Enn Revelasion pou Zan

2 “Pou anz lasanble* ki dan Efez, ekrir: Ala bann kitsoz ki li dir, sa kikenn ki ena set zetwal dan so lame drwat la ek ki pe mars omilie set stenn lalanp an-or: 2 ‘Mo konn to bann aksion, travay dir ki to fer ek to landirans, ek mo kone ki to pa kapav siport bann move dimounn, ek ki to’nn teste bann ki dir zot bann zapot, me ki pa bann zapot, ek to finn trouve ki zot bann manter. 3 To pe osi montre landirans, ek to finn persevere akoz mo nom ek to pa finn dekouraze. 4 Selman, mo ena sa kont twa, ki to’nn perdi lamour ki to ti ena dan koumansman.

5 “‘Alor rapel kotsa to ti ete avan to tonbe, repanti, ek fer bann kitsoz ki to ti pe fer dan koumansman. Si to pa fer sa, mo pou vinn kot twa, ek mo pou tir to stenn lalanp dan so plas, amwin ki to repanti. 6 Parkont, to ena kitsoz bon dan twa: parey kouma mwa, to ena laenn pou bann aksion ki bann ki dan sekt Nikola pe fer. 7 Ki sa kikenn ki ena zorey la tann seki lespri sin pe dir bann lasanble: Seki sorti vinker, mo pou permet li manz frwi pie lavi, ki dan paradi Bondie.’

8 “Ek pou anz lasanble ki dan Smirn, ekrir: Ala bann kitsoz ki li dir, sa kikenn ki ‘Premie ek Dernie’ la, limem ki ti mor ek ki’nn regagn lavi: 9 ‘Mo konn to soufrans* ek to lamizer, me to ris, ek mo konn osi bann dimounn ki dir ki zot Zwif ek ki koz kont* twa. Me zot pa vremem bann Zwif. Zot enn sinagog Satan. 10 Pa bizin per bann kitsoz ki biento pou fer twa soufer. Gete! Lediab pou kontign zet sertin parmi zot dan prizon, pou ki teste zot net, ek zot pou gagn persekision pandan dis zour. Res fidel ziska lamor, ek mo pou donn twa kouronn lavi. 11 Ki sa kikenn ki ena zorey la tann seki lespri sin pe dir bann lasanble: Seki sorti vinker zame pa pou konn deziem lamor.’

12 “Pou anz lasanble ki dan Pergam, ekrir: Ala bann kitsoz ki li dir, sa kikenn ki ena sa long lepe bien fite ki koup de kote la: 13 ‘Mo kone kot to reste, setadir, kot tronn Satan ete; ek pourtan to pe kontign res atase ar mo nom, ek to pa’nn renie lafwa ki to ti ena dan mwa mem dan lepok Antipas, mo temwin fidel, ki bann dimounn inn touye akote zot, kot Satan pe reste.

14 “‘Selman, mo ena de-trwa kitsoz kont twa: Ena bann dimounn kot twa ki pe swiv lansegnman Balaam, limem ki ti ansegn Balak kouma pou fer bann garson Izrael tom dan pese,* setadir pou ki zot manz bann kitsoz ki finn sakrifie ar bann zidol ek pou ki zot komet limoralite sexiel.* 15 Dan mem fason, ena osi bann dimounn kot twa ki pe swiv lansegnman sekt Nikola. 16 Alor repanti. Si to pa fer sa, mo pou vinn kot twa bien vit, ek mo pou lager kont bann-la ar sa long lepe ki sorti dan mo labous la.

17 “‘Ki sa kikenn ki ena zorey la tann seki lespri sin pe dir bann lasanble: Seki sorti vinker, mo pou donn li inpe lamann ki’nn kasiet, ek mo pou donn li enn ti ros blan, ek lor sa ti ros-la inn ekrir enn nouvo nom ki personn pa kone apart sa kikenn ki’nn gagn sa la.’

18 “Pou anz lasanble ki dan Tiatir, ekrir: Ala bann kitsoz ki Garson Bondie dir, sa kikenn ki so lizie kouma enn laflam dife la ek ki so lipie kouma enn bon kalite kwiv la: 19 ‘Mo konn to bann aksion, to lamour, to lafwa, to servis sakre ek to landirans, ek mo kone ki bann aksion ki to’nn fer dernieman, zot plis ki seki to ti fer dan koumansman.

20 “‘Selman, mo ena sa kont twa, ki to toler Zezabel, sa fam ki apel limem enn profet la, ek ki ansegn ek anbet mo bann esklav pou komet limoralite sexiel* ek pou manz bann kitsoz ki finn sakrifie ar bann zidol. 21 Ek mo’nn donn li letan pou repanti, me li pa’le repanti ar so limoralite sexiel.* 22 Gete! Mo pre pou zet li lor enn lili douler, ek bann ki pe komet ladilter avek li, mo pou fer zot gagn bann gran soufrans,* amwin ki zot repanti ar bann aksion ki li’nn inflians zot pou fer. 23 Ek mo pou touy so bann zanfan avek enn lepidemi mortel, pou ki tou bann lasanble kone ki momem sa kikenn ki examinn seki ena dan pli profon bann panse* ek leker, ek mo pou donn sakenn seki li merite dapre so bann aksion.

24 “‘Selman, mo dir leres parmi zot ki dan Tiatir, tou bann ki pa swiv sa lansegnman-la, bann ki pa’nn aprann seki sertin apel “bann kitsoz profon Satan”: Mo pa pe met okenn lezot fardo lor zot. 25 Selman, res atase ar seki zot ena ziska ki mo vini. 26 Ek seki sorti vinker ek swiv mo bann aksion ziska lafin, mo pou donn li lotorite lor bann nasion, 27 parey kouma mwa mo’nn gagn lotorite ar mo Papa, ek li pou diriz zot avek enn baton an feray pou ki zot kraze tibout-tibout parey kouma bann resipian larzil. 28 Ek mo pou donn li zetwal ki leve gramatin. 29 Ki sa kikenn ki ena zorey la tann seki lespri sin pe dir bann lasanble.’