Iehova​—Dika E Gwautaomu Tauna Hereadaena

 1. Kohelete 7:20 ai, King Solomon ena hereva amo dahaka e hadibamu?

KING Solomon na e gwa: “Asi kara-maoromaoro tauna ta tanobada ai e kara namomu mo, bona nega ta se kara dikamu.” (Koh. 7:20) Una na hereva momokanina! Ita iboudai na kara dika tauda. (1 Ioa. 1:8) Una dainai, Dirava bona ma haida ese eda dika bae gwautao na namo.

 2. Turamu namona ta ese emu dika be gwautaomu neganai, emu hemami be ede bamona?

² Reana oi ese turamu namona ta lalona o hahisia negana o laloataomu. Oi na o ura una ba hamaoromaoroa bona emui hetura karana ba hanamoa lou dainai, mai kudoumu idoinai ida o sori henia. Turamu ese emu dika e gwauatao neganai emu hemami be ede bamona? Emu hemami na e namo bona o moale, ani?

 3. Ina atikol ai dahaka baita herevalaimu?

³ Ita na ta uramu Iehova na ita Turada namo hereana, to nega haida eda hereva o kara amo ia lalonai baita hahisiamu. To, dahaka dainai baita abia dae momokani, Iehova na e ura dikadikamu eda dika baine gwautao. Edena dalai Iehova ese dika e gwautaomu karana na ita ese dika ta gwautaomu karana amo e idau? Bona daidia be Dirava ese edia dika e gwautaomu?

 4. Dahaka dainai ta diba momokanimu Iehova na noho heḡaeḡae eda dika baine gwautao?

⁴ Baibul ese e hadibadamu Iehova na noho heḡaeḡae eda dika baine gwautao. Iehova na Sinai Ororona ai Mose enai e hedinarai neganai, aneru ta amo e gwa: “Lau binai Iehova; Iehova, hebogahisi bona harihari-bada Diravana. Badu ai na halahemu; hebogahisi ai bona ura heni ai na haraḡamu. Daha daha na bogadia hisimu; kara-havara bona kara rea bona kara-dika na gwautaomu.” (Eso. 34:6, 7) Iehova na kara namo bona hebogahisi Diravana, bona ia na nega iboudiai noho heḡaeḡae eda dika baine gwautao.​—Neh. 9:17; Sal. 86:15.

 5. Salamo 103:13, 14 heḡereḡerena, Iehova ese taunimanima na e dibadia ḡoevaḡoeva dainai, ia be dahaka e kara?

⁵ Iehova na ita e Havarada Tauna dainai, ia na mai dibana namonamo ita. Mani a laloa, ia ese taunimanima ta ta ina tanobadai na e dibadia ḡoevaḡoeva. (Sal. 139:15-17) Una dainai, ita iboudai ese tamada sinada edia amo ta abi hanai kara dikadia iboudiai na e itadiamu. Danu, ia na mai dibana eda mauri ai e varamu ḡaudia iboudiai ese eda kara e haidaumu. Iehova ese taunimanima na e dibadia ḡoevaḡoeva dainai, ia be dahaka e kara? Ia ese ita edai hebogahisi karana e hahedinaraia.​—Sal. 78:39; Salamo 103:13, 14 ba duahi.

 6. Edena dalai Iehova ese e hahedinaraia ia na e ura dikadikamu eda dika baine gwautao?

⁶ Iehova ese e hahedinaraia ia na e ura dikadikamu eda dika baine gwautao. Ia na mai dibana tau ginigunana, Adam, ena kara dainai, ita iboudai na kara dika bona mase ese e butuda tao. (Roma 5:12) Ita ta na dia heḡereḡere una kara dika bona mase edia iḡui amo ita siboda baita heruha eiava taunimanima ma ta baita ruhaia. (Sal. 49:7-9) To, eda lalokau Diravana ese e bogada hisi bona dala e kara baine ruhada totona. Ia be dahaka e kara? Ioane 3:16 ese e hahedinaraia, Iehova ese Natuna vara-edeana e siaia ita daidai baine mase helaoreana. (Mat. 20:28; Roma 5:19) Iesu na ita daidai e mase, unu amo ia bae abidadama henia taudia na kara dika bona mase amo baine ruhadia. (Heb. 2:9) Iehova na e lalohisihisi bada badina e itaia Natuna lalokauna na haida ese e hahisia bona e hahemaraia bada ela bona e mase! Momokani, Iehova ese Natuna na bema koua diba unu na basinema mase toma bema basinema ura eda dika baine gwautao.

 7. Daidia be Iehova ese edia dika e gwautao?

⁷ Baibul ai Iehova ese edia dika e gwautao taudia momo e sivarailaidia. (Efe. 4:32) Oi be daika ena sivarai o laloamu? Reana King Manase ena sivarai o laloamu. Una kara dika tauna na dala dika hereadia ai Iehova vairanai e kara dika. Ia ese dirava koikoidia e tomadiho henidiava bona haida e hagoadadiava unu bae kara toma. Natuna e aladia bona dirava koikoidia ediai e bouboulaidia. Danu, Iehova ena dubu helaḡa lalonai kaivakuku au-tubuana ta e haginia. Baibul ese ia na ini e herevalaia toma: “Iehova vairanai e kara havara-havara, bona e habadua.” (2 Sis. 33:2-7) To, Manase na mai kudouna idoinai ida e helalo-kerehai neganai, Iehova ese ena dika na e gwautao. Bona ena king dagina na e henia lou. (2 Sis. 33:12, 13) Danu, reana King David ena sivarai o laloamu, ia na Iehova vairanai kara dika badadia e kara, e heudahanai bona e ala-ala. To, David na mia kudouna idoinai ida e helalo-kerehai bona ena kerere e gwaurai hedinarai neganai, Iehova ese ia danu ena dika e gwautao. (2 Sam. 12:9, 10, 13, 14) Oibe, ta diba momokanimu Iehova na e ura dikadikamu eda dika baine gwautao. Bona, ina stadi ai baita itaiamu, Iehova ese dika e gwautaomu karana na taunimanima edia amo e idau.

 8. Iehova na Hahemaoro Tauna dainai edena dalai dika e gwautaomu?

⁸ Iehova na “tanobada idoinai ihahemaoro-henina Diravana.” (Gen. 18:25) Hahemaoro tauna namona ese taravatu baine lalopararalaidia namonamo na namo. Iehova enai una na momokani, badina ia na eda Hahemaoro Tauna bona Taravatu Ihenina Tauna. (Isa. 33:22, NWT) Iehova na maoro bona kerere edia idau na mai dibana, taunimanima ta na dia unu bamona. Hahemaoro tauna namona be ma dahaka baine kara danu? Namona na hahemaoro do se karaia lalonai, e vara ḡaudia iboudiai baine haerodia namonamo guna. Iehova na Hahemaoro Tauna ḡoevadaena, badina ḡau iboudiai mai dibana ḡoevaḡoeva.

 9. Iehova na ta ena dika do se gwauatao neganai, ia be dahaka e diba gunamu?

⁹ Iehova ena hahemaoro karana na dia taunimanima edia heḡereḡerena, badina ia na ḡau iboudiai e tahu namonamomu bena hahemaoro e karamu. (Gen. 18:20, 21; Sal. 90:8) Ia na dia taunimanima ese e itamu o e kamonaimu ḡaudia amo hahemaoro e karamu. Ia na e lalopararamu ta na tamana sinana edia amo e abi hanai karadia, ena edukeisin, ena noho gabuna, bona ena hemami bona lalohadai ese ena kara e haidaumu. Danu, Iehova na taunimanima kudoudia e itamu. Ia ese taunimanima ta ta ena kara badidia, ena lalohadai bona ura na e lalopararalai namonamomu. Iehova matanai ḡau ta na dia hehuni. (Heb. 4:13) Una dainai, Iehova na ḡau iboudiai mai dibana namonamo dainai dika e gwautaomu.

10. Dahaka dainai baita gwa diba, Iehova ena hahemaoro daladia na nega iboudiai mamaoro-mamaoro? (Deuteronomi 32:4)

¹⁰ Iehova ena hahemaoro daladia na nega iboudiai mamaoro-mamaoro. Ia ese taunimanima toadia na se lalomu. Ia ese ta ena dika e gwautaomu badina na dia toana, ena kohu, ladana na bada eiava ena diba dainai. (1 Sam. 16:7; Iak. 2:1-4) Ta se Iehova na basine doria eiava laloani monina amo basine koia diba. (2 Sis. 19:7) Ia na dia ta e badu heniamu eiava ena hemami e laloamu dainai abi hidi e karamu. (Eso. 34:7) Iehova na eda Hahemaoro Tauna hereadaena badina ita ta ta eda mauri dalana ibounai na e lalopararalaia ḡoevaḡoevamu.​—Deuteronomi 32:4 ba duahia.

11. Edena dalai Iehova ese dika e gwautaomu karana na idau herea?

¹¹ Heberu Revarevadia e tore taudia na e diba Iehova ese dika e gwautaomu karana na idau herea. Nega haida, idia ese Heberu herevana ta e ḡaukaralaia bona buka ta na e gwa “una hereva na Dirava ese kara dika tauna ena dika e gwauataomu karana ai mo e ḡaukaralaia, to dia tau ta ese ma ta ena dika e gwauataomu karana ai se herevalaia.” Iehova sibona na mai ena siahu helalo-kerehai tauna ena dika baine gwauatao momokani. Iehova ese eda dika e gwauataomu neganai dahaka e varamu?

12-13. (a) Tau ta na Iehova ese ena dika e gwauataomu neganai, ena hemami be ede bamona? (b) Iehova na dika e gwauataomu neganai dahaka e karamu?

¹² Iehova ese eda dika e gwautaomu karana baita abia daemu neganai, “goada matamata” bona lalomaino baita abimu bona laloda mamina be ḡoevamu. Unu baita hemami tomamu bema “Iehova sibona” ese eda dika be gwautaomu. (Apos. 3:19, NWT) Iehova ese eda dika e gwauataomu neganai, eda hetura karana ia ida e hanamoa loumu, una na heḡereḡere ita na kara dika ta asita karaia na heto.

¹³ Iehova ese eda dika e gwauataomu neganai, ita ta karaia kara dikana dainai gwau basine henidamu eiava basina panisida loumu. (Isa. 43:25; Ier. 31:34) Iehova ese eda kara dika e abi ohomu “laurabada kahana bona lahara kahana padadia edia daudau heḡereḡerena.”b (Sal. 103:12) Iehova ese eda dika e gwautaomu karana baita laloamu neganai, ia baita hanamoamu bona baita matauraiamu. (Sal. 130:4) To Iehova be daika ena dika baine gwauatao diba?

14. Iehova ese dika e gwautaomu karana ai dahaka tame diba?

¹⁴ Tame itaia, Iehova ese ta ena kara dika e gwauataomu badina na dia ena kara dika na bada o maraḡi dainai. Danu, tame diba Iehova na ita e Havarada Tauna, Taravatu Ihenina Tauna, bona Hahemaoro Tauna dainai, ena diba e ḡaukaralaiamu, unu amo abi hidi baine kara ta ena dika baine gwauatao eiava lasi. To Iehova ese una do se karaia neganai ia be dahaka e lalomu?

15. Luka 12:47, 48 heḡereḡerena, Iehova ese e laloamu ḡauna ta be dahaka?

¹⁵ Iehova ese e laloamu ḡauna ta na ina, kara dika tauna be mai dibana ia e karaiamu karana be kerere eiava lasi. Iesu ese una na e hahedinaraia, Luka 12:47, 48 ai. (Ba duahia.) Bema ta na mai ena ura ida kara dikana ta baine karaia​—ena be mai dibana una kara na Iehova ese e inai heniamu​—una na kara dika badana. Reana Iehova na abi hidi be karamu una tau ena dika basine gwauatao. (Mar. 3:29; Ioa. 9:41) To, namona na baita abia dae, nega haida ita na mai dibada ta karamu karadia haida na kekerere. Dirava ese eda dika baine gwautao diba, a? Oibe. Mani Iehova ese e laloamu ḡauna ma ta aita itaia.

16. Helalo-kerehai anina be dahaka, bona dahaka dainai Iehova ese eda dika baine gwauatao totona baita helalo-kerehai na ḡau badana?

¹⁶ Iehova ese e laloamu ḡauna ma ta na, e uramu baine diba bema kara dika tauna na e helalo-kerehai momokani. Helalo-kerehai anina be dahaka? Helalo-kerehai anina na “ta ese ena lalohadai, kara bona ena ura baine haidau.” Bona anina ma ta na, ta na e kara kara dikadia dainai e lalohisihisimu, eiava bema kara kara maorodia se kara dainai e lalohisihisi badamu. E helalo-kerehaimu tauna na dia e kara kara dikadia daidiai mo e lalohisihisimu, to unu kara ese ena hetura karana Iehova ida e hadikaia danu dainai. Mani King Manase bona King David aita lalodia lou, idia raruosi na kara dika badadia e kara, to mai kudoudia idoinai ida e helalo-kerehai dainai, Iehova ese edia dika na e gwautao. (1 Han. 14:8) Oibe, Iehova ese eda dika baine gwauatao totona helalo-kerehai momokani toana baine itaia na namo. To ta karaia kara dikana dainai baita sori mo na dia heḡereḡere, namona kara ma haida baita kara danu.c Iehova ese e laloamu ḡauna ma ta aita itaia.

17. Eda kara baita haidau anina be dahaka, bona dahaka dainai kara dika gunadia basita kara loulou na mai anina bada? (Isaia 55:7)

¹⁷ Iehova ese e laloamu mai anina bada ḡauna ma ta na, bema ta na ena kara e haidaua eiava. Ta ena kara baine haidaua anina na baine “helalo lou.” Eiava baita gwa diba, ta na ena kara dikana baine rakatania bona Iehova ena dala baine badinaia. (Isaia 55:7 ba duahia.) Namona na lalona baine hamatamataia unu amo Iehova ena lalohadai ese baine hakaua. (Roma 12:2; Efe. 4:23) Namona na lalona baine hadaia ena lalohadai bona kara dika gunadia baine dadaraidia. (Kol. 3:7-10) Momokani, Keriso ena boubou ḡauna baita abidadama henia karana amo Iehova ese eda dika baine gwauatao bona eda kara dika amo baine haḡoevada. Bema Iehova ese be itadamu ita na mai momokanida ida ta hekwarahimu eda kara dika gunadia baita rakatani totona, ia ese una boubou ḡauna dainai eda dika be gwauataomu.​—1 Ioa. 1:7.

18. Dahaka tame herevalai Iehova ese dika e gwautaomu karana ai?

¹⁸ Mani tame herevalai poin badadia haida aita riviulai. Iehova na dika e gwautaomu Tauna hereadaena. Dahaka dainai unu ta gwau tomamu? Badi ginigunana na, ia na hanaihanai e noho heḡaeḡaemu eda dika baine gwautao. Badi iharuana na, Ia na mai dibana namonamo ita. Bona ia sibona mo mai dibana ita be ta helalo-kerehai momokanimu eiava lasi. Bona badi ihatoina na, Iehova ese eda dika na e gwauatao momokanimu, ienai ita na vaitani kara dika ta asita karaia na heto. Unu amo laloda mamina baine ḡoeva bona iena lalonamo baita abia diba.

19. Ena be ita na dia ḡoevadae tauda bona dounu kara dika baita karamu, to dahaka dainai baita moale diba?

¹⁹ Momokani, ita na dia ḡoevadae tauda dainai, dounu kara dikadia baita karamu. To, Insight on the Scriptures, Volume 2, rau 771 ai e gwauraia herevana ese baine hagoadada diba, ini e gwau toma: “Iehova na hebogahisi Diravana bona ena hesiai taudia edia manoka ḡaudia na mai dibana, una dainai idia na edia kerere daidiai basie lalohisihisi hanaihanai na namo. (Sal. 103:8-14; 130:3) Bema idia na Dirava ena dala bae badinaia namonamomu, idia na bae moale diba. (Fili. 4:4-6; 1 Ioa. 3:19-22).” Una na hahegoada herevana, ani?

20. Atikol gabena ai ita be dahaka baita herevalaimu?

²⁰ Ta moalemu badina bema eda kerere amo baita helalo-kerehai momokanimu neganai, Iehova na noho heḡaeḡae eda dika be gwautaomu. To, Iehova ese dika e gwautaomu karana be ede baita tohotohoa toma? Ededia dalai ita ese dika ta gwautaomu karana bona Iehova ese dika e gwautaomu karana na heheḡereḡere, to ededia dalai haida ai na i’idau? Dahaka dainai ena idau baita lalopararalaia na mai anina bada? Atikol gabena ese unu henanadai be haerelaimu.