Anou garde nou fidelité avek enn leker entier

“Mo pou marche dan to la verité. Faire mo leker vinn entier pou toi, pou mo ena la crainte pou to nom.”—PS. 86:11.

1, 2. (a) Dapré Psaume 86:2, 11, ki pou aide nou pou reste fidele ar Jéhovah devant bann l’epreuve ek bann tentation? (b) Kan eski nou bizin developpe enn fidelité sincere?

KIFER certain chretien ki’nn reste fidele pendant plusieurs l’année malgré ki zot inn faire prison ek inn konn persecution, plitar tombe dan piege materialiste? Reponse sa question-la ena enn rapport avek nou leker symbolik, setadir seki nou été vrai-mem endan. Psaume 86 faire enn lien entre fidelité ek enn leker entier; setadir enn leker complet, ki pa divisé. David, ki ti ecrire bann psaume, ti faire sa la priere-la: “Ah protege mo nâme, parski mo fidele. To-mem mo Bondié. Sauve to serviteur ki faire toi confiance.” Li ti dire aussi: “Ah Jéhovah, enseigne moi to bann la loi. Mo pou marche dan to la verité. Faire mo leker vinn entier pou toi, pou mo ena la crainte pou to nom.”—Ps. 86:2, 11.

² Si nou pa faire Jéhovah confiance avek tou nou leker, lezot kitsoz ek bann relation ki nou ena avek bann dimoune kapav affaibli nou fidelité envers vrai Bondié. Bann desir egoïste zot couma bann bombe ki cachiette enba la terre lor chemin kot nou pé marché. Mem si nou finn reste fidele envers Jéhovah dan bann situation difficile, nou kapav tombe dan bann piege Satan. Alors, li bien important ki nou developpe enn fidelité sincere envers Jéhovah asterla, avant ki nou gagne bann l’epreuve ek bann tentation. La Bible dire: “Plus ki tou kitsoz ki to bizin protegé, protege to leker.” (Prov. 4:23) Nou kapav aprann bann leson important ar seki ti arrive enn prophete ki sorti Juda, ki Jéhovah ti envoyé pou koz ar le roi Yarobam, en Israël.

“Laisse mo donne toi enn cadeau”

 3. Couma Yarobam ti reagir kan li ti tann jugement ki prophete Bondié ti annoncé?

³ Mazinn sa scene-la: enn representant Bondié inn fek annonce enn message severe ar le roi Yarobam, ki ti etabli l’adoration veau dan royaume dix tribu Israël, dan le nord. Le roi bien en colere. Li donne l’ordre so bann zom pou attrape sa messager-la. Mais Jéhovah Li avek so serviteur. Desuite, la main ki le roi inn levé avek colere kont sa representant Bondié-la, paralysé par enn mirak, ek l’autel ki ti servi pou fausse l’adoration, fann en deux. Enn sel coup l’attitude Yarobam changé. Li suppliye prophete Bondié: “S’il te plait, calmé Jéhovah to Bondié ek prié pou moi pou ki mo la main kapav gueri.” Prophete-la prié Jéhovah, ek la main le roi gueri.—1 Rois 13:1-6.

 4. (a) Kifer seki le roi ti propose sa prophete-la ti vrai-mem enn test pou so fidelité? (b) Ki prophete-la ti reponn li?

⁴ Lerla Yarobam dire sa representant Bondié-la: “Vinn avek moi lakaz ek mange enn ti kitsoz, ek laisse mo donne toi enn cadeau.” (1 Rois 13:7) Ki sa prophete-la pou faire asterla? Eski li pou accepté l’invitation le roi apré ki li’nn annonce enn message condamnation kont li? (Ps. 119:113) Ou-soit eski li pou refuse sa l’invitation-la, mem si le roi parette bien regretté? Pena doute ki Yarobam ki bien riche, kapav donne so bann camarade bann cadeau ki ena beaucoup valeur. Si prophete Bondié ti’nn developpe enn desir secret pou bann kitsoz materiel, sa proposition le roi-la li enn grand tentation pou li. Selman, Jéhovah ti donne li sa l’ordre-la: “Fodé pa to mange di-pain ni boire de l’eau, ek fodé pa to retourne par mem chemin ki to ti allé.” Alors, dan enn fason bien ferme ek clair, prophete-la reponn le roi: “Mem si to donne moi la moitié to lakaz, mo pa pou vinn avek toi ek mo pa pou mange di-pain ni boire de l’eau dan sa l’endroit-la.” Ek li quitte Béthel par enn lot chemin. (1 Rois 13:8-10) En rapport avek decision ki sa prophete-la ti prend, ki leson sa enseigne nou lor enn fidelité sincere?—Rom. 15:4.

“Contente-nou avek seki nou ena”

 5. Couma materialisme li enn kitsoz ki testé nou fidelité?

⁵ Materialisme kapav pa parette enn kitsoz ki testé nou fidelité, mais en realité li enn kitsoz ki testé nou fidelité. Eski nou ena confiance dan promesse Jéhovah pou donne nou seki nou vrai-mem bizin? (Mat. 6:33; Héb. 13:5) Si nou moyen pa permette nou pou gagne bann “bon” kitsoz dan nou la vie asterla, eski nou pa kapav vive sans sa bann kitsoz-la, au lieu ki nou faire tou pou gagne zot, n’importe ki sa coute nou? (Lire Philippiens 4:11-13.) Eski nou tenté pou sacrifié bann privilege dan congregation pou nou kapav gagne seki nou envie asterla? Eski enn service fidele pou Jéhovah occupe premier place dan nou la vie? Nou bann reponse pou depann beaucoup lor fason ki nou servi Bondié, si nou pé servi Li avek tou nou leker ou-soit non. L’apotre Paul ti ecrire: “Nou pou kapav tire enn grand profit si nou ena sa l’attachement-la pou Bondié, ek si nou contente-nou avek seki nou ena. Parski nou pa finn amenn nanyin dan le monde, ek nou pa pou kapav aussi prend nanyin allé. Alors, si nou ena mangé ek linge, nou pou contente-nou ar sa.”—1 Tim. 6:6-8.

 6. Ki “bann cadeau” kitfois nou kapav gagné, ek ki pou aide nou pou decidé si nou pou accepté zot ou-soit non?

⁶ Par exemple, nou patron kapav offert nou enn promotion ki pou faire nou gagne enn pli bon salaire ek bann lezot l’avantage. Ou-soit kitfois nou pensé ki nou pou gagne plus kass si nou al rod travail dan enn lot pays ou-soit dan enn lot l’endroit. Au commencement, nou kapav pensé ki sa bann l’occasion-la c’est bann benediction Jéhovah. Mais avant nou prend enn decision, eski nou pa bizin examine nou bann mobile? Premier kitsoz ki nou bizin prend en consideration c’est: “Ki l’effet mo decision pou ena lor mo relation avek Jéhovah?”

 7. Kifer li important ki nou tire net tou desir materialiste dan nou leker?

⁷ Le monde Satan pa arreté encourage materialisme. (Lire 1 Jean 2:15, 16.) L’objectif Satan c’est pou gate nou leker. Alors, nou bizin faire attention ek examine-nou-mem pou guetté si ena bann desir materialiste dan nou leker ek tire zot net. (Rév. 3:15-17) Jésus pa ti gagne okenn difficulté pou rejette l’offre ki Satan ti faire li pou donne li tou bann royaume ki ena dan le monde. (Mat. 4:8-10) Li ti donne sa l’avertissement-la: “Garde zot lizié ouvert, ek faire attention ar tou sorte qualité l’envie exageré, parski mem kan enn dimoune li dan l’abondance, so la vie pa depann lor bann kitsoz ki li ena.” (Luc 12:15) Nou fidelité pou aide nou pou compte lor Jéhovah au lieu ki nou compte lor nou-mem.

Enn vié prophete ‘ti embete li’

 8. Couma fidelité sa prophete Bondié-la ti testé?

⁸ Tou ti pou kapav inn marche bien pou sa prophete Bondié-la si li ti contigne so chemin pou retourne kot li. Mais desuite apré, li ti gagne enn lot l’epreuve. La Bible dire: “Ek ti ena enn vié prophete ki ti reste Béthel, ek so bann garson ti vinn raconte li” tou seki ti’nn passé sa jour-la. Kan li ti tann seki ti’nn arrivé, li ti demann so bann garson pou prepare so bourrik pou li kapav al joinde sa prophete Bondié-la. Enn tipé plitar, li ti trouve prophete-la pé reposé enba enn grand pié ek li ti dire li: “Vinn avek moi lakaz ek mange enn boute di-pain.” Kan representant Bondié ti refuse so l’invitation, vié prophete-la ti dire li: “Moi aussi mo enn prophete pareil couma toi, ek enn ange inn dire moi parole Jéhovah, li ti dire: ‘Faire li revinn avek toi dan to lakaz, pou ki li mange di-pain ek boire de l’eau.’ ” Mais la Bible ajouté: “Li ti pé embete li.”—1 Rois 13:11-18.

 9. Ki la Bible dire lor enn dimoune ki embete lezot, ek kisannla zot faire di-tort?

⁹ Nou pa koné ki mobile sa vié prophete-la ti ena, mais li ti koz menti. Kitfois pendant enn lepok, sa vié missié-la ti servi Jéhovah couma enn prophete fidele. Mais la, li ti pé agir dan enn fason pou trompe sa prophete Jéhovah-la. La Bible condamne sa qualité conduite-la dan enn fason ferme. (Lire Proverbes 3:32.) Bann dimoune ki embete lezot pa zis faire zot-mem di-tort, mais souvent zot faire lezot aussi di-tort lor plan spirituel.

“Li ti retourne avek” sa vié missié-la

10. Ki prophete Bondié ti faire kan enn vié missié ti invite li, ek couma sa ti fini pou li?

¹⁰ Prophete ki ti sorti Juda-la ti’nn bizin kapav realisé ki sa vié prophete-la ti pé embete li. Li ti’nn kapav demann li-mem: ‘Kifer Jéhovah pou envoye enn ange ar enn lot dimoune pou donne moi bann nouveau l’instruction?’ Li ti’nn kapav demann Jéhovah plus renseignement, mais la Bible pa dire ki li’nn faire sa. Au contraire, “li ti retourne avek [sa vié missié-la] pou li mange di-pain dan so lakaz ek boire de l’eau.” Sa pa ti faire Jéhovah plaisir. Kan finalement sa prophete-la ti reprend so chemin pou retourne Juda, enn lion ti trouve li ek ti touye li. Carriere sa prophete-la inn fini vrai-mem dan enn fason bien triste!—1 Rois 13:19-25.a

11. Ki bon l’exemple Ahiya inn laissé?

¹¹ Parkont, prophete Ahiya, ki Jéhovah ti envoyé pou choisir Yarobam ek pou faire li vinn le roi, ti reste fidele envers Jéhovah mem kan li ti’nn vinn vié. Kan Ahiya ti’nn vinn vié ek ti aveugle, Yarobam ti envoye so femme pou questionne Ahiya lor la santé zot garson ki ti malade. Avek courage Ahiya ti annoncé ki garson Yarobam pou mort. (1 Rois 14:1-18) Parmi bann benediction ki Abiya ti gagné c’est ki plitar Ezra, pretre Jéhovah ti servi seki Ahiya ti’nn ecrire pou li ecrire enn partie dan la Bible.—2 Chron. 9:29.

12-14. (a) Ki leson nou kapav aprann ar seki’nn arrive sa jeune prophete-la? (b) Donne bann l’exemple pou montré l’importance pou prend bien compte dan la priere bann conseil biblik ki bann ancien donné.

¹² La Bible pa dire kifer sa prophete ki sorti Juda-la pa ti demann Jéhovah plus renseignement avant li retourné ek al mangé ek boire avek sa vié missié-la. Eski li possible ki sa vié missié-la ti dire li seki li ti envie tendé? Ki leson nou kapav tiré? Nou bizin cent pou cent sur ki bann la loi Jéhovah zot juste. Ek nou bizin bien decidé pou obeir zot, n’importe ki arrivé.

¹³ Certain, kan zot rod bann conseil, zot tann zis seki zot envie tendé. Par exemple, li possible ki enn proclamateur inn gagne enn travail ki pou kapav prend le temps ki li consacré avek so famille ek pou lezot l’activité spirituel. Kitfois li al demann enn ancien conseil. D’abord ancien-la kapav dire li ki li reconette ki li pa dan enn position pou dire frere-la couma li bizin prend soin so famille. Apré sa, ancien-la kitfois reguette avek li bann danger ki li kapav gagné lor plan spirituel si li accepté sa travail-la. Eski frere-la pou rappel zis seki ancien-la inn dire li au commencement, ou-soit eski li pou prend en consideration seki ancien-la inn dire li apré aussi? Li clair ki frere-la bizin decidé seki pou pli bon pou li lor plan spirituel.

¹⁴ Anou prend enn lot situation. Enn soeur kapav al demann enn ancien si li pou bizin separé ar so mari ki pena mem croyance ki li. Ancien-la surement pou explik li ki c’est li ki bizin decidé si li pou separé ar so mari ou-soit non. Kitfois li pou reguette avek soeur-la bann conseil biblik lor sa sujet-la. (1 Cor. 7:10-16) Eski sa soeur-la pou prend en consideration seki ancien-la dire? Ou-soit eski li’nn fini mette dan so la tête ki li pou quitte so mari? Kan li prend so decision, li pou montré ki li sage si li considere dan la priere bann conseil biblik ki li’nn gagné.

Reconette nou limite

15. Ki nou aprann ar erreur ki sa prophete Bondié-la ti faire?

¹⁵ Ki nou kapav aprann encore ar erreur ki sa prophete Juda-la ti faire? Proverbes 3:5 dire: “Faire Jéhovah confiance avek tou to leker ek pa fié lor to prop l’intelligence.” Au lieu ki li ti contigne compte lor Jéhovah couma li ti’nn faire dan le passé, dan sa l’occasion-la sa prophete ki sorti Juda-la ti compte lor so prop jugement. A cause so erreur, li ti perdi so la vie ek so bon reputation devant Bondié. Seki’nn arrive li montré vrai-mem l’importance pou reconette nou limite ek pou reste fidele dan nou service pou Jéhovah!

16, 17. Ki pou aide nou pou reste fidele envers Jéhovah?

¹⁶ Bann desir egoïste ki nou ena dan nou leker ena tendance pou mette nou lor enn mauvais chemin. La Bible dire: “Leker pli traitre ki n’importe ki lezot kitsoz ek li bien mauvais.” (Jér. 17:9) Pou nou reste fidele envers Jéhovah, nou bizin contigne travail dur pou tire nou vié personnalité avek so tendance pou ena l’orgueil ek pou compte zis lor nou-mem. Ek nou bizin mette lor nou nouveau personnalité, “ki finn crée dapré volonté Bondié, dan enn justice ek enn fidelité ki vrai.”—Lire Éphésiens 4:22-24.

¹⁷ “La sagesse li avek bann dimoune ki reconette zot limite,” c’est seki Proverbes 11:2 dire. Kan nou compte lor Jéhovah ek nou reconette nou limite, sa aide nou pou evite faire bann erreur grave. Par exemple, kan nou decouragé, sa kapav facilement fausse nou jugement. (Prov. 24:10) Li possible ki nou fatigué faire certain kitsoz dan nou service sacré ek nou commence pensé ki nou finn assez faire dan nou la vie ek ki kitfois inn arrive ler pou lezot prend sa bann responsabilité-la. Ou-soit kitfois nou envie amenn enn la vie ki pli “normal.” Selman, si nou “faire bann grand zeffort” ek nou “ena toujours beaucoup pou faire dan travail nou Seigneur,” sa pou protege nou leker.—Luc 13:24; 1 Cor. 15:58.

18. Ki nou kapav faire si nou pa koné ki decision pou prend?

¹⁸ Parfois li kapav arrivé ki nou bizin prend bann decision bien difficile, ek kitfois nou pa toujours koné ki nou bizin faire. Eski nou pou tenté pou essaye reglé sa probleme-la par nou-mem? Si arrivé nou retrouve-nou dan sa qualité situation-la, nou pou montré-nou sage si nou demann l’aide Jéhovah. Jacques 1:5 dire: “Si kikenn parmi zot mank sagesse, laisse li contigne demann Bondié, parski Bondié content pou donne tou dimoune.” Nou Papa ki dan le ciel pou donne nou l’esprit saint ki nou bizin pou nou kapav prend bann bon decision.—Lire Luc 11:9, 13.

Anou bien decidé pou reste fidele

19, 20. Ki nou bizin bien decidé pou faire?

¹⁹ Bann l’année ki’nn passé apré ki Salomon ti quitte vrai l’adoration ti bien testé fidelité bann serviteur Bondié. Li vrai ki dan certaine fason, beaucoup ti al kont la loi Jéhovah. Pourtant, certain ti reste fidele envers Jéhovah.

²⁰ Chaque jour, nou bizin faire bann choix ek prend bann decision ki testé nou fidelité. Nou aussi nou kapav montré ki nou fidele. Anou reste toujours fidele envers Jéhovah pendant ki nou pé faire tou pou ki nou leker symbolik vinn entier, ek nou faire sa avek enn confiance total ki Li pou contigne beni so bann fidele serviteur.—2 Sam. 22:26.

[Note]

Couma ou pou reponn?

• Kifer nou bizin tire net bann desir materialiste dan nou leker?

• Ki pou aide nou pou reste fidele envers Jéhovah?

• Couma, kan nou reconette nou limite, sa aide nou pou reste fidele envers Bondié?

[Zimage lor page 15]

Eski ou gagne difficulté pou resisté devant bann tentation?

[Zimage lor page 16]

Eski ou pou considere dan la priere bann conseil biblik ki ou gagné?