Thutak Pathian Chu Entawn Rawh
“A fa duh takte angin Pathian awm dân latute ni rawh u.”—EPHESI 5:1.
1. Ṭhenkhatin thutak chungchângah eng rin dân nge an neih a, engvângin nge an ngaih dân chu a dik loh?
“THUTAK engnge ni?” (Johana 18:38) Kum 2,000 dâwn lai kaltaa Pontia Pilata zawh, chu indeusawhna zawhna chuan thutak chu thil ûm harsa tak a nihzia a hril a ni. Chu chu tûn laia mi tam tak chuan an pawm ngei ang. Thutak nihna ngei pawhin beih a tuar si a. Mi tinin mahni tân thutak an siam chawp, a nih loh leh thutak pumhlûm a awm thei lo, a nih loh leh thutak a inthlâk danglam reng tih an sawi chu i lo hre tawh mai thei a. Chutianga ngaih chu a dik lo. Zir bingna leh lehkha zirnate thiltum chu kan awmna khawvêl chanchin thil nihphung dik tak, thutak zir chu a ni. Thutak hi mi mal ngaih dân thil a ni lo. Entîr nân, mihringin thi thei lo thlarau a neih leh neih loh chungchângah te; Setana a awm leh awm loh chungchângah te; nunin thiltum a neih leh neih loh chungchângah te hian chhânna dik pakhat chauh a awm thei a. Pakhat a dik anga, pakhat a sual ang; a pahnihin a dik kawp thei lo a ni.
2. Eng kawngin nge Jehova chu thutak Pathian a nih a, eng zawhnate nge sawiho ni dâwn?
2 Thuziak hmasaah khân, Jehova chu thutak Pathian a nih thu kan lo zir tawh a. Thil engkim chungchângah thu dik a hria a ni. A khingpui bum hmang Diabol-Setana nêna inkalh tak maiin, Jehova chu a dik reng bawk a. Chu chang ni lovin, Jehova chuan thutak chu mi dangte hnênah phal takin a hailang ṭhîn bawk. Tirhkoh Paula chuan a Kristianpuite chu: “A fa duh takte angin Pathian awm dân latute ni rawh u,” tiin a fuih a ni. (Ephesi 5:1) Jehova Thuhretu kan nih angin, thusawi leh nunkawnga thutak vuan tûrin engtin nge amah chu kan entawn ang? Engvângin nge hei hi thil pawimawh tak a nih? Dikna kawng zawhtute chu Jehova’n a pawm tih finfiahna eng nge kan neih? I lo en ang u.
3, 4. Tirhkoh Paula leh Petera chuan ‘ni hnuhnûng’ chhûnga thilthleng tûr eng nge an sawi?
3 Sakhaw lama thu dik lo a hluar lai hunah kan awm a. Thlarauva thâwk khumna hnuaia tirhkoh Paula’n a lo sawi lâwk angin, tûn ‘ni hnuhnûnga’ mi tam takte chuan Pathian ngaihsak anna an nei a, nimahsela a thiltihtheihna chu an âwih lo a ni. Ṭhenkhat chuan thutak an dodâl a, an “rilru [a] chhe tawh” a ni. Chu bâkah, “mi sual leh tihdertute erawh chu mi bum leh buma awmin an sual zual deuh deuh” a ni. Chutiang mite chuan zir reng mah se, “thutak [an] hre phâk ngai lo.”—2 Timothea 3:1, 5, 7, 8, 13.
4 Tirhkoh Petera pawh ni hnuhnûng chungchâng ziak tûra thâwk khum a ni a. A hrilh lâwk ang ngeiin, mite chuan thutak an hnâwl mai ni lovin, Pathian Thu leh a chhûnga inziak thutak puangtute chu an nuihsawh a ni. Chutiang nuihsawhtute chuan Nova hun laia khawvêl pum pui tuilêt chu ‘anmahni châkna angin,’ an haider a; chu chuan nakina rorêlna ni awm dân tûr a hril a ni. An duhzâwng ang anga thil an ngaihtuahna chu Pathian ngaihsak lote tihboral hunah chhiat an tawrh phahna tûr a ni.—2 Petera 3:3-7.
Jehova Chhiahhlawhte Chuan Thutak An Hria
5. Zâwlnei Daniela sawi angin, ‘tâwpna hunah’ eng thil nge lo thleng ang a, he hrilh lâwkna hi engtin nge a thlen famkim tawh?
5 “Tâwpna hun” chungchâng a ziahnaah, zâwlnei Daniela chuan Pathian mite chunga thil lo thleng tûr danglam tak a sawi lâwk a ni—sakhaw lam thutaka harhna chu. Heti hian a ziak a ni: “Mi tam tak [chuan Pathian Lehkha Thu] an tlân vêl ang a, hriatnate a pung dâwn a ni,” tiin. (Daniela 12:4) Jehova mite chu Bumtu ropui tak tihbuai leh tihderin an awm lo va. Anni chuan Bible chu an tlân vêl a, hriatna dik an neih phah a ni. Kum zabi pakhatnaah, Isua chuan a zirtîrte chu a tibengvâr a. “Pathian Lehkha Thu hriat nân an thinlung a tifing” a ni. (Luka 24:45) Kan hunah pawh, Jehova chuan chutiang bawkin thil a ti a. A Thu, a thlarau, leh a inawpna pâwl hmangin, leilunga mi nuai tam takte chu thutak a hriattîr a ni.
6. Tûn laia Pathian mite hian Bible thutak eng nge an hriat?
6 Pathian mite kan nih avângin, kawng danga kan hriat ngai hauh loh tûr thil tam tak kan hre thiam a. Khawvêl lam mi fingte’n kum sângbi engemaw zât an buaipui tawh zawhnate chhânna chu kan hria a ni. Entîr nân, hrehawm tawrhna a awm chhan te, mi an thih chhan te, leh mihringin khawvêl pum remna leh inpumkhatna an siam theih loh chhan te kan hria a ni. Tin, nakina thil lo thleng tûr—Pathian Ram, lei paradis, leh ṭha famkima chatuana nun—beiseina kan nei bawk. Lalchungnungber, Jehova chu kan lo hre ta a. A mize duhawm takte rualin, a malsâwmna dawng tûra kan thil tih tûrte pawh kan hre ta bawk. Thutak hriatna chuan thu dik lote hre tûrin min ṭanpui a. Thutak nunpuina chuan thil engmah lo mai ûmna ata min vênghim a, kan nun aṭanga thil ṭha ber min hmuhtîrin, nakin hun atâna beiseina mak ropui tak min neihtîr bawk.
7. Bible thutak chu tute tân nge hmuh theih a, tute tân nge hmuh theih loh?
7 Bible thutak i hre thiam em? I hriat thiam chuan, malsâwmna nasa tak i dawng tihna a ni. Thuziak mi pakhatin lehkhabu a ziah hian, mi tute emaw hîp tûrin a ziak bîk ṭhîn a. Lehkhabu ṭhenkhat chu lehkha thiam tak takte tâna ziak a ni a, a dangte chu naupangte tân, a dangte chu zir bîk neite tân a ni. Bible hi mi zawng zawng tâna awlsam têa neih theih a nih rualin, mi tuemawte hriatthiam leh hlimpui tûr a ni bîk a. Jehova chuan Bible chu leilunga mi inngaitlâwm leh mi zaidamte tâna a siam bîk a ni. Chutiang mite chuan, an lehkha thiamna te, hnam dân te, an nihna te, a nih loh leh an hnam te chu eng pawh ni se, Bible awmzia an man thei a ni. (1 Timothea 2:3, 4) Kawng lehlamah chuan, Bible thutak hriatthiamna chu eng anga fing leh zir sâng pawh ni se, duhna rilru nei tak tak lote hnêna pêk a ni lo. Mi chapo te, induh te chuan Pathian Thua thutak awm chu an hre thiam thei lo. (Matthaia 13:11-15; Luka 10:21; Tirhkohte 13:48, NW) Pathian chauhvin chutiang lehkhabu chu a siam chhuak thei a ni.
Jehova Chhiahhlawhte Chu An Dik
8. Engvângin nge Isua ngei chu thutak a nih?
8 Jehova ang bawkin, a Thuhretu rinawmte chu an dik a. Jehova Thuhretu langsâr ber, Isua Krista chuan a zirtîrna leh a nun dân leh a thih dân hmangin thutak chu a nemnghet a ni. Jehova thu leh thutiamte chungchânga thutak chu a vuan nghet tlat bawk. Chutichuan, a sawi angin, amah Isua ngei chu thutak a ni.—Johana 14:6; Thu Puan 3:14; 19:10.
9. Thudik tak sawi chungchângah Pathian Lehkha Thu chuan eng nge a sawi?
9 Isua chu “khawngaih leh thutakin a khat” a; tin, “a kâah tihderna rêng rêng [a] awm ngai lo.” (Johana 1:14; Isaia 53:9) Kristian dikte chuan mi dangte laka dikna kawngah Isua min tihhmuh chu an zui a. Paula chuan a rinpuite chu: “Mahni ṭhenawm hnênah thu dik tak sawi ṭheuh rawh u; inpêng tawn ṭheuh kan ni si a,” tiin a zilh a ni. (Ephesi 4:25) Chu mi hma pawhin, zâwlnei Zakaria pawhin: “Mi tinin mahni ṭhenawm hnênah thudik tak sawi ṭheuh ula,” tiin a lo ziak bawk. (Zakaria 8:16) Pathian tihlâwm an duh avângin, Kristiante chu an dik a ni. Jehova chu a dik a, dâwtthu aṭanga lo awm thei thil ṭha lote chu a hria a ni. Chuvângin, a chhiahhlawhte chu thudik tak sawi tûrin a beisei tlat a ni.
10. Engvângin nge mite hian dâwt an sawi a, a rah chhuah thil ṭha lo chu eng nge ni?
10 Mi tam tak tân chuan, dâwt sawi chu thil engemaw neih theih nâna hmanraw ṭangkai tak niin a lang mai thei. Mite chuan hremna pumpelh nân, kawng engemawa hlâwkpui nân, a nih loh leh mi dangte fak hlawh nân dâwt an sawi ṭhîn a. Mahse, dâwt sawi hrât hi nungchang ṭhat lohna pakhat a ni. Chu bâkah, dâwt sawite chuan Pathian duhsakna an dawng thei lo. (Thu Puan 21:8, 27; 22:15) Mi dik nia hriat kan hlawh chuan, mi dangte chuan kan thusawi an âwih ang a; min ring tlat ang. Nimahsela, kan dâwt sawi engemaw hriat chhuah a nih chuan, mi dangte chuan a hnua kan sawi apiang chu an ringhlel tawh mai ang. Africa thufing pakhat chuan: “Dâwt vawikhat sawi chuan thutak vawi sângkhat sawi a tichhia,” a ti. Thufing dang pawhin: “Dâwt sawi hrât chuan thutak a sawi hunah pawh mi rin a hlawh lo vang,” a ti bawk.
11. Eng kawngin nge dikna chu thu dik sawi mai a nih loh?
11 Dikna chu thu dik sawi mai a ni lo. Chu chu nunkawng pakhat a ni. Chu chuan kan nihna a sawifiah a. Thutak chu kan thusawi mai ni lovin, kan thiltih hmangin kan hriattîr a ni. Paula chuan: “Nang, mi dangte zirtîrtu, nangmah i inzirtîr lo maw? Nang, mi rûk ru lo tûra hrilhtu, nangin i ru ṭhîn maw? Nang, uirê lo tûra hrilhtu, nangin i uirê ṭhîn maw?” tiin a zâwt a. (Rom 2:21, 22) Mi dangte hnêna thutak pe chhâwng tûr chuan, kawng engkimah kan dik tûr a ni. Dikna leh rinawmna kawnga hming kan neihna chuan, mite’n kan thu zirtîr an chhânlêt dân chungah nghawng thui tak a nei ang.
12, 13. Naupang pakhatin dikna chungchângah eng nge a ziah a, nungchang tehna sâng tak a vawn chhan chu eng nge ni?
12 Jehova chhiahhlawhte zînga naupangte pawhin dikna pawimawhzia chu an hre thiam a. School-a thu inziah siaknaah, kum 13 mi Jenny chuan: “Rinawmna hi ka thil ngaihsân êm êmte zînga mi a ni a. Mahse, vânduaithlâk takin, tûn laia mi tam takte hi an rinawm tak tak lo. Ka damchhûngin ka rinawm reng ang tiin ka intiam nawn ṭhîn. Keimah leh ka ṭhiante chungah hlâwkna thleng nghâl lo pawh ni se, ka rinawm tlat bawk ang. Thu dik sawite leh mi rinawmte chauh ṭhiana neih ka tum hrâm hrâm a ni,” tiin a ziak a ni.
13 A thuziah chungchâng a sawinaah, Jenny zirtîrtu chuan: “I la naupang hle nachungin chutiang nungchang ṭha tehnate chu i nei tlat a. I tum ang ngeiin i awm dâwn tih ka hria a ni; nungchang nghet tak i neih tlat avângin,” a ti a ni. He school naupangin nungchang nghet a neih chhan chu eng nge ni? A thuziakna bul lamah chuan, Jenny chuan a sakhuain a “nun atâna tehna a siamsak” thu a sawi a ni. Tûnah chuan kum sarih lai a liam tawh a. A zirtîrtuin a lo rin lâwk ang ngeiin, Jenny chuan Jehova Thuhretute zînga pakhat angin nungchang tehna sâng takte chu a la zâwm reng a ni.
Jehova Chhiahhlawhte Chuan Thutak An Hailang
14. Engvângin nge Pathian chhiahhlawhte chuan thu dik vawng reng tûrin mawhphurhna an neih bîk?
14 Jehova Thuhretu ni lo mi dangte pawhin thu dik tak sawi leh rinawm chu an tum ngei ang. Nimahsela, Pathian chhiahhlawh kan nih angin, thu dik vawng nghet tûrin mawhphurhna nasa tak kan nei bîk a ni. Bible thutak, chatuan nunnaa hruai thei thutak chu kawltîr kan ni tawh a. Chuvângin, chu hriatna chu mi dangte hrilh tûrin mawhphurhna kan nei a ni. Isua chuan: “Tupawh tam tak an pêka hnênah chuan tam tak an phût ang,” a ti. (Luka 12:48) Chuvângin, Pathian hriatna hlu dawngtute hnênah chuan ‘tam tak phût’ a ni rêng a ni.
15. Bible thutak mi dangte hriattîrna kawngah eng hlimna nge i hmuh?
15 Bible thutak mite hriattîrna kawngah hian hlimna a awm a. Isua zirtîr, kum zabi pakhatnaa mite angin, chanchin ṭha—beiseina thuchah duhawm tak—chu ‘vêngtu nei lo berâmte anga hrehawm leh darha awmte’ leh “ramhuaite zirtîrna” hmanga tihbuai leh mit tihdersakte hnênah kan hril a ni. (Matthaia 9:36; 1 Timothea 4:1, 2) Tirhkoh Johana chuan: “Ka fate thutakah an awm tih ka hriat a liama lâwmna nasa zâwk rêng ka nei lo ve,” tiin a ziak a. Johana fate—thutaka a hruai luhte ni mai theite—rinawmna chuan ani chu a tihlim êm êm a ni. Chutiang bawkin, mite’n Pathian Thu lâwm taka an pawm kan hmuh hian hlimna min pe a ni.
16, 17. (a) Engvângin nge mi zawng zawngin thutak an pawm loh? (b) Bible thutak i puan hian eng hlimna nge i neih theih?
16 Mi zawng zawngin thutak chu an pawm dâwn lo. Isua chuan Pathian chungchâng thutak chu, lâr lo hle mah se, a sawi tlat a ni. Amah dodâltu Judate hnênah chuan: “Thutak ka sawi pawhin nangnin engati nge mi rin loh? Pathian hnêna chhuak chuan Pathian thu a pawm ṭhîn; he mi avâng hian in pawm lo a ni, Pathian hnêna chhuak in nih loh avângin,” a ti a ni.—Johana 8:46, 47.
17 Isua ang bawkin, keini pawhin Jehova chungchâng thutak hlu êm êm mai chu hrilh lovin kan awm lo va. Isua thusawi pawh mi zawng zawngin an pawm loh avângin, kan sawi apiang an pawm chu kan beisei lo. Nimahsela, thil dik kan ti a ni tih inhriatna aṭanga lo awm hlimna chu kan nei a ni. Jehova chuan a hmangaih-ngilneihna avângin thutak chu mihringte hnêna hriattîr a duh a. Thutak neitu kan nih angin, Kristiante chu thim hnuaia awm khawvêlah hian êng kengtu kan lo ni a. Thutak êng chu kan ṭawngkam chhuak leh thiltiha lantîrin, mi dangte chu kan Pa, vâna mi chawimawi tûrin kan ṭanpui thei a ni. (Matthaia 5:14, 16) Setana thutak anpui siam chu kan hnâwl a, Pathian Thu engmah pawlh loh leh thianghlim tak kan pawmzia chu vântlâng hriatah kan puang a ni. Thutak kan hriat leh mite kan hriattîr chuan a dawngtute hnênah zalênna dik tak a pe thei a ni.—Johana 8:32.
Dikna Kawng Um Rawh
18. Engtin nge Isua chuan Nathanaela chu a duhsak a, engvâng nge?
18 Isua chuan thutak a hmangaih a, a sawi bawk a. Leia rawng a bâwl laiin, mi dikte chungah duhsakna a lantîr a ni. Nathanaela chungchângah Isua chuan: “En teh u, Israel mi tak, ngamthlêmna rêng nei lo saw,” a ti a. (Johana 1:47) Chutichuan, Nathanaela, Bartholomaia ni bawk chu tirhkoh 12 zînga mi ni tûra thlan a ni. (Matthaia 10:2-4) Chawimawina a va ni êm!
19-21. Huaisen taka thu dik a sawi avângin, tûn hmaa mitdelpa chu eng anga malsâwm nge a nih?
19 Bible-a Johana lehkhabuah hian bung khat tawp chu Isua malsâwmna dawng mi rinawm pakhat chanchinin a khat a. A hming erawh kan hre lo. Kan hriat chinah chuan, ani chu piantirh aṭanga mitdel, kutdawh a ni a. Isua’n a mit a tihvâr chuan, mite chuan mak an ti hle a. Chu mak taka tihdamna chanchin chuan Pharisaite beng a lo thleng a; Pharisaite chuan thutak an hua a, an zîngah Isua ring apiang chu inkhâwmna in aṭanga hnawt chhuak tûrin inremna an lo nei tawh a ni. An thiltum an hriat avângin, mitdelpa nu leh pa chuan an hlau ta a, Pharisaite hnênah chuan dâwt an sawi ta a ni; an fapain khua a hmuh theih dân leh tu tihdam nge ni tih an hriat loh thu chu an hrilh a ni.—Johana 9:1-23.
20 Tihdama chu Pharisaite hmaa hruai a ni leh a. A rahchhuah tûr chu ngaihthah ṭhakin, huaisen takin thu dik chu a sawi ta a ni. Tihdam a nih dân leh Isua chu a tidamtu a nih thu a sawi a. Hêng mi challang leh mi thiamte’n Isua chu Pathian hnêna mi a nih an rin loh chu mak a tih êm avângin, tihdam pa chuan thil lang chiang êm êm chu pawm tûrin a fuih a ni: “He mi hi Pathian hnêna chhuak a nih loh chuan engmah a ti thei lo vang,” tiin. Hnialna tûr an hriat loh avângin, Pharisaite chuan mi suala puhin an hnawt chhuak ta a ni.—Johana 9:24-34.
21 Isua’n chu thu a hriat chuan, chu pa chu a zawng chhuak a. A han hmuh chuan, tûn hmaa mitdelpa rinna chu a tihnghehsak a ni. Isua chuan Messia a nih thu tlang takin a hriattîr a. Thutak a sawi avângin chu pa chu malsâwm a va ni êm! Dik takin, thutak sawitute chuan Pathian duhsakna an dawng tak zet a ni.—Johana 9:35-37.
22. Engvângin nge dikna kawng chu kan ûm ang?
22 Thutak nunpui chu kan ngaih pawimawh êm êm tûr thil a ni a. Chu chu mite leh Pathian nêna inlaichînna ṭha neih nâna thil pawimawh ber a ni. Mi dik tak tih chu mi inhawng, mi tak, pan nuam, leh rin tlâk tak hi a ni a, chu chuan Pathian pawm mi min nihtîr a ni. (Sâm 15:1, 2) Mi dik lo tih chu mi rilru kawi, rinchhan tlâk loh, dâwt sawi hi a ni a, chu chuan Jehova duhsakna min chântîr a ni. (Thufingte 6:16-19) Chuvângin, dikna kawng ûm chu tum tlat rawh. Dik takin, thutak Pathian entawn tûr chuan, thutak kan hriain, thu dik kan sawiin, thutakah kan nung tûr a ni. (w03 8/1)
Engtin Nge I Chhân Ang?
• Thutak kan hriat avângin engvângin nge kan lâwm ang?
• Jehova dikna chu engtin nge kan entawn ang?
• Bible thutak mi dangte hrilhnaah eng hlâwkna nge awm?
• Engvângin nge dikna kawng ûm chu a pawimawh êm êm?
[Phêk 15-naa milemte]
Bible thutak kawltîr kan nih angin, Kristiante chuan ṭhahnemngai takin mi dangte an hrilh