Eski Vremem U Ena Lafwa dan Bon Nuvel?

“Rwayom Bondye finn koste. Repanti, ek ena lafwa dan bon nuvel.”—MARK 1:15.

1, 2. Kuma eski u pu explik pasaz Mark 1:14, 15?

DAN lane 30 N.L., Zezi Kris ti kumans enn gran travay predikasyon dan Galile. Li ti pe pres “bon nuvel Bondye.” Buku Galilein ti tuse kan zot ti tann li dir: “Letan fixe finn realize, ek rwayom Bondye finn koste. Repanti ek ena lafwa dan bon nuvel.”—Mark 1:14, 15.

² “Letan fixe” pu Zezi kumans so predikasyon ti’nn arive. Pu bann dimunn usi, letan finn arive pu zot pran enn desizyon ki pu fer zot gayn faver Bondye. (Lik 12:54-56) ‘Rwayom Bondye ti’nn koste.’ Kifer? Se parski Zezi ti prezan antan ki Lerwa ki Zeova ti swazire. So predikasyon ti pus bann dimunn ki ena enn bon leker pu repanti. Me kuma eski sa bann dimunn la ti montre ki zot ena ‘lafwa dan sa bon nuvel la’? Ek kuma eski nu’si nu montre ki nu fer parey kuma zot?

 3. Kuma eski bann dimunn finn montre ki zot ena lafwa dan bon nuvel lor rwayom?

³ Parey kuma Zezi, lapot Pyer usi ti ankuraz bann dimunn pu repanti. Letan Pyer ti koz avek bann Zwif dan Zerizalem zur Lapantkot lane 33 N.L., li ti dir: “Repanti, ek ki sakenn parmi zot batize lor non Zezi Kris pu gayn pardon zot pese, ek zot pu gayn don lespri sin gratis.” Par milye dimunn ti repanti, ti batize ek ti vinn bann disip Zezi. (Akt 2:38, 41; 4:4) Dan lane 36 N.L., bann dimunn ki pa ti Zwif, zot usi zot ti fer parey. (Akt 10:1-48) Zordi, lafwa dan sa bon nuvel la, pus enn kantite dimunn pu repanti pu bann pese ki zot finn fer. Lafwa pus zot pu angaz zot ar Bondye ek pu pran batem. Sa bann dimunn la finn aksepte sa bon nuvel delivrans la ek zot ena lafwa dan sakrifis Zezi. Anplis, zot pe pratik lazistis, ek zot finn pran pozisyon pu Rwayom Bondye.

 4. Ki ete lafwa?

⁴ Me, ki ete lafwa? Lapot Pol ti ekrir: “Lafwa, se enn garanti ki bann kitsoz ki nu pe espere vremem pu arive, se enn prev sir lor bann kitsoz ki purtan nu pa truve.” (Ebre 11:1) Nu lafwa fer nu sir ki tu seki Bondye finn promet dan so Parol vremem pu arive. Telman nu sir ki sa pu arive, ki kumadir sa finn fini realize. Li parey kumadir nu ena enn kontra, enn garanti, ki pruve ki nu propryeter enn sertin kitsoz. Lafwa li usi “enn demonstrasyon kler” bann kitsoz ki nu pa truve. Grasa nu kapasite pu konpran bann kitsoz spirityel ek enn leker ki ranpli ar rekonesans, nu ena lasirans ki tu sa bann kitsoz la zot reel, mem si nu pa finn truv zot.—2 Korintyin 5:7; Efezyin 1:18.

Nu Bizin Lafwa!

 5. Kifer eski li inportan ki nu ena lafwa?

⁵ Nu tu nu finn ne avek enn dezir pu aprann lor Bondye. Me, nu pa finn ne avek lafwa. Dayer, “pa tu dimunn ki ena lafwa.” (2 Tesalonisyin 3:2) Me, bann Kretyin bizin ena lafwa pu zot kapav gayn seki Bondye finn promet zot. (Ebre 6:12) Pol ti sit buku legzanp bann dimunn ki ti ena lafwa. Apre sa, li finn ekrir: “Parski nu ena enn gran kantite temwin otur nu, anu tir tu pwa ki zenn nu ek sirtu pese ki blok nu fasilman, ek anu galup avek landirans sa lekurs ki devan nu la. Ek anu fixe nu lizye lor Zezi, Gid Prinsipal nu lafwa ek sa Kikenn ki fer nu lafwa vinn parfe la.” (Ebre 12:1, 2) Me ki ete sa “pese ki blok nu fasilman la”? Se enn mank lafwa. Li kapav usi ki nu’nn perdi lafwa ki nu ti ena avan. Pu gard nu lafwa for, nu bizin ‘fixe nu lizye lor Zezi’ ek swiv so legzanp. Nu bizin usi rezet enn move kondwit sexyel. Nu bizin konbat bann dezir nu lekor ek evit tom dan pyez materyalis. Sa vedir usi evit bann lanseynman sa lemond la, ek bann tradisyon ki pa an akor avek Labib. (Galat 5:19-21; Kolosyin 2:8; 1 Timote 6:9, 10; Zid 3, 4) Anplis, nu bizin krwar ki Bondye avek nu, ek ki bann konsey ki truv dan so Parol zot vremem efikas.

6, 7. Kifer eski li bon nu priye pu nu gayn lafwa?

⁶ Nu pa kapav devlop lafwa par numem. Lafwa li form parti dan frwi lespri sin Bondye, uswa so lafors aktif. (Galat 5:22, 23) Donk, ki nu pu fer si nu bizin fer nu lafwa vinn pli for? Zezi ti dir: “Si zot . . . konn donn zot zanfan seki bon, komye plis nu Papa ki dan lesyel pu donn lespri sin bann ki demann Li!” (Lik 11:13) Wi, anu priye ek demann Bondye so lespri sin. Kifer? Parski sa kapav fer nu devlop lafwa ki nu bizin pu fer volonte Bondye, mem dan bann sityasyon byin-byin difisil.—Efezyin 3:20.

⁷ Li bon ki nu priye pu nu gayn plis lafwa. Kan Zezi ti pre pu al tir demon ki ti dan enn zenn garson, papa garson la ti kriye: “Mo ena lafwa! Ed mwa pu mo ena plis lafwa!” (Mark 9:24) Bann disip Zezi ti demann li: “Donn nu ankor plis lafwa.” (Lik 17:5) Donk, anu priye pu nu gayn plis lafwa, avek konfyans ki Bondye pu ekut sa kalite lapriyer la.—1 Zan 5:14.

Li Byin Inportan ki Nu Ena Lafwa dan Parol Bondye

 8. Kuma eski lafwa dan Parol Bondye kapav ed nu?

⁸ Zis avan ki Zezi donn so lavi an sakrifis, li ti dir so bann disip: “Pa bizin zot trakase. Ena lafwa ar Bondye, ena lafwa ar mwa usi.” (Zan 14:1) Antan ki Kretyin, nu ena lafwa ar Bondye ek ar so Garson. Me eski nu ena lafwa dan Parol Bondye? Parol Bondye kapav ena enn gran linflyans lor nu lavi ek pus nu pu fer seki bon. Me li pu ena sa linflyans la si nu etidye li. An mem tan, nu bizin aplik li avek ful konfyans ki se ladan ki ena bann pli bon konsey ki nu kapav gayne.—Ebre 4:12.

9, 10. Kuma eski u pu explik seki Zak 1:5-8 dir lor lafwa?

⁹ Nu, bann imin inparfe, nu lavi ranpli ar problem. Me lafwa dan Parol Bondye kapav vremem ed nu. (Zob 14:1) Par egzanp, fer kumadir nu pa pe kone kuma nu pu fer fas ar enn difikilte. Parol Bondye donn nu sa konsey la: “Si kikenn parmi zot mank sazes, li bizin kontiyn demann Bondye, parski Bondye donn tu dimunn avek bonker ek san fer repros. Me, li bizin kontiyn demann sa avek lafwa, san ki li ena dut. Parski enn kikenn ki dute li parey kuma enn vag lamer ki divan pus dan ninport ki direksyon. Avredir, fode pa ki sa kikenn la panse ki li pu gayn kitsoz ar Zeova. Parski li enn kikenn ki pa konn pran desizyon ek ki pa stab dan seki li fer.”—Zak 1:5-8.

¹⁰ Zeova pa pu repros nu si nu santi ki nu mank sazes ek nu demann Li sa dan lapriyer. Okontrer, Li pu ed nu pu truv problem la dan enn bon fason. Kuma? Kitfwa, nu bann konpaynon Kretyin kapav atir nu latansyon lor sertin pasaz Labib ki kapav ed nu. Uswa nu kapav truv bann verse kan nu pe etidye. Ubyin lespri sin Zeova kapav gid nu dan lezot fason. Nu Papa ki dan lesyel pu donn nu sazes ki nu bizin pu fer fas ar bann difikilte, si nu “kontiyn demann Li sa avek lafwa, san ki nu dute.” Si nu parey kuma enn vag dan lamer ki divan pus dan ninport ki direksyon, nu pa pu kapav atann ki Bondye donn nu kitsoz. Kifer? Parski si nu kumsa, sa pu montre ki nu pa kapav pran desizyon ek ki nu pa stab dan lapriyer ek dan bann lezot kitsoz. Wi, nu pa stab mem an seki konsern nu lafwa ar Bondye. Donk, nu bizin ena enn lafwa solid dan Parol Bondye ek dan direksyon ki Li donn nu. Anu get sertin legzanp ki montre kuma parol Bondye kapav ed nu ek gid nu.

Lafwa ek Bann Kitsoz Ki Nu Bizin pu Nu Viv

11. Ki lasirans, lafwa dan Parol Bondye donn nu konsernan bann kitsoz ki nu bizin tulezur?

¹¹ Me ki nu pu fer si nu pe mank manze uswa nu pena enn plas pu reste, uswa nu pov? Lafwa dan Parol Bondye donn nu lasirans ki Zeova pu donn nu seki nu bizin tulezur. Li dir nu ki dan so nuvo lemond, Zeova pu asir Li ki tu bann ki kontan Li pu gayn bann bon kitsoz an abondans. (Psom 72:16; Lik 11:2, 3) Kitfwa nu kapav santi nu ankuraze kan nu reflesi lor legzanp Eliya. Zeova ti fer ansort ki so profet gayn manze alor ki ti ena lafaminn. Plitar, par enn mirak, Bondye ti fer ansort ki lafarinn ek delwil ki enn madam ti ena, pa diminye ditu. Alor, sa finn permet sa madam la, so garson ek profet Eliya res vivan. (1 Lerwa 17:2-16) Zeova ti fer parey pu profet Zeremi. Kan Zerizalem ti anture par larme Babilonn, Li ti donn Zeremi seki li ti bizin. (Zeremi 37:21) Mem si Zeremi ek Eliya ti gayn zis enn tigit manze, Zeova ti pran zot swin. Azordi, Li fer parey pu bann ki ena lafwa ar Li.—Matye 6:11, 25-34.

12. Kuma eski lafwa pu ed nu pu gayn bann kitsoz ki nu bizin pu viv?

¹² Si nu ena lafwa ek si nu met an pratik bann prinsip Labib, sa pa pu fer nu vinn ris. Me sa pu ed nu pu gayn seki nu bizin pu viv. Anu pran enn legzanp. Labib dir ki nu bizin bann dimunn onet, ki konn travay, ek ki travay dir. (Proverb 22:29; Eklezyast 5:18, 19; 2 Korintyin 8:21) Fode zame nu suzestim valer enn bon repitasyon antan ki enn travayer. Ena sertin landrwa kot difisil pu gayn bann travay ki byin peye. Me mem la, bann travayer onet, ki konn travay, ek ki travay byin, gayn buku plis lavantaz ki lezot. Kitfwa sa bann travayer la pena buku kitsoz materyel. Me malgre sa, lapliparditan zot ena seki zot bizin pu viv. Ek zot gayn satisfaksyon pu manz manze ki zot finn gayne par zotmem.—2 Tesalonisyin 3:11, 12.

Lafwa Ed Nu pu Siport Sagrin

13, 14. Kuma eski lafwa ed nu pu siport sagrin?

¹³ Parol Bondye montre nu ki li normal ki nu sagrin kan nu perdi enn kikenn ki nu kontan. Abraam ti byin-byin sagrin kan Sara, so madam ki li ti byin kontan, ti mor. (Zenez 23:2) Leker David ti kase kan li ti tann dir ki so garson Absalon finn mor. (2 Samyel 18:33) Mem Zezi, ki ti enn zom parfe, ti plore kan so kamarad Lazar ti mor. (Zan 11:35, 36) Kan enn kikenn ki nu kontan mor, nu kapav resanti enn gran lapenn. Me lafwa dan bann promes ki truv dan Parol Bondye kapav ed nu pu siport sa sagrin la.

¹⁴ Pol ti dir: ‘Mo ena lafwa ar Bondye ki pu ena enn rezireksyon bann dimunn ki drwat ek bann dimunn ki pa drwat.’ (Akt 24:15) Nu bizin ena lafwa ki Bondye pu resisit enn kantite dimunn. (Zan 5:28, 29) Parmi zot, pu ena Abraam ek Sara, Izaak ek Rebeka, Zakob ek Lea. Tu sa bann dimunn la pe dormi dan lamor ek zot pe atann ler kan Bondye pu relev zot dan so nuvo lemond. (Zenez 49:29-32) Wi, li pu enn gran lazwa kan bann dimunn ki nu kontan pu leve ek zot pu viv lor later! (Revelasyon 20:11-15) Antretan, li vre ki lafwa pa pu kapav anlev tu nu sagrin. Me li pu ed nu pu res pros avek Bondye ki pu ed nu pu siport nu sagrin.—Psom 121:1-3; 2 Korintyin 1:3.

Lafwa Donn Lafors Bann Ki Deprime

15, 16. (a) Kifer eski nu kapav dir ki se pa zis zordi ki bann serviter Zeova pe sufer depresyon? (b) Kuma eski nu kapav fer fas ar depresyon?

¹⁵ Parol Bondye montre usi ki mem bann ki ena lafwa ar Bondye kapav santi zot deprime. Kan Zob ti gayn enn gran problem, li ti panse ki Bondye finn abandonn li. (Zob 29:2-5) Neemya ti byin sagrin kan li ti get move leta Zerizalem ek so bann miray. (Neemya 2:1-3) Lapot Pyer ti telman abat apre ki li ti fer tret ar Zezi, ki li ti “plore buku.” (Lik 22:62) Ek Pol ti konsey bann Kretyin dan kongregasyon Tesalonik pu “ankuraz bann dimunn ki deprime.” (1 Tesalonik 5:14) Donk, se pa zis dan nu lepok, ki bann ki ena lafwa ar Bondye pe sufer depresyon. Me, kuma eski nu kapav fer fas ar depresyon?

¹⁶ Nu kapav santi nu deprime parski nu pe bizin fer fas ar plizir problem byin grav. Me, nu kapav sey fer zefor pu pa konsider tu sa bann problem la kuma enn sel gro problem. Nu kapav atak bann problem la enn par enn avek led bann prinsip Labib. Sa kapav diminye nu stres. Si nu ena enn lavi ki byin ekilibre ek si nu repoz nu byin, sa usi kapav ed nu. Me ena enn kitsoz ki sir: Lafwa ar Bondye ek dan so Parol pu ed nu pu kontiyn ena enn bon lasante spirityel. Kifer? Parski lafwa pu donn nu ankor plis lasirans ki vremem Bondye pran nu swin.

17. Kuma eski nu kone ki Zeova pran nu kont?

¹⁷ Pyer donn nu sa lasirans la: “Abes zot anba puvwar Bondye pu ki Li elev zot kan pu ariv ler. Zet tu zot traka lor Li, parski Li pran zot kont.” (1 Pyer 5:6, 7) Enn ekrivin psom ti sante: “Zeova sutenir bann ki tonbe ek Li relev bann ki kurbe ar traka.” (Psom 145:14) Nu bizin ena lafwa dan sa bann parol la parski zot truv dan Parol Bondye. Wi, nu lafwa vinn pli for kan nu kone ki nu kapav zet tu nu traka lor nu Papa ki dan lesyel ek ki kontan nu. Mem si depresyon la persiste!

Lafwa ek Bann Lezot Difikilte

18, 19. Kuma eski lafwa ed nu pu fer fas ar maladi ek pu konsol nu bann frer ek ser ki malad?

¹⁸ Kan numem uswa enn kikenn ki nu byin kontan tom byin malad, sa kapav enn gran leprev pu nu lafwa. Okenn par dan Labib nu pa lir ki bann Kretyin kuma Epafrodit, Timote ek Trofim ti geri par enn mirak. Me, pena dut ki Zeova ti ed zot pu siport zot maladi. (Filipyin 2:25-30; 1 Timote 5:23; 2 Timote 4:20) Anplis, konsernan “kikenn ki ena pitye pu enn ti dimunn,” enn ekrivin psom ti sante: “Zeova Limem pu sutenir li kan li dan duler lor so lili; ek Li pu sulaz li ar tu so maladi.” (Psom 41:1-3) Kuma eski sa bann parol la kapav ed nu pu konsol nu bann frer ek ser ki malad?

¹⁹ Nu kapav priye ansam avek bann dimunn ki malad ek priye pu zot. Sa se enn mwayin kot nu kapav donn zot enn led spirityel. Li vre ki zordi nu pa pu demann Bondye pu geri bannla par enn mirak. Me, nu kapav demann Li pu donn zot lafors moral ki zot bizin pu siport zot maladi. Nu kapav demann Li pu donn bannla lafors spirityel ki zot bizin pu andir sa bann moman kot zot feb fizikman la. Zeova pu sutenir zot. Ek zot lafwa pu vinn ankor pli for kan zot mazinn lepok kot “personn pa pu dir: ‘Mo malad.’ ” (Izai 33:24) Wi, li vremem enn rekonfor kan nu kone ki tu bann dimunn ki obeir Bondye pu libere pu tuletan ar pese, maladi ek lamor! Zot pu gayn sa bann benediksyon la grasa Zezi Kris ki’nn resisite ek grasa Rwayom Bondye. Pu tu sa bann gran benediksyon la, nu remersi Zeova ki ‘pu geri tu nu maladi.’—Psom 103:1-3; Revelasyon 21:1-5.

20. Kifer eski nu kapav dir ki lafwa kapav ed nu pu siport “bann zur difisil” kan nu vinn vye?

²⁰ Lafwa kapav ed nu pu siport “bann zur difisil” kan nu vinn vye, kan lasante ek lafors pe kumans diminye. (Eklezyast 12:1-7) Donk, bann frer ek ser parmi nu ki dan laz, kapav priye parey kuma enn ekrivin Psom ki ti aze. Li ti sante: “A Senyer Zeova! Tomem mo lespwar . . . Pa rezet mwa aster ki mo’nn vye, ek pa kit mwa alor ki mo nepli ena lafors.” (Psom 71:5, 9) Sa ekrivin Psom la ti santi ki li ti bizin sutyin Zeova. Zordi usi, ena enn kantite frer ek ser ki finn pas buku lane dan servis Bondye ek ki aster finn vinn vye. Zot usi zot ena sa mem santiman la. Zot kapav sir ki, akoz zot lafwa, zot pu tuletan ena sutyin Zeova.—Deteronom 33:27.

Gard Lafwa dan Parol Bondye

21, 22. Si nu ena lafwa, kuma eski sa kapav ena enn lefe lor nu relasyon avek Bondye?

²¹ Lafwa dan bon nuvel lor Rwayom Bondye ek dan tu seki Labib dir, pu ed nu pu vinn ankor pli pros ar Zeova. (Zak 4:8) Li vre ki Zeova Li nu Senyer Siprem. Me, Li usi nu Kreater ek nu Papa. (Izai 64:8; Matye 6:9; Akt 4:24) Enn ekrivin Psom ti sante: “To mo Papa, mo Bondye ek Ros ki delivre mwa.” (Psom 89:26) Nu’si nu pu konsider Zeova kuma ‘Ros ki delivre nu,’ si nu ena lafwa ar Li ek dan so Parol Labib. Sa li vremem enn gran privilez, pa vre?

²² Zeova, Li Papa bann Kretyin ki’nn gayn lespri sin ek ki pu al viv dan lesyel. Li usi Papa zot bann konpaynon ki ena lespwar pu res lor later. (Romin 8:15) Ek kan nu ena lafwa ar nu Papa ki dan lesyel, zame Li pa pu les nu tonbe. David ti dir: “Mem si mo papa ek mo mama kit mwa, Zeova Limem pu pran mwa swin.” (Psom 27:10) Anplis, nu ena sa lasirans la: “Zeova zame pa pu abandonn so pep akoz so gran non.”—1 Samyel 12:22.

23. Ki nu bizin fer pu nu kapav ena enn relasyon dirab avek Zeova?

²³ Byinsir, pu nu ena enn relasyon dirab avek Zeova, nu bizin ena lafwa dan bon nuvel lor Rwayom Bondye. Nu bizin usi aksepte Labib pu seki li ete vremem, setadir Parol Bondye. (1 Tesalonisyin 2:13) Nu bizin ena enn lafwa total an Zeova, ek les so Parol ekler nu semin. (Psom 119:105; Proverb 3:5, 6) Nu bizin priye Zeova avek ful konfyans ki Li konpran nu, ki Li ena pitye pu nu ek ki Li pu ed nu. Amezir nu fer sa, nu lafwa ar Li pu grandi.

24. Ki parol ankurazan nu truve dan Romin 14:8?

²⁴ Lafwa pus nu pu angaz nu lavi pu tuletan avek Bondye. Si nu ena enn lafwa solid, mem si nu bizin mor, nu pu tuzur so bann serviter ki’nn angaze ar Li. Ek nu pu ena lespwar pu resisite. Wi, “ki nu vivan uswa ki nu mor, nu lavi li pu Zeova.” (Romin 14:8) Anu tuzur gard sa parol ankurazan la dan nu leker. Ek anu tuzur gard konfyans dan Parol Bondye ek kontiyne ena lafwa dan bon nuvel lor Rwayom Bondye.

Kuma Eski U Pu Reponn?

• Ki ete lafwa, ek kifer eski nu bizin sa kalite la?

• Kifer eski li inportan ki nu ena lafwa dan bon nuvel ek dan Labib an antye?

• Kuma eski lafwa ed nu pu fer fas ar plizir difikilte?

• Ki kitsoz pu ed nu pu gard nu lafwa?

[Zimaz lor paz 8]

Zeova ti sutenir Zeremi ek Eliya parski zot ti ena lafwa

[Zimaz lor paz 9]

Zob, Pyer ek Neemya ti ena enn lafwa solid

[Zimaz lor paz 11]

Pu nu ena enn relasyon dirab avek Zeova, nu bizin ena lafwa dan bon nuvel lor Rwayom Bondye