LESON 11

Ou Kapav Gagn Bann Bienfe Gras-a Ou Lektir Labib

Version Inprime

Eski ou finn deza gagn enn gran proze ek ou pa kone kotsa pou koumanse? Kitfwa pou ki li pli fasil, ou’nn kas proze-la an plizir parti. Li parey osi kan nou koumans lir Labib. Kitfwa ou pe demann oumem: ‘Kotsa mo pou koumanse?’ Dan sa leson-la, nou pou examinn de-trwa ti kitsoz sinp ki kapav ed ou pou apresie ou lektir Labib ek ou letid Labib.

1. Kifer nou bizin pran labitid pou lir Labib?

Enn dimounn ki pran labitid pou lir Labib, ouswa “lalwa LESEGNER,” li pou ere ek li pou reisi dan so lavi. (Lir Psom 1:1-3.) Pou koumanse, ou kapav lir Labib pandan de-trwa minit sak zour. Plis ou pran labitid pou lir Labib, plis ou pou apresie ou lektir Labib.

2. Kouma ou lektir Labib kapav ed ou?

Pou ki nou gagn bann bienfe avek nou lektir Labib, nou bizin fer enn ti poz ek reflesi lor seki nou’nn lir. (Psom 119:97) Amezir ki ou lir Labib, ou kapav poz oumem sa bann kestion-la: ‘Ki sa aprann mwa lor Zeova? Kouma mo kapav aplik sa dan mo lavi? Kouma mo kapav servi sa bann verse-la pou ed lezot?’

3. Kouma ou kapav organiz ou pou lir Labib?

Eski ou gagn linpresion ki ou pa gagn letan pou lir Labib? Boukou parmi nou gagn sa problem-la. Esey servi ou letan “dan meyer fason posib.” (Efezien 5:16, NW) Ou kapav fer sa kan ou prevwar enn moman presi pou lir ou Labib sak zour. Sertin dimounn prevwar pou lir zot Labib boner gramatin. Lezot fer li pandan lazourne, kitfwa pandan zot poz dezene. Ena lezot ankor ki lir zot Labib aswar avan ki zot al dormi. Ek ou, ki pli bon moman pou ou?

ANOU GET INPE PLIS

Ou pou aprann kouma ou kapav fer ou lektir Labib vinn pli interesan. Ou pou aprann osi kouma ou kapav prepar bien ou letid Labib pou ki ou kapav gagn bann bienfe gras-a sa letid-la.

Zimaz: Enn garson aprann pou kontan enn manze. 1. Garson-la pe zwe ar so manze. 2. Kan li inpe pli gran, li pe manz sa manze-la. 3. Kan li vinn inpe pli gran, garson-la kontan pou manz sa manze-la. — Parey kouma ou aprann pou apresie enn manze ki zame ou’nn goute avan, ou kapav aprann pou apresie ou lektir Labib

4. Aprann pou apresie ou lektir Labib

Kitfwa li pa fasil pou koumans lir Labib. Me selman, ou kapav aprann pou apresie ou lektir Labib parey kouma ou aprann pou apresie enn manze ki zame ou’nn goute avan. Lir 1 Pier 2:2, ek apre sa, get sa kestion-la ansam:

Eski ou panse ki si ou lir ou Labib toulezour, sa pou ed ou pou plis apresie ou lektir Labib?

Zwe VIDEO-la pou trouve kouma sertin zenn finn aprann pou kontan lir Labib. Apre sa, get sa bann kestion-la ansam:

VIDEO: Bann Zenn Aprann pou Kontan Labib (5:33)

Dan sa video-la, ki difikilte bann zenn finn gagne?
Ki finn ed zot pou ki zot kapav kontign zot lektir Labib?
Ki zot finn fer pou ki zot lektir Labib vinn pli interesan?

De-trwa lide ki pou ed ou koumans ou lektir Labib:

Swazir enn tradiksion ki ou kapav fer konfians ek ki fasil pou konpran. Esey lir Tradiksion Lemond Nouvo. Bann Lekritir Sakre.
Lir bann verse Labib ki interes ou. Par exanp, get lankadre “Mo Koumans Lir Labib.”
Ekrir kotsa ou’nn arive dan ou lektir. Servi lankadre “Mo Lektir Labib” ki ena dan sa liv-la.
Servi aplikasion JW Library^®. Gras-a sa aplikasion-la, ninport ki kote ou ete, ou pou kapav lir ek ekout Labib, ki li lor ou portab ouswa lor enn lot aparey elektronik.
Servi ti brosir Enn Gid pou Pli Konpran Parol Bondie. Ladan ena bann map ek bann lankadre ki pou fer ou lektir Labib vinn pli interesan.

5. Prepar ou letid Labib

Lir Psom 119:34, ek apre sa, get sa kestion-la ansam:

Kifer li bon ki ou priye avan ki ou lir ou Labib ouswa prepar ou letid?

Kouma ou kapav gagn plis bienfe sak fwa ki ou fer ou letid? Kan ou pe prepar enn leson, esey sa metod-la:

Lir premie parti leson-la.
Rod ek lir bann verse, ek esey konpran ki lien zot ena avek size lor ki ou pe etidie.
Soulign bann mo ouswa bann fraz ki reponn sak kestion; sa pou ed ou kan ou get leson-la avek ou ansegnan.

Zimaz: Enn madam pe prepar so letid. A. Li pe lir premie paz enn leson. B. Li pe rod ek lir bann verse ki’nn mansione. C. Li pe soulign bann mo ek bann fraz inportan dan leson-la.

Eski ou ti kone?

Bann Temwin Zeova finn servi diferan tradiksion Labib. Me selman, zot bien kontan servi Tradiksion Lemond Nouvo. Bann Lekritir Sakre parski li exakt, li kler, ek ena nom Bondie dan sa tradiksion-la.—Get lartik lor jw.org “Eski Bann Temwin Zeova Ena Zot Prop Labib?”

SERTIN DIMOUNN DIR: “Mo pena letan pou lir ek etidie Labib.”