Thlipui I Do Thei
HENG hun khirh takah hian, mi tam tak chuan thlipui ang harsatnate an tâwk a. Mahse Kristiante tân chuan, Pathian an hmangaihna leh a thu bulte chunga an rinawmna chuan chûng harsatnate hmachhawn thei tûrin a ṭanpui a ni. Engtin nge? A chhânna chu Isua sawi tehkhin thu-ah hian a hmuh theih a. Ani chuan a thuâwih a zirtîrte chu “mi fing lungpui chunga in satu nên” a tehkhin a ni. Tichuan: “Ruahte a lo sûr a, tuite a lo lian a, thlite a lo tleh a, chu mi in chu a rawn nam sawk sawk a; nimahsela a chim lo va; lungpui chunga rem tlat a nih avângin,” a ti.—Matthaia 7:24, 25.
He tehkhin thua mi hi fing hle mah se, ruah sûr te, tui lian te, leh thil tichhe thei thli te’n a entîr harsatna chu a tâwk tho tih chhinchhiah rawh. Chuvângin, Isua chuan a zirtîrte’n harsatna zawng zawng pumpelhin, remna leh muanna chhum lo chat lovin an chên ang tih a târ lang lo. (Sâm 34:19; Jakoba 4:13-15) Mahse, Pathian chhiahhlawhte chu chutiang harsatna leh hrehawmna nasa takte atân an inbuatsaih theiin, an hmachhawn thei bawk tih erawh a sawi ngei a ni.
Isua chuan chu tehkhin thu chu heti hian a sawi ṭan a ni: “Mi tin hêng ka thu hi hriaa zâwm apiang chu, mi fing lungpui chunga in satu nên tehkhin tûr a ni,” tiin. Isua’n in tak tak sak chungchâng a sawi lo va, Kristian thiltih leh chêttîrtu insiam chungchâng a sawi a ni tih a chiang hle. Isua thusawi ngaithlatute chuan an hriat theihna hmangin, chhût dân ṭha tak an hmang a. Anni chuan zirtîrna an dawnte nunpuiin, an thiltih leh chêttîrtu chu Krista zirtîrna lungpui chungah an sa a ni. Ngaihvenawm takin, he entîr nei lungpui hi a pâwn lânga hmuh mai theih a ni lo. Tehkhin thua mi chuan lung awmna thleng tûrin ‘thûk taka a laih’ a ngai a ni. (Luka 6:48) Chutiang bawkin, Isua zirtîrte chuan Pathian hnaihtîrtu mize ṭha daihrei takte nei tûrin rim takin an thawk a ni.—Matthaia 5:5-7; 6:33.
Thlipui ang harsatnain Krista zuitute Kristian lungphûm nghehna a rawn fiah hian eng nge lo thleng? Krista zirtîrnate duh taka an zawmna leh an Kristian miziate chu harsatna an tawh chhûnga chakna pe chhuaktu a lo ni a, a pawimawh zâwk Armageddon thlipui lo tleh thuai tûr lakah chakna hnâr a ni ang. (Matthaia 5:10-12; Thu Puan 16:15, 16) Dik takin, mi tam tak chuan Krista zirtîrna zâwmin thlipui ang fiahnate chu an do hneh a. Nang pawhin chutiang chuan i do hneh ve thei a ni.—1 Petera 2:21-23. (w07 1/1)