Genesis
4 Adama chuan a nupui Evi chu a pâwl a, a rai a. Evi’n Kaina a hrin chuan: “Jehova ṭanpuinain fapa ka hring ta,” tiin a sawi a. 2 A hnuah a nau Abela pawh a rawn piang a.
Abela chuan berâm a vulh a, Kaina erawh chuan lei a let thung a ni. 3 Hun eng emaw chen a liam hnuah, Kaina chuan Pathian Jehova hnêna hlan tûrin a thil thar chhuah ṭhenkhat a rawn la a. 4 Abela chuan a berâm zînga piang hmasa ber ṭhenkhat rawn lain a thaute nên a hlân a. Jehova chuan Abela leh a thilhlante chu a lâwm a, 5 Kaina leh a thilhlan erawh chu a lâwm lo. Tichuan, Kaina chu thinrim tak leh rilru na takin a awm a. 6 Jehova chuan Kaina hnênah: “Engvângin nge thinrim tak leh rilru na taka i awm? 7 Thil ṭha i tih chuan lawm i hlawh leh dâwn lâwm ni? I tih loh erawh chuan, sual chuan thunun tum chein kawngka bulah a châng reng che a, i thunun lêt tûr a ni zâwk dâwn lâwm ni?” a ti a.
8 A hnuah Kaina’n a nau Abela hnênah: “Lovah i feh ang hmiang,” a ti a. Lova an awm lai chuan Kaina’n a nau Abela chu a bei a, a that ta a. 9 Chûng thilte a thlen hnu chuan, Jehova’n Kaina hnênah: “Khawiah nge i nau Abela?” tiin a zâwt a. Ani chuan: “Ka hre lo. Ka nau vêngtu ka ni em ni?” a ti a. 10 Pathian chuan: “Eng thil nge i tih tâk? Ngaithla rawh, i nau thisen chuan lei aṭangin min au asin. 11 I nau thisen i chhuah dawng tûra a kâ lo ângtu he ram ata hi ânchhe dawnga hnawh chhuah i ni e. 12 Lei i leh pawhin rah a chhuahsak lo vang che a. Leiah hian vâkvai leh tlân chhe rêng rêngin hun i hmang tawh ang,” a ti a. 13 Kaina chuan Jehova hnênah: “Ka thil sual tih avânga hremna hi a nasa lutuk a, ka tuar zo lo vang. 14 Vawiinah he ram aṭang hian min hnawt chhuak a, ka hnaih thei ngai tawh lo vang che a; leiah hian vâkvai leh tlânchhe rêng rêngin ka awm tawh ang a, min hmu apiangin min that ngei ang,” a ti a. 15 Jehova chuan a hnênah: “A nih chuan, Kaina thattu apiang chu a lêt sariha hrem a ni ang,” a ti a.
Tichuan, a hmutu apiangin an tihhlum loh nân Jehova’n Kaina chu chhinchhiahna a siamsak a. 16 Kaina chu Jehova hma ata a kal bo va. Eden chhak lama awm Vahvaihna ramah* a awm ta a.
17 A hnuah Kaina chuan a nupui a pâwl a, a rai a, Enoka a hring a. Tichuan, Kaina chuan khawpui a din a, a fapa hming chawiin Enok a vuah a. 18 A hnuah Enoka chu Irada pa a rawn ni a. Irada chu Mehujaela pa a ni a, Mehujaela chu Methusaela pa a ni a, Methusaela chu Lameka pa a ni.
19 Lameka chuan nupui pahnih a nei a. A hmasa zâwk chu Adai a ni a, a hnuhnung zâwk chu Zillai a ni. 20 Adai chuan Jabala a hring a. Jabala chu puan ina chênga ran vulh ṭhînho thlahtu a ni. 21 A unaupa chu Jubala a ni a. Ani chu ṭingṭang leh phênglâwng tumtuho thlahtu a ni. 22 Zillai pawhin Tubal-kaina a hring a, Tubal-kaina chu dâr leh thîr hmanraw tinrêng chhertu a ni a. A farnu hming chu Naamai a ni. 23 Tin, Lameka chuan a nupui Adai leh Zillai te tân heti hian hla a phuah a:
“Lameka nupuite u, min ngaithla ula;
Ka thusawi hi bengkhawn ang che u:
Mi pakhatin min hliam avângin ka that a,
Chu tlangvâl chuan min beih avângin ka that ta a ni.
24 Kaina thattu mah a lêt sariha hrem tûr a nih chuan,
Lameka thattu chu a lêt 77-a hrem ni rawh se,” tiin.
25 Tin, Adama chuan a nupui chu a pâwl leh a, fapa a hring a. A nupui chuan: “Kaina’n a thah tâk Abela aiawhtu tûr thlah dang Pathianin min pe* leh ta,” tia sawiin a hmingah chuan Setha* a phuah a. 26 Setha chuan fapa a nei a, a hmingah chuan Enosa a sa a. Chûng hun lai chuan mite’n Jehova hming an lam ṭan a ni.