Iehova ese taunimanima iboudiai e hahemaoro henidiamu neganai, baita abia dae ia e karamu abi hididia na iboudiai mamaoro, a? Oibe! Abraham na e abia dae vaitani Iehova na aonega, hebogahisi bona “tanobada idoinai ihahemaoro-henina Diravana.” Ia ese Natuna na e hadibaia namonamo bona hahemaoro ḡaukarana ibounai na ia e henia. (Ioa. 5:22) Iehova bona Iesu ese taunimanima ta ta kudoudia na e itamu. (Mat. 9:4) Una dainai ta dibamu, taunimanima ta ta be hahemaoro henidiamu neganai, idia ese kara maorona be karaiamu! Oibe, namona na Iehova baita abidadama henia bona baita abia dae ia e karamu abi hididia na hanaihanai mamaoro. Iehova sibona mo heḡereḡere hahemaoro ḡaukarana baine karaia—dia ita! (Isa. 55:​8, 9) Una dainai, hahemaoro ḡaukarana ibounai na ia bona Natuna ediai aita rakatania, bona baita abia dae eda King Iesu ese Tamana ena hahemaoro dalana na be tohotohoa ḡoevaḡoevamu.—Isa. 11:​3, 4. w24.05 rau 7 par. 18-19

Ita ese mai kudouda ibounai ida hereva momokani baita gwaurai na mai anina bada. Filipo ese turana Natanael e laohaia Iesu baine hedavari henia neganai, e vara ḡauna amo una na baita dibaiamu. Ena be Iesu ese Natanael na nega ta do se hedavari henia to Iesu na e gwa: “Israel tauna korikorina ta a itaia; ia na asi ena koikoi.” (Ioa. 1:47) Iesu na Natanael enai ḡau idauna ta e itaia. Ena be Natanael na ita heḡereḡereda, dia ḡoevadae, to ia na ḡau iboudiai lalodiai e kara momokani. Iesu ese una na e laloa bada dainai Natanael na e hanamoa. Salamo 15 ese Iehova ihamoalena totona, ma haida baita kara henidia daladia momo e herevalai. Salamo 15:3 ese Iehova ena ruma ai baine noho tauna ena kara na ini e gwaurai toma: “Ia malana amo haida se hadikadiamu, turana ihadikana karana ta se karaiamu, bona dekena tauna ihadikana herevana ta se gwauraiamu.” Bema eda hereva nahuadia basita tohomu, haida baita hadikadiamu.—Iak. 1:26. w24.06 rau 10 par. 7, 9; rau 11 par. 10

Bema haroro ḡaukara totona bo heḡaeḡae namonamomu, oi na bo uramu ma haida ba hereva henidia. Iesu ese ena aposetolo taudia na e haheḡaeḡaedia guna bena gabeai e siaidia. (Luka 10:​1-11) Idia na lesu ese e hadibadia ḡaudia na e badina dainai, haroro ḡaukara na e moalelaia. Edena dala ai haroro ḡaukara totona baita heḡaeḡae? Namona na baita gwaurai herevadia na baita lalodia namonamo bena Baibul anina na baita herevalaia namonamo. Vaevae taunimanima ese e gwauraimu herevadia bona ihaerelaidia daladia baita lalo. Unu amo taunimanima baita hereva henidiamu neganai, mai moaleda ida baita herevamu. w24.04 rau 16 par. 6-7