Sapit 13

Kifer Nu Ere Kan Nu Viv Kuma Bondye Demande

 1. Kifer eski nu kapav dir ki nu ere kan nu swiv simin Zeova?

ZEOVA enn “Bondye ere,” ek Li anvi ki u zwir lavi. (1 Timote 1:11) Kan u mars dan so simin, u kapav tir profi pu u mem, ek konn enn trankilite profon ek dirab, kuma enn larivyer ki zame pa sek. Kan enn kikenn mars dan simin Bondye, sa pus li usi pu kontiyn fer bann aksyon drwat, “kuma bann vag lamer.” Sa fer nu gayn vre boner.—Izai 48:17, 18.

 2. Kuma eski bann Kretyin kapav ere mem ki parfwa zot gayn maltrete?

² Ena kapav proteste, zot dir, ‘Defwa ena dimunn sufer parski zot fer seki bon.’ Li vre; sa mem ki ti ariv bann zapot Zezi. Me selman, mem ki zot ti persekite, zot ti zwaye ek zot ti kontiyn “anons bon nuvel konsernan Kris.” (Akt 5:40-42) Zot legzanp kapav anseyn nu bann leson inportan. Enn parmi bann leson la li: mem ki nu viv kuma Bondye demande, sa li pa enn garanti ki tuletan nu pu byin trete. Lapot Pol finn ekrir: “Avredir, tu bann ki ule viv dan latasman avek Bondye ansam avek Kris Zezi, zot usi, zot pu persekite.” (2 Timote 3:12) Nu pu gayn maltrete parski Satan ek so lemond kont bann ki viv kuma Bondye demande. (Zan 15:18, 19; 1 Pyer 5:8) Me vre boner pa depann lor fason ki lezot tret nu, me plito lor lasirans ki nu ena ki nu pe fer seki bon ek seki Bondye aksepte.—Matye 5:10-12; Zak 1:2, 3; 1 Pyer 4:13, 14.

 3. Ki lefe ladorasyon Zeova bizin ena lor lavi enn dimunn?

³ Ena dimunn panse ki zot kapav gayn faver Bondye si zis detrwa fwa zot montre ki zot devwe, ek lezot fwa zot bliye Li. Pa kumsa ki nu donn Bondye Zeova vre ladorasyon. Vre ladorasyon bizin ena enn lefe lor kondwit enn dimunn, lor tu seki li fer, zur apre zur, lane apre lane. Akoz sa Labib apel sa kalite ladorasyon la enn “Simin.” (Akt 19:9; Izai 30:21) Alor, sa vedir ki enn dimunn bizin viv dapre seki Bondye demande; so bann parol ek so bann aksyon bizin an armoni avek Parol Bondye.

 4. Kifer eski li bon fer bann sanzman pu viv an akor avek bann simin Bondye?

⁴ Kan bann nuvo ki pe etidye Labib truve ki zot bizin fer bann sanzman pu fer Bondye plezir, kitfwa zot kapav demann zot mem, ‘Eski li vremem vo lapenn viv kuma Bondye demande?’ Wi, nu kapav sir. Kifer? Parski “Bondye Li lamur,” donk si nu mars dan so bann simin, nu pu tir profi. (1 Zan 4:8) Bondye saz, donk Li kone ki pli bon pu nu. Pwiski Zeova Li enn Bondye tu-pwisan, Li kapav donn nu lafors pu aret enn move labitid, ek realiz nu dezir pu fer Li plezir. (Filipyin 4:13) Anu egzaminn detrwa bann prinsip pu viv kuma Bondye demande ek anu gete kuma kan nu aplik sa bann prinsip la, nu kapav viv ere.

NU ERE KAN NU ONET

 5. Ki Labib dir lor koz manti ek kokin?

⁵ Zeova “enn Bondye laverite.” (Psom 31:5) Pena dut, u’si, u anvi swiv so legzanp pu ki lezot konn u kuma enn kikenn ki koz laverite. Kan nu onet, nu respekte nu mem, ek nu santi nu byin. Me, malonete byin popiler dan sa lemond ki ranpli ar pese la; akoz sa, bann Kretyin bizin pran kont sa warning la: “Sakenn parmi zot [bizin] koz laverite avek so prosin . . . Fode ki enn voler aret kokin, me plito ki li travay dir . . ki li fer enn bon travay avek so lamin, pu ki li ena kitsoz pu partaz avek seki pena.” (Efezyin 4:25, 28) Bann Kretyin rann enn zurne travay onet. Zot pa pran bann kitsoz zot patron, amwin ki li donn zot permisyon. Ki li dan travay, dan lekol, uswa dan lakaz, enn adorater Zeova bizin ‘onet dan tu kitsoz.’ (Ebre 13:18) Enn kikenn ki finn gayn labitid koz manti uswa kokin pa kapav gayn faver Bondye.—Deteronom 5:19; Revelasyon 21:8.

 6. Kuma eski enn dimunn onet ki viv kuma Bondye demande kapav donn Zeova laglwar?

⁶ Nu gayn buku benediksyon kan nu onet. Selina li enn vev Afrikin ki mizer, me ki kontan Bondye Zeova ek kontan so bann prinsip drwat. Enn zur, li finn truv enn sak kot ti ena enn karne labank ek enn gro som larzan. Li finn servi enn lanyer telefonn pu kapav truv propriyeter sak la—enn komersan; bann voler ti kokin so sak. Misye la pa ti ule krwar kan Selina, ki pa ti tro byin, finn vinn kot li pu return li so sak avek tu seki ti ena ladan. Li finn dir Selina: “Sa kalite lonete la merit byin enn rekonpans.” Apre sa, li finn donn li enn som larzan. Me pli inportan ankor, misye la finn donn loner relizyon Selina. Wi, bann aksyon onet donn lanseynman Labib plis valer, sa donn Bondye Zeova laglwar, ek sa fer bann adorater onet viv ere.—Tit 2:10; 1 Pyer 2:12.

NU ERE KAN NU BONKER

 7. Kifer eski zwe pu larzan pabon?

⁷ Nu ere kan nu bonker, tandiki bann ki voras pa pu gayn “rwayom Bondye.” (1 Korintyin 6:10) Zwe pu larzan li enn form gurmandiz ki byin popiler, parski nu rod fer larzan lor ledo lezot. Bondye pa aksepte bann ki “voras pu gayn bann kitsoz enn fason malonet.” (1 Timote 3:8) Mem si lalwa guvernman pa defann zwe ek mem si enn dimunn zwe pu distraksyon, avek letan li kapav vinn esklav enn pratik ki finn rwinn lavi buku dimunn. Byin suvan enn kikenn ki zwe pu larzan met so fami lor lapay, li pa kit ase larzan pu aste bann kitsoz neseser kuma manze ek linz.—1 Timote 6:10.

 8. Kuma eski Zezi finn les enn legzanp bonker, ek kuma eski nu kapav vinn bonker?

⁸ Parski bann Kretyin bonker, zot kontan ed lezot, sirtu zot bann frer ki mizer. (Zak 2:15, 16) Avan ki Zezi ti vinn lor later, li finn get byin kuma Bondye finn montre Li bonker anver bann dimunn. (Akt 14:16, 17) Zezi finn donn so letan, so bann talan, ek mem so lavi pu bann dimunn. Akoz sa li ti byin plase pu dir: “Ena buku plis lazwa kan done ki kan gayne.” (Akt 20:35) Zezi ti felisit enn vev mizer ki avek bonker ti met de ti pyes larzan dan bwat trezor tanp, parski li ti met “tu seki li ti ena.” (Mark 12:41-44) Bann Izraelit lontan ek bann Kretyin premye syek ti bann bon legzanp parski zot ti pe donn avek lazwa, zot ti pe sutenir kongregasyon ek travay Rwayom par bann don materyel. (1 Kronik 29:9; 2 Korintyin 9:11-14) Zordi zur, apart bann don materyel, bann Kretyin kontan pu donn Bondye loner ek pu servi zot lavi dan so servis. (Romin 12:1; Ebre 13:15) Zeova beni zot pu zot letan, zot lenerzi, zot resurs, zot larzan ki zot servi pu sutenir travay predikasyon Rwayom ki pe fer dan lemond antye.—Proverb 3:9, 10.

BANN LEZOT REZON KI KAPAV RANN NU ERE

 9. Kifer eski abiz bann labwason alkolik pabon?

⁹ Pu ki bann Kretyin ere, zot bizin ‘prezerv zot bann kapasite pu reflesi.’ (Proverb 5:1, 2) Sa vedir ki zot bizin lir Parol Bondye ek bann piblikasyon baze lor Labib, ek medit lor la. Me ena bann kitsoz ki zot bizin rezete. Par egzanp, si enn dimunn abiz lor bann labwason alkolik, sa kapav fer li perdi kontrol so bann panse. Buku ki dan sa leta la tom dan enn move kondwit moral, fer vyolans ek provok bann aksidan byin grav. Li pa drol ki Labib dir ki bann sular pa pu gayn Rwayom Bondye! (1 Korintyin 6:10) Parski bann vre Kretyin byin deside pu gard enn “lespri ki ena enn bon zizman,” zot pa bwar ziska su, ek sa ed zot pu viv ere ant zot.—Tit 2:2-6.

10. (a) Kifer eski bann Kretyin pa servi taba? (b) Ki profi enn dimunn tire kan li aret bann labitid ar ki li ti esklav?

¹⁰ Nu ere kan nu ena enn lekor prop. Purtan, buku vinn esklav bann kitsoz ki fer zot lekor ditor. Ena par egzanp taba. Dapre enn rapor Lorganizasyon Mondyal Lasante “trwa milyon dimunn mor tulelane” parski zot fime. Li kapav difisil pu aret fime, parski u lekor pu demann sa enn-de fwa kan u pa fime. Me lot kote, bann ki finn aret fime truve ki zot ena enn pli bon lasante ek plis larzan pu rul zot bidze. Wi, si nu aret fime, uswa si nu aret pran bann lezot ladrog, nu pu ena enn lekor prop, enn konsyans kler, ek nu pu konn vre boner.—2 Korintyin 7:1.

VIV ENN MARYAZ ERE

11. Ki bizin pu ki enn maryaz ena valer devan lalwa, ek pu ki li gard so loner ek li dirab?

¹¹ Bann ki viv ansam kuma mari ek fam bizin sir ki zot maryaz finn anrezistre kuma bizin dan leta sivil. (Mark 12:17) Zot bizin usi konsider maryaz kuma enn responsabilite serye. Li vre ki kapav ena separasyon si enn konzwin pa sutenir volonterman so fami, si li maltret li, uswa si li anpes li servi Bondye. (1 Timote 5:8; Galat 5:19-21) Me bann parol lapot Pol dan 1 Korintyin 7:10-17 ankuraz de dimunn marye pu res ansam. Byinsir, pu ki zot konn vre boner, tulede konzwin bizin fidel ar zot kamarad. Pol finn ekrir: “Fode ki maryaz gard so loner devan tu dimunn, ek fode ki lili maryaz pa gayn okenn tas, parski Bondye pu ziz bann ki fer bann vis sexyel ek adilter.” (Ebre 13:4) Lexpresyon “lili maryaz” vedir relasyon sexyel ant enn zom ek enn fam ki marye devan lalwa. Pa kapav konpar bann lezot relasyon sexyel, par egzanp enn misye ki marye avek plizir fam, kuma enn kitsoz ki “gard loner maryaz devan tu dimunn.” Anplis, Labib kondann relasyon sexyel avan maryaz ek relasyon sexyel ant de dimunn mem sex.—Romin 1:26, 27; 1 Korintyin 6:18.

12. Ki bann move konsekans vis sexyel?

¹² Bann vis sexyel kapav donn plezir pandan enn ti moman, me zot pa donn vre boner. Sa pa fer Bondye plezir ek sa kapav mark konsyans enn dimunn. (1 Tesalonisyin 4:3-5) Gayn relasyon sexyel andeor maryaz kapav fer enn dimunn trap SIDA uswa bann lezot maladi ki trape par relasyon sexyel. Enn rapor medikal dir: “Finn estime ki dan lemond antye, tulelane plis ki 250 milyon dimunn trap blenorazi, ek apepre 50 milyon trap sifilis.” Ena usi problem bann zennfi ki tom ansint alor ki zot pa ti anvi. Dapre rapor Federasyon Internasyonal Planifikasyon Familyal, atraver lemond plis ki 15 milyon zennfi ki ena ant 15 ek 19 an tom ansint tulelane, ek enn tyer parmi zot fer lavortman. Enn letid finn montre ki zis dan enn peyi Lafrik, 72 pursan bann tifi mor sirtu akoz bann konplikasyon lavortman. Sertin parmi bann ki fer bann vis sexyel kapav pa gayn okenn maladi, uswa kapav pa tom ansint. Me, zot moral afekte. Buku perdi respe pu zot mem ek zot degut zot mem.

13. Ki bann lezot problem ladilter provoke, ek ki pe atann bann ki kontinye fer bann vis sexyel ek ladilter?

¹³ Mem si kapav pardonn ladilter, Labib permet enn konzwin inosan demann divors, si li swete. (Matye 5:32; konpar ar Osea 3:1-5.) Kan enn move kondwit sexyel kumsa kas enn maryaz, sa les bann tras lor moral konzwin inosan la ek lor bann zanfan. Pu ki tu mars byin dan fami, Parol Bondye dir byin ki zizman Bondye pu vinn lor bann ki fer bann vis sexyel ek ladilter ek ki pa repanti. Pa fini, Labib montre klerman ki bann ki ena enn move kondwit sexyel “pa pu gayn rwayom Bondye.”—Galat 5:19, 21.

“PA FER PARTI DAN LEMOND”

14. (a) Ki bann form idol bann ki viv kuma Bondye demande, bizin rezete? (b) Ki direksyon Zan 17:14 ek Izai 2:4 done?

¹⁴ Bann ki ule fer Bondye plezir ek zwir bann benediksyon Rwayom, bizin pa ador okenn form idol. Labib montre ki pa bon fer bann zimaz pu adore, mem bann zimaz Kris, uswa bann zimaz so mama, Mari. (Egzod 20:4, 5; 1 Zan 5:21) Akoz sa mem, bann Kretyin pa ador stati, lakrwa ek bann zimaz. Zot evit lezot form idol ki paret surnwa, kuma salye pavyon ek sant bann sante ki donn bann nasyon laglwar. Kan fors zot pu fer sa bann kitsoz la, zot mazinn bann parol ki Zezi ti dir Satan: “Zeova, to Bondye ki to bizin adore, ek ar Li tusel ki to bizin rann enn servis sakre.” (Matye 4:8-10) Zezi finn dir ki so bann disip “pa fer parti dan lemond.” (Zan 17:14) Sa vedir ki zot pa pran par dan okenn zafer politik, ek zot viv dan lape an armoni avek seki Izai 2:4 dir: “Li [Bondye Zeova] pu rann zizman parmi bann nasyon ek li pu met bann kitsoz an ord konsernan buku lepep. Ek zot pu bizin forz zot lepe an lam ki tras siyon ek zot pik an sizay. Okenn nasyon pa pu lev lepe kont enn lot nasyon, ni zot pu aprann lager ankor.”

15. Ki ete Gran Babilonn, ek pu sorti ladan, ki buku nuvo etidyan Labib fer?

¹⁵ “Pa fer parti dan lemond” vedir usi kup tu kontak avek “Gran Babilonn,” pwisans mondyal fos relizyon. Ladorasyon sal ki egziste zordi ti kumanse dan ansyin Babilonn; li finn ena enn move linflyans spirityel lor bann dimunn partu lor later. “Gran Babilonn” reprezant tu bann relizyon ki ena bann lanseynman ek bann pratik ki pa an akor avek konesans Bondye. (Revelasyon 17:1, 5, 15) Enn adorater Zeova pa pu angaz li dan bann aktivite ki kont so lafwa, li pa pu partisip dan ladorasyon bann lezot relizyon, ni li pu partisip dan okenn kitsoz ki ena enn rapor avek Gran Babilonn. (Nonm 25:1-9; 2 Korintyin 6:14) Akoz sa mem, buku nuvo etidyan Labib avoy enn let dan lorganizasyon relizye kot zot ti ete, pu fer kone ki zot pe retir zot. Sa finn rapros zot ar Bondye, parey kuma Li ti promet: “‘Alor, sorti parmi zot, ek res separe ar zot,’ sa mem seki Zeova pe dir, ‘ek aret tus kitsoz malprop’; ‘ek mo pu akeyir zot.’” (2 Korintyin 6:17; Revelasyon 18:4, 5) Eski pa sa mem ki u vremem anvi, ki nu Papa ki dan lesyel aksepte u?

KUMA KONSIDER BANN FET KI FER TULELANE

16. Kifer eski bann vre Kretyin pa selebre Nwel?

¹⁶ Kan nu viv kuma Bondye demande, nu libere ar bann fet lemond ki avek letan vinn enn pwa. Par egzanp, Labib pa indik dat egzak nesans Zezi. Ena kapav dir avek sirpriz, ‘Mo ti panse Zezi finn ne le 25 Desam!’ Me li inposib parski li finn mor ver mwa Mars-Avril lane 33 N.L., alor ki li ti ena trant-trwa zan edmi. Anplis, zur so nesans, bann berze “ti pe viv deor anplener ek zot ti pe vey zot bann trupo pandan lanwit.” (Lik 2:8) Dan peyi Izrael, lafin Desam fer fre ek ena lapli, ek normalman pandan sa sezon la bann muton res andan pandan lanwit pu ki zot proteze kont liver. Par kont, pu bann Romin, 25 Desam li enn zur spesyal, zur nesans bondye soley. Plizir syek apre ki Zezi ti vinn lor later, bann vre Kretyin aposta finn asosye sa dat la avek nesans Kris. Akoz sa, bann Kretyin pa selebre Nwel, ni okenn fet ki baze lor bann fos krwayans relizye. Parski zot latasman li zis pu Zeova, zot pa fer okenn fet ki ador bann dimunn uswa bann nasyon.

17. Kifer eski bann ki viv kuma Bondye demande pa fer laniverser, ek kifer malgre sa, bann zanfan Kretyin zot ere?

¹⁷ Labib mansyonn zis de laniverser nesans, laniverser de zom ki pa ti servi Bondye. (Zenez 40:20-22; Matye 14:6-11) Pwiski Labib pa donn dat nesans zom parfe Zezi, kifer eski nu bizin donn linportans laniverser bann dimunn inparfe? (Eklezyast 7:1) Byinsir, bann paran ki viv kuma Bondye demande pa atann enn zur spesyal pu montre lamur pu zot zanfan. Enn tifi Kretyin, ki ena 13 an finn fer sa remark la: “Mwa ek mo fami, nu pas bann bon letan ansam. . . . Mo byin pros avek mo bann paran, ek kan bann lezot zanfan demann mwa kifer mo pa fer bann fet, mo dir zot ki tulezur enn fet pu mwa.” Enn zenn Kretyin 17 an finn dir: “Dan nu lakaz, nu donn kado tutlong lane.” Gayn plis lazwa kan donn bann kado sirpriz.

18. Ki selebrasyon Zezi finn donn so bann disip lord pu selebre tulelane, ek ki sa rapel nu?

¹⁸ Pu bann ki viv kuma Bondye demande, ena enn zur spesyal ki zot selebre tulelane. Zot selebre Repa Diswar Senyer, ki suvan apel Selebrasyon an Memwar lamor Kris. Zezi ti donn so bann disip lord konsernan sa selebrasyon la: “Kontiyn fer sa an mo memwar.” (Lik 22:19, 20; 1 Korintyin 11:23-25) Kan Zezi ti selebre premye fwa sa repa la, lanwit le 14 Nisan, 33 N.L., li ti servi dipin san lelvin ek divin ruz, ki reprezant so lekor imin ek so disan parfe. (Matye 26:26-29) Bann Kretyin swazire avek lespri sin Bondye ki manz sa dipin ek bwar sa divin la. Zot finn rant dan enn nuvo lalyans, enn lalyans pu Rwayom, ek zot ena lesperans pu al viv dan lesyel. (Lik 12:32; 22:20, 28-30; Romin 8:16, 17; Revelasyon 14:1-5) Me selman, tu bann ki asiste sa selebrasyon la, le 14 Nisan dapre kalandriye Zwif, zot tir profi. Sa fer zot rapel lamur ki Bondye Zeova ek Zezi Kris finn montre par sakrifis ranson ki kuver nu pese, ek ki donn tu bann ki ena faver Bondye, posibilite pu viv pu tuletan.—Matye 20:28; Zan 3:16.

TRAVAY EK DISTRAKSYON

19. Ar ki problem bann Kretyin bizin fer fas pu zot gayn zot lavi?

¹⁹ Bann vre Kretyin bizin travay dir pu zot gayn seki zot bizin. Kan bann sef fami fer sa, zot satisfe. (1 Tesalonisyin 4:11, 12) Byinsir, si travay enn Kretyin pa an akor avek Labib, li pa pu truv lazwa. Li vre ki defwa li difisil pu enn Kretyin truv enn travay ki an armoni avek bann prinsip Labib. Par egzanp, ena patron servi sertin so bann anplwaye pu anbet bann kliyan. Me, lot kote ena patron pre pu fer bann konsesyon pu respekte konsyans enn anplwaye onet, parski zot pa anvi perdi enn anplwaye ki zot fer konfyans. Me, dan ninport ki sityasyon u ete, u kapav sir ki Bondye pu beni u bann zefor pu truv enn travay ki fer u gard enn konsyans prop.—2 Korintyin 4:2.

20. Kifer eski nu bizin byin konn swazir nu bann distraksyon?

²⁰ Pwiski Bondye anvi ki nu ere, nu bizin konn ekilibre nu travay avek distraksyon, kot nu kapav repoze ek distrer nu. (Mark 6:31; Eklezyast 3:12, 13) Lemond Satan propoz bann distraksyon ki depler Bondye. Me, pu fer Bondye plezir, nu bizin byin swazir bann liv ki nu lir, bann program radyo ek lamizik ki nu ekute, bann konser, bann fim, bann pyes teat, bann program televizyon ek bann kaset video ki nu gete. Si avan, nu bann distraksyon pa ti an akor avek bann warning ki nu truve dan Deteronom 18:10-12, Psom 11:5, ek Efezyin 5:3-5, asterla nu pu fer bann sanzman ki bizin pu nu fer Bondye plezir ek pu nu ere.

RESPE PU LAVI EK DISAN

21. Kuma eski respe pu lavi bizin inflyans nu lopinyon lor lavortman, ek usi nu bann labitid ek nu kondwit?

²¹ Pu konn vre boner, nu bizin, parey kuma Zeova, konsider lavi kuma sakre. So Parol defann nu fer krim. (Matye 19:16-18) Avredir, Lalwa ki Bondye ti donn Izrael montre ki lavi enn tibaba ki pankor ne ena buku valer devan lizye Bondye—li pa enn kitsoz ki kapav detrir. (Egzod 21:22, 23) Akoz sa, nu bizin pa konsider lavi kuma enn kitsoz san valer. Pu sa, fode pa nu servi taba, gat nu lekor avek lezot ladrog uswa lalkol, uswa ankor pran bann risk initil. Fode pa nu angaz nu dan bann aktivite ki met nu lavi uswa lavi lezot an danze, ek fode pa nu refiz pran bann prekosyon sekirite, pu ki nu pa responsab lamor lezot dimunn.—Deteronom 22:8.

22. (a) Ki Bondye panse lor disan ek fason ki servi li? (b) Disan kisannla kapav vremem sap lavi?

²² Zeova ti dir Noe ek so fami ki disan reprezant nam, uswa lavi. Donk, Bondye ti defann zot manz disan. (Zenez 9:3, 4) Pwiski nu bann desandan Noe, sa lalwa la aplik usi ar nu. Zeova ti dir bann Izraelit ki zot ti bizin vers disan lor later, ek zot pa ti gayn drwa servi sa dan lezot fason. (Deteronom 12:15, 16) Lord ki bann Kretyin premye syek ti gayne, ti rapel zot lalwa Bondye lor disan: “Pa pran . . . disan.” (Akt 15:28, 29) Parski lavi sakre, bann dimunn ki viv kuma Bondye demande pa aksepte ki dokter met disan ar zot, mem si lezot insiste ki bizin fer sa pu sap lavi. Bann Temwin Zeova aksepte bann lezot tretman ki vremem efikas, ek kumsa zot protez zot usi kont bann danze ki ena kan met disan. Bann Kretyin kone ki zis disan ki Zezi finn verse kapav vremem sap lavi. Si nu ena lafwa dan sa disan la, nu kapav gayn pardon pu nu bann pese ek gayn usi posibilite pu viv pu tuletan.—Efezyin 1:7.

23. Ki bann rekonpans u kapav gayne si u viv kuma Bondye demande?

²³ Wi, li vre ki, pu viv kuma Bondye demande, sa demann zefor. Bann manb u fami uswa u bann kamarad pros kapav bufonn u. (Matye 10:32-39; 1 Pyer 4:4) Me, bann rekonpans ki u pu gayne depas tu bann leprev ki u pe bizin siporte. U pu ena enn konsyans prop ek u pu zwir enn bon lamitye avek bann adorater Zeova. (Matye 19:27, 29) Pa fini, u pu kapav viv pu tuletan dan nuvo lemond lazistis ki Bondye finn promet nu. (Izai 65:17, 18) Li enn lazwa pu viv an akor avek bann konsey Labib, ek kumsa fer leker Zeova kontan! (Proverb 27:11) Wi, pena dut ki nu ere kan nu viv kuma Bondye demande!—Psom 128:1, 2.

TESTE U KONESANS

Pu ki bann rezon nu ere kan nu viv kuma Bondye demande?

Ki bann sanzman ki nu bizin fer pu viv kuma Bondye demande?

Kifer eski u anvi viv kuma Bondye demande?

[Zimaz paz 124, 125]

Bann ki viv kuma Bondye demande, zot ere kan zot ekilibre zot bann aktivite spirityel avek letan ki zot pase pu distrer zot