Deuteronomi

Mose ena hahetoni

31 Mose ese ini hereva iboudiai na Israel taudia e hamaorolaidia. 2 Bena ia ese ma e hereva henidia, eto, Hari dina ai lauegu mauri laḡanidia na sinahu-ta ruahui. Asi goadagu baina raka Iasi bona baina raka vareai; bona Iehova ese vada e hamaorogu, eto “Oi na ina Ioridane sinavaina basio hanaia”. 3 Iehova, emui Dirava, na umui vairamui ai baine hanai; ia ese unu bese na umui vairamui ai baine habuadia tari, bena edia tano bavabia, emui tano ai ba halaoa. Iosua ese baine gunalaimui, Iehova ena hereva heḡereḡerena. 4 Iehova ese baine habuadia tari, Sihon bona Og, Amoro taudia edia pavapava, e habuadia tari bona edia tano e habuaia tari heḡereḡerena. 5 Iehova ese umui imamui ai baine atodia, bena vada na haḡanilaimui haheḡanidia heḡereḡeredia ba kara henidia. 6 Ba goada, lalomui ba ha-aukadia, idia garidia basio gari; badina be Iehova, emui Dirava, ese baine bamomui. Ia ese basine lalomui rea, bona basine rakatanimui.

7 Bena Mose ese Iosua e boiria, Israel taudia iboudiai vairadiai e hereva henia, eto, Ba goada, lalomu ba ha-aukaia; ina orea ida ba raka vareai, Iehova ese seneda e gwaurai henidia hamata baine henidia eto tanona ai. Tano na ba henidia, edia tano ai bainela. 8 Iehova na oi vairamu ai bainela; ia ese baine bamomu. Ia ese basine lalomu rea, bona basine rakatanimu. Basio gari; kudoumu basine hetaha.

9 Mose ese ina taravatu idoinai e torea, hahelaḡa taudia, Levi natuna, Iehova ena taravatu mauana e huaiava taudia, bona Israel tau-badadia iboudiai, e henidia. 10 Mose ese e haḡanidia, eto, Laḡani ihahitudia dokodia ai, heruha-nege laḡanina ena nega helaḡana ai, kalaga ariana dainai 11 Israel taudia ese Iehova, emui Dirava, ena abi-hidi gabuna ai ia vairanai bae hebou negana ai, ina taravatu ba duahia hedinarai Israel taudia vairadiai, ibouboudiai vada bae kamonai. 12 Taunimanima iboudiai ba haboudia: tatau bona hahine, memero bona kekeni, bona idau taudia emui hanua ai e noho hedoamu danu. Bena bae kamonai, lalodia bae parara, Iehova, emui Dirava, garina bae gari, bona ina taravatu ena hereva iboudiai bae badinadia, bona karadia bae kara. 13 Natudia danu do asi dibadia, vada bae kamonai bona bae diba; bena Iehova, emui Dirava, garina bae gari, Ioridane sinavaina ba hanaia murinai emui tano ai ba halaoa tanona lalonai ba noho dinadia iboudiai.

14 Iehova ese Mose e hamaoroa, eto, A kamonai: dina na vada eme kahikahi oi vada ba mase. Iosua a boiria, raruosi na hebou kalagana lalonai ba raka vareai, unuseni ai lau ese baina haḡania. Bena Mose bona Iosua na ela, hebou kalagana lalonai e raka vareai. 15 Bena Iehova na kalaga ai e hahedinarai henidia, ori dubuna ai. Hari ori dubuna na kalaga iduarana badinai e hedinarai.

16 Bena Iehova ese Mose e hamaoroa, eto, A kamonai: oi na tubu tama dekediai ba mahuta. Bena ina bese taudia bae tore isi, dirava idaudia, bae lao henia tanona taudia edia dirava, bae toma henidia diho, lau bae rakatanigu, bona egu taravatu vada na henidia be bae tataia utu. 17 Una dina ai egu badu baine siahu ediai; baina rakatanidia, vairagu na edia amo baina hunia; bena bae hebua tari, dika momo bona hekwarahi momo ediai bae kau. Bena una dina ai idia baeto “Ina dika na latadai vada e kau badina be eda Dirava na bogaragidai se nohomu ani?” 18 Momokani, una dina ai lau ese vairagu baina hunia, edia kara dika bona dirava idaudia vada e lao henidia daidiai.

19 Taunabunai, ina ane ba torea bona Israel taudia ba hadibalaidia. Ududia ai bavatoa: ina ane ese Israel taudia baine habadelaidia lau vairagu ai. 20 Badina be senemui na gwaurai henidia hamata tanona ai baina hakaudia vareai, rata bona bada-ranuna e arumu tanona; unuseni ai bae aniani, bogadia bae hakunu, taudia bae bada. Una negana ai idia ese dirava idaudia bae tahudia, bona isiaidia bae lao heni, a lau bae dadaraigu, bona egu taravatu bae tataia utu. 21 Bena dika momo bona hekwarahi momo ediai bae kau negana ai, ina ane ese baine habadelaidia; badina be idia garadia ududia amo basine boio. Badina be lau dibagu lalohadai dahaka dahaka ina harihari lalodia ai e varamu, na gwaurai henidia hamata tanona ai do asina hakaudia vareai negana ai.

22 Taunabunai, Mose ese ina ane e torea una dina ai, bona ia ese Israel taudia e hadibalaidia.

23 Iehova ese Iosua Nunu e haḡania, eto, Ba goada, lalomu ba ha-aukaia: Israel taudia do ba hakaudia vareai, lau ese vada na gwaurai henidia hamata tanona lalonai. Lau danu baina bamomu.

24 Mose ese ina taravatu ena hereva iboudiai na buka ai e tore ḡuḡuru. 25 Bena Mose ese Levi taudia, Iehova ena taravatu mauana e huaiava taudia, e haḡanidia, eto, 26 Ina taravatu bukana bavabia, Iehova, emui Dirava, ena taravatu mauana badibadinai bavatoa; ia ese umui baine habadelaimui. 27 Badina be emui gwau-edeede bona emui daḡedaḡe be dibagu; hari dina ai, lau na doini dekemui ai na mauri nohomu ai, umui ese Iehova vada o gwau edeede henia; matona, baina mase murinai ede ba kara toma? 28 Emui iduhu tau-badadia iboudiai bona emui heitatao taudia ba haboudia, lau ese ini hereva baina gwaurai henidia, bena guba bona tanobada na umui ihabadelaimui ai baina halaodia. 29 Badina be lau dibagu, lauegu mase murinai umui na do ba kara havara, bona vada na haḡanilaimui daladia na ba rakatani; bena dina gabedia ai dika na emui ai baine kau, badina be Iehova vairanai do ba kara havara, bona ena badu ba havaraia, imamui ḡaukaradia daidiai.

30 Bena Mose na Israel taudia iboudiai edia hebou ai ina ane herevadia e gwaurai hedinarai, ela bona e ore.