’Galopé pou ki zot reussi gagne sa prix-la’

“Galope enn fason ki zot reussi gagne sa.”​—1 COR. 9:24.

1, 2. (a) Ki l’exemple Paul ti servi pou encourage bann chretien hébreu? (b) Ki conseil bann serviteur Bondié encouragé pou suive?

DAN lettre ki l’apotre Paul ti ecrire bann Hébreu, li ti servi enn joli l’exemple pou encourage so bann compagnon chretien. Li ti rappel zot ki zot pa ti tousel dan sa la course pou la vie-la. Ti ena enn “grand la foule temoin” autour zot ki ti’nn reussi fini zot la course. Si bann chretien hébreu ti reflechi lor bann kitsoz ek bann grand zeffort ki sa bann serviteur fidele-la ti faire par la foi, sa ti pou motive zot pou fini zot la course.

² Dan lartik avant, nou ti examine plusieurs l’exemple bann serviteur fidele Jéhovah ki ti forme partie dan sa ’grand la foule temoin-la.’ Zot tou ti manifesté enn la foi bien solide ki ti aide zot pou reste fidele envers Bondié, ek pou fini zot la course. Nou kapav tire enn leson ar zot bon l’exemple. Couma nou ti examiné dan sa lartik-la, Paul ti donne sa conseil-la so bann compagnon chretien: “Anou tire tou poids ek peché ki kapav blok nou facilement, ek anou galope avek endurance sa la course ki devant nou-la.” Sa conseil-la applik ar nou aussi.​—Héb. 12:1.

 3. Ki conseil Paul ti donne bann chretien kan li ti faire reference ar bann coureur dan bann sport ki ti ena en Grèce?

³ Paryaz galopé ti enn sport bien populaire dan lepok l’apotre Paul. Concernant sa sport-la, livre Backgrounds of Early Christianity dire ki “bann grec ti entraine-zot ek ti participe dan bann competition, touni.”a Dan sa bann cas-la, bann coureur ti tire tou zot linge parski sa ti kapav mette enn poids inutile lor zot ek ti kapav ralenti zot. Kitfois nou pensé ki zot ti pé galope dan enn fason indecent, mais si zot ti galope coumsa c’est parski zot ti ena enn sel l’objectif: pou gagne prix. Paul ti pé rod dire ki, pou bann chretien gagne la vie eternel, li ti important ki zot tire ou-soit diminué n’importe ki kitsoz ki ti kapav ralenti zot. Sa ti enn bon conseil pou bann chretien dan sa lepok-la, ek pou nou aussi zordi. Ki bann poids ou-soit bann fardeau ki kapav empeche nou pou gagne sa prix pou la vie-la?

“Tire tou poids”

 4. Ki kitsoz ki ti pli important pou bann dimoune dan lepok Noé?

⁴ Paul ti conseil bann chretien pou “tire tou poids.” Sa implik tou kitsoz ki kapav empeche nou pou donne tou nou l’attention ek pou faire tou seki nou kapav dan la course ki nou pé galopé. Ki sa bann kitsoz ki kapav vinn couma enn poids-la? Kan nou guette l’exemple Noé, enn parmi bann serviteur Bondié ki Paul ti cité, nou rappel seki Jésus ti dire: “Pareil couma sa ti été dan lepok Noé, coumsa-mem sa pou été dan lepok Fils de l’homme.” (Luc 17:26) Jésus pa ti pé mette l’accent lor sa destruction ki ti pé vini-la, enn destruction ki jamais finn ena avant. Li ti pé koz lor fason ki bann dimoune ti pé vive. (Lire Matthieu 24:37-39.) La plupart dimoune dan lepok Noé pa ti envie aprann konn Bondié, ek pa ti faire zeffort pou faire Li plaisir. Ki kitsoz ki ti pli important pou zot? Pa bann grand kitsoz. Mangé, boire, marié​—bann kitsoz normal ki ti forme partie dan la vie. Ki ti zot probleme? Dapré Jésus, “zot pa ti prend compte.”

 5. Ki l’attitude nou bizin ena devant tou seki nou ena pou faire?

⁵ Pareil couma Noé ek so famille, nou aussi nou ena beaucoup pou faire toulé-jour. Nou bizin travail ek nou bizin prend nou-mem ek nou famille soin. Kitfois nou prend beaucoup le temps, nou servi nou la force ek nou depense seki nou ena, pou nou kapav faire sa. Li facile ki nou tracasse-nou pou bann kitsoz ki nou bizin toulé-jour surtout kan ena probleme economik. En tant ki bann chretien baptisé, nou ena aussi bann responsabilité spirituel important. Nou bizin preché, prepare ek assisté bann reunion, ek pou nou reste fort lor plan spirituel, nou bizin reserve le temps pou nou l’etude personnel ek nou l’adoration en famille. Mem si Noé ti ena beaucoup pou faire dan service Bondié, “li ti faire exactement seki ti’nn dire li faire.” (Gen. 6:22) Eski nou kapav dire ki nou aussi nou pé “faire exactement” seki’nn dire nou, ou-soit eski nou pé faire zis nou minimum? Si nou envie faire tou seki Jéhovah demann nou ek fini nou la course, li bien important ki nou pa sarié okenn poids ki kapav empeche nou fini sa la course-la.

6, 7. Ki conseil Jésus nou bizin rappel?

⁶ Alors, ki Paul ti pé rod dire kan li ti conseil pou tire “tou poids”? Bien sur, nou pa kapav tire tou responsabilité lor nou zepaule. Mais rappel seki Jésus ti dire concernant bann kitsoz ki important dan la vie: “Fodé jamais zot tracassé ek zot dire: ’Ki nou pou mangé?’ ou-soit: ’Ki nou pou boire?’ ou-soit: ’Ki nou pou metté?’ C’est tou sa bann kitsoz-la ki bann nation pé faire tou pou gagné. Mais zot Papa ki dan le ciel, koné ki zot bizin tousala.” (Mat. 6:31, 32) Jésus ti pé rod faire comprend ki mem bann kitsoz normal couma mangé ek linge kapav vinn enn fardeau ou-soit enn l’obstacle si nou faire zot passe en premier dan nou la vie.

⁷ Rappel seki Jésus ti dire: “Zot Papa ki dan le ciel, koné ki zot bizin tousala.” Sa vedir ki Jéhovah, nou Papa ki dan le ciel pou faire so part pou donne nou seki nou bizin. Bien sur, kitfois “tou sa bann kitsoz-la” zot different ar seki nou, nou envie. Mais kan-mem, Jésus ti dire ki fodé pa nou tracassé concernant ’bann kitsoz ki bann nation pé faire tou pou gagné.’ Kifer? Plitar Jésus ti donne sa conseil-la bann dimoune ki ti pé ecoute li: “Faire attention ar zot-mem, pangar zot leker vinn lourd parski zot trop mangé ek boire, ek a cause bann tracas ki ena dan la vie, ek ki enn sel coup sa jour-la vinn lor zot couma enn piege.”​—Luc 21:34, 35.

 8. Kifer nou bizin “tire tou poids” surtout dan nou lepok?

⁸ Nou finn arrive pré ar la fin la course ki nou pé galopé ek nou pré pou rente dan bite. Li pou bien triste si nou laisse bann poids inutile empeche nou pou avancé alors ki la fin derriere la porte! L’apotre Paul ti donne sa conseil ki bien sage-la: “Nou pou kapav tire enn grand profit si nou ena sa l’attachement-la pou Bondié, ek si nou contente-nou avek seki nou ena.” (1 Tim. 6:6) Alors, si nou contente-nou ar bann kitsoz ki nou bizin, li pou pli facile pou contigne galopé ek gagne sa prix ki devant nou-la.

“Peché ki kapav blok nou facilement”

9, 10. (a) Ki été “peché ki kapav blok nou facilement”? (b) Couma sa peché-la kapav blok nou?

⁹ Paul pa ti zis dire “tire tou poids,” mais li ti dire aussi tire ’sa peché ki kapav blok nou facilement-la.’ Ki ’sa peché ki kapav blok nou facilement-la’? Mot grec ki’nn servi pou traduire “blok nou facilement” parette enn sel fois dan la Bible, zis dan sa verset-la. Enn specialiste dan la Bible, Albert Barnes ti dire: “Pareil couma enn coureur ti faire attention pou ki okenn linge pa gene li ek maye avek so lipié ek empeche li galopé, enn chretien aussi bizin mette enn coté tou kitsoz ki kapav ressemblé sa linge-la.” Ki enn chretien bizin faire pou ki nanyin pa blok li ek faire li perdi so la foi?

¹⁰ Enn chretien fidele pa perdi so la foi enn coute coumsa. Sa kapav arrivé tigit par tigit, sans mem ki li remarké. Dan commencement so lettre, Paul ti averti bann chretien lor danger pou pa laisse-zot “eloigné tigit par tigit” ek “developpe enn mauvais leker ki mank la foi.” (Héb. 2:1; 3:12) Kan linge enn coureur maye dan so lipié, pena barré ki li pou tombé. Si sa coureur-la pa prend compte danger ki ena pou mette certain linge, ena enn grand possibilité ki sa maye dan so lipié kan li pé galopé. Ki kapav faire li pa prend compte sa danger-la? Kitfois li negligent ou-soit li trop compte lor li-mem, ou-soit parski li pé pense lezot kitsoz. Ki leson nou kapav aprann ar conseil ki Paul ti donné?

11. Ki kapav faire nou perdi nou la foi?

¹¹ Nou bizin rappel ki c’est a cause bann kitsoz ki nou finn faire pendant enn certain temps ki finalement nou perdi nou la foi. Enn lot specialiste dire concernant “peché ki kapav blok nou facilement,” ki c’est “peché ki ena pli grand l’influence lor nou, a cause nou situation, nou personnalité, ek bann dimoune ki nou frequenté.” Sa specialiste-la pé rod dire ki nou l’environnement, nou bann defaut, ek nou bann frequentation kapav ena enn grand l’influence lor nou. Sa bann kitsoz-la kapav affaibli ou-soit-mem faire nou perdi nou la foi.​—Mat. 13:3-9.

12. Ki bann rappel nou bizin prend compte pou ki nou pa perdi nou la foi?

¹² Depuis touletan l’esclave fidele ek avisé finn rappel nou ki nou bizin faire attention ar bann kitsoz ki nou guetté ek ki nou ecouté parski sa kapav ena enn l’influence lor nou leker ek nou l’esprit. Li finn aussi mette nou en garde kont danger ki ena pou galope derriere l’argent ek bann kitsoz materiel. Li kapav arrivé ki nou laisse bann divertissement attirant ek tou bann nouveau gadget ki ena dan le monde, detourne nou. Li pou enn grand erreur si nou pensé ki sa conseil-la trop severe ou-soit ki sa applik zis ar lezot. Fodé pa nou pensé ki sa bann danger-la pa kapav ena enn l’effet lor nou. Nou pa remark desuite bann piege ki le monde Satan mette devant nou pou embete nou. Certain chretien finn perdi zot la foi parski zot finn montré-zot negligent, zot finn trop compte lor zot-mem ou-soit zot finn laisse bann distraction ki ena dan le monde attire zot. Si nou laisse sa bann kitsoz-la influence nou, nou aussi nou kapav perdi la vie eternel.​—1 Jean 2:15-17.

13. Couma nou kapav protege nou-mem kont bann mauvais l’influence?

¹³ Toulé-jour nou gagne contact ar bann dimoune ki favorise bann l’objectif, bann valeur ek bann pensée ki ena dan sa le monde-la. (Lire Éphésiens 2:1, 2.) Ki quantité sa kapav influence nou? Sa pou depann beaucoup lor fason ki nou reagir ar sa bann l’influence-la. “L’air” ki Paul ti mentionné faire bann dimoune mort lor plan spirituel. Alors, nou bizin touletan reste lor nou garde pou ki nanyin pa touffe nou ek empeche nou fini nou la course. Ki kapav aide nou pou contigne nou la course? Kan nou imite Jésus, nou l’exemple parfait ki ti fini so la course. (Héb. 12:2) Nou ena aussi l’exemple Paul. Li aussi li ti fini so la course ek li ti encourage so bann compagnon pou imite li.​—1 Cor. 11:1; Phil. 3:14.

’Zot kapav gagne sa prix-la’—Couma?

14. Eski sa la course-la ti important pou Paul?

¹⁴ Eski sa la course-la ti important pou Paul? Kan dernier fois li ti koz avek bann ancien Éphèse, li ti dire zot: “Mo la vie pa compté pou moi, coumadir li ti enn kitsoz ki ena valeur pou moi, pourvi ki mo fini mo la course ek ministere ki mo finn gagné ar Seigneur Jésus.” (Actes 20:24) Li ti pré pou sacrifié tou kitsoz, mem so la vie, pou li kapav fini so la course. Paul ti faire beaucoup zeffort ek li ti travail dur pou preche la bonne nouvelle. Mais pou li, tou sa bann zeffort-la ti pou dan vide si li pa ti fini so la course. Pourtant, li pa ti ena enn trop grand l’assurance ek pensé ki li ti’nn fini gagne sa prix-la. (Lire Philippiens 3:12, 13.) C’est selman kan li ti pré pou mort ki li ti kapav dire avek enn certain l’assurance: “Mo’nn combatte sa joli combat-la, mo’nn termine la course, mo’nn garde la foi.”​—2 Tim. 4:7.

15. Ki l’encouragement Paul ti donne so bann compagnon chretien?

¹⁵ En plus, Paul ti ena enn grand desir pou trouve so bann compagnon fini zot la course sans ki zot tombé. Par exemple, li ti encourage bann chretien dan congregation Philippes pou travail dur pou zot gagne la vie sauve. Zot ti bizin “tini ferme parole ki donne la vie.” Li ti aussi dire: “Pou ki mo kapav glorifié mo-mem, jour Christ, ki mo pa finn galope dan vide ni mo finn travail dur dan vide.” (Phil. 2:16) Kan certain parmi so bann frere pa ti fini zot la course, Paul ti senti-li responsable. Li ti encourage aussi bann chretien dan Corinthe, kan li ti dire zot: “Galope enn fason ki zot reussi gagne sa [prix-la].”​—1 Cor. 9:24.

16. Kifer sa prix ki devant nou-la bizin réel pou nou?

¹⁶ Dan enn longue la course, par exemple enn marathon, kan enn coureur commence galopé li pa trouve la ligne pou rente dan bite, desuite. Kan-mem, toute longue la course, sa coureur-la garde so l’esprit fixé lor la. Kan li koné ki li pré pou arrive dan bite, li faire encore plus zeffort pou fini so la course. La course ki nou pé galopé aussi li pareil. Sa prix ki devant nou-la bizin réel pou nou. Sa pou aide nou pou fini nou la course ek pou gagne sa prix-la.

17. Couma la foi kapav aide nou pou garde nou l’esprit fixé lor sa prix ki devant nou-la?

¹⁷ Paul ti ecrire: “La foi c’est kan nou sur ki seki nou pé attann pou arrivé, li enn preuve sur ki bann kitsoz ki pourtant nou pa trouvé, zot enn realité.” (Héb. 11:1) Abraham ek Sara ti disposé pou abandonne enn la vie confortable ek pou vive couma “bann etranger ek bann dimoune ki reste dan enn fason temporaire dan sa pays-la.” Ki ti aide zot? “Zot ti trouve [realisation bann promesse Bondié] de loin.” Moïse ti refuse pou profite “plaisir temporaire ki gagné dan peché” ek “bann tresor l’Égypte.” Couma li ti gagne la foi ek courage pou faire sa? Li ti “garde so lizié fixé lor recompense ki ti devant li.” (Héb. 11:8-13, 24-26) Nou comprend kifer Paul ti servi l’expression “par la foi” kan li ti koz lor sakenn parmi sa bann serviteur fidele-la. Grace a la foi zot pa ti pou trouve zis bann l’epreuve ek bann probleme ki zot ti pé gagné. La foi ti aide zot pou trouve seki Bondié ti pé faire pou zot ek seki Li ti pou faire encore dan l’avenir.

18. Ki nou bizin faire pou tire “peché ki kapav blok nou facilement”?

¹⁸ Kan nou medite lor l’exemple bann zom ek bann femme ki ti manifesté la foi ki mentionné dan Hébreux chapitre 11, sa aide nou pou developpe la foi ek pou tire “peché ki kapav blok nou facilement.” (Héb. 12:1) Nou kapav aussi “interesse-nou sakenn ar nou camarade, pou encourage sakenn parmi nou pou montré l’amour, ek faire bann bon action.” Nou faire sa kan nou rassemblé ensam avek bann dimoune ki pé faire zeffort pou developpe mem la foi ki nou.​—Héb. 10:24.

19. Kifer li important ki nou garde nou l’esprit fixé lor sa prix ki devant nou-la?

¹⁹ Nou aussi nou pré pou fini nou la course. Coumadir nou pé trouve bite devant nou. Grace a la foi ek avek l’aide Jéhovah, nou aussi nou kapav “tire tou poids ek peché ki kapav blok nou facilement.” Oui, nou kapav galope dan enn fason pou nou reussi gagne sa prix ki devant nou-la​—bann benediction ki Jéhovah, nou Bondié ek nou Papa inn promette nou.

[Note]

Eski ou rappel?

• Couma nou kapav tire “tou poids”?

• Couma enn chretien kapav perdi la foi?

• Kifer nou bizin garde nou l’esprit fixé lor sa prix ki devant nou-la?

[Zimage page 26]

Ki été “peché ki kapav blok nou facilement,” ek couma sa kapav blok nou?