“Parol Zeova Ti Pe Kontign Fane Partou ek Ti Pe Vinn Pli For”

1, 2. (a) Ar ki sitiasion danzere Pol ek so bann kamarad fer fas dan Efez? (b) Lor ki kitsoz nou pou koze dan sa sapit-la?

TANN enn ta tapaz dan bann lari Efez, enn lafoul dimounn pe kriye ek pe galoupe. Sa lafoul-la bien ankoler ek pe koumans proteste! Zot trap de zom ki pe vwayaz ansam avek Pol, ek trenn zot avek zot. Lor semin prinsipal sa lavil-la kot ena bann magazin, ena boukou dimounn. Enn sel kout tou sa bann dimounn-la zwenn sa lafoul-la, ek zot tou pran direksion teat anplener ki kapav akeyir 25,000 dimounn. Laplipar bann dimounn pa kone kifer lafoul pe proteste, me zot ena enn ti lide ki sa ena enn lien avek zot tanp ek dees ki zot bien kontan, Artemis. Zot koumans exsite ek kriye: “Artemis bann Efezien li vremem gran!”​—Zist. 19:34.

² Ankor enn fwa, Satan esey servi enn lafoul ki ankoler pou ki bann dimounn pa tann bon nouvel lor Rwayom Bondie. Me laviolans, se pa sel taktik ki Satan servi. Dan sa sapit-la, nou pou trouv bann diferan taktik ki Satan servi pou esey anpes bann frer ek ser dan premie siek prese, ek pou kas linite ki ena parmi zot. Me kitsoz pli inportan ki nou pou trouve, se ki tou so bann taktik fel, parski ‘dan enn fason extraordiner, parol Zeova kontign fane partou ek vinn pli for.’ (Zist. 19:20) Kifer sa bann Kretien-la pe reisi kontign prese? Parey kouma nou azordi, se gras-a led Zeova ki nou pe reisi kontign prese ek gard sa linite ki ena parmi nou la. Me parey kouma bann Kretien dan premie siek, nou bizin fer nou par. Gras-a lespri sin, nou kapav gagn bann kalite ki pou ed nou kontign prese. Me pou koumanse, anou get lexanp Apolos.

3, 4. Ki kitsoz Akila ek Prisil remarke lor Apolos, ek kouma zot ed li?

³ Pol inn fini koumans so trwaziem vwayaz misioner. Pandan ki li lor sime pou al Efez, enn Zwif ki apel Apolos rant dan Efez. Li sorti dan enn lavil ki boukou dimounn bien kone, Alexandri, ki trouv dan Lezip. Ena boukou bon kitsoz pou dir lor Apolos. Li enn bon orater, ek ‘li konn bien bann Lekritir.’ Anplis, li “bien devwe gras-a lespri sin.” Apolos koz avek bann Zwif ki dan sinagog avek boukou kouraz ek devouman.​—Zist. 18:24, 25.

⁴ Akila ek Prisil tann diskour ki Apolos fer. Zot extra kontan pou trouve ki li “ansegn bann kitsoz konsernan Zezi dan enn fason exakt.” Vremem seki li dir lor Zezi exakt. Me selman, Akila ek Prisil remarke ki ena sertin kitsoz ki Apolos pa kone. Li “konn zis batem Zan.” Akila ek Prisil zot enn koup ki fer bann latant, ek zot ena boukou limilite. Me kanmem sa, zot pa per Apolos parski li enn bon orater ek ena enn bon ledikasion. Okontrer, ‘zot amenn li ar zot ek explik li semin Bondie dan enn fason pli exakt.’ (Zist. 18:25, 26) Kouma sa zom ki enn bon orater ek ki ena enn bon ledikasion la reazir? Apolos montre enn parmi bann kalite pli inportan ki enn Kretien bizin ena: Limilite.

5, 6. Ki’nn ed Apolos pou vinn pli itil pou Zeova, ek ki nou aprann ar lexanp Apolos?

⁵ Apolos aksepte led ki Akila ek Prisil donn li, ek gras-a sa, li vinn enn pli bon serviter Zeova. Apre sa, Apolos al Akai ek laba li “bien ed” bann Kretien. Apolos rann enn bon temwaniaz ar bann Zwif dan sa rezion-la, ki persiste ki Zezi pa Lemesi ki Bondie ti promet. Lik dir: ‘Avek enn gran determinasion, li prouve dan enn fason kler ki bann Zwif dan lerer, ek li servi bann Lekritir pou montre zot ki Zezi limem Lekris.’ (Zist. 18:27, 28) Apolos enn vre benediksion! Avredir, li ede pou ki “parol Zeova” kontign vinn pli for. Ki nou kapav aprann ar lexanp Apolos?

⁶ Limilite se enn kalite bien inportan ki tou bann Kretien bizin ena. Sakenn parmi nou ena bann diferan kapasite. Kitfwa se enn kapasite ki natirel, ki nou’nn gagne par lexperyans, ouswa se enn kitsoz ki nou’nn aprann. Me selman, nou limilite bizin pli gran ki nou bann kapasite, sinon, nou bann kapasite pou vinn enn problem. Parski si nou pa fer atansion, nou pou vinn enn later kot lorgey pou pouse koumadir move-zerb. (1 Kor. 4:7; Zak 4:6) Si nou vremem ena limilite, nou pou konsider lezot kouma bann dimounn ki pli siperyer ki nou. (Fil. 2:3) Nou pa pou ankoler kan lezot koriz nou, ek nou pa pou rezet lansegnman ki nou gagne. Nou pa pou res atase avek nou bann prop lide kan nou trouve ki li pa an-akor avek direksion ki lespri sin pe done. Tanki nou fer zefor pou kontign ena limilite, Zeova ek so Garson pou kontign servi nou pou fer zot travay.​—Lik 1:51, 52.

 7. Kouma Pol ek Apolos zot enn bon lexanp pou nou konsernan limilite?

⁷ Limilite permet ki pena lespri konpetision. Eski to kapav mazine ki kantite Satan ti pou kontan kree divizion parmi bann Kretien dan premie siek? Satan ti pou bien kontan ki Apolos ek Pol, ki bann bon orater, koumans zalou zot kamarad ek lager pou kone kisann-la ki pli inportan dan lasanble! Li ti pou bien fasil ki sa de zom-la fer sa. Mem dan Korint, sertin Kretien ti koumans dir: ‘Mwa mo pou Pol, mwa mo pou Apolos.’ Eski Pol ek Apolos ti ankouraz sa kalite mantalite-la? Non! Avek limilite Pol ti rekonet ki Apolos ti fer boukou pou travay predikasion, ek li ti mem donn Apolos lezot travay pou fer. Apolos li, li ti swiv direksion ki Pol ti donn li. (1 Kor. 1:10-12; 3:6, 9; Tit 3:12, 13) Pol ek Apolos ti ena limilite ek ti travay bien ansam, ek zot vremem enn bon lexanp pou nou azordi!

 8. Ki sime Pol pran pou retourn Efez, ek kifer?

⁸ Pol ti promet ki li pou retourn Efez, ek li tini so promes.a (Zist. 18:20, 21) Me remarke, ki semin li pran pou al Efez. Dernie fwa ki nou trouv Pol, li dan Antios dan Siri. Pou al Efez li kapav pran semin ki pli kourt, setadir al Selesi ek pran enn bato pou al direk Efez. Me olie ki li fer sa, li ‘travers bann rezion ki lwin ar lamer.’ Sertin inn kalkile ki vwayaz ki Pol inn fer dan Zistwar Bann Zapot 18:23 ek 19:1 fer anviron 1,600 kilomet! Me kifer Pol swazir pou fer enn larout ki long ek difisil koumsa? Parski li ena lobzektif pou “fortifie tou bann disip.” (Zist. 18:23) Pol kone ki parey kouma so de premie vwayaz, so trwaziem vwayaz misioner pou demann li boukou zefor. Me pou li, sa vo lapenn ki li fer sa bann zefor-la. Azordi bann responsab sirkonskripsion ek zot madam ena mem latitid ki Pol. Nou vremem apresie zot lespri sakrifis ek lamour ki zot ena!

 9. Kifer enn group disip bizin repran batem, ek ki nou aprann avek zot lexanp?

⁹ Kan Pol ariv Efez, li zwenn omwin douz disip Zan Batis. Sa bann disip-la ti batize dan batem Zan ki ti nepli valid. Anplis, zot pa mem kone ki ete lespri sin. Pol explik zot kifer li inportan ki zot pran batem lor nom Zezi. Ek parey kouma Apolos, sa bann disip-la montre ki zot ena limilite ek ki zot anvi aprann plis. Apre ki zot inn pran batem lor nom Zezi, zot gagn lespri sin, ek bann don ki sorti kot Bondie. Wi, Zeova beni bann ki dispoze pou swiv bann nouvo direksion ki so lorganizasion done.​—Zist. 19:1-7.

10. Kifer Pol kit sinagog pou al dan lasal lekol, ek kouma nou kapav swiv so lexanp kan nou prese?

¹⁰ Enn lot bon kitsoz arive. Pol pres avek kouraz dan sinagog pandan trwa mwa. Mem si li “rezonn avek bann dimounn lor Rwayom Bondie dan enn fason konvinkan,” sertin fer latet dir ek koumans opoz zot ar Pol. Olie ki Pol perdi so letan ar bann ki “koz an mal lor Semin Bondie,” li pran bann dispozision pou al koz dan lasal lekol. (Zist. 19:8, 9) Bann ki anvi kontign aprann plis lor Rwayom Bondie bizin kit sinagog pou al dan lasal lekol. Kitfwa parey kouma Pol, nou osi nou pou bizin aret sertin konversasion kan nou trouve ki dimounn-la pa dispoze pou ekoute ouswa ki li pe zis anvi diskite. Ena ankor boukou dimounn sinser ki bizin tann sa mesaz ankourazan la!

11, 12. (a) Kouma Pol montre ki li travay dir ek ki li adapte li? (b) Kouma bann Temwin Zeova travay dir ek adapte zot kan zot prese?

¹¹ Kitfwa Pol ansegn dan lasal lekol toulezour, depi 11-er gramatin ziska 4-er tanto. (Get not pou letid pou Zistwar Bann Zapot 19:9, nwtsty-F.) Dan sa bann ler-la boukou dimounn abitie aret travay pou manze ek pou repoze parski fer bien so. Mazinn sa: Si Pol inn ansegn koumsa toulezour pandan de-z-an, kitfwa li’nn pas plis ki 3,000 lertan pou ansegne, seki fer 125 er par mwa.b Se enn lot rezon kifer parol Zeova pe kontign fane partou ek vinn pli for. Pol enn kikenn ki travay dir ek li pa ezite pou adapte li. Li adapte so program predikasion ar bann dimounn dan sa landrwa-la. Gras-a sa, ‘tou bann ki res dan provins Lazi, bann Zwif ek bann Grek toule-de, tann parol Lesegner.’ (Zist. 19:10) Wi, vremem Pol rann enn gran temwaniaz!

¹² Azordi osi, bann Temwin Zeova montre ki zot travay dir ek ki zot adapte ar bann dimounn. Nou fer zefor pou pres dan bann plas ek dan bann ler kot ena pli boukou dimounn. Nou prese lor sime, dan bazar, ek dan bann plas kot ena plis dimounn. Nou esey kontakte zot par telefonn ek par let. Ek kan nou prese lakaz-lakaz, nou fer zefor pou pres dan bann ler kot bann dimounn pou plis kot zot.

13, 14. (a) Ki Zeova ed Pol pou fer? (b) Ki erer bann garson Seva fer, ek ki mem erer bann swadizan Kretien fer azordi?

¹³ Apre sa, dan liv Zistwar Bann Zapot nou trouve kouma Zeova ed Pol pou fer “bann mirak extraordiner.” Bann dimounn mem servi bann latwal ek bann tabliye ki Pol mete pou geri bann dimounn. Gras-a sa osi, zot kapav tir bann move lespri lor bann dimounn.c (Zist. 19:11, 12) Laplipar dimounn trouv sa extraordiner ki pe kapav tir bann demon, me pa tou dimounn ki kontan.

¹⁴ Sertin ‘Zwif ki al dan diferan landrwa pou tir bann demon’ esey imit bann mirak ki Pol fer. Sertin parmi sa bann Zwif-la servi nom Zezi ek Pol pou esey tir bann demon. Lik koz lor set garson enn sef pret, ki apel Seva, ki esey fer sa zot osi. Me demon-la dir zot: “Mo konn Zezi ek mo konn Pol, me zot kisann-la zot ete?” Lerla, sa zom ki ena enn move lespri lor li la atak sa bann foser-la, li sot lor zot kouma enn zanimo sovaz, bles zot, ek fer zot galoup touni. (Zist. 19:13-16) Sa sitiasion-la montre dan enn fason kler ki Zeova ti donn Pol enn gran pouvwar, me ki Li pa ti donn sa, sa bann zom ki ti pe pratik enn fos relizion la. Azordi, ena bann milyon dimounn ki krwar ki pou fer Bondie plezir, li ase ki zot kriye nom Zezi, ouswa ki zot dir ki zot “Kretien.” Me parey kouma Zezi ti dir, se zis bann ki fer volonte so Papa, ki ena enn vre lespwar pou lavenir.​—Mat. 7:21-23.

15. Kan sa konsern bann pratik ek bann kitsoz ki ena enn lien avek bann move lespri, kouma nou kapav imit lexanp bann Efezien?

¹⁵ Kan bann dimounn tann dir kouma bann garson Seva inn imilie, zot koumans ena respe pou Bondie. Sa pous boukou pou vinn bann krwayan ek pou aret bann pratik ki ena enn lien avek bann move lespri. Bann Efezien pratik ek krwar dan mazik. Li normal pou zot pou zet bann sor, pou servi bann port-boner, ouswa mem pou resit bann inkantasion ki’nn ekrir dan bann liv. Boukou Efezien desid pou rasanble zot bann liv mazik ek pou bril zot an piblik, mem si zordi sa reprezant bann milyon roupi.d Lerla, ‘dan enn fason extraordiner, parol Zeova kontign fane partou ek vinn pli for.’ (Zist. 19:17-20) Se vremem enn gran viktwar pou Zeova ek so bann vre adorater, lor fos relizion ek bann pratik ki ena lien avek bann move lespri! Sa bann dimounn fidel la enn bon lexanp pou nou. Azordi, nou antoure avek bann dimounn ki fer bann kitsoz ki ena enn lien avek bann move lespri. Si nou remarke ki nou ena enn kitsoz ki ena enn lien avek bann move lespri, nou bizin fer parey kouma bann Efezien, nou bizin tir li deswit! Anou res lwin ar bann kitsoz ki ena enn lien avek sa pratik bien degoutan la.

16, 17. (a) Dekrir kouma Demetriyis koumans fer bann dimounn proteste dan Efez. (b) Kouma bann Efezien montre ki zot bann fanatik?

¹⁶ Aster-la, nou pou al koz lor enn taktik Satan, ki Lik dekrir kouma “enn gran boulversman konsernan Semin Bondie.” Kan Lik servi sa bann mo-la, li pa pe exazere.e (Zist. 19:23) Se Demetriyis enn zouvriye ki travay larzan ki kree sa problem-la. Pou koumanse, li rapel bann lezot artizan ki zot depann lor lavant bann zidol pou gagn kas. Apre sa, li dir zot ki mesaz ki Pol pe prese, pa bon pou zot biznes parski bann Kretien pa ador bann zidol. Li kone osi ki bann dimounn ki pe ekout li, bien fier zot lavil ek zot pei. Lerla, li averti zot ki si bann dimounn ekout Pol, bann-la pou konsider zot dees Artemis ek so tanp “kouma enn kitsoz san valer.”​—Zist. 19:24-27.

¹⁷ Demetriyis reisi konvink bann dimounn pou pa ekout mesaz Pol. Bann zouvriye ki travay larzan ankoler ek koumans kriye: “Artemis bann Efezien li vremem gran!” Bann dimounn dan lavil dan konfizion ek koumans proteste. Zot fer enn latroupman parey kouma inn dekrir dan koumansman sa sapit-la.f Pol, ki ena boukou kouraz, anvi al dan teat anplener pou koz ar lafoul, me bann disip sipliy li pou pa met so lavi an danze. Enn zom ki apel Alexand, ki enn Zwif, debout devan lafoul ek esey koz avek zot. Kitfwa li pe fer sa pou explik diferans ki ena ant bann Zwif ek sa bann Kretien-la. Me sa enn gaspiyaz, parski sa lafoul-la pa ekout so bann explikasion. Kan bann-la trouve ki li enn Zwif, zot anpes li koze ek zot kontign kriye “Artemis bann Efezien li vremem gran!” ek zot fer sa pandan anviron de-z-er-d-tan. Azordi osi, ena bann fanatik relizie, ek souvan zot azir dan enn fason ki pa lozik ditou.​—Zist. 19:28-34.

18, 19. (a) Kouma lemer Efez kalme lafoul? (b) Parfwa, kouma bann lotorite inn protez pep Zeova, ek ki nou bizin fer pou gagn sa proteksion-la?

¹⁸ Finalman, lemer lavil fer lafoul res trankil. Se enn zom ki kalm ek ki pran bann bon desizion bien vit. Li rasir lafoul ki zot dees ek zot tanp pa an danze akoz sa bann Kretien-la, ek ki Pol ek so bann konpagnon pa’nn fer nanye demal kont tanp Artemis, ek ki ena enn sistem ki’nn etabli pou regle sa kalite problem-la. Seki pli inportan, li rapel lafoul ki zot kapav gagn problem avek Rom parski sa kalite latroupman-la ilegal. Apre sa, li fer lafoul ale. Seki sa lemer-la dir ena sans ek rezonab, alor sa kalme lafoul.​—Zist. 19:35-41.

¹⁹ Se pa premie fwa ki enn ofisie ki rezonab protez bann disip Zezi, ek sa pa pou dernie osi. Avredir, dan enn vizion ki lapot Zan ti gagne konsernan bann dernie zour, li ti trouv “later,” setadir bann dimounn ouswa bann group bien pwisan dan lemond, aval “larivier,” setadir bann persekision ki Satan souleve kont bann disip Zezi. (Rev. 12:15, 16) Ek se seki finn arive. Dan boukou ka, nou trouve kouma bann ziz ki rezonab finn protez drwa ki bann Temwin Zeova ena pou zwenn ansam pou zot ladorasion ek pou pres bon nouvel avek lezot dimounn. Me biensir, enn lot rezon inportan kifer bann ziz inn protez nou bann drwa osi, se parski nou ena enn bon konportman. Aparaman, Pol so bon konportman finn permet li gagn respe sertin ofisie gouvernman dan Efez, ek zot pa anvi ki li met so lavi an danze. (Zist. 19:31) Alor, ki nou osi nou lonette ek nou bon konportman permet nou gagn respe bann dimounn ki nou zwenn! Nou pa kone ki kantite bon kitsoz kapav arive gras-a nou bon konportman.

20. (a) Ki to resanti kan to trouve kouma parol Zeova ti pe vinn pli for dan premie siek ek ki azordi osi li pe vinn pli for? (b) Ki to determine pou fer?

²⁰ Eski li pa extraordiner pou trouve kouma dan premie siek “parol Zeova ti pe kontign fane partou ek ti pe vinn pli for”? Li extraordiner osi pou trouve kouma dan nou lepok, Zeova finn permet nou gagn bann mem kalite viktwar. Eski twa osi to anvi ena to par dan sa kalite laviktwar-la? Si wi, swiv bann lexanp ki nou’nn examine. Kontign kiltiv limilite, pa tarde pou swiv bann direksion ki lorganizasion Zeova done, kontign travay dir, rezet bann pratik ki ena enn lien avek bann demon, ek fer tou seki to kapav pou rann enn bon temwaniaz gras-a to lonette ek to bon konportman.