Bientot enn paradi lor la terre!

“Nou Papa ki dan le ciel, ki to nom sanctifié. Ki to royaume vini. Ki to volonté faire lor la terre pareil couma dan le ciel.” —Matthieu 6:9, 10.

SA C’EST enn la priere ki beaucoup dimoune koné. Zot appel sa la priere Notre Père. Sa la priere-la donne enn l’espoir. Dan ki sens?

Pareil couma la priere Notre Père montré, c’est grace a Royaume Bondié ki volonté Bondié pou faire lor la terre pareil couma sa pé faire asterla dan le ciel. Ek volonté Bondié, c’est pou retabli Paradi lor la terre. (Révélation 21:1-5) Ki été vrai-mem Royaume Bondié, ek couma li pou retabli Paradi lor la terre?

Enn vrai gouvernement

Royaume Bondié, li enn vrai gouvernement. Pou ki n’importe ki gouvernement fonctionné, li bizin ena bann dirigeant, bann la loi, ek bann sujet. Eski Royaume Bondié rempli sa bann condition-la? Note bann reponse ki la Bible donné pou sa trois question-la:

Kisannla bann dirigeant dan Royaume Bondié? (Isaïe 33:22) Jéhovah inn choisir so Garson, Jésus Christ, pou prend la tête dan So Royaume. (Matthieu 28:18) Enba direction Jéhovah, Jésus inn choisir bann dimoune ki sorti “dan tou tribu, ek langue ek peuple ek nation” ki pou regne avek li “couma bann le roi ki dirige la terre.” Quantité ki zot été, li limité.—Révélation 5:9, 10.

Ki bann la loi Royaume Bondié inn etabli pou so bann sujet? Certain sa bann la loi ou-soit commandement-la demandé ki bann sujet Royaume Bondié faire bann kitsoz precis. Jésus ti faire konn la loi ki pli important parmi sa bann la loi-la kan li ti dire: “ ‘To bizin content Jéhovah to Bondié avek tou to leker ek avek tou to nâme ek avek tou to l’esprit.’ Sa-mem pli grand ek premier commandement. Deuxieme commandement ki pareil, c’est: ‘To bizin content to prochain couma to-mem.’ ”—Matthieu 22:37-39.

Lezot la loi demandé ki bann sujet Royaume Bondié pa faire certain kitsoz. Par exemple, la Bible dire dan enn fason bien clair: “Pa laisse-zot trompé. Ni bann ki pratik fornication, ni bann ki pratik l’idolatrie, ni bann adultere, ni bann zom ki gardé pou bann pratik kont nature, ni bann zom ki dormi ar bann zom, ni bann voleur, ni bann dimoune ki toujours envie gagne plus, ni bann soulard, ni bann ki insulté lezot, ni bann ki trompe dimoune pou tire l’argent, pa pou herite royaume Bondié.”—1 Corinthiens 6:9, 10.

Kisannla ki bann sujet Royaume Bondié? Jésus ti compare bann sujet Royaume Bondié ar bann mouton. Li ti dire: “Zot pou ecoute mo la voix, ek zot pou vinn enn sel troupeau, enn sel berger.” (Jean 10:16) Pou vinn enn sujet Royaume Bondié, li pa assez ki enn dimoune zis dire ki li suive Jésus, l’excellent berger. Li bizin aussi faire seki Jésus inn donne l’ordre pou faire. Jésus ti dire: “Pa tou seki dire moi, ‘Seigneur, Seigneur,’ ki pou rente dan royaume ki dan le ciel, mais celui ki faire volonté mo Papa ki dan le ciel.”—Matthieu 7:21.

Alors bann sujet Royaume Bondié servi ek honore nom Bondié, Jéhovah, pareil couma Jésus. (Jean 17:26) Zot obeir commandement Jésus pou enseigne lezot dimoune concernant “sa bon nouvelle lor royaume-la.” (Matthieu 24:14; 28:19, 20) Ek zot montré vrai l’amour entre zot.—Jean 13:35.

“Detruire bann ki pé detruire la terre”

Bann condition ki ena dan le monde zordi zot enn signe ki dan enn tigit le temps encore, Royaume Bondié pou agir kan li pou amenn bann grand-grand changement lor la terre. Couma nou konn sa? Ena deux mille an, Jésus ti decrire enn signe ki ena plusieurs element ki ti pou montré ki “royaume Bondié bien pré.” (Luc 21:31) Couma nou finn trouvé dan lartik avant, zordi dan le monde entier, bann element sa signe-la zot bien visible.

Ki pou arrivé apré sa? Jésus reponn: “Lerla pou ena enn grand tribulation couma jamais pa finn ena depuis commencement le monde ziska zordi, non, ek ki pa pou ena encore.” (Matthieu 24:21) C’est pa bann dimoune ki pou faire sa catastrophe-la. Mais c’est Bondié Li-mem ki pou agir pou “detruire bann ki pé detruire la terre.” (Révélation 11:18) Li ‘pou tire bann mauvais dimoune’ ki par zot bann action egoïste, inn amenn la terre dan bord destruction. Mais bann dimoune ki personne pa kapav faire zot okenn reproche, ki servi Bondié dan fason ki Li accepté, zot ki ‘pou reste lor la terre.’—Proverbes 2:21, 22.

Jéhovah ena bann bon raison pou faire sa bann grand changement-la. Kifer? Anou prend enn l’exemple. Maziné ki ou proprietaire enn batiment kot ena deux-trois appartement. Certain locataire serieux ek ena consideration; zot paye zot loyer ek occupe bien zot appartement. Mais lezot locataire crée probleme ek zot pense zis zot tousel; zot refuse paye zot loyer ek zot faire bann degat dan ou batiment. Malgré plusieurs warning, zot pa changé. Ki ou pou faire? En tant ki proprietaire, surement ou pou mette sa bann mauvais locataire-la dehors.

Jéhovah pou faire pareil Li aussi. En tant ki Createur la terre ek tou seki ena lor la, Li ena droit pou decidé kisannla pou reste lor la terre. (Révélation 4:11) Jéhovah inn dire ki so projet c’est pou tire tou bann ki pa prend compte so volonté ek ki empeche lezot profite zot bann droit.—Psaume 37:9-11.

Paradi pou retabli lor la terre

Bientot, Royaume Bondié ki dirigé par Jésus Christ pou prend pouvoir lor la terre. Jésus ti appel sa nouveau depart-la “renouvellement tou kitsoz.” (Matthieu 19:28, TOB.) Ki condition pou ena lerla? Guette bann promesse ki ena dan la Bible:

Psaume 46:9. “Li faire bann la guerre arreté ziska dan boute la terre.”

Isaïe 35:1. “Desert ek l’endroit sec pou content, ek la plaine kot nanyin pa poussé, pou dan la joie ek pou bourgeonné couma safran.”

Isaïe 65:21-23. “Bann ki mo finn choisir pou profite tou travail ki zot la main faire. Zot pa pou rinté pou nanyin, ni zot pou gagne bann zenfant pou ki arrive zot malheur.”

Jean 5:28, 29. “L’heure pé vini kot tou seki dan bann tombe souvenir pou tann . . . la voix [Jésus] ek pou sorti.”

Révélation 21:4. “[Bondié] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur.”

Bann raison pou croire dan sa bann promesse-la

Eski ou croire dan bann promesse ki ena dan la Bible? La Bible ti annoncé ki beaucoup dimoune pa pou croire dan sa bann promesse-la. Li dire: “Dan dernier jour pou ena bann moqueur . . . ki pou agir dapré zot prop desir ek ki pou dire: ‘Kot sa presence ki ti promette-la? Oui, depuis la mort nou bann ancetre, tou kitsoz pé contigné pareil couma zot ti été depuis commencement la creation.’ ” (2 Pierre 3:3, 4) Mais sa bann moqueur-la pé faire enn grand erreur. Guette zis quatre raison kifer ou kapav croire dan seki la Bible dire:

(1) Dan le passé, Bondié ti deja prend bann action kont bann mauvais dimoune. Deluge ki ti ena dan lepok Noé, li enn l’exemple remarquable.—2 Pierre 3:5-7.

(2) Parole Bondié inn annonce exactement bann condition ki ena dan le monde zordi.

(3) Tou kitsoz pa “pé contigné pareil couma zot ti été depuis commencement la creation.” Jamais avant sa, nou la terre inn passe par autant probleme dan domaine social, moral, ek l’environnement.

(4) Zordi “bon nouvelle lor royaume” pé preché partout lor la terre. Sa li enn signe ki “la fin pou vini” bientot.—Matthieu 24:14.

Bann Témoins de Jéhovah invite ou pou etudié Parole Bondié, la Bible, ensam avek zot. Sa pou permette ou konn plus lor l’espoir ki nou ena pou vive pou touletan kan Royaume Bondié pou dirigé. (Jean 17:3) Oui, enn l’avenir extraordinaire pé attann bann dimoune. Ena bann pli bon lepok zis devant nou. Eski ou pou la pou profite seki l’avenir reservé?

[L’encadré page 7]

Bann ki pretann ki bann kitsoz pou contigné reste pareil couma dan le passé, faire enn grand erreur

[Zimage page 8]

Eski ou pou la pou profite seki sa l’avenir-la reservé?