Let Zid

1 Mwa Zid, enn esklav Zezi Kris ek enn frer Zak, pou bann ki Bondie finn apele ek ki Bondie nou Papa kontan ek ki finn proteze pou Zezi Kris:

2 Ki zot gagn mizerikord,* lape, ek lamour an-abondans.

3 Zot ki mo bien kontan, mem si mo ti bien anvi ekrir zot konsernan mem delivrans ki nou ena, mo finn trouv sa neseser pou ekrir zot pou ankouraz zot pou kontign* lite pou lafwa ki bann ki sin* ti gagne enn fwa pou tou. 4 Rezon kifer mo pe ekrir zot se parski sertin zom, ki depi bien lontan ti’nn fini gagn sa zizman-la par bann Lekritir, finn rant parmi zot. Sa bann zom-la pena okenn respe pou Bondie ek zot servi bonte extraordiner* nou Bondie kouma enn pretext pou ena enn kondwit devergonde* ek zot montre ki zot pa fidel anver nou sel proprieter* ek Segner, Zezi Kris.

5 Mem si zot bien konn tousala, mo anvi rapel zot ki Zeova,* ki ti sap enn pep depi pei Lezip, plitar ti detrir bann ki pa ti ena lafwa. 6 Ek pou bann anz ki pa ti res dan plas kot zot ti ete dan koumansman me ki ti kit plas kot zot ti pe reste, li finn atas zot pou touletan dan enn gran nwarte ek finn rezerv zot pou gran zour zizman. 7 Dan mem fason, Sodom ek Gomor ek bann lavil ki otour zot osi ti pratik enn limoralite sexiel* ki degoutan ek zot ti satisfer zot bann move dezir ki kont natir. Zot inn gagn pinision par enn dife eternel* ek sa servi nou kouma enn lavertisman.

8 Malgre sa, sa bann zom-la osi touletan pe mazinn bann move kitsoz,* zot pe fer zotmem ek lezot* vinn inpir, zot pe mepriz lotorite,* ek zot pe koz an mal lor bann ki ranpli ar laglwar. 9 Me kan Mikael, sef anz,* ti gagn enn dezakor avek Lediab ek ti pe diskite konsernan lekor Moiz, li pa ti oze kondann Lediab par bann parol insiltan. Me li ti dir: “Ki Zeova* ziz twa.” 10 Me sa bann zom-la pe koz an mal lor tou bann kitsoz ki zot pa vremem konpran. Ek tou bann kitsoz ki zot konpran par linstin, parey kouma bann zanimo ki pa rezone, se sa bann kitsoz lamem ki zot pe fer ek ki pe kontign fini zot.

11 Bien tris pou zot, parski zot finn swiv mem semin ki Kain ek zot finn prese pou swiv move semin Balaam pou gagn enn rekonpans, ek zot finn detrir kan zot finn koz kont bann ki ti ena lotorite lor zot parey kouma Kore ti fer! 12 Sa bann zom-la ansam avek zot dan bann repa ki zot organize pou montre lamour pou bann frer ek ser. Selman, zot kouma bann ros ki kasiet anba delo, bann berze ki nouri zotmem san okenn laper, bann niaz ki pena lapli ek ki divan pe pouse dan tou direksion. Zot kouma bann pie ki pa raport frwi dan zot sezon parski zot inn mor net* ek zot inn derasine. 13 Zot kouma bann gro vag ki zet zot bann aksion ki fer zot gagn onte koumadir lekim lor laplaz. Zot kouma bann zetwal ki pena enn traze fix ek Bondie finn rezerv enn nwarte pli nwar ki ena pou zot pou touletan.

14 Enok, setiem zenerasion apartir Adan, ti osi anons enn profesi konsernan bann-la, kan li ti dir: “Gete! Zeova* ti vini avek plizir dizenn milye* so bann anz ki sin 15 pou amenn enn zizman kont tou dimounn, ek pou kondann tou bann ki pena okenn respe pou Bondie akoz tou bann move aksion ki zot ti fer, ek akoz tou bann kitsoz sokan ki sa bann move dimounn la ti dir kont li.”

16 Sa bann zom-la kontan plengne, ek zame zot satisfe ar zot lavi. Zot pe swiv zot bann prop dezir, zot pe flat zotmem par bann gran-gran koze, ek zot pe flat lezot* pou zot prop lavantaz.

17 Me zot ki mo bien kontan, rapel bann parol ki bann zapot nou Segner Zezi Kris ti dir avan,* 18 parey kouma bann-la ti abitie dir zot: “Dan bann dernie zour pou ena bann moker ki pou swiv zot bann prop dezir pou fer bann move kitsoz.” 19 Se sa bann-la mem ki kree divizion, zot bann zom ki azir kouma bann zanimo,* ek zot pa les zot gide par lespri Bondie. 20 Me zot ki mo bien kontan, fortifie zot lafwa ki bien sin ek priye avek led lespri sin, 21 pou ki zot res dan lamour Bondie, amezir ki zot pe atann mizerikord nou Segner Zezi Kris ki fer gagn lavi pou touletan. 22 Anplis, kontign montre mizerikord anver sertin ki ena bann dout; 23 tir zot dan dife pou sov zot. Me kontign montre mizerikord anver lezot, ek anmemtan fer atansion ar zotmem ek ena laenn mem pou sa linz ki’nn tase par bann move aksion la.

24 Aster, pou sa kikenn ki kapav anpes zot tom dan pese* la ek fer zot res san defo ek dan enn gran lazwa devan so laglwar, 25 pou sel Bondie nou Sover par mwayin Zezi Kris nou Segner, pou li laglwar, grander, pwisans, ek lotorite depi leternite, aster-la, ek pou tou leternite. Amen.