Nikodema nêna an inbiaknaa Isua’n pian thar a pawimawhzia a sawi uar dân hi lo chhinchhiah ang che. Ani chuan: “Mi tupawh an pian thar loh chuan Pathian ram an hmu thei lo vang,” a ti a. (Johana 3:3) “Loh chuan” tih leh “thei lo” tih thu malte hian pian thar a ṭûlzia chu a târ lang chiang hle a ni. Entîr nân, mi tuemawin, “Nî a chhuah loh chuan, chhûn êng a awm thei lo,” a tih chuan, chhûn êng awm tûrin nî chu loh theih lohva a chhuah ngei a ngai a tihna a ni a. Chutiang bawkin, Isua chuan Pathian Ram hmu tûrin mi chu a pian thar ngei ngei a ngai a tihna a ni.

Isua thusawi ngun taka kan chhiar chuan, pian thar leh thar loh chu mi mal duhthlanna niin a zirtîr lo tih a lang. Chu chu engtin nge kan sawi theih? ‘Piang thar’ tia lehlin Grik thu mal chu “chung lam aṭanga piang” ti pawhin a lehlin theih a ni.a Chu lehlin dân dang aṭanga thlîr chuan, pian tharna chu “chung lam” aṭanga lo inṭan a ni a—chu chu vân aṭangin, a nih loh leh “Pa hnên ata” tihna a ni. (Johana 19:11; Jakoba 1:17) Ni e, chutiang pian tharna chu Pathian hrin, a nih loh leh Pathian awmtîr a ni.—1 Johana 3:9.