Jerusalem Chu Tihchhiat A Ni

LALBER Nebukadnezzaran Israel-mi lehkha thiam ber berte Babulon-a a kalpui chin kum 10 chuang a ni tawh a. Tin tunah enge lo thleng hi en teh! Jerusalem chu hal ral mek a ni. Tin Israel-mi tihhlum lohva awmte chu mi-tangte anga Babulon-a hruai an ni.

Mipuiin an kawng tha lote an thlak loh chuan an chunga thil lo thleng tura zawlneite sawi kha hei hi a ni tih hre reng la. Mahse Israel-mite chuan zawlneite thu an ngaithla lo va. Jehova biak aiin pathian dik lote an be zawk zel a. Chuvangin mipuiin hrem an phu a ni. Pathian zawlnei Ezekielan Israel-mite thil tih tha lote chanchin min hrilh vangin chu chu kan hria a ni.

Ezekiela chu tunge ni i hria em? He Jerusalem tihchhiatna nasa tak thlen hma kum 10 chuanga Lalber Nebukadnezzaran Babulon-a a hruai tlangvalte zinga pakhat a ni. Daniela leh a thiante pathum Shadraka, Meshaka leh Abednegoa te pawh chumi rual chuan Babulon-a hruai an ni.

Babulon-a Ezekiela la awm laiin, Jerusalem biak ina thil tha lote Jehovan a hmuhtir a. Chu chu Jehovan thiltihmakin a ti a. A taktakah chuan Ezekiela chu Babulon-ah a la awm a, mahse Jehovan biak ina awm thil tinreng a hmuhtir a. Tichuan Ezekiela hmuh chu a rapthlak a nia!

‘Heta biak ina mipuiin thil tenawm an tihte hi en teh. Rul leh ran dangte lema khat bangte hi en teh. Tin anmahni betu Israel-mite hi en teh!’ tiin Jehovan Ezekiela a hrilh a. Ezekielan chung thilte chu a hmu thei a, thil lo nih dante chu a ziak a.

‘Israel-mite hruaituten a rukin enge an tih i hmu em?’ Jehovan Ezekiela a zawt a. Aw, chu pawh chu a hmu thei. Mipa 70 an awm a, an vaiin pathian dik lo an bia a. ‘Jehovan min hmu lo. Ram hi a kalsan tawh,’ an ti a.

Tin Jehovan biak in hmar lam kawngkaa hmeichhe thenkhat a hmuhtir a. Chutah chuan pathian dik lo Tammuza biain a thu a. Tin sawng Jehova biak in luhnaa mipate saw en teh! 25 vel an awm a. Ezekielan anmahni a hmu a. Khawchhak lam hawiin an kun a, ni an bia a ni.!

‘Heng mite hian mi zahna an nei lo. Thil tha lo an ti mai ni lovin, ka biak in ngeiah lo kalin an ti,’ Jehovan a ti a. Chuvangin Jehova chuan: ‘Ka thinur tha chak an hria ang. Tin tihboral an nih hunah pawi ka tih sak lovang,’ tiin a tiam a.

Chung thilte chu Jehovan Ezekiela a hmuhtir hnu kum thum vel chauhvah Israel-mite chu Lalber Nebukadnezzara lakah an hel a. Chuvangin anmahni do turin a kal a. Kum khat leh a chanve hnuah Babulon-miten Jerusalem kulh an su tlang a, khawpui an hal ta vek a. Mipui tam ber chu tihhlum emaw Babulon-a mi-tang anga hruai emaw an ni.

Engvanginnge he boralna nasa tak hi Jehovan Israel-mite chungah a thlentir? E, Jehova thu an ngaithla lo va, a dante an zawm loh vang a ni. Hei hian kan tan Jehova sawi apiang tih zel a pawimawhzia a tilang.

A tirah chuan Israel ramah mi tlemte an awm phal a m.Lalber Nebukadnezzara chuan chungho enkawltuah chuan Juda-mi a hming Gedalia a dah a. Mahse Israel-mi thenkhatin Gedalia chu an that a. Chu thil tha lo chu a thlen tak avang chuan Babulon-mite an lo kal ang a, anmahni an tiboral vek ang tih mipui chuan an hlau ta a. Tichuan an hnenah Jeremia an kal luihtir a, Aigupta-ah an tlan bo ta a.

Chu vang chuan Israel ram chu mi tumah awm lovin a awm ta a. Kum 70 chhungin ramah chuan tumah an cheng lo. A ruak vek a. Mahse Jehovan kum 70 hnuah chu ramah chuan mipuite a hruai kir leh ang tih a tiam tawh a. Chumi chhung chuan Babulon rama Pathian mite chungah enge lo thleng i en ang u.