Lui kamah ka lo ding a. 18 Lui aṭang chuan bâwng pui thau leh nalh tak tak pasarih an lo chhuak a, lui kama hnimte chu an pet a. 19 A hnuah bâwng pui dang pasarih, pawr tak tak leh chêr chhe tak tak an lo chhuak leh a. Aigupta ram pumah hian chutianga bâwng pui pawr chhia chu ka la hmu ngai lo. 20 Chûng bâwng pui chêr chhe tak takte chuan bâwng pui thau tak tak pasarihte chu an ei zo ta mai a. 21 Mahse, an ei zawh hnuah pawh an lan dân chu a la ngai reng avângin an ei zo tih pawh a hriat loh. Tichuan, ka ṭhangharh ta a.

22 “A hnuah, mumang ka nei leh a. Ka mumangah chuan buh vui lian ṭha tak tak pasarih awmna buh kûng pakhat ka hmu a. 23 A hnuah, khawchhak thlîin a chhêm ro buh vui sîn chhe tak tak pasarih ka hmu leh a. 24 Chûng buh vui sîn chhe tak takte chuan buh vui lian ṭha tak tak pasarihte chu an lem zo ta mai a. Tichuan, ka mumang chu mitdawivaih thiamte hnênah ka hrilh a; mahse, min hrilhfiah thei tu mah an awm lo,” a ti a.

25 Josefa chuan Pharaoa hnênah: “Pharaoa mumangte chuan awmze thuhmun a nei a ni. Pathian dik chuan Pharaoa hnênah a thil la tih tûrte a hrilh a nih hi. 26 Bâwng pui thau tak tak pasarihte leh buh vui ṭha tak tak pasarihte chuan kum sarih a entîr ve ve a. Chûng mumangte chuan awmze thuhmun a nei a ni. 27 A hnua lo chhuak bâwng pui chêr tak tak pasarihte leh khawchhak thlîin a chhêm ro buh vui chhe tak tak pasarihte pawh chuan kum sarih a entîr a. Chu chu ṭâm kum, kum sarih tihna a ni. 28 Pharaoa hnêna ka sawi ang chiah khân: Pathian dik chuan Pharaoa hnênah a thil la tih tûrte a hrilh a nih hi.

29 “Kum sarih lo awm tûr chhûng hian Aigupta ramah buh leh thlai thar a hlâwk êm êm ang a. 30 Chu chu ṭâm kum, kum sarihin a rawn zui ang a, Aigupta rama buh leh thlai thar a hlâwk êm êm kumte chu theihnghilh vek a ni ang a, ṭâm chuan ram hi a tichhe vek ang. 31 Ṭâm chu a nasat dâwn êm avângin, ram chhûnga buh leh thlai thar a hlâwk êm êm kumte chu hriat reng a ni tawh lo vang. 32 Pathian dik chuan a thlentîr ngei dâwn avângin, Pharaoa chu mumang vawi hnih a neihtîr a ni. Tin, Pathian dik chuan chu chu a rawn thlentîr thuai bawk ang.

33 “Chuvângin, tûnah hian Pharaoa’n mi fing leh remhria zawng sela, Aigupta ram chunga hotuah awmtîr rawh se. 34 Pharaoa chuan hma la sela, Aigupta rama buh leh thlai thar a hlâwk êm êm kum sarih chhûnga thil thar chhuah hmun ngaa ṭhena hmun khat la khâwmtu tûr hotute ruat sela, 35 anni chuan kum ṭhat kum lo awm tûr chhûnga ei tûr an lâk khâwmte chu Pharaoa thuneihnain khawpui tinah dah ṭhain vênghim rawh se. 36 Chûng ei tûr an chhêk khâwmte chu Aigupta rama ṭâm kum, kum sarih a thlen chhûngin mihring leh rante’n an ei thei ang a. Chutiang chuan ram hi ṭâm avângin a boral lo vang,” a ti a.

37 Chu rawtna chu Pharaoa leh a chhiahhlawh zawng zawngte chuan ṭha an ti hle a. 38 Pharaoa chuan a chhiahhlawhte hnênah: “Amah anga Pathian thlarauvin a awmpui hi mi dang kan hmu thei dâwn em ni?” a ti a. 39 Tichuan, Josefa hnênah: “Pathianin hêng zawng zawng hi a hriattîr che avângin, nang anga fing leh remhria hi an awm lo. 40 Ka chhûngte chunga hotuah i awm ang a, ka mite zawng zawngin i thu an âwih ang. Lal ka nih avâng chauhvin nang aiin ka ropui ang,” a ti a. 41 Pharaoa vêk chuan: “En teh, Aigupta ram zawng zawng chunga hotuah ka ruat tâk che hi,” a ti a. 42 Tichuan, Pharaoa chuan a hming nemna zungbun chu a kut aṭanga phawiin Josefa a buntîr a, puan zai sîn ṭha chîa siam thawmhnawte hâktîrin, rangkachak ṭhî a awrhtîr a. 43 Chu bâkah, lal tawlailîr pahnihnaah chuantîrin a hmaah mite chu, “A·vrékh!”* tiin a autîr a. Chutiang chuan Aigupta ram zawng zawng chunga hotuah a ruat a ni.

44 Pharaoa chuan Josefa hnênah: “Kei hi Pharaoa ka ni. Mahse, Aigupta ram zawng zawnga mi tu mahin i thu lo chuan eng mah an tithei lo vang,” tiin a sawi chhunzawm a. 45 Chumi hnu chuan, Pharaoa’n Josefa hmingah Zaphenath-panea a phuah a, On* khaw puithiam Potiphera fanu Asenathi chu nupuiah a neihtîr bawk a. Tichuan, Josefa chuan Aigupta ram chu a enkawl ṭan ta a. 46 Aigupta lal Pharaoa rawng a bâwl ṭan lai chuan Josefa chu kum 30-a upa a ni.

Tin, Josefa chu Pharaoa hma aṭang chuan kal chhuakin, Aigupta ram pum a fang chhuak a. 47 Kum ṭhat kum, kum sarih chhûng chuan ram chhûngah buh leh thlai thar a hlâwk hle a. 48 Chûng kum sarih chhûng chuan Aigupta ram puma ei tûrte chu la khâwm zêlin, khawpui zawng zawngah a chhêk khâwm a. Khawpui tinah chuan a chhehvêla buh leh thlai tharte chu a dah khâwm zêl a. 49 Josefa chuan tuifinriat kama ṭiau vaivut ang maia tamin a chhêk khâwm zêl a, a hnuah phei chuan a tam tâk êm avângin an teh sêng ta lo va.

50 Ṭâm a tlâk hmain, On* khaw puithiam Potiphera fanu Asenathi chuan Josefa chu fapa pahnih a hrinsak a. 51 Josefa chuan: “Pathianin ka buaina zawng zawng leh ka pa in lam ka ngaihna zawng zawng min theihnghilhtîr ta,” tia sawiin, a fapa upa zâwk hmingah chuan Manasea* a phuah a. 52 Chu bâkah, “Pathianin hrehawm ka tawrhna ramah hian fate min neihtîr ta,”* tia sawiin, a fapa naupang zâwk hmingah chuan Ephraima* a phuah a ni.

53 Tichuan, Aigupta rama kum ṭhat kum, kum sarih chu a lo tâwp ta a. 54 Josefa’n a lo sawi tawh ang chiahin, ṭâm kum, kum sarih chu a lo inṭan a. Lei chung zawng zawngah ṭâm tla mah se, Aigupta ram pumah chuan ei tûr a awm thung a. 55 A hnuah, Aigupta ram pum pawhin ṭâm a tuar ve tâk avângin, mite chuan Pharaoa hnênah ei tûr an dîl ta huai huai a. Pharaoa chuan Aigupta mi zawng zawngte chu: “Josefa hnênah kal ula, a hrilh apiang che u chu ti rawh u,” tiin a hrilh a. 56 Lei chung zawng zawngah ṭâm chu a tla chhunzawm zêl a. Aigupta ramah pawh ṭâm tla chu a nasat tâk êm avângin, Josefa chuan buh chhêk khâwmnate chu hawngin, buh chhêk khâwm sate chu Aigupta mite hnênah a hralh a. 57 Chu bâkah, lei pum puiah ṭâm tla chu a nasat êm avângin, hmun hrang hranga mite chu Josefa hnên aṭanga buh lei tûrin Aigupta ramah an kal a.