“Fer Travay enn Evanzelizater”

“Gard to bon zizman dan tu kitsoz, . . . fer travay enn evanzelizater.”—2 TIMOTHÉE 4:5.

 1. Ki travay Jésus ti donn so bann disip?

NON Jéhovah ek seki Li ena lintansyon pu fer, pe proklame partu lor later. So bann serviter pe pran oserye travay ki Jésus ti donn so bann disip kan li ti dir zot: “Ale, ek fer bann disip parmi tu bann nasyon, batiz zot au nom du Père et du Fils et de l’esprit saint, anseyn zot pu swiv tu seki mo finn dir zot fer.”—Matthieu 28:19, 20.

 2. Ki konsey Timothée ti gayne, ek sit enn fason kuma bann ansyin kapav akonpli zot minister?

² Bann premye Kretyin ti pran sa travay-la byin oserye. Par egzanp, lapot Paul ti donn sa konsey-la so konpaynon Timothée, ki ti enn ansyin. Li ti dir li: “Fer travay enn evanzelizater, akonpli to minister afon.” (2 Timothée 4:5) Dan nu lepok, kan enn ansyin pres le Rwayom avek zel ek kan li sorti regilyerman dan predikasyon, se enn fason ki li akonpli so minister. Par egzanp, Sirveyan Letid-de-Liv ena privilez pu pran latet dan predikasyon ek pu form lezot proklamater. Se seki Paul limem ti fer. Li ti pres la bonn nuvel, ek li ti form lezot dan le minister.—Actes 20:20; 1 Corinthiens 9:16, 17.

Bann Evanzelizater Zele dan le Pase

3, 4. Ki lexperyans Philippe ti ena dan travay evanzelizater?

³ Bann premye Kretyin ti bann evanzelizater byin zele, ek zot ti renome pu sa. Nu pran legzanp Philippe. Li ti enn parmi sa “set zom ki ti ena enn bon repitasyon ek ki ti ranpli ar lespri [sin] ek sazes,” ki bann zapot ti swazir. Sa set frer-la ti bizin distribye manze tulezur, san fer preferans, ar bann Kretyenn vev ki ti koz Grec ek ar bann ki ti koz Hébreu, a Jérusalem. (Actes 6:1-6) Kan sa travay spesyal-la ti termine, enn gran persekisyon ti dispers tu bann Kretyin, eksepte bann zapot. Alor, Philippe ti al Samarie. Laba, li ti pres la bonn nuvel ek grasa lespri sin, li ti gayn puvwar pu tir demon lor bann dimunn posede ek geri bann dimunn bwate ek paralize. Buku Samaritains ti aksepte la bonn nuvel lor Rwayom Bondye, ek zot ti pran batem. Kan bann zapot dan Jérusalem ti tann sa, zot ti avoy Pierre ek Jean a Samarie pu ki bann nuvo batize kapav gayn lespri sin.—Actes 8:4-17.

⁴ Lerla, lespri sin ti diriz Philippe lor larut Gaza, pu li zwenn l’eunuque Éthiopien. Sa ‘misye-la ti enn dimunn inportan ki ti travay pu Candace, la Renn Éthiopie.’ Apre ki Philippe inn donn li enn lexplikasyon kler lor profesi Isaïe, l’eunuque Éthiopien ti egzers lafwa an Jésus ek li ti pran batem. (Actes 8:26-38) Apre sa, Philippe ti al Ashdod ek answit, Césarée, ek lor so semin, li ti “pres la bonn nuvel dan tu bann lavil” kot li ti pase. (Actes 8:39, 40) Wi, pena dut, Philippe inn les enn bon legzanp dan travay evanzelizater!

 5. Pu ki kitsoz bann tifi Philippe ti byin renome?

⁵ Anviron vintan apre, Philippe ti tuzur byin aktif dan so minister a Césarée. Lepok ki Paul ek Luc ti al res kot li, la Bib dir ki li ti ena “kat tifi ki pa marye, ek ki ti pe profetize.” (Actes 21:8-10) Sa bann tifi-la ti sirman gayn enn bon formasyon spirityel, zot ti byin zele dan zot minister, ek zot ti mem ena privilez pu profetize. Dan nu lepok, kan bann paran byin zele dan la predikasyon, sa kapav ena enn bon lefe lor zot zanfan. Sa kapav insit zot zanfan pu vinn bann evanzelizater, ek fer sa travay-la avek zel tutlong zot lavi.

Bann Evanzelizater Zele dan Nu Lepok

 6. Ki bon rezilta bann evanzelizater Kretyin ti gayne dan premye syek?

⁶ Dan profesi ki Jésus ti done lor lepok la fin, li ti dir: “Dabor, la bonn nuvel pu bizin prese dan tu nasyon.” (Marc 13:10) La fin pu vini selman kan la bonn nuvel pu fini prese “partu kot dimunn reste lor later.” (Matthieu 24:14) Dan premye syek, amezir ki Paul ek lezot evanzelizater ti pres la bonn nuvel, buku dimunn ti vinn krwayan, ek zot ti form bann kongregasyon partu dan lanpir Romain. Bann ansyin ki ti’nn etabli dan sa bann kongregasyon-la, ti partisip dan predikasyon ansam avek zot bann frer ek ser; zot ti al pres partu. Dan sa lepok-la, buku dimunn ti pe aksepte parol Jéhovah ek zot ti vinn krwayan. Se seki pe arive zordi usi, grasa travay evanzelizater ki plizir milyon Temwin Jéhovah pe fer. (Actes 19:20) Eski u’si, u parmi bann ki pe donn Jéhovah luanz?

 7. Ki bann proklamater la bonn nuvel pe fer zordi?

⁷ Dan nu lepok, buku proklamater pe sezi lokazyon pu ogmant zot partisipasyon dan laktivite predikasyon. Plizir milye parmi zot inn vinn misyoner, ek enn gran kantite inn antrepran servis pyonye oxilyer ek pyonye permanan. Wi, ki li zom, fam uswa zanfan, sa bann proklamater zele-la pe fer vremem enn bon travay! Jéhovah pe beni so bann serviter amezir ki zot pe travay kot-a-kot antan ki bann evanzelizater.—Tsephania 3:9.

 8. Ki travay profetik pe fer zordi, ek kisannla pe fer sa?

⁸ Bondye finn konfye bann Kretyin oints, responsabilite pu pres la bonn nuvel lor later antye. “Lezot brebi,” ki pe ogmante deplizanpli, pe sutenir zot dan sa travay-la. (Jean 10:16) Zot pe fer enn travay ki sov lavi bann dimunn. Dan enn sans profetik, zot pe met enn mark lor fron bann dimunn ki pe sufer ek ki pe pleyne akoz bann kitsoz detestab ki pe arive zordi. Byinto, sa lemond puri-la pu detrir. Antretan, se enn grand privilez pu fer dimunn lor later konn la verite ki kapav sov zot lavi!—Ézékiel 9:4-6, 11.

 9. Kuma kapav ed bann nuvo proklamater?

⁹ Si nu pe pres la bonn nuvel depi lontan, kitfwa nu kapav fer kitsoz pu ed bann nuvo proklamater. Detanzantan, nu kapav invit zot pu akonpayn nu dan le minister. Bann ansyin ankuraze pu fer tu seki zot kapav pu fortifye zot bann konpaynon lor plan spirityel. Zefor sa bann ansyin-la kapav ed bann proklamater pu vinn bann evanzelizater zele ek efikas.—2 Pierre 1:5-8.

Rann Temwaynaz de Port-an-Port

10. Ki legzanp Jésus ek so bann disip inn done dan zot minister?

¹⁰ An rapor avek travay evanzelizater, Jésus Christ ti donn so bann disip enn bon legzanp. Konsernan minister ki li ek so bann disip ti akonpli, la Bib dir: “Li ti al dan tu lavil ek dan tu vilaz, pu pres la bonn nuvel lor Rwayom Bondye. Ek tule duz ti avek li.” (Luc 8:1) Ki la Bib dir lor bann zapot? Apre ki zot finn gayn lespri sin zur la Pentecôte lane 33 N.L., “tulezur dan tanp ek de mezon-an-mezon, zot ti kontiyn anseyne ek anons la bonn nuvel san arete, konsernan Christ, Jésus.”—Actes 5:42.

11. Dapre Actes 20:20, 21, ki lapot Paul ti fer dan so minister?

¹¹ Etandone ki lapot Paul ti byin zele dan so minister, li ti kapav dir bann ansyin dan Éphèse: “Mo pa finn retenir mwa pu anons zot, tu bann kitsoz ki profitab, ni pu anseyn zot an piblik ek de mezon-an-mezon.” Kan Paul ti ‘anseyn de mezon-an-mezon,’ eski li ti pe fer bann vizit pastoral kot bann frer ek ser? Non, parski li dir apre: “Mo finn donn temwaynaz afon avek bann Juifs ek bann Grecs usi, lor linportans pu repanti devan Bondye, ek pu ena lafwa dan nu Senyer Jésus.” (Actes 20:20, 21) Normalman, avek bann dimunn ki’nn fini angaz zot lavi pu servi Jéhovah, li pa neseser anseyn zot pu “repanti devan Bondye, ek pu ena lafwa dan nu Senyer Jésus.” Anrealite, Paul ti pe anseyn bann non-krwayan pu repanti ek ena lafwa an Jésus. An mem tan, li ti pe form bann ansyin dan lavil Éphèse dan predikasyon de port-an-port, parey kuma Jésus ti fer avek so bann disip.

12, 13. An akor avek Philippiens 1:7, ki bann Temwin Jéhovah inn fer pu etabli zot drwa pu prese?

¹² Parfwa li pa fasil pu pres de port-an-port. Par egzanp, sertin dimunn ofanse kan nu al pres kot zot. Me, nu pa anvi ofans personn, nu pe sinpleman obeir enn lord ki la Bib inn donn nu. Nu lamur pu Bondye ek pu nu prosin insit nu pu donn temwaynaz dan sa fason-la. (Marc 12:28-31) Pu kapav ‘defann ek etabli legalman’ nu drwa pu pres de port-an-port, nu finn bizin prezant plizir ka devan bann tribinal, ek devan lakur Suprême des États-Unis. (Philippiens 1:7) Preske tuletan, sa lakur-la inn rann bann zizman dan nu faver. Pran legzanp sa zizman-la:

¹³ “Distribisyon bann panfle relizye, se enn metod ki depi lontan bann misyoner inn servi pu prese, sa remont mem depi linvansyon la pres. Pandan plizir syek, buku relizyon inn servi sirtu sa mwayin-la pu prese, ek sa pa’nn sanze zordi. Sa finn permet bann reprezantan buku organizasyon relizye amenn l’Évangile dan lakaz buku dimunn. Par zot vizit, zot inn esey fer bann dimunn adopte zot lafwa. . . . Dapre premye Amendement [dan la Loi États-Unis], sa laktivite relizye-la ena mem linportans ki ladorasyon ek predikasyon ki fer dan legliz.”—Murdock contre Pennsylvanie, 1943.

Kifer Bizin Kontiyn Prese?

14. Ki lefe nu minister kapav ena lor enn dimunn, tigit par tigit?

¹⁴ Ena plizir rezon kifer nu pres de port-an-port. Sak fwa ki nu al kot enn dimunn, nu esey plant enn la grin la verite dan so leker. Kan nu re-al vizit li, nu esey aroz sa la grin-la. Tigit par tigit, lintere dimunn-la kapav ogmante, parski Paul ti ekrir: “Mwa mo’nn plante, Apollos finn aroze, me se Bondye ki’nn fer puse.” (1 Corinthiens 3:6) Donk, anu kontiyn ‘plante ek aroze,’ konfyan ki Jéhovah ‘pu fer puse.’

15, 16. Kifer nu al vizit bann dimunn plizir fwa?

¹⁵ Nu fer travay evanzelizater parski ena buku lavi an danze. Nu predikasyon kapav sov nu lavi, ek lavi bann dimunn ki ekut nu. (1 Timothée 4:16) Si nu kone ki enn dimunn an danze, eski nu pu fer zis enn ti zefor-mem pu ed li? Non! Pareyman, nu kontiyn vizit bann dimunn plizir fwa, parski nu predikasyon kapav sov zot lavi. Sityasyon bann dimunn pe tuletan sanze. Enn dimunn ki okipe, kitfwa pa pu anvi ekut nu mesaz enn premye fwa, me li kapav dispoze pu ekute enn lot fwa. Uswa, nu kapav zwenn enn lot manb so fami ek nu gayn enn bon konversasyon avek li.

¹⁶ Se pa selman sityasyon bann dimunn ki kapav sanze, me usi zot latitid. Par egzanp, enn dimunn ki’nn afekte par lamor enn manb so fami, kapav pli dispoze pu ekut mesaz lor Rwayom Bondye. Nu anvi konsol sa dimunn-la, ed li pu pran konsyans so bezwin spirityel, ek montre li kuma pu konble sa bezwin-la.—Matthieu 5:3, 4.

17. Pu ki rezon prinsipal nu prese?

¹⁷ Rezon pli inportan kifer nu al pres de mezon-an-mezon, ek nu rann temwaynaz dan lezot fason, se parski nu anvi fer tu dimunn konn non Jéhovah. (Exode 9:16; Psaume 83:18) Wi, nu gayn enn gran satisfaksyon kan bann dimunn ki kontan la verite ek la zistis, vinn bann serviter Jéhovah grasa nu laktivite predikasyon! Dan enn Psaume, nu kapav lir: “Zot, zenn zan ek zot usi bann vyerz, bann vyeyar ek bann garson, donn non Jéhovah luanz, parski zis so non ki pli elve ki tu. So dinite pli gran ki later ek lesyel.”—Psaume 148:12, 13.

Travay Evanzelizater Fer Nu Gayn Bann Byinfe

18. Ki byinfe nu gayne personelman kan nu prese?

¹⁸ Nu gayn buku byinfe personelman kan nu al pres de mezon-an-mezon. Par egzanp, sa ed nu pu kiltiv limilite, sirtu kan bann dimunn pa byin akeyir nu. Pu ki nu vinn bann evanzelizater efikas, nu bizin imit Paul. Li ti ‘fer li vinn tu kitsoz, pu tut sort kalite dimunn, pu li kapav sov sertin.’ (1 Corinthiens 9:19-23) Avek letan, kan nu gayn lexperyans dan nu minister, sa ed nu pu ena takt avek bann dimunn. Kan nu kont lor Jéhovah ek nu byin swazir nu bann mo, sa permet nu swiv sa konsey Paul-la: “Fer ansort ki zot parol li tuzur agreab, ek li asezone avek disel, pu zot kone kuma zot bizin reponn dimunn.”—Colossiens 4:6.

19. Kuma eski lespri sin ed bann evanzelizater?

¹⁹ Nu travay evanzelizater insit nu’si pu kont lor lespri sin Bondye. (Zekaria 4:6) Lerla, nu kapav manifeste frwi-de-lespri dan nu minister—“lamur, lazwa, lape, la pasyans, fer dibyin, la bonte, lafwa, la duser, la metriz de swa.” (Galates 5:22, 23) Sa ena enn lefe lor fason ki nu azir avek bann dimunn, parski kan nu les lespri sin diriz nu lavi, sa ed nu pu manifeste lamur, lazwa ek lape anver lezot. Nu pu ena pasyans, nu pu fer dibyin ek nu pu manifeste la bonte. Nu pu montre usi ki nu ena lafwa, la duser ek la metriz de swa. Nu pu manifeste tu sa bann kalite-la kan nu pres la bonn nuvel.

20, 21. Ki byinfe nu gayne kan nu res byin okipe dan nu travay evanzelizater?

²⁰ Enn lot byinfe ki nu gayne antan ki evanzelizater, se ki nu laktivite fer nu plis konpran lezot. Kan dimunn rakont nu zot problem—maladi, somaz, problem dan la fami—nu pa pu dir zot ki zot bizin fer, me nu partaz avek zot bann panse ankurazan ki baze lor la Bib. Nu interes nu ar bann dimunn ki’nn avegle lor plan spirityel, me ki kitfwa kontan la zistis. (2 Corinthiens 4:4) Wi, se enn gran lazwa pu ed spirityelman bann dimunn ki “byin dispoze pu lavi eternel”!—Actes 13:48.

²¹ Kan nu partisip regilyerman dan predikasyon, sa ed nu pu gard nu lespri fixe lor bann kitsoz spirityel. (Luc 11:34) Se enn byinfe pu nu, parski sinon, nu kapav tom dan pyez materyalis, enn kitsoz ki byin kuran dan sa lemond-la. Lapot Jean ti donn bann Kretyin sa konsey-la: “Pa kontan lemond ni bann kitsoz ki ena dan lemond. Si enn kikenn kontan lemond, li pena lamur nu Papa an li, parski tu seki ena dan lemond—dezir nu lekor, dezir nu lizye, ek fer letalaz bann kitsoz ki nu ena—tusala pa sorti ar nu Papa me sorti dan lemond. Anplis, lemond pe al fini, ek so dezir usi, me seki fer volonte Jéhovah pu res pu tuzur.” (1 Jean 2:15-17) Kan nu res byin okipe dan nu travay evanzelizater, ek kan nu ena buku pu fer dan travay nu Senyer, sa pu anpes nu pu kontan lemond.—1 Corinthiens 15:58.

Ramas Bann Trezor dan Lesyel

22, 23. (a) Ki trezor bann evanzelizater Kretyin ramase? (b) Kuma prosin lartik pu ed nu?

²² Kan nu zele dan predikasyon, nu pu gayn bann byinfe dirab. Se seki Jésus ti montre kan li ti dir: “Aret ramas bann trezor lor later, kot karya ek laruy manz tu, ek kot voler rantre ek kokin. Ramas plito bann trezor dan lesyel, kot pena karya ek laruy pu manz kitsoz ek kot bann voler pa rantre ek kokin. Parski kot to trezor ete, la-mem to leker pu ete.”—Matthieu 6:19-21.

²³ Anu kontiyne ramas bann trezor dan lesyel, konsyan ki pli gran privilez ki nu ena, se pu reprezant Suverin Senyer Jéhovah kuma so bann Temwin. (Isaïe 43:10-12) Amezir ki nu akonpli nu servis pu Jéhovah, sirman nu pu ena mem santiman ki sa ser 90 an-la. Li finn konsakre tu so lavi pu servi Jéhovah, ek li ti dir: “Mo remersye Jéhovah parski Li’nn aksepte mwa dan so servis tu sa letan-la, malgre mo bann defo. Mo priye sinserman ki Li pu res tuzur mo Papa ki kontan mwa.” Nu’si parey, si nu relasyon avek Jéhovah kont buku pu nu, nu pu anvi fer nu travay evanzelizater afon. Dan prosin lartik nu pu aprann kuma nu kapav akonpli nu minister afon.

Kuma U Pu Reponn?

• Kifer nu bizin fer travay enn evanzelizater?

• Ki u kapav dir lor travay bann evanzelizater dan le pase ek bann evanzelizater zordi?

• Kifer nu pres de port-an-port?

• Ki byinfe u gayne personelman kan u fer travay enn evanzelizater?

[Zimaz lor paz 12]

Dan nu lepok usi ena bann evanzelizater kuma Philippe ek so bann tifi

[Zimaz lor paz 16]

Ki byinfe u gayne personelman kan u pres la bonn nuvel avek lezot?