Bung 8
Engvângin Nge Pathianin Tuarna Awm A Phal?
1, 2. Mihringte tuarna hi miten eng angin nge an dawnsawn ṭhin?
VANDUAINA râpthlâk tak a lo thlena, in leh lote tichhiaa nunna tam takte a han lâk châng hian, mi tam tak chuan chutiang thil râpthlâk tak lo thlen nachhan chu an hre thiam thei lo va. Mi dangte chu dân bawhchhiatna leh tharum thawhna nasatzia te, a râwnzia te, leh khuahkhirh a nih lohna te hian a tihrehawm hle bawk a. ‘Engvângin nge Pathianin tuarna awm a phal?’ tiin nangmah ngei pawhin i ngaih tuah mai thei a ni.
2 He zawhna hi an lungawina tâwk chhânna an hmuh loh avângin mi tam tak chuan Pathian an rin loh phah hial a. Pathian hian mihringte hi a ngaihsak tak tak lo niin an ngai a ni. Mi dang, tuarnate hi nuna awm ve rêng nia ngaitute chu an lungni lo êm êm a, mihringte zînga sualna awm zawng zawng hi Pathian vângah an puh bawk a. Nang pawhin chutiang rilru chu i lo pu a nih chuan, hêng thil chungchânga Bible thusawite hi i ngaihven zâwng tak a ni ngei ang.
TUARNA HI PATHIAN AWMTIR A NI LO
3, 4. Sualna leh tuarnate hi Jehova laka mi a ni lo tih engvângin nge kan chian theih?
3 Kan chhehvêla tawrhna kan hmuhte hi Pathian Jehova awmtîr a nih lohzia Bible-in min hrilh chiang hle a ni. Entîr nân, Kristian tirhkoh Jakoba chuan: “Tuman thlêmna an tawh laiin, ‘Pathian thlêm ka ni,’ ti suh se; Pathian chu sual thlêm rual a ni lo, amah pawhin tumah a thlêm ngai lo,” tiin a lo ziak a. (Jakoba 1:13) Chuvângin, mihringte tibuaitu harsatna tam tak hi Pathian awmtîr a ni thei lo vang. Ani chuan vân nunna chang tlâka siam tûrin mite chungah fiahna a thlentîr ngai lo va, an nun hmasa zâwka an thil sual tih anga an ngaihte avângin mite a tuartîr ngai hek lo.—Rom 6:7.
4 Chu mai ni lovin, Pathian hmingin emaw, Krista hmingin emaw miten thil râpthlâk takte ti ṭhîn mah sela, atu zâwk zâwkin emaw chutiang thiltihte chu an pawmpui a ni tia han ngaihbel tûr engmah Bible-ah hian a awm lo. Pathian leh Krista chuan an rawngbâwla inchhâl si, mahse mi bum hmang te, mi thah leh suam hmang te, leh mihringte hrehawmna thlen thei thil dang tam tak titute nên inzawmna engmah an nei lo. Dik takin, “mi suaksual kawng chu LALPA tâna tenawm a ni.” Pathian “chu mi suaksual lakah chuan a hla” a ni.—Thufingte 15:9, 29.
5. Jehova mize ṭhenkhat chu engte nge ni a, a thilsiamte chungah eng rilru nge a put?
5 Bible chuan Jehova chu ‘khawngaihnaa khat leh zahngai thei’ tiin a sawi a. (Jakoba 5:11) “LALPA chuan rorêlna fel a ngaina si a” tiin a sawi bawk. (Sâm 37:28; Isaia 61:8) Ani chu phuba lâk hmang a ni lo va. Ani chuan a thilsiamte chu lainat takin a enkawl a, an vaia hnênah an hamṭhatna tûrin thil ṭha ber a pe zâwk ṭhîn. (Tirhkohte 14:16, 17) Jehova chuan he leia nun inṭan tirh aṭangin chutiang chuan a lo ti a ni.
BUL TANNA THA FAMKIM CHU
6. Hmasâng hnam thawnthu ṭhenkhatin mihringte chanchin inṭanna engtin nge a lo sawi thawi?
6 Kan zavai hian na tawrh leh mi na tuar hmuh te leh tuarnate hi kan hriat ṭhan vek a ni a. Chuvângin tawrhna rêng rêng awm loh hun chu ngaihruat thiam pawh a harsa hle mai thei, mahse mihringte chanchin inṭannaah chuan chutiang chu thil awmdân a ni tlat si. Hnam ṭhenkhatte thawnthu pawhin chutiang bul ṭanna hlimawm tak chungchâng chu a lo sawi thawi ve bawk a. Hmasâng Grik thawnthuah chuan, “Mihring Hun Bi Panga”-a a hmasa ber chu “Rangkachak Hun” tia vuah a ni a. Chumi hun chhûng chuan mihringten nun hlimawm tak an hmang a, thawhrimna te, natna te, leh kum upat avânga tlâkchhiatnate pawh a awm lo. Chinese-ho chuan an hnam thawnthua Lal Eng (Huang-Ti) rorêl chhûngin mipuite chu inrem takin an chêng a, ramsa kawlhte nên pawh inremin an awm a ni, an ti a. Persia mi te, Aigupta mi te, Tibet mi te, Peru mi te, leh Mexico mite zawng zawng hian mihringte chanchin inṭannaah chuan hlimna leh ṭhat famkimna hun a awm thu hi an hnam thawnthuah an nei vek a ni.
7. Engvângin nge Pathianin leilung leh mihringte hi a siam?
7 Hnam hrang hrang thawnthute hian mihringte chanchin ziak upa ber, Bible thu hi an rawn sawi nawn mai chauh a ni. Nupa tuak hmasa ber, Adama leh Evi-te chu Pathianin Eden huan tia koh paradis-ah a dah a, an hnênah: “Chi tam tak thlaha lo pungin, leilung hi luah khat ula,” tiin thu a pe bawk tih Bible-in min hrilh a ni. (Genesis 1:28) Kan nu leh pa hmasa berte chuan ṭha famkim nihna chu an hlimpui êm êm a, lei pumpui paradis lo ni a, chatuana remna leh hlimna neia mihring chhûngkaw ṭha famkimin an luah khah hun hmu thei tûrin hmabâk an nei a ni. Chu ngei chu Pathianin leilung leh mihring a siam chhan chu a ni.—Isaia 45:18.
ITSIKNA AVANGA CHONA
8. Adama leh Evi-te chu eng thupêk nge zâwm tûra beisei an nih, mahse eng thil nge thleng?
8 Pathian duhsakna dawng reng tûrin Adama leh Evi-te chuan “a chhia leh a ṭha hriatna thing” rah chu an ei loh a ngai a. (Genesis 2:16, 17) Jehova dân kha lo zâwm ta sela chuan, mihringte nun tikhawlo tûrin tuarnate hi a awm lo vang. Pathian thupêk kha zâwmin Jehova an hmangaihna leh a laka an rinawm nghehna chu an lantîr thei a ni. (1 Johana 5:3) Mahse, Bung 6-a kan zir tâk ang khân, chutiang chuan thil a kal ta lo va. Setana nawrna avângin Evi chuan chu thingkûnga thei rah chu a ei a. A hnuah Adama pawhin thei rah ei phal loh chu a ei ve ta a ni.
9. Jehova kaihhnawih eng thubuai nge Setana’n a siam chhuah?
9 Chu thil thleng chu a pawizia i hre thiam em? Chungnungber a nihna anga Jehova dinhmun chu Setana hian a sawisêl a ni. Diabola’n, “Thi teh suh e,” tia sawiin, “I thi ngei tûr a ni,” tia Pathian thusawi kha a hnial kalh a. Setana thusawi zawm zelte hian Jehova chu Adama leh Evi-te Pathian ang nih theih dân tûr hrilh duh lo leh, a chhia leh a ṭha thliar hrang tûrin Amah an mamawh lo angin a lantîr bawk a ni. Tichuan Lei leh Vâna Chungnungber Jehova nihna leh a dinhmun chu Setana chona hian rinhlelhawmah a siam ta a ni.—Genesis 2:17; 3:1-6.
10. Mihringte chungchângah Setana’n eng nge a sawi thawi?
10 Diabol-Setana chuan mihringte hian Pathian thuawih chu an hlâwkna tûr a nih chhûng chauhvin Jehova thu an awih ang tih a sawi thawi bawk a. Thu danga sawi chuan, mihringte rinawmna chungchângah rinhlelhna a siam a ni. Setana chuan mihring tumah mahni duh thuin Pathian lakah an rinawm nghet lo vang tiin a puh a. Jehova chhiahhlawh rinawm tak, B.C.E 1600 hma hun engemawti laia fiahna nasa tak tâwktu Joba chanchin Bible-in a sawiah hian, îtsîkna avânga he Setana puhna hi chiang taka târlan a ni. Joba lehkhabu bung hmasa pahnihte hi i chhiar chuan, mihringte hrehawm tawrh nachhan leh Pathianin tuarna awm a phal nachhan te i hre thiam thei ang.
11. Joba kha eng ang mi nge a nih, mahse Setana’n engtin nge a puh?
11 Joba, mi “famkim, mi ngîl,” chu Setana beihna hnuaiah a lo awm ta a. A hmasa berin, Setana chuan Joba chu rilru chhe tak pû-ah a puh a, “Joba chuan vâng awm lovin a ṭih em ni?” tiin zawhna a han siam a. Chumi zawhah, Diabola chuan Jehova’n a vênhimna leh malsâwmnain Joba rinawm nghehna chu a lei a ni tiin fing vervêk takin Pathian leh Joba-te chu a sawichhe leh a. Setana chuan, “Tûnah hian i kut thawh la, a neih zawng zawng hi han khawihsak teh, i hmaichhan ngeiah a sawichhe mai ang che,” tiin Jehova chu a cho ta a ni.—Joba 1:8-11.
12. (a) Pathianin Setana kha Joba fiahtîr a phal chauhvin eng zawhnate nge chhân theih ni ang? (b) Joba fiahna chuan eng rah nge a rawn chhuah tâk?
12 Joba chuan Pathian hnên aṭanga thil ṭha tam tak a dawn vâng chauhvin em ni Jehova rawng a bâwl? Joba rinawmna chuan fiah a ngam ang em? Kawng lehlamah chuan, Jehova pawhin fiah remti tûr khawpin a chhiahhlawh chu a ring tâwk em? Jehova’n Joba chungah Setana fiahna tawrhhlelhawm tak a thlen a phal chauhvin hêng zawhnate hi a chhân theih dâwn a ni. Pathian remtihnaa awm fiahna hnuaia Joba rinawmna chu Joba lehkhabu hian a sawi a. Hei hi Jehova felna leh mihringte rinawmna thiam chantîrna chiang tak a lo ni ta a ni.—Joba 42:1, 2, 12.
13. Eden-a thil thleng leh Joba chunga thil thlengah khân engtin nge kan tel ve?
13 Amaherawhchu, Eden huana thil thleng leh Joba chunga thil thlengte khân awmze thûk zâwk a nei a. Setana thubuai siam chuan mihring zawng zawng, tûn laia keinite pawh hi min huam tel vek a ni. Pathian hming chu sawichhiat a ni a, chungnungber a nihna chu cho a ni bawk. Pathian thilsiam, mihring felna chu rinhlelhawm a ni ta a. Hêng thubuaite hi chin fel a lo ṭûl ta a ni.
THUBUAITE CHIN FEL DAN TUR
14. Îtsîkna avânga chona a hmachhawn hunah an puha chuan eng nge a tih mai theih?
14 Tehkhin nân, fa engemaw zât neiin chhûngkaw hlim takah hmangaihna nei tak nu leh pa in lo ni ta a. I ṭhenawmte zînga mi pakhatin nu leh pa fel lo tak an ni tiin dâwt thu a lo theh darh a. I ṭhenawma mi chuan, i faten an hmangaih lo che a, dinhmun ṭha zâwk an hriat loh vâng chauhvin i hnênah an khawsa a, mi tuin emaw kawng kawhhmuh ta sela chuan an chhuahsan mai ang che, ti ta se, engtin nge i tih ang? ‘Âwm ang lo lutuk!’ i ti mai thei. Chu chu a dik a ni, mahse engtin nge i finfiah theih ang? Nu leh pa ṭhenkhat chuan thinur takin an tilêt mai thei a. Mahse, chutianga chhân lêtna chuan buaina a siam belhchhah bâkah, dâwt thu chu a thlâwp hlauh dâwn a ni. Chutiang buaina chin fel dân kawng lungawithlâk tak chu, nangmah puhtu che chu a puhna che finfiah nâna hun i pêk leh, i faten an hmangaih tak zet che a ni tih nemnghet tûra hun i pêk hi a ni.
15. Setana chona chu Jehova’n engtianga chin fel nge a thlan?
15 Jehova chu hmangaihna nei nu leh pa ang chu a ni. Adama leh Evi-te chu naupangte nên chuan tehkhin theih an ni a, Setana erawh chu ṭhenawm dawthei ang chu a ni. Pathian chuan fing takin Setana, Adama, leh Evi-te chu chawplehchilhin a tiboral mai lo va, hêng thil tisualtute hi hun engemaw chen an dam zêl a phalsak zâwk a ni. Hei hian kan nu leh pa hmasa berte chu chi thlaha mihring chhûngkua din ṭan tûrin hun a siamsak a, thubuaite chu chin fel a nih theih nân Diabola pawh a puhna dik leh dik loh finfiah tûrin hun remchâng a siamsak bawk a ni. Amaherawhchu, atîr aṭang rêngin Pathian chuan mihring ṭhenkhat chu a lakah an rinawm nghet ang a, Setana chu dawthei a nihzia an tifiah dâwn tih a hresa vek a ni. Jehova’n amah hmangaihtute chu mal a la sâwm zêl avâng leh a la ṭanpui zêl avângin kan va lâwm tehlul êm!—2 Chronicles 16:9; Thufingte 15:3.
ENG NGE FINFIAH NI TAWH?
16. Khawvêl hi Setana thu hnuaiah engtin nge a lo awm?
16 Mihringte chanchin zawng zawng deuhthawah hian Setana chuan mihringte awp tuma a ruahmanna duang chhuak tûrin zalênna a nei a. Thil dang dang bâkah, politic thuneihna hi a thunun a, Jehova biakna ni lo amah biakna lama fing taka kaihruaitu sakhuate chu a tilâr bawk a. Chutiang chuan Diabola chu “he khawvêl pathian” a lo ni ta a, “he khawvêl lal” tia koh a ni bawk. (2 Korinth 4:4; Johana 12:31) Dik takin, “khawvêl pumhlûm hi mi sual thu thuin a awm,” a ni. (1 Johana 5:19) Hei hian Setana’n Pathian Jehova hnên aṭanga mihring zawng zawng hruaibo thei anga a inchhâlna a dik tih a finfiah em? Hnai lo ve! Setana awm a la phalsak reng chungin, Jehova chuan ama thil tum tipuitling tûrin hma lam a pan zêl a ni. A nih leh, Pathianin sualna awm a phal chhan chungchângah hian Bible-in eng nge a târlan ve le?
17. Sualna leh tuarna awm nachhan chungchângah hian rilruah eng nge kan vawn reng tûr?
17 Sualna leh tawrhnate hi Jehova awmtîr a ni lo. Setana hi he khawvêl lal leh he khawvêl pathian a nih avângin, amah leh a lamṭangte hian tûna mihringte dinhmunah leh mihringten hrehawm an tawrhna zawng zawngah hian mawh an phur a ni. Chutiang harasatna chu Pathian awmtîr a ni tiin tuman dik takin an sawi thei lo.—Rom 9:14.
18. Jehova’n sualna leh tuarna awm a phal hian Pathian aṭanga inlâk hran duhna chungchângah eng nge a finfiah?
18 Jehova’n sualna leh tuarna awm a phalna hian Pathian aṭanga inlâk hranna chuan dinhmun ṭha zâwk a thlen lo tih a finfiah a ni. Mihringte chanchinah hian vânduaina râpthlâk tak tak indawt zutin a thleng tih chu phat rual a ni lo va. A chhan chu mihringten anmahnia kawng hran zawh an thlan avâng leh, Pathian thu leh a duhzâwngte ngaihsakna tak tak an lantîr loh avângin a ni. Hmân laia Jehova mite leh an hruaituten rinawm lo taka “mahni kawng” zawha a thu an hnâwl chuan, vânduaina râpthlâk tak an tawh phah a. A zâwlnei Jeremia hmangin, Pathianin an hnênah: “Mi fingte chu an zakin an zâm ang a, manin an awm ang; ngai teh u, LALPA thu chu an paih thla a, anmahniah eng finna nge awm le?” tiin a sawi a ni. (Jeremia 8:5, 6, 9) Jehova tehnate an zawm loh avângin, a tlângpuiin mihringte chu a khalhna awm lo lawng lian, tuipui so but buta invawrh vêl ang an lo ni ta a ni.
19. Setana’n mihring zawng zawng hi Pathian lakah a heltîr thei lo tih fiahna eng nge awm?
19 Pathianin sualna leh tuarna awm a phalna hian Setana chuan mihring zawng zawng hi Jehova lak aṭangin a hruaibo thei lo tih a finfiah bawk a ni. An chungah eng anga thlêmna nasa emaw, harsatna nasa emaw pawh thleng mah se, Pathian laka an rinawmna vawng rengtute an awm zêl a ni tih thil thleng chanchin chuan a târlang bawk. Kum zabi tam tak chhûngin Jehova thiltihtheihna chu a chhiahhlawhte tân lantîrin a awm a, a hming chu lei pumpuiah puan chhuah a ni bawk. (Exodus 9:16; 1 Samuela 12:22) Hebrai bung 11 hian mi rinawmte hming tam tak min hrilh a, Abela te, Enoka te, Nova te, Abrahama te, leh Mosia te an tel a ni. Hebrai 12:1, 2 chuan anniho chu ‘chhûmpui nasa tak ang thlîrtute [thuhretute]’ tiin a sawi a. Anni chu Jehova chunga tihchêt rual loh rinna nei entawn tûrte an ni. Tûn laiah pawh, Pathian laka tihchhiat rual loh rinawmna an neih avângin mi tam tak chuan an nun an chân phah bawk a. An rinna leh an hmangaihnain, chutiang mite chuan Setana hian mihring zawng zawng hi Pathian lakah a heltîr thei lo tih chiang takin an finfiah a ni.
20. Jehova’n sualna leh tuarna awm zêl a phal hian Pathian leh mihringte chungchângah eng nge a finfiah?
20 A tâwp berah chuan, Jehova’n sualna leh tuarna awm a phal zêlna hian an chatuan malsâwmna leh hlimna atân Siamtu, Jehova chauh hian mihringte chunga rorêl theihna leh dikna a nei tih a finfiah a ni. Kum zabi tam tak chhûng chu mihringte hian inawpna chi hrang hrang an lo hmang tawh a. Mahse chu chuan eng nge rah a chhuah? Tûn laia hnam hrang hrangten buaina nasa tak leh hun khirh tak an tawn mêkte hi, Bible-in, “mi, mi dang chungah pawi khawpin a intilal ṭhîn a,” tia a sawi hi a dikzia tichiangtu a ni. (Thuhriltu 8:9) Jehova chauhvin min chhan chhuak theiin, atîra a thil tum pawh a tifamkim thei a ni. Hei hi engtin nge a tih ang a, engtikah nge a tih ang?
21. Setana chungah eng nge thleng dâwn a, hei hi hlen chhuak tûrin tu nge hman ni dâwn?
21 Adama leh Evi-te Setana thlêm thlûka an awm hnu lawkah khân, Pathian chuan chhandamna kawnghmang chungchânga A thil tum chu a puang a. Setana chungchânga Jehova thu puan chu hei hi a ni: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” tih hi. (Genesis 3:15) Chu thu puan chhuah chuan Diabola chu thil sual chatuana a tih phalsak a nih loh tûrzia a nemnghet a ni. Messia Ram Lalber a nih angin, thutiam Chi Thlah, Isua Krista, chuan ‘Setana lû chu a la tithitling’ ang. Ni e, “rei lo têah,” hel hmang Setana chu Isua’n a la tikehsawm vek dâwn a ni!—Rom 16:20.
ENG NGE I TIH ANG?
22. (a) Eng zawhnate nge i hmachhawn tûr? (b) Setana’n Pathian laka mi rinawmte chungah a thinurna duh tâwkin hrithla mah se, eng nge an chian theih?
22 A kaihhnawih thubuaite i hre tawh si a, tu lamah nge i ṭan dâwn le? Jehova thlâwptu rinawm nghet tak i nihzia chu i thil tihin i finfiah ang em? Setana chuan hun tlêm tê chauh a nei tawh tih a inhriat avângin, Pathian laka rinawmna vawng duhtute chunga a thinurna duh tâwka hrithla tûrin theihtâwp a chhuah dâwn a ni. (Thu Puan 12:12) Mahse Pathian hnên ata ṭanpuina hmuh i inring thei a, a chhan chu “Lalpa chuan amah ngaihsaktute chu thlêmna ata chhan chhuah dân . . . a hria” a ni. (2 Petera 2:9) Ani chuan i tuar theih tâwk bâk chu thlêmna i tawh a phal lo vang a, thlêmna i tuar chhuah theihna tûrin tlân chhuahna kawng a siam sak zâwk dâwn che a ni.—1 Korinth 10:13.
23. Ring nghet takin eng nge kan thlîr theih ?
23 Lalber Isua Krista’n Setana leh amah zuitute zawng zawng laka phuba a lâk hun tûr chu ring nghet takin i thlîr ang u. (Thu Puan 20:1-3) Mihringten lungngaihna leh buaina an tawrhnaa mawhphurtu zawng zawng chu Isua’n a tiboral vek dâwn a ni. Chu hun lo thlen hma zawng chuan, tuarna na tak pakhat a awm a, chu chu thihnaa kan hmangaih takte kan chân ṭhîn hi a ni. An chungah eng nge thleng tih hre tûrin bung dawt leh hi i chhiar dâwn nia.
I HRIATNA FIAH RAWH
Mihringte tuarna hi Jehova awmtîr a ni lo tih engtin nge kan hriat?
Eden-a Setana thubuai siam chhuah, Joba huna chiang ta kha engte nge ni?
Pathianin tuarna awm a phalna hian eng thilte nge a finfiah?