Kolose

1 Lau Paulo, Iesu Keriso ena aposetolo taugu, Dirava ena ura dainai, bona varavarada Timoteo, 2 ai raruosi ese umui helaḡa taumui Kolose ai, Keriso iabidadama-henina taumui, a tore henimuimu:

Harihari-bada bona maino Tamada Dirava ena amo bavabi.

Hahenamo herevadia

3 Dirava, iseda Lohiabada Iesu Keriso Tamana, a hanamoamu, umui daimui ai a noiamu negadia iboudiai; 4 badina be ai na vada a kamonai Keriso Iesu o abidadama heniamu, bona helaḡa taudia iboudiai o ura henidiamu. 5 Badina be emui helaro na guba ai, sivarai namo ena hereva momokani ai o kamonai guna helarona. 6 Ina na umui emui ai vada e kau, tanobada idoinai vada eha kau heḡereḡerena: bona tanobada idoinai huahuana e dobimu, umui bogaragimui ai e dobimu heḡereḡerena; dia ina harihari mo, to Dirava ena harihari-bada sivaraina o kamonai bona o diba momokani dinana amo. 7 Ai bamomai, emai lalokau Epafra, ese e hadibamui; ia na Keriso ena hesiai tauna korikori emui ai. 8 Ia ese danu emui uraheni, Lauma lalonai, vada e hamaorolaimai.

Emai ḡuriḡuri daimui ai

9 Una dainai, ai a kamonai dinana amo ema bona harihari, ḡuriḡuri asia hadokoa umui daimui ai; a noinoimu, iena ura ba diba vaitani mai aonegamui idoinai, laumamui danu bae diari; 10 bena Lohiabada imatauraina ai ba raka, kara iboudiai ia ba hamoalea, kara namodia iboudiai anidia ba havara, bona emui diba Dirava enai baine tubu. 11 Ai a noinoimu danu, siahu idoinai ese baine hagoadamui, ia siahuna herea-daena heḡereḡerena; bena ba haheauka bona ba boga auka mai moalemui ida. 12 Ita Tamada baita imodaia: ia ese vada e haḡoevada, diari ai helaḡa taudia ida ahuda baita abia;

13 ia danu dibura siahuna amo vada e hamaurida, ia Natuna, ena lalokau, ena basileia lalonai vada e abida vareai; 14 ia lalonai ita na mai eda hahemauri bona mai eda dika igwau-taodia.

Keriso ena ḡaukara

15 Ia na asita itaiamu Diravana heida-idana, e vara ḡaudia iboudiai roboadia. 16 Badina be ḡau iboudiai guba ai bona tanobada ai ia ese e kara, ta itamu ḡaudia bona asita itamu ḡaudia, guba pavapavadia, lohia badadia, ḡaubada hereadia, siahu taudia: iboudiai ia ese e karadia, iena ḡau. 17 Ia e noho guna, a ḡau iboudiai be gabeamo, bona ḡau iboudiai ia lalonai e hekamo boumu. 18 Ia na ekalesia kwarana; ekalesia na ia tau-anina. Ia na mase amo toreisi-lou roboana, taunabunai ḡau iboudiai lalodiai ia na herea. 19 Badina be Diravana ena ura dainai, ena honuhonu-dae na ienai e miava; 20 bona iena amo ḡau iboudiai, tanobada ḡaudia bona guba ḡaudia, ienai baine hadarodia dae, ia idia ida bae herohemaino, iena satauro rarana dainai.

21 Umui danu, gunaguna ia bona umui na mai padamui; lalomui ai o inai heniava emui kara dika daidiai. 22 A harihari ia ese ienai vada eme hadaromui dae, ia tau-anina ena mase dainai; bena ia vairanai baine haginimui mai helaḡamui ida, asi bebeka-bebekamui, asi emui kara havara. 23 Ḡau tamona, kamonai ai ba noho, ba badinaia tarika-tarika, ba gini tutukatutuka; sivarai namo ena helaro amo basie daromui daudau. Sivarai namo bunai vada o kamonai; sivarai namo bunai taunimanima iboudiai guba henunai vada e harorolai henidia; sivarai namo bunai lau Paulo na hesiai tauna ai vada eme halaogu.

Lauegu ḡaukara daimui ai

24 Harihari egu hisihisi umui daimui ai na moalelaimu; bona Keriso ena hisihisi orena lau taugu ai na haḡuḡuruamu, ekalesia, ia tau-anina, dainai. 25 Ena hesiai taugu ai nala, bena Dirava ese dagi e henigu umui emui ai, Dirava ena hereva baina harorolaia ḡuḡuru helaoreana. 26 Ena hereva hehunina na sene eregunadia bona uru iboudiai edia amo e hunia, ema harihari; a harihari ena helaḡa taudia ediai vada e hahedinaraia, 27 bena idia ediai, Dirava ena ura dainai, ina hereva hehunina hairaina herea-daena na bese idau-idau taudia bogaragidiai baine hedinarai. Herevana binai: Keriso na umui lalomui ai, emui hairai helarona. 28 Ai ese ia a harorolaiamu; taunimanima iboudiai a sisiba henidiamu, taunimanima iboudiai a hadibadiamu, aonega iboudiai lalodiai; taunimanima iboudiai danu baia haginidia, bae namo ḡuḡuru Keriso lalonai. 29 Una totona na hekwarahimu bona na goada tohomu; iena ḡaukara heḡereḡerena lau lalogu ai e ḡaukaramu, mai siahuna ida.