Kouma Lavi Finn Aparet?

Bondie “tomem lasours lavi.” (Psom 36:9) Eski ou dakor avek seki sa verse-la dir? Sertin dimounn panse ki lavi finn aparet enn kout koumsa. Si sa li vre, savedir ki nou osi nou finn aparet enn kout koumsa. Me si se Zeova ki’nn kree lavi, pena dout ki Li ti ena enn bon rezon pou fer sa.a Dan sa leson-la, nou pou gete seki Labib dir lor kouma lavi finn aparet ek kifer li lozik pou krwar sa.

1. Kouma liniver finn aparet?

Labib dir: “O-koumansman, Bondie ti kree lesiel ek later.” (Zenez 1:1) Laplipar bann siantis rekonet ki liniver finn ena enn koumansman. Kouma Bondie finn kree liniver? Li’nn servi so “lafors aktif,” setadir so lespri sin, pou fer tou seki existe dan liniver, parmi ena bann galaxi, bann zetwal, ek bann planet.​—Zenez 1:2.

2. Kifer Bondie finn kree later?

Zeova ‘pa finn kree later pou nanye, me Li finn kree li pou ki dimounn res lor la.’ (Izai 45:18) Li’nn kree later dan enn zoli fason pou ki bann dimounn kapav ena tou seki zot bizin pou viv pou touletan. (Lir Izai 40:28; 42:5.) Bann siantis dir ki later li enn plas spesial. Se sel planet ki ena tou seki bizin pou ki bann dimounn viv lor la.

3. Ki diferans ena ant bann imin ek bann zanimo?

Kan Zeova ti fini kree later, Li’nn kree bann plant ek bann zanimo. Apre sa, “Bondie ti kree zom dan so resanblans.” (Lir Zenez 1:27.) Bondie finn kree nou dan so resanblans, alor nou diferan avek tou seki Bondie inn kree, parski nou kapav imit bann kalite ki Bondie ena, kouma lamour ek lazistis. Li’nn osi kree nou avek kapasite pou aprann bann lang, pou apresie bann zoli kitsoz, ek lamizik. Anplis nou, nou kapav ador Bondie ek vinn so kamarad, alor ki bann zanimo pa kapav fer sa.

ANOU GET INPE PLIS

Anou get bann prev ki montre nou ki lavi finn kree ek ki nou kapav krwar seki Labib dir konsernan kreasion. Nou pou gete osi kouma nou kapav aprann plis lor Bondie, gras-a bann kalite ki bann dimounn ena.

4. Lavi finn kree

Bann dimounn gagn laglwar pou bann kitsoz ki zot inn kopie lor lanatir. Alor kisannla bizin gagn laglwar pou bann kitsoz ki ena dan lanatir? Zwe VIDEO-la, ek apre sa, get sa kestion-la ansam:

VIDEO: Krwar dan Bondie (2:43)

• Ki bann dimounn finn kopie lor lanatir?

Pou ki ena enn lakaz, bizin ena enn dimounn pou fer so plan ek pou ranz li. Me kisannla inn fer sa pou tou bann kitsoz ki ena dan lanatir? Lir Ebre 3:4, ek apre sa, get sa bann kestion-la ansam:

• Ki kitsoz ou trouv extraordiner dan lanatir?

• Eski li lozik pou krwar ki liniver ek tou seki ena dan liniver finn kree par enn kikenn? Kifer ou pans sa?

Eski ou ti kone?

Lor jw.org ou kapav trouv bann lartik ek bann video ki koz lor sa size-la dan seri lartik “Eski Inn Kree Sa Ouswa Non?” ek “Lopinion lor Lorizinn Lavi”

“Biensir, sak lakaz li konstrir par enn kikenn, me sa kikenn ki’nn konstrir tou kitsoz la se Bondie.”

5. Seki Labib dir lor kreasion li vre

VIDEO: Eski Finn Kree Liniver?​—Extre (3:51)

• Eski Labib ansegn nou ki later ek tou seki existe lor la, finn kree dan sis zour 24-er?

• Eski li lozik pou krwar seki Labib rakonte lor kreasion? Kifer ou pans sa?

Lir Zenez 1:1, ek apre sa, get sa kestion-la ansam:

• Bann siantis dir ki liniver finn ena enn koumansman. Eski seki zot dir li an-akor avek seki ou fek lir dan Labib?

Sertin dimounn demann zotmem si Bondie finn servi levolision pou kree lavi. Lir Zenez 1:21, 25, 27, ek apre sa, get sa kestion-la ansam:

• Eski Labib ansegne ki Bondie finn servi levolision pou kree bann pwason, bann lezot zanimo, ek bann dimounn? Ouswa eski Li finn kree bann diferan “form lavi”?

6. Pena okenn lezot kreasion ki parey kouma bann dimounn

Bann dimounn zot bien diferan ar bann zanimo ki Zeova inn kree. Lir Zenez 1:26, ek apre sa, get sa kestion-la ansam:

• Nou kapav manifeste bann kalite kouma lamour ek konpasion parski nou finn kree dan resanblans Bondie. Ki sa aprann nou lor personalite Bondie?

SEKI NOU’NN APRANN

Zeova inn kree liniver ek tou seki existe.

Eski Ou Rapel?

• Dapre Labib, kouma liniver finn aparet?

• Pou kree tou bann form lavi, eski Bondie finn servi levolision ouswa Li’nn kree tou kitsoz?

• Kifer nou kapav dir ki pena okenn lot kreasion ki parey kouma bann dimounn?

DEKOUVER

Kreasion montre ki ena enn Kreater.

« Qu’enseigne la nature ? » (Leve!, Septam 2006, an Franse)

Gete kouma enn paran kapav ansegn so zanfan seki Labib dir lor kreasion.

‘Zeova . . . Inn Kree Tou Kitsoz’ (2:37)

Eski levolision li an-akor avek seki Labib dir?

“Eski Bondie Finn Servi Levolision pou Kree Bann Diferan Form Lavi?” (Lartik lor jw.org)

Eski bann fosil ouswa bann lexperyans ki bann siantis inn fer montre ki lavi finn kree ouswa li finn aparet enn kout koumsa?

Cinq questions à se poser sur l’origine de la vie (Brosir)