2 Timoteo

1 Lau Paulo, Keriso Iesu ena aposetolo taugu, Dirava ena ura dainai, Keriso Iesu lalonai mauri gwauhamatana e miamu heḡereḡerena, 2 natugu Timoteo, egu lalokau, na tore henimumu:

Harihari-bada bona hebogahisi bona maino, Tamada Dirava ena amo, bona Keriso Iesu eda Lohiabada ena amo bavabi.

3 Dirava na hanamoamu; senegu ese isiaina e lao heniva heḡereḡerena ai, lau ese danu na lao heniamu mai lalogu ḡoevaḡoevana ida. Hanuaboi ai, dina ai, egu ḡuriḡuri ai na hanamoamu bona oi ilalomu asina hadokoamu. 4 Emu tai na helalo unelaiamu, bona na ura badamu baina itamu, baina moale bada helaoreana. 5 Emu kamonai korikori danu na helalo unelaiamu; una kamonai na gunaguna tubumu hahinena Loi bona sinamu Eunike lalodia ai e miava; lau na tomamu harihari oi lalomu ai e miamu danu.

Emu ḡaukara

6 Una dainai na halomumu, Dirava ena herahia ḡauna be imagu tubuamu ai na ato kau negana ai o abia, herahiana ba hahururu-hururua. 7 Badina be Dirava ese gari laumana se henida, a siahu bona lalokau bona boga-auka laumana e henida. 8 Taunabunai, eda Lohiabada igwauraina ai basio hemarai, bona lau e ḡuigu hemaraina basio hemarai. Dika iboudiai lalodiai ba haheauka, sivarai namo dainai, Dirava ese goada baine henimu heḡereḡerena. 9 Ia ese vada e hamaurida, bona boiboi helaḡana amo vada e boirida, dia ita eda kara heḡereḡeredia, a ia sibona ena lalo-hadai bona ena harihari-bada heḡereḡeredia. Una harihari-bada be Keriso Iesu lalonai e henida, seneda do asie vara negana ai, 10 a harihari vada eme hahedinaraia, Keriso Iesu, iseda Hahemauri Tauna, ihahedinaraina ai. Ia ese mase vada e ha-orea; ia ese sivarai namo amo ina mauri bona mauri hanaihanai vada e hadiaridia. 11 Una sivarai namo iharorolaina bona iloalaina bona ihahedibalaina tauna ai vada e halaogu.

12 Una dainai lau ini na hisihisi tomamu; to asina hemaraimu. Badina be egu abidadama vada dibagu, bona lalogu na hadaiamu, na tomu ia na mai goadana egu ai vada e atoa ḡauna baine gimaia diba, ela bona una dina baine kau. 13 Hereva momokanidia lauegu amo o kamonaiva ba badinadia tarika-tarika, Keriso Iesu iabi-daena ai bona irua-henina ai. 14 E henimu ḡauna namona ba gimaia, Lauma Helaḡa, ita laloda e noho henimu Laumana, dainai.

15 Dibamu Asia ai e nohomu taudia iboudiai na egu amo e raka oho, Fugelo bona Heremogene danu. 16 Onesiforo mai ena ruma taudia ida Lohiabada ese baine bogadia hisi; badina be nega momo ia ese lalogu vada e hamatamataia, bona egu gadea hemaraina se hemarai; 17 a Roma ai e kau negana ai e tahugu goadagoada ema bona e davarigu. 18 Lohiabada ena hebogahisi do baine davaria, una dina ai. Isiaigu ede e lao heni tomava Efeso ai vada dibamu.