Kris Koz Avek Bann Kongregasyon

“Ala bann kitsoz ki li dir, sa kikenn ki ena set zetwal dan so lamin drwat la.”—REVELASYON 2:1.

1, 2. Kifer eski nu bizin interese ar seki Zezi ti dir set kongregasyon dan Lazi Miner?

ZEZI Kris, sel Garson ki Bondye finn kre direk, li Sef kongregasyon Kretyin. So bann disip ki’nn swazire pu al dan lesyel form parti dan sa kongregasyon la. Pu gard sa kongregasyon la san defo, Kris egzers so lotorite kan li felisit zot ek li koriz zot. (Efezyin 5:21-27) Dan Revelasyon sapit 2 ek 3, nu truv detrwa legzanp kuma li fer sa. Dan sa bann sapit la, ena bann mesaz ki Zezi ti adres set kongregasyon dan Lazi Miner. So bann parol ti ena buku pwa ek ti ranpli ar lamur.

² Avan ki li ti tann bann parol ki Zezi ti dir sa set kongregasyon la, lapot Zan ti gayn enn vizyon “zur Senyer.” (Revelasyon 1:10) Sa “zur” la ti kumanse kan Rwayom Kris ti etabli an 1914. Donk, seki Zezi ti dir sa bann kongregasyon la, li byin inportan dan bann dernye zur. So lankurazman ek so konsey ed nu pu fer fas ar sa bann letan kritik la.—2 Timote 3:1-5.

 3. Ki reprezant bann “zetwal,” bann “anz,” ek bann “portlanp an or” ki Zan ti truve?

³ Zan ti truv Zezi Kris dan so laglwar. Kris ti “ena set zetwal dan so lamin drwat” ek li ti “pe mars omilye set portlanp an or,” uswa kongregasyon. Bann “zetwal” la zot ‘bann anz sa set kongregasyon la.’ (Revelasyon 1:20; 2:1) Parfwa, bann zetwal reprezant bann anz. Me pa dan sa kontex la, parski Kris pa ti pu servi enn imin pu ekrir bann mesaz pu bann kreatir spirityel! Donk, li pli lozik pu panse ki bann “zetwal” isi reprezant bann sirveyan uswa bann kolez ansyin ki’nn swazire par lespri sin. Sa term “anz” la atir latansyon lor zot rol antan ki mesaze. Parski lorganizasyon Bondye finn konn lakrwasman, “serviter fidel ki ansarz” finn usi etabli lezot zom kalifye kuma sirveyan. Sa bann zom la zot bann manb “lezot muton” ki Zezi ena.—Lik 12:42-44; Zan 10:16.

 4. Ki profi bann ansyin tire kan zot pran kont seki Kris dir bann kongregasyon?

⁴ Bann “zetwal” la zot dan lamin drwat Zezi. Sa vedir ki li ena puvwar ek kontrol lor zot, ek bannla gayn so faver ek so proteksyon. Donk, zot ena bann kont pu rann li. Zordi, bann ansyin tir profi kan zot pran byin kont bann parol ki Zezi ti adres sa set kongregasyon la. Sa permet zot truve kuma pu regle bann sityasyon parey ki arive zordi. Byinsir, tu bann Kretyin bizin ekut Garson Bondye. (Mark 9:7) Alor, ki nu kapav aprann kan nu pran kont seki Kris ti dir sa bann kongregasyon la?

Pu Anz Ki dan Efez

 5. Ki kalite lavil, Efez ti ete?

⁵ Zezi ti felisit kongregasyon ki ti dan Efez, me li ti usi repran li. (Lir Revelasyon 2:1-7) Efez ti truv lor lakot lwes Lazi Miner. Li ti enn sant komersyal ris ek enn sant relizye. Gran tanp dees Artemis ti truv laba. Efez ti ranpli ar limoralite, fos relizyon, ek bann pratik mazik. Me malgre sa, Bondye ti beni minister lapot Pol ek lezot Kretyin dan sa lavil la.—Akt, sapit 19.

 6. Kuma eski zordi bann Kretyin fidel zot parey kuma bann Kretyin dan ansyin lavil Efez?

⁶ Kris ti felisit kongregasyon Efez par sa bann parol la: “Mo konn to bann aksyon, lapenn ki to done ek to landirans. Mo kone ki to pa kapav siport bann zom move ek to teste bann ki pretann ki zot bann zapot. Me, to’nn truve ki zot bann manter parski zot pa bann zapot.” Zordi usi, bann kongregasyon bann vre disip Zezi finn fer buku bon aksyon, zot finn donn buku lapenn, ek zot finn montre landirans. Zot pa toler bann fos frer ki ule pas pu bann zapot. (2 Korintyin 11:13, 26) Parey kuma bann Efezyin, zordi bann Kretyin fidel pa “kapav siport bann zom move.” Donk, pu pa sali ladorasyon Zeova ek pu protez kongregasyon, zot pa frekant depre bann aposta ki pa repanti.—Galat 2:4, 5; 2 Zan 8-11.

7, 8. Ki problem grav ti egziste dan kongregasyon Efez, ek kuma eski nu’si nu kapav fer fas ar enn sityasyon parey?

⁷ Me, bann Kretyin dan Efez ti ena enn problem grav. Zezi ti dir sa kongregasyon la: “Mo ena enn kitsoz kont twa: to finn abandonn lamur ki to ti ena okumansman.” Bann manb sa kongregasyon la ti bizin fer zot premye lamur pu Zeova, reviv dan zot. (Mark 12:28-30; Efezyin 2:4; 5:1, 2) Nu tu, nu bizin fer atansyon ki nu pa perdi nu premye lamur pu Bondye. (3 Zan 3) Me, ki nu bizin fer si nu truve ki nu pe kumans galup deryer larzan uswa bann plezir ek ki sa pe vinn bann kitsoz buku pli inportan dan nu lavi? (1 Timote 4:8; 6:9, 10) Ebyin, nu bizin priye Zeova avek tu nu leker. Nu bizin demann Li led pu ranplas sa bann move tandans la par enn profon lamur ek rekonesans pu tu seki Li ek so Garson finn fer pu nu.—1 Zan 4:10, 16.

⁸ Kris ti ankuraz bann Efezyin: “Rapel depi kot sa to’nn tonbe; repanti ek fer bann aksyon ki to ti pe fer avan.” Me, ki ti pu arive si zot pa ti fer sa? Zezi dir: “Sinon, mo pe vini, ek mo pu tir to portlanp dan so plas.” Si tu bann muton perdi zot premye lamur, ebyin “portlanp,” uswa kongregasyon pu nepli egziste. Akoz sa, antan ki bann Kretyin ki byin devwe, nu bizin travay dir pu fer kongregasyon briye tultan lor plan spirityel.—Matye 5:14-16.

 9. Kuma eski nu bizin konsider bann sekt?

⁹ Bann Efezyin merit felisitasyon parski zot finn ayir “bann aksyon sekt Nikola.” Apart seki Revelasyon mansyone lor sa sekt la, pena okenn lezot ranseynman presi lor so lorizinn, so bann lanseynman ek so bann pratik. Zezi ti kondann bann ki ti swiv bann zom. Donk, nu bizin ayir bann sekt, parey kuma bann Kretyin dan Efez ti fer.—Matye 23:10.

10. Ki pu ariv bann ki pran byin kont seki lespri dir?

¹⁰ Kris ti dir: “Les sa kikenn ki ena enn zorey la tann seki lespri pe dir bann kongregasyon.” Kan Zezi ti lor later, lespri Bondye ti inflyans seki li ti dir. (Izai 61:1; Lik 4:16-21) Donk, nu bizin pran kont seki Bondye dir atraver Zezi par mwayin so lespri sin. Avek direksyon lespri sin, Zezi ti promet: “Seki sorti vinker, mo pu donn li privilez pu manz frwi zarb ki donn lavi, ki truv dan paradi Bondye.” Pu bann manb 144,000 ki lor later ek ki pe ekut seki lespri dir, sa sinifi lavi imortel dan lesyel, dan “paradi Bondye,” uswa an prezans Zeova mem. “Gran laful” usi ekut seki lespri pe dir. Zot, zot pu viv dan paradi lor later kot zot pu bwar “dan enn larivyer ki ena delo lavi.” Ek zot pu gayn gerizon avek “bann feyaz bann zarb” ki lor bor sa larivyer la.—Revelasyon 7:9; 22:1, 2; Lik 23:43.

11. Kuma eski nu kapav ankuraz lamur pu Zeova?

¹¹ Bann Efezyin ti perdi zot premye lamur. Me, ki bizin fer si enn sityasyon parey pe devlope dan enn kongregasyon zordi? Sakenn parmi nu kapav ankuraz lamur pu Zeova. Kuma? Se kan nu koz lor so bann manyer azir ki ranpli ar lamur. Bondye finn donn enn ranson atraver so Garson ki Li byin kontan. Alor, nu kapav exprim nu rekonesans pu lamur ki Zeova inn montre dan sa fason la. (Zan 3:16; Romin 5:8) Kan li apropriye, nu kapav mansyonn lamur Bondye dan nu bann komanter ek dan nu bann size dan reynion. Nu kapav montre nu prop lamur pu Zeova letan nu donn so non loner dan predikasyon. (Psom 145:10-13) Wi, nu bann parol ek nu bann aksyon kapav fer buku pu fer reviv ek fortifye premye lamur enn kongregasyon.

Pu Anz Ki dan Smirn

12. Ki listwar aprann nu lor lavil Smirn ek bann pratik relizye ki ti ena laba?

¹² Kris, “sa kikenn ki ‘Premye ek Dernye’ la, ek ki ti mor ek ki ti regayn lavi” par enn rezireksyon ti felisit kongregasyon Smirn. (Lir Revelasyon 2:8-11.) Smirn (zordi Izmir, Turquie) ti enn lavil ki ti konstrir lor lakot lwes Lazi Miner. Bann Grek ti abit sa lavil la, me bann larme Lidi ti detrir li ver 580 A.N.L. Bann ki ti pran puvwar apre Alexand Legran, ti rekonstrir lavil la dan enn lot landrwa. Sa fwa la, Smirn ti fer parti dan provins Romin ki ti truv dan Lazi. Li ti enn sant komersyal ki ti pe byin prospere ek ki ti renome pu so bann zoli batiman piblik. Li ti ena enn tanp an loner Tiber Sezar, ek sa ti fer li vinn enn sant pu ladorasyon lanperer. Bann adorater lanperer ti bizin bril enn pinse lansan ek dir “Sezar, li Senyer.” Bann Kretyin pa ti kapav obeir sa lalwa la parski pu zot, se ‘Zezi, ki Senyer.’ Akoz sa, zot ti gayn persekisyon.—Romin 10:9.

13. Malgre ki zot ti pov lor plan materyel, dan ki sans bann Kretyin Smirn ti ris?

¹³ Apart persekisyon, bann Kretyin dan Smirn ti siport lamizer. Li posib ki zot ti konn bann problem finans parski zot pa ti partisip dan ladorasyon lanperer. Zordi usi, bann serviter Zeova konn sa bann kalite leprev la. (Revelasyon 13:16, 17) Me malgre ki zot pov, bann ki resanble bann Kretyin Smirn, zot ris lor plan spirityel. Ek se sa ki pli inportan!—Proverb 10:22; 3 Zan 2.

14, 15. Ki rekonfor bann manb 144,000 ki lor later kapav gayne dan Revelasyon 2:10?

¹⁴ Laplipar bann Zwif dan Smirn ti “enn sinagog Satan.” Kifer? Parski zot ti pe swiv bann tradisyon ki pa ti an akor avek Lekritir. Zot ti rezet Garson Bondye, ek zot ti insilte bann disip Zezi, ki ti’nn swazire par lespri sin. (Romin 2:28, 29) Me get bann parol ki Zezi dir apre. Sa vremem sulaz bann manb 144,000 ki lor later. Zezi dir: “Pa per bann sufrans ki to pu traverse. Gete, Satan pu kontiyn zet sertin parmi zot dan prizon pu teste zot dan enn fason konple ek pu fer zot gayn persekisyon pandan dis zur. Res fidel mem ziska lamor, ek mo pu donn twa kuronn lavi.”—Revelasyon 2:10.

¹⁵ Zezi ti sutenir suverennte Zeova ek li pa ti per pu mor akoz sa. (Filipyin 2:5-8) Mem si zordi Satan pe lager kont bann manb 144,000 ki lor later, zot pa per bann sufrans ki zot bizin andire antan ki grup—ki li persekisyon, prizon, uswa enn lamor vyolan. (Revelasyon 12:17) Zot pu sorti vinker dan sa lemond la. Dan bann zwe ki bann nasyon payin ti organize sa lepok la, bann vinker ti gayn enn kuronn fler ki plitar ti fane ek ti sek. Me, Zezi promet bann manb 144,000 ki pu resisite, ki li pu donn zot “kuronn lavi,” kuma bann kreatir imortel dan lesyel. Sa vremem enn kado ki ena buku valer, ki pa kapav estime!

16. Si nu pe frekant enn kongregasyon ki resanble kongregasyon Smirn, lor ki kestyon nu bizin fixe nu latansyon?

¹⁶ Ki nu lesperans li dan lesyel uswa lor later, fer kumadir nu pe frekant enn kongregasyon ki resanble kongregasyon Smirn. Ki nu pu fer? Ebyin, anu ed nu bann frer ek ser pu fixe zot lespri lor rezon prinsipal kifer Bondye pe permet persekisyon. Se akoz sa kestyon ki’nn suleve lor drwa ki Bondye ena pu reyne dan liniver. Sak Temwin Zeova fidel pruve ki Satan enn manter. Li montre ki mem enn dimunn ki pe persekite, kapav kontiyn, san bes lebra, sutenir drwa ki Bondye ena pu reyne antan ki Suverin Liniver. (Proverb 27:11) Anu ankuraz lezot Kretyin pu andir persekisyon. Kumsa nu tu, nu pu kontiyn ena “privilez pu ofer [Zeova] enn servis sakre san ki nu per, avek fidelite ek lazistis devan Li pandan tu nu bann zur,” wi pu tultan.—Lik 1:68, 69, 74, 75.

Pu Anz Ki dan Pergam

17, 18. Pergam ti enn sant ki kalite ladorasyon? Ki ti kapav ariv enn kikenn ki ti refiz partisip dan sa kalite lidolatri la?

¹⁷ Kongregasyon ki ti dan Pergam ti gayn felisitasyon ek koreksyon tulede. (Lir Revelasyon 2:12-17.) Pergam ti truv 80 km dan lenor Smirn. Se enn lavil ki ti plonze dan relizyon payin. Li paret ki bann astrolog Babilonyin ti kit Babilonn, zot ti sove zot ti al laba. Dan Pergam, ti ena enn tanp renome, tanp Esculape, ki ti fos bondye gerizon ek medsinn. Bann gran laful dimunn malad ti vwayaze pu vinn dan sa tanp la. Pergam ti ena usi enn tanp rezerve pu ladorasyon Sezar Ogist. Ala kifer, sa lavil la ti konsidere kuma “sant prinsipal ladorasyon lanperer dan kumansman lanpir.”—Encyclopædia Britannica, 1959, Volim 17, paz 507.

¹⁸ Dan Pergam, ti ena enn lotel dedye pu Zeus. Dan sa lavil la, ti ena usi ladorasyon bann imin, ki ti konsidere kuma bondye. Byinsir, ti ena lamin Satan deryer sa. Alor, sa pa etonn nu ki Zezi ti dir ki sa kongregasyon la ti truv dan landrwa kot ti ena “tronn Satan”! Enn kikenn ki ti sutenir suverennte Zeova ek ki ti refiz ador lanperer, ti kapav konn lamor. Zordi, lemond li tuzur dan puvwar Dyab. Bann dimunn ador bann sinbol nasyonal. (1 Zan 5:19) Depi premye syek ziska nu lepok, buku Kretyin fidel finn mor kuma bann martir. Par egzanp, Zezi sit “Antipas” kuma so “temwin, enn kikenn ki ti fidel ek ki [bannla] ti tuye kan li ti avek zot.” Pena dut ki Bondye Zeova ek Zezi Kris rapel sa bann serviter fidel la.—1 Zan 5:21.

19. Ki Balaam ti fer, ek kont ki kitsoz tu bann Kretyin bizin res lor zot gard?

¹⁹ Kris ti koz usi lor “lanseynman Balaam.” Parski li ti gurman bann kitsoz materyel, fos profet Balaam ti rod modi Izrael. Me Bondye ti transform so malediksyon an benediksyon. Lerla, Balaam ti konplote ansam avek Balak, lerwa Moabit pu atir buku Izraelit ek fer zot tom dan lidolatri ek move kondwit sexyel. Bann ansyin bizin tini ferm an faver seki drwat parey kuma Fineas, ki ti azir kont bann aksyon Balaam. (Nonm 22:1–25:15; 2 Pyer 2:15, 16; Zid 11) Avredir, tu bann Kretyin bizin res lor zot gard pu pa tom dan lidolatri ek pu anpes bann move kondwit sexyel rant tigit par tigit dan kongregasyon.—Zid 3, 4.

20. Si enn Kretyin pe kumans devlop bann lide aposta, ki li bizin fer?

²⁰ Kongregasyon Pergam ti dan gran danze parski li ti toler “bann ki pe tini ferm lanseynman sekt Nikola.” Kris ti dir kongregasyon la: “Repanti. Sinon, mo pe vinn vit ver twa, ek mo pu lager ar bannla avek sa long lepe ki dan mo labus la.” Bann ki swiv bann sekt anvi fer bann Kretyin ditor lor plan spirityel. Ek bann ki byin deside pu kre divizyon ek bann sekt pa pu gayn Rwayom Bondye. (Romin 16:17, 18; 1 Korintyin 1:10; Galat 5:19-21) Si enn Kretyin pe kumans devlop bann lide aposta ek li anvi fann sa ar lezot, li bizin pran bann parol Kris kuma enn warning! Pu evit sa gro maler ki pe atann li la, li bizin repanti ek rod led spirityel avek bann ansyin dan kongregasyon. (Zak 5:13-18) Wi, li bizin azir san tarde, parski Zezi pe vinn vit pu rann zizman.

21, 22. Ki bann ki manz “lamann ki’nn kasyet,” ek ki sa vedir?

²¹ Bann manb 144,000 fidel ki lor later ek zot bann fidel konpaynon pa bizin per sa zizman ki pe vini la. Bann benediksyon pe atann tu bann ki pe pran byin kont konsey ki Zezi done par direksyon lespri sin Bondye. Par egzanp, bann manb 144,000 ki lor later ek ki pu sorti vinker dan sa lemond la pu gayn enn linvitasyon. Zot pu invite pu manz inpe “lamann ki’nn kasyet.” Zot pu gayn usi “enn kayu blan” lor ki ena “enn nuvo non.”

²² Bondye ti nuri bann Izraelit ar lamann pandan zot sezur 40 an dan dezer. Ti ramas enn tipe sa “dipin” la dan enn resipyan an or ek ti plas sa andan lars lalyans. Donk, sa ti kasyet dan Tre-Sin tabernak, kot Zeova ti montre so prezans atraver enn lalimyer ki Li ti fer aparet par mirak. (Egzod 16:14, 15, 23, 26, 33; 26:34; Ebre 9:3, 4) Personn pa ti gayn drwa manz sa lamann ki ti kasyet la. Me kan bann disip Zezi ki’nn swazire, pu resisite, zot pu manz “sa lamann ki’nn kasyet la.” An ki sans? Ebyin, zot pu gayn lavi imortel.—1 Korintyin 15:53-57.

23. Ki reprezant “kayu blan” ek “nuvo non”?

²³ Dan bann tribinal Romin, enn kayu nwar ti amenn kondanasyon, tandiki enn kayu blan ti vedir ki dimunn la finn akite. Zezi donn bann manb 144,000 ki sorti vinker dan lemond, “enn kayu blan.” Sa vedir ki devan so lizye, zot inosan, pir ek prop. Bann Romin ti usi servi bann kayu kuma bann ‘tiket lantre’ pu bann evennman inportan. Donk pareyman, sa “kayu blan” la kapav indike ki enn manb 144,000 lor later finn gayn enn plas dan lesyel pu asiste maryaz Lanyo. (Revelasyon 19:7-9) Sa “nuvo non” la sinifi privilez ki sa bann manb la ena pu ini ansam avek Kris kuma bann zeritye avek li dan Rwayom Bondye. Wi, tusala vremem ankuraz bann manb 144,000 ki lor later, dan zot servis pu Zeova. Sa ankuraz zot bann asosye usi ki ena lesperans pu viv dan paradi lor later!

24. Ki pozisyon nu bizin garde kont bann aposta?

²⁴ Li bon ki nu rapel ki bann aposta ti pe menas kongregasyon Pergam. Zordi usi, enn sityasyon parey kapav menas byinet spirityel kongregasyon ki nu pe frekante. Si sa arive, anu rezet bann aposta konpletman ek anu kontiyn mars dan laverite. (Zan 8:32, 44; 3 Zan 4) Bann fos anseynan uswa bann dimunn ki ena bann tandans aposta kapav gat enn kongregasyon an antye. Ala kifer, nu bizin gard enn pozisyon ferm kont bann aposta. Fode ki zame nu les zot anbet nu par zot bann move largiman pu anpes nu obeir laverite.—Galat 5:7-12; 2 Zan 8-11.

25. Dan prosin lartik nu pu egzaminn bann mesaz ki Zezi ti adres ar lezot kongregasyon. Ki sa bann kongregasyon la sa?

²⁵ Nu finn get ansam bann parol ki Zezi Kris ti dir trwa sa set kongregasyon ki truv dan Lazi Miner la. So bann parol felisitasyon ek so bann konsey fer nu reflesi. Me, avek direksyon lespri sin, Zezi ena ankor buku kitsoz pu dir sa kat lezot kongregasyon la. Dan prosin lartik, nu pu egzaminn ansam bann mesaz ki li ti adres kongregasyon Tyatir, Sard, Filadelfi, ek Laodise.

Ki U Pu Reponn?

• Kifer eski nu bizin pran kont seki Kris dir bann kongregasyon?

• Kuma nu kapav ede pu fer reviv premye lamur enn kongregasyon?

• Kifer eski nu kapav dir ki malgre ki zot ti pov lor plan materyel, bann Kretyin dan Smirn ti ris vremem?

• Kan nu reflesi lor sityasyon ki ti egziste dan kongregasyon Pergam, kuma eski nu bizin konsider bann panse aposta?

[Caption on page 8]

GRES

LAZI MINER

Efez

Smirn

Pergam

Tyatir

Sard

Filadelfi

Laodise

[Zimage page 10]

“Gran laful” pu viv dan enn paradi lor later

[Zimage page 11]

Bann Kretyin ki gayn persekisyon, zot vinker dan sa lemond la