Lyamucitatu, August 12
Co kwitila muli ikeye, banatupatula na ndando ya kupatula kwitila mu maninga endi, eyo, banatukonekela byuma bitwabulumuna mwafwa ya bufuko bwa ngozi yendi yakama.—Efeso 1:7.
Yesu wapwile wa kulumbunuka ngwe mwafwile Adama simbu kanda alinge bubi. (1 Kori 15:45) Yesu mwakututsililile, welwisile byuma byazimbalesele Adama. (Loma 5:19) Ngeci, Yesu wakupwile “Adama wa mamaneselelo.” Kukutondeka munu weka lalo wa kulumbunuka afwete byuma byazimbalesele Adama. Yesu watsile “lumolika kunahu.” (Hebe 7:27; 10:12) Kuliseza muka kuli ha kukonekela bubi na ndando ya kupatula? Kukonekela bubi yapwa ngila yakapangesa Njambi mu kwilwisa banu kuli ikeye. Co ndando ya kupatula yapwa mulambu uje ulingisa Yehova akonekele bubi bwa banu. Ou mulambu wimanena maninga a Yesu aje atikile mwafwa yetu.Hebe 9:14. w25.02 5 ¶12-13
Lyamuciwana, August 13
Njambi wapwa wa kulongwa, kasa kumyecelela muliwane na ceseko cije kumwasa kukolesela. Nga muliwana na ceseko, Njambi amishokolwela ngila mangana mwase kukolesa omwo mu ceseko.—1 Kori 10:13.
Kumona Yehova ngwetu wapwa wa kuyoya kutukwasa tumone byeseko bituliwana nabyo mu ngila inapande. Mu ngila muka? Mwafwa kulinga ngoco kutukwasa tushangumuke kumona byeseko byetu mubinakundamena ñanda yakama ili mukati ka Yehova na Satana. Liyabolo ali na kwendeka ngwendi nga tuliwana na bukalu tulikela kupangela Yehova. (Yombi 1:10, 11; Prov 27:11) Oloni nga tupwa ba kulongwa kuli Yehova nameme tuli na kuliwana na byeseko tumwesa ngwetu twazema Yehova, co Liyabolo wapwa muka makuli. Kuma baka-fulumende bali na kumilwisa ndi? Kuma kumwesi na bimbongo ndi? Indi hamo banu bamukambulwila kubesi na kutambula muzimbu waubwa? Nambe hamo muli na kuliwana na byeseko byeka? Nga mukemwo, co anukeni ngweni nga mukolesa mu byeseko bimuli na kuliwana nabyo muzibisa Yehova kubwaha ku mbunge. Anukeni lalo ngweni, Yehova kasa kumyecelela muliwane na ceseko cije kumwasa kukolesela. Amyana nzili mangana mukolese. w24.06 22 ¶9
Lyamucitanu, August 14
Munu na munu mashungu endi babenya akewo akamweseka na kumukoka na kumukokweya.—Jems 1:14.
Kuma muzibuka buzeye bweni ndi? Tukobela mu bukalu nga kutunanguka buzeye bwetu na kusinganyeka ngwetu kutwasa kukobela mu ceseko. (1 Iwa 1:8) Mukemwo kapositolo Paulu wendekele ngwendi nameme baje ‘banakolo ku sipilitu’ basa kukobela mu ceseko nga kubatwalelelaho kupwa ba kutona. (Gala 6:1) Tunapande kupwa ba kulongwa kuli yetu babenya na kunanguka buzeye bwetu. (2 Kori 13:5) Tunapande kulinga bika nga twananguka byuma bije bikatukobelesa mu byeseko? Tunapande kupanga na nzili mangana tukolesele obyo byeseko. Cakumwenako, mu simbu ya ibasonekele Mbimbiliya ku cikolo ca nganda kukekwo kwapwile kwakwasi kukobelelako. Mukemwo ku cikolo kwakele baka-kunyunga babangi mangana banyungilile nganda yabo. Mu ngila imolika, netu tunapande kwaka manene mbunge ku buzeye bwetu, mangana twase kuhyana byeseko.—1 Kori 9:27. w24.07 15 ¶5-7