Kifer nou bizin dire la verité?

Kan Manfred ti ena 18 an, li ti commence travail dan enn bureau ek en mem temps li ti pé gagne enn training.a So compagnie ti faire bann l’arrangement pou ki li ek plusieurs lezot ki ti pé gagne sa training-la, suive cours dan enn lekol deux fois par semaine. Enn jour classe ti fini pli boner. Dapré la loi compagnie, bann zeleve-la ti bizin retourne travail pou le reste la journée. Mais zot inn prefere al amusé, apart Manfred ki ti retourne dan travail. Zis lerla, sa directeur ki en charge bann zeleve-la, inn vini. Kan li’nn trouve Manfred, li’nn demann li: “Kifer ou pa dan classe zordi? Kot bann lezot été?” Ki Manfred ti bizin reponn?

Manfred inn trouve-li dan enn situation ki kapav arrive n’importe kisannla: Eski li bizin dire la verité ou-soit eski li bizin koz menti pou couvert so bann camarade? Si li dire la verité, sa vedir ki so bann camarade pou gagne problem ek zot pou nepli content li. Eski li bon si nou koz menti dan enn situation coumsa? Ki ou ti pou faire, ou? Nou pou retourne avek cas Manfred plitar, mais avant sa, anou guetté ki kitsoz impliké kan nou ena pou decidé si nou pou dire la verité ou-soit non.

Enn la-lutte entre la verité ek fausseté

Au commencement l’histoire bann dimoune, tou kitsoz ti basé lor la verité. Personne pa ti deforme la realité, ni manipule la verité ou-soit deforme li. Jéhovah nou Createur, Li enn “Bondié la verité.” So parole, li la verité; Li pa kapav koz menti, ek Li condamne bann mensonge ek bann menteur.—Psaume 31:5; Jean 17:17; Tite 1:2.

Mais alors, couma fausseté inn commencé? Jésus ti donne enn sel reponse ki nou kapav croire, kan li ti dire so bann l’ennemi religieux ki ti pé rod touye li: “C’est Satan le Diable ki zot papa, ek zot oulé faire seki li envie. Kan li ti commencé, li ti enn criminel. Li pa’nn tini ferme dan la verité parski la verité pa dan li. Kan li koz menti, li koz dapré so prop tendance, parski li enn menteur ek li-mem ki ti commence koz menti en premier.” (Jean 8:44) En realité, Jésus ti pé koz lor seki ti arrivé dan jardin Éden kan Satan ti amenn premier couple humain pou desobeir Bondié ek lerla sa ti faire zot tombe dan peché ek la mort.—Genèse 3:1-5; Romains 5:12.

Bann parole Jésus faire nou koné ki c’est Satan ki “ti commence koz menti en premier,” ki c’est par li-mem ki mensonge inn commencé. Satan ti premier pou soutenir mensonge, ek li pé contigne faire sa zordi. Avredir, li “pé mette tou bann dimoune lor la terre entier dan l’erreur.” Zordi nou trouve fausseté partout ek sa inn faire bann dimoune beaucoup di-tort. Satan ena enn bon part responsabilité ladan.—Révélation 12:9.

Satan finn commence enn la-lutte entre la verité ek fausseté ek sa la-lutte-la pé contigné partout ziska zordi. Sa inn rente parmi tou bann classe social ek li affecté chaque dimoune. Fason ki enn dimoune vive kapav mette li dan coté la verité ou-soit dan coté fausseté. Bann dimoune ki dan coté Bondié vive dapré la verité ki ena dan Parole Bondié, la Bible. Ki li rann-li compte ou-soit non, n’importe kisannla ki pa suive chemin la verité, tombe dan la main Satan parski “le monde entier li dan pouvoir sa kikenn ki mauvais-la.”—1 Jean 5:19; Matthieu 7:13, 14.

Kifer nou ena tendance pou koz menti?

“Le monde entier,” li dan pouvoir Satan, sa kikenn ki ti commence koz menti en premier-la. Alors sa faire nou comprend kifer tou sa quantité dimoune-la koz menti. Mais nou kapav demandé, kifer Satan ti koz menti? Satan ti koné ki Jéhovah ena droit pou dirige tou So bann creature, parmi ti ena premier couple humain aussi. Pourtant, Satan ti envie gagne sa grand position ki Jéhovah tousel ena-la, enn kitsoz ki li, li pa ti ena droit gagné. Li ti tellement envie gagne sa position-la ek li ti tellement ena enn l’ambition egoïste, ki li ti faire plan pou prend place Jéhovah. Pou li reussi faire sa, Satan ti koz menti ek ti servi tromperie.—1 Timothée 3:6.

Ki nou kapav dire zordi? Eski ou pa d’accord ki c’est parski bann dimoune touletan envie gagne plus ek zot ena bann l’ambition egoïste ki zot encore toujours pé koz menti? Bann business ki envie toujours faire plus l’argent, politik kot ena corruption ek fausse religion, zot rempli ar tromperie, fausseté ek fraude, ek zot deforme la realité. Kifer? Eski souvent c’est pa parski bann dimoune envie gagne plus ek avancé dan zot la-vie, setadir pou gagne richesse, pouvoir, ou-soit position ki zot pa supposé gagné? Le roi Salomon ki ti règne lor Israël dan le passé, ti donne sa l’avertissement-la: “Enn kikenn ki pé pressé pou gagne beaucoup richesse, pa pou reste innocent.” (Proverbes 28:20) Ek l’apotre Paul ti ecrire: “L’amour pou l’argent li enn racine tou sorte qualité mauvais kitsoz.” (1 Timothée 6:10) Nou kapav dire sa aussi pou enn desir exageré pou gagne pouvoir ou-soit enn bel position.

Enn lot raison kifer bann dimoune koz menti, c’est parski zot peur—zot peur bann consequence ou-soit zot peur seki lezot kapav pensé si zot konn la verité. Li normal ki bann dimoune envie ki lezot content ek accepté zot. Mais sa desir-la kapav pousse zot pou deforme la verité, mem si c’est enn tigit-mem, pou couvert zot bann erreur, pou cachiette bann detail ki pa dan zot faveur, ou-soit zis pou donne enn bon l’impression. Salomon ti ena raison kan li ti ecrire: “Tremblé devant bann zom, sa-mem ki mette nou dan piege, mais enn dimoune ki mette so confiance en Jéhovah pou protegé.”—Proverbes 29:25.

Fidelité envers Bondié la verité

Ki Manfred ti dire kan so directeur ti demann li enn l’explication? Li ti dire la verité. Li ti dire: “Professeur inn largue nou boner zordi, alors mo’nn vinn travail. Mais mo pa kapav reponn pou lezot. Kitfois ou kapav demann zot ou-mem.”

Manfred ti’nn kapav faire malin ek donne enn reponse ki ti pou trompe so directeur, ek lerla bann lezot zeleve ti pou content li. Mais li ti ena bann bon raison pou reste attaché ar la verité. Manfred enn Témoin de Jéhovah. Li ti agir dan enn fason honnete ek a cause sa li’nn garde enn conscience clair. Sa ti aussi faire li gagne confiance so patron. Pendant enn partie so training, Manfred ti al travail dan departement bijouterie kot normalement bann ki pé suive training pa gagne droit travail. Apepré 15 an plitar, kan Manfred ti gagne promotion pou enn poste kot li ti ena plus responsabilité dan compagnie, sa mem directeur-la ti telephone li pou felicite li ek pou raconte li sa l’occasion kot li ti montré ki li enn dimoune ki fidel ar la verité.

Jéhovah Li Bondié la verité. Alors tou bann ki envie ena enn relation proche avek Li, bizin “rejette seki fausse” ek “dire la verité.” Enn dimoune ki servi Bondié bizin content la verité. Salomon ti dire: “Enn temoin fidel pa pou koz menti.” Mais ki été enn mensonge?—Éphésiens 4:25; Proverbes 14:5.

Ki été enn mensonge?

Tou mensonge li enn kitsoz ki fausse, mais pa tou seki fausse ki enn mensonge. Kifer? Enn dictionnaire dire ki enn mensonge c’est “kan nou dire enn dimoune, avek l’intention pou trompe li, ki enn kitsoz ki li koné ou-soit ki li croire, li pa vrai.” Oui, koz menti implik aussi l’intention pou trompe enn dimoune. Alors kan nou dire enn kitsoz ki pa vrai sans ki nou faire expré—couma par exemple kan nou donne enn dimoune bann renseignement ou-soit bann chiffre ki pa exact, par erreur—nou pa pou appel sa enn mensonge.

En plus, nou bizin guetté si dimoune ki pé demann sa renseignement-la, li ena droit konn tou detail. Par exemple, faire coumadir c’est directeur enn lot compagnie ki ti demann Manfred sa bann mem question-la. Eski Manfred ti pou obligé dire li tou? Pa necessairement. Parski sa directeur-la pa ti ena droit gagne sa bann renseignement-la, Manfred pa ti pou obligé donne li sa bann l’information-la. Bien-sur, mem dan sa cas-la, li pa ti pou bon ki li koz menti.

Ki l’exemple Jésus inn donne nou dan sa domaine-la? Enn fois, Jésus ti pé koz avek certain dimoune ki pa ti so bann disciple mais ki ti interessé pou koné kot-sa li ti pou allé. Zot ti donne li sa conseil-la: “Quitte ici ek al Judée.” Ki Jésus ti reponn zot? “Monté, al fête-la zot, moi mo pa pé al sa fête-la asterla, parski mo l’heure pankor vini.” Enn tipé apré sa, Jésus ti al Jérusalem pou fête. Kifer li ti reponn coumsa? Parski sa bann dimoune-la pa ti ena droit konn bann detail exact lor so bann allé-vini. Alors, mem si Jésus pa ti dire enn kitsoz ki fausse, li pa ti donne zot enn reponse complet. Li ti faire sa pou limite di-tort ki zot ti kapav faire li ou-soit so bann disciple. Sa pa ti enn mensonge parski l’apotre Pierre ti ecrire concernant Jésus: “Li pa ti commette okenn peché, ek pa ti trouve okenn tromperie dan so la-bouche.”—Jean 7:1-13; 1 Pierre 2:22.

Ki nou kapav dire lor Pierre li-mem? Sa soir kot ti arrete Jésus-la, eski Pierre pa ti koz menti trois fois ek renié Jésus? Oui, a cause la crainte pou bann dimoune, Pierre ti koz menti. Mais dé-suite “li ti ploré avek beaucoup remords” ek li ti repenti, ek Bondié ti pardonne li. En plus, li ti tire leson ar so erreur. Dé-trois jour plitar, li ti rann temoignage lor Jésus en publik ek kan bann chef juif dan Jérusalem ti menace li, li ti determiné pou contigne koz lor Jésus. Pierre ti faire enn erreur mais bien vite li ti ré-vinn lor bon chemin. Oui, sa bizin encourage nou parski nou tou nou kapav facilement laisse enn moment faiblesse domine nou ek dire ou-soit faire enn kitsoz ki pa bizin.—Matthieu 26:69-75; Actes 4:18-20; 5:27-32; Jacques 3:2.

La verité pou etabli pou toujours

Proverbes 12:19 dire: “C’est la levre ki dire la verité ki pou bien etabli pou toujours, mais la langue ki dire seki fausse pou reste zis pou enn ti moment.” Oui, kan nou dire bann parole ki vrai, sa li reste pou touletan. Ek kan bann dimoune dire la verité ek agir en accord avek la verité, bann relation ki ena entre zot vinn pli stable ek faire zot gagne satisfaction. Oui, kan nou dire la verité, nou recolté bann bon resultat dé-suite. Parmi ena enn conscience clair, enn bon reputation, ek bann relation solid dan mariage, dan la famille, entre camarade, ek mem dan business.

Parkont, mensonge pa dure longtemps. Enn la-langue ki dire bann fausseté kapav trompe dimoune pou inpé lé-temps, mais a la longue pou decouvert sa bann fausseté-la. En plus, Jéhovah, Bondié la verité, inn fixé enn lé-temps; Li pa pou tolere bann fausseté ek bann ki favorise mensonge pou touletan. La Bible promette ki Jéhovah pou tire l’influence Satan le Diable, ki ti commence koz menti en premier ek ki pé mette tou bann dimoune lor la terre entier dan l’erreur. Bientot Jéhovah pou detruire tou bann mensonge ek bann menteur.—Révélation 21:8.

Kan finalement “la levre ki dire la verité” pou bien etabli pou toujours, sa pou enn soulagement, pa vrai?

[Note]

[L’encradré, page 4]

L’envie pou gagne plus ek l’ambition egoïste pousse bann dimoune pou koz menti

[L’encadré, page 5]

Tou mensonge li enn kitsoz ki fausse, mais pa tou seki fausse ki enn mensonge