Jehova chu fel taka ruahmantu Pathian a ni a. (1 Korinth 14:33, 40) Chuvângin, a mite pawh fel takin an inrêlbâwl ang tih kan beisei thei a ni. Engtin nge Kristian kohhran chu a inrêlbâwl? Hlawhtling tûrin engtin nge kan ṭanpui ve theih?

1. Kohhran lû chu tu nge ni?

“Krista chu . . . kohhranho lû a ni.” (Ephesi 5:23) Ani chuan vân aṭangin khawvêl puma Jehova mite thiltih a kaihruai a. Isua chuan upa puitling tlêm tê, Governing Body tia hriat, “bâwih rinawm, fing tak,” chu a ruat a. (Matthaia 24:45-47 chhiar rawh.) Kum zabi khatnaa Jerusalema tirhkohte leh upate ang bawkin, Governing Body chuan khawvêl puma kohhrante hnênah kaihhruaina a pe a ni. (Tirhkohte 15:2) Mahse, hêng mipate hi kan inawpna pâwl hruaitute an ni lo. Jehova kaihhruainate an hriat theih nân Bible an chhiar a, Isua kaihhruaina chu inhuam takin an zâwm bawk a ni.

2. Upate mawhphurhna chu eng nge ni?

Upate chu Kristian mi puitling an ni a, anni chuan Jehova mite chu Bible aṭanga zirtîrnate an pêk bâkah, ṭanpuina leh fuihnate pein, Pathian berâmte chu an vêng a ni. An hnathawhte atâna hlawh pêk an ni lo va. Chu aiin, ‘Pathian thu anga châk chungin, hlêpna bawlhhlawh duh vâng ni lovin, rilrua duh tak zâwkin’ rawng an bâwl a ni. (1 Petera 5:1, 2) Upate chu nakina upa nih tling thei tûr kohhranho rawngbâwltute chuan an ṭanpui a ni.

Governing Body chuan upa ṭhenkhat chu bial kantute ni tûrin a ruat a. Anni chuan kohhran hrang hrangte chu kaihhruaina leh fuihnate pe tûrin an tlawh a ni. Pathian Lehkha Thu-a thil phût tlintute chu kohhran upa leh kohhranho rawngbâwltu ni tûrin an ruat bawk.—1 Timothea 3:1-10, 12; Tita 1:5-9.

3. Thuhretu mi mal tinte mawhphurhna chu eng nge ni?

Kohhrana mi tinte chuan kohhran inkhâwmtea chhânnate pein leh an dinhmun azir zêla rawngbâwlnaa an telna hmangin ‘Jehova hming chu an fak’ a ni.—Sâm 148:12, 13 chhiar rawh.

ZIR BELHIN HMUH BELH RAWH

4. Isua chu hruaitu ngilnei tak a ni

Isua chuan sâwmna duhawm tak min pe a ni. Matthaia 11:28-30 chhiarin, he zawhna hi sawiho vang che u:

• Isua chu eng ang hruaitu nge ni a, a kaihhruaina hnuaiah eng anga awm tûrin nge min duh?

VIDEO: Nepal Ram Lîrnghînga Upate Hmalâkna (4:56)

Bible chuan upate’n an hna an thawh dân tûr chiang takin a zirtîr.

Isaia 32:2 leh 1 Petera 5:1-3 chhiarin, hêng zawhnate hi sawiho vang che u:

• Upate’n Isua angin mi dangte an thlamuan tih i hriat hian engtin nge i awm?

• Upate’n Isua an entawn dân kawng dang ṭhenkhat chu eng nge ni?

5. Upate’n entawn tûr siamin an zirtîr

VIDEO: Upate’n Hma An Hruai! (7:39)

Isua chuan kohhran hruaitute tân tehna a siam a. Matthaia 23:8-12 chhiarin, he zawhna hi sawiho vang che u:

• Upate tâna Bible tehnate leh sakhaw hruaitute nun dân inan lohna chungchângah engin nge i rilru khawih?

1. Upate chuan anmahni leh an chhûngte thlarau lamah an tichak reng

2. Upate chuan kohhrana mi zawng zawngte an ngaihsak

3. Upate chuan thu an hril ziah

4. Upate chu zirtîrtu an ni a. Hmun tihthianghlimnaah leh thil dangahte pawh an ṭanpui bawk

6. Upate kan thawhpui thei

Bible-in upate kan thawhpui a ngaih chhan pawimawh tak min hrilh a. Hebrai 13:17 chhiarin, hêng zawhnate hi sawiho vang che u:

• Bible-in hotute thu awih tûr leh an thu thua awm tûr, a nih loh leh an laka intulût tûra min fuih chu a inawm em? Engvângin nge?

Luka 16:10 chhiarin, he zawhna hi sawiho vang che u:

• Thil ho tê anga langah pawh upate thlâwp chu engvângin nge thil pawimawh tak a nih?

KHAIKHAWMNA

Isua chu kohhran lû a ni. A kut hnuaia awm upate chuan min thlamuan a, entawn tûr siama min zirtîr avângin lâwm takin kan thawhpui a ni.

Ennawnna

• Kohhran lû chu tu nge ni?

• Engtin nge upate’n kohhran an ṭanpui?

• Jehova Thuhretu mi mal tinte mawhphurhna chu eng nge ni?

HRIAT BELH NAN

Governing Body leh kohhran upa dangte’n tûn laia Kristiante an ngaihsak nasatzia fihfiahna en ang che.

Khuahkhirhna Hnuaia Awm Unaute Tihchakna (4:22)

Bial kantute hnathawh chungchâng en rawh.

Thingtlânga Bial Kantu Nun (4:51)

Kohhrana hmeichhiate mawhphurhna chungchâng chhiar rawh.

“Jehova Thuhretute’n Hmeichhe Rawngbâwltute An Nei Em?” (Vênnainsâng thuziak)

Upate’n an Kristian unaute fuih tûra an thawhrim dân chhiar rawh.

“Kristian Upate—‘Kan Lâwmna Tûra Min Thawhpuitute’” (Vênnainsâng, January 1, 2013)

1. Bible-in pasalte hnênah eng thurâwn nge a pêk?

Jehova chuan pasal chu chhûngkaw lû atân a ruat a. (Ephesi 5:23 chhiar rawh.) Ani chu chhûngkuain a hlâwkpui tûr thu tlûknate siam tûrin a beisei a ni. Bible chuan pasalte chu: “In nupuite hmangaih rawh u,” tiin thurâwn a pe. (Ephesi 5:25) Eng nge a awmzia? Hmangaihna nei tak pasal chuan a nupui chu inah leh vântlâng hmaah ngilnei takin a cheibâwl a. Thil ṭha lo lakah vênghimin, a tisa lam leh rilru lam mamawhte chu theih tâwp chhuahin a ngaihsak a ni. (1 Timothea 5:8) A pawimawh ber chu, a thlarau lam mamawh ngaihsaknaah hma a hruai hi a ni. (Matthaia 4:4) Entîr nân, a nupui chu a ṭawngṭaipuiin, Bible a chhiarpui thei a. Pasalin hmangaihna nei taka a nupui a ngaihsak hian Jehova nêna an inṭhianna a vawng ṭha a ni.—1 Petera 3:7 chhiar rawh.

Isua chu Kristian kohhran Lû a ni a. (Ephesi 5:23) Tûn laiah, Isua chuan vân aṭangin “bawih rinawm, fing tak” hmangin leia a hnungzuitute chu a kaihruai a ni. (Matthaia 24:45 chhiar rawh.) Isua ngeiin a ruat chu “bawih” chuan thu neihna engemaw chen a nei ang a; mahse, Krista bawih ni rengin Krista unaute rawng an bâwl a ni. Chu bawih chu tu nge ni? Engtin nge min ngaihsak?