Li Ti Mars Avek Bondie

ENOK ti diferan ar bann dimounn ki ti dan so lepok, ek akoz sa, li ti santi li tousel. Se zis lor li tousel dan so lepok, ki Labib dir: “Enok ti kontign mars avek vre Bondie.” Kouma enn sinp imin lor later ti kapav mars ar Bondie? Ek azordi, ki kitsoz nou kapav aprann ar kouraz ki Enok ti ena?

Enok ti mars ar vre Bondie dan de fason: (1) Li ti refiz les li inflianse par bann dimounn ki ti bien move, ek (2) li ti fer seki bon. Li ti refiz pou azir kouma bann dimounn dan so lepok ki pa ti pe fer Bondie plezir. Enok ti setiem zenerasion depi Adan ek Ev; Mem si Adan ti bien vie, li ti ankor vivan dan lepok Enok. (Get tablo “Depi Lepok Enok Ziska Lepok Bann Ziz.”) Apre ki Adan ek Ev ti dezobeir Bondie, preske tou imin ti swiv zot lexanp. Zot garson Kain ti touy so prop frer Abel, ki ti premie dimounn ki ti montre lafwa dan Zeova. Sertin bann desandan Kain ti violan parey kouma li, kitfwa mem pli pir ki li. (Zen. 4:23, 24) Avek kouraz, Enok pa ti les sa bann dimounn violan la inflians li. Li ti kontign res enn zom ki kontan lape, ek sa ti fer Bondie plezir.

Enn tigit avan ki Enok ne, “bann dimounn ti koumans kriye nom Zeova.” (Zen. 4:26) Zot pa ti respekte nom Zeova ek zot ti servi so nom pou ador Li dan enn move fason. Me Enok pa ti fer kouma zot, li ti kontan ek li ti respekte nom Zeova ki sin. Alor, li kler ki Enok ti diferan ar bann dimounn ki ti viv dan so lepok.

Enok ti fer Zeova plezir kan li ti fer seki Li ti demann li fer. Pou ki li kapav fer sa, li ti bizin ankor plis kouraz. Kifer? Parski Zeova ti anvi ki li pres enn mesaz ar bann move dimounn ki ti otour li. Ala mesaz-la: “Gete! Zeova ti vini avek plizir dizenn milye so bann anz ki sin pou amenn enn zizman kont tou dimounn, ek pou kondann tou bann ki pena okenn respe pou Bondie akoz tou bann move aksion ki zot ti fer, ek akoz tou bann kitsoz sokan ki sa bann move dimounn la ti dir kont li.”

Remarke ki fason ki Enok ti anons sa mesaz-la, sa ti koumadir Zeova ti fini ziz sa bann dimounn-la. Sa ti montre osi ki bann parol Enok ti pou vremem realize. Bann lexpresion ki Enok ti servi ti montre ki kantite Zeova ti ankoler ar fason ki bann dimounn ti pe azir. Enok ti servi bann lexpresion kouma “move aksion,” “pena respe pou Bondie,” ek “bann kitsoz sokan.” Kan bann dimounn ti tann sa bann parol-la, sirman zot ti bien ankoler. Me avek kouraz, Enok ti dir zot seki Zeova ti anvi zot tande.

Labib pa dir exakteman kouma bann dimounn ti reazir, me nou konpran ki ti ariv enn moman kot Enok so lavi ti an danze. Kifer nou dir sa? Parski Labib dir: “Apre sa, ti nepli trouv li parski Bondie ti pran li.” Ki ti arive? Li paret ki bann move dimounn ti pe persekit Enok. Selman, Zeova pa ti les zot fer Enok dimal ouswa touy li. Parski Zeova ti kontan Enok, Li ti “pran li” ek ti fer li dormi dan lamor. Koumsa, personn pa ti pou kapav fer li dimal ek Zeova ti pou gard li dan so memwar. Wi, dan lavenir Enok pou resisite.

Selman, avan so lamor, Zeova ti donn Enok enn kado spesial. Labib dir “avan ki ti transfer [Enok], li ti gagn temwaniaz ki li’nn fer Bondie vremem plezir.” Kitfwa dan enn vizion, Zeova ti montre Enok bann benediksion ki li ti pou gagne dan lavenir, setadir ki li ti pou viv anpe lor later ki pou vinn enn paradi! Avan ki Enok mor, li ti sir ki Zeova ti kontan li ek ti beni li, parski li ti ena enn lafwa for ek enn gran kouraz!

Lir sa zistwar-la dan Labib:

• Zenez 5:21-24

• Ebre 11:5

• Zid 14, 15

Kouma to pou reponn?

Dan ki diferan fason Enok ti montre kouraz?

Anou Get Inpe Plis

1. 1. Kan Labib dir ki “bann dimounn ti koumans kriye nom Zeova,” ki sa vedir? (Zen. 4:26; w01 15/9 29 ¶3-wcgr)

   To repons

2. 2. Enok ti premie profet Bondie. Kouma li ti reisi asim so responsabilite? (w01 15/9 30 ¶5-wcgr)

   To repons

3. 3. Kifer Enok ti kone ki li ti pou bizin boukou kouraz avan mem ki li ti vinn enn profet? (w06 1/10 17 ¶13-14) A

   To repons

   

4. 4. Kouma to kapav montre ki Enok pa’nn al dan lesiel, kouma sertin krwar? (Zan 3:13; Ebre 11:5, 13)

   To repons

Bann Leson ki Nou Kapav Aprann

• Kan kitfwa nou bizin plis kouraz pou prese? Kouma lexanp Enok kapav ed nou? B

  To repons

  

• Ki Zeova resanti kan nou mars avek kouraz ansam avek Li? (Prov. 27:11; Ebre 11:5)

  To repons

• Kouma to kapav imit kouraz ki Enok ti montre dan to lavi?

  To repons

Reflesi lor Zeova ek So Proze

• Ki sa zistwar-la aprann twa lor Zeova?

  To repons

• Ki lien sa zistwar-la ena ar proze Zeova?

  To repons

• Kan Enok pou resisite, ki to ti pou kontan demann li?

  To repons

Aprann Plis

Kouma lexanp Enok kapav ed twa kan to ena pou fer fas ar bann dimounn ki violan?

Imit Bann Ki Ena Lafwa, Pa Bann Ki Pena Lafwa—Enok, Pa Lamek (2:53)

Reflesi lor bann kitsoz ki ti ed Enok pou devlop lafwa.

“Marche avek Bondié dan sa lepok difficile-la” (w05 1/9 23-27)