Kifer nou bizin donne priorité service Jéhovah?

“Mo la bouche pou raconte to justice, toute longue la journée, mo pou raconte to delivrance.”​—PS. 71:15.

COUMA OU POU REPONN?

Ki kitsoz ki ti passe en premier dan la vie Noé, Moïse, Jérémie, ek Paul?

Ki pou aide ou decidé ki ou pou faire avek ou la vie?

Kifer ou bien decidé pou mette service Jéhovah en premier dan ou la vie?

1, 2. (a) Ki enn dimoune montré kan li voué so la vie ar Jéhovah? (b) Couma l’exemple Noé, Moïse, Jérémie ek Paul kapav aide nou?

KAN ou voué ou la vie ar Bondié ek ou baptisé pou vinn enn disciple Jésus, c’est decision pli important ki ou prend dan ou la vie. Coumadir ou pé dire: ‘Jéhovah, mo envie ki to vinn mo Maitre dan tou domaine mo la vie. Mo to serviteur. Mo envie ki to dire moi couma mo bizin servi mo le temps, ki mo bann priorité bizin été, ek couma mo bizin servi seki mo ena ek mo bann talent.’

² Si ou enn chretien baptisé, dan enn certaine fason, c’est seki ou finn promette Jéhovah. Ou merite gagne bann felicitation pou sa decision sage ki ou finn prend-la. Mais, kan ou reconette Jéhovah couma ou Maitre, ki sa impliké concernant fason ki ou servi ou le temps? L’exemple Noé, Moïse, Jérémie ek l’apotre Paul kapav aide nou pou reponn sa question-la. Sa bann zom-la ti servi Jéhovah avek tou zot nâme. Nou situation aussi pareil couma zot. Bann decision ki zot ti prend ti montré ki ti zot priorité ek sa kapav encourage nou pou reflechi couma nou pé servi nou le temps zordi.​—Mat. 28:19, 20; 2 Tim. 3:1.

AVANT DELUGE

 3. Couma nou lepok pareil couma lepok Noé?

³ Jésus ti faire enn comparaison entre lepok Noé ek nou lepok. Li ti dire: “Pareil couma sa ti été dan lepok Noé, coumsa-mem presence Fils de l’homme pou été.” Zot ti pé “mangé ek boire, bann zom ti pé marié ek ti pé donne bann femme en mariage, ziska jour ki Noé ti rente dan l’arche; ek zot pa ti prend compte, ziska ki deluge ti vini ek ti balié zot tou.” (Mat. 24:37-39) La plupart dimoune zordi contigne vive sans ki zot prend compte ki pa reste beaucoup le temps avant la fin. Zot pa ecoute bann l’avertissement ki bann serviteur Bondié pé annoncé. Pareil couma bann dimoune ti faire dan lepok Noé, zordi aussi beaucoup riyé kan zot tann dire ki bientot Bondié pou tire mechanceté lor la terre. (2 Pierre 3:3-7) Pourtant, dan enn situation difficile coumsa, couma Noé ti servi so le temps?

 4. Couma Noé ti servi so le temps apré ki Jéhovah ti donne li enn travail special pou faire, ek kifer?

⁴ Bondié ti dire Noé seki Li ti ena l’intention pou faire ek Li ti donne li enn travail special pou faire. Alors, Noé ti construire enn l’arche pou protege la vie bann dimoune ek bann zanimo. (Gen. 6:13, 14, 22) Noé ti aussi annonce jugement Jéhovah ki ti bien pré. L’apotre Pierre appel li “enn predicateur la justice” pou montré ki Noé ti faire zeffort pou aide bann dimoune trouvé ki zot situation ti bien grave. (Lire 2 Pierre 2:5.) Eski ou pensé ki li ti pou raisonnable ki Noé ek so famille travail dur pou monte enn business, pou plus reussi ki bann dimoune dan zot lepok, ou-soit pou rod enn la vie confortable? Non, bien sur! Zot ti koné ki ti pou arrivé, alors zot ti rejette tou sa bann kitsoz ki ti pou kapav detourne zot l’attention-la.

CHOIX KI ENN PRINCE EGYPTIEN TI FAIRE

5, 6. (a) L’education ki Moïse ti gagné ti surement prepare li pou ki kitsoz? (b) Kifer Moïse ti rejette bann possibilité ki ti kapav gagné en Égypte?

⁵ Asterla, anou guette l’exemple Moïse. Tifi Pharaon ti adopté li ek li ti grandi dan enn palais égyptien. En tant ki enn jeune prince, li ti “gagne enn l’education complet lor sagesse bann Égyptien.” (Actes 7:22; Ex. 2:9, 10) Kitfois sa l’education-la ti pou prepare li pou faire enn carriere dan palais Pharaon. Li ti pou kapav vinn enn dimoune important dan pli grand gouvernement sa lepok-la, gagne beaucoup kitsoz de luxe, bann privilege, ek bann plaisir ki sa position-la ti pou permette li gagné. Mais eski Moïse ti ena l’objectif pou profite sa bann plaisir-la?

⁶ Kan Moïse ti tipti, so bann vrai parent ti enseigne li lor Jéhovah, alors, surement li ti koné seki Jéhovah ti promette so bann ancetre Abraham, Isaac, ek Jacob. Li ti ena la foi dan sa bann promesse-la. Surement li ti bien reflechi lor so l’avenir ek lor so fidelité envers Jéhovah. Alors, kan ti arrive ler pou choisir entre reste enn prince égyptien ou-soit vinn enn esclave israélite, ki Moïse ti decidé pou faire? Li ti choisir “pou gagne maltraité ensam avek peuple Bondié au lieu ki profite plaisir temporaire ki gagné dan peché.” (Lire Hébreux 11:24-26.) Plitar, li ti laisse Jéhovah guide li lor fason ki li ti bizin servi so la vie. (Ex. 3:2, 6-10) Kifer Moïse ti faire sa? Parski li ti croire dan bann promesse Bondié. Li ti comprend ki pa ti ena okenn l’avenir pou li dan l’Égypte. Li ti ena raison, parski inpé le temps apré, Bondié ti envoye dix plaie pou puni sa nation-la. Eski ou trouve enn leson ladan pou tou bann ki finn voué zot la vie ar Jéhovah zordi? Au lieu ki nou pense pou faire enn carriere ou-soit pou profite bann plaisir ki ena dan sa le monde-la, nou bizin plutot mette Jéhovah ek so service en premier dan nou la vie.

JÉRÉMIE TI KONÉ KI POU ARRIVÉ

 7. Couma situation Jérémie ti ressemblé nou situation?

⁷ Enn lot zom ki ti mette service Jéhovah en premier dan so la vie, c’est prophete Jérémie. Jéhovah ti choisir Jérémie pou vinn so prophete ek ti demann li pou preche enn message condamnation kont Jérusalem ek Juda ki ti’nn vinn apostat. Dan enn sens, Jérémie ti vive “dan periode final bann jour.” (Jér. 23:19, 20) Li ti bien koné ki sa systeme dan ki li ti pé vive-la pa ti pou duré touletan.

8, 9. (a) Kifer Bondié ti bizin corrige fason pensé Barouk? (b) Ki nou bizin rappel kan nou faire bann projet?

⁸ Ki Jérémie pa ti faire parski li ti koné ki pou arrivé? Li pa ti essaye faire so l’avenir dan sa systeme ki ti’nn condamné-la. Sa ti pou vrai-mem bete si li ti faire sa. Mais selman, ti ena enn moment kot Barouk, secretaire Jérémie, pa ti trouve bann kitsoz dan enn bon fason. Alors, Bondié ti inspire Jérémie pou dire so secretaire: “Guetté! Seki mo’nn construire, mo pé crasé, seki mo’nn planté, mo pé deraciné, setadir sa pays-la net. Mais toi, to pé contigne rod bann grand kitsoz pou to-mem. Arrete rodé. Parski mo pé amenn enn malheur lor tou dimoune, . . . mais toi, c’est to la vie ki to pou gagné couma enn recompense partout kot to pou allé.”​—Jér. 45:4, 5.

⁹ Nou pa koné exactement ki “bann grand kitsoz” Barouk ti pé rodé pou li-mem.a Mais, nou koné ki sa bann kitsoz-la pa ti ena okenn l’avenir, ek ki zot ti pou detruire kan bann Babylonien ti pou prend Jérusalem en 607 avant nou lepok. Ki leson nou kapav tiré? Li vrai ki pou gagne bann kitsoz ki nou bizin dan la vie, nou bizin faire certain projet pou nou l’avenir. (Prov. 6:6-11) Mais eski li pou vrai-mem sage ki nou depense beaucoup le temps ek l’energie pou galope derriere bann kitsoz ki pa pou duré? Li vrai ki l’organisation Jéhovah contigne faire bann projet pou construire bann nouveau la Salle du Royaume, bann Béthel, ek lezot projet theocratik. Mais selman, sa bann projet-la zot ena enn l’avenir parski zot l’objectif c’est pou favorise bann l’interet Royaume Bondié. Li ti pou bon ki tou bann serviteur Jéhovah ki baptisé ena mem priorité kan zot faire bann projet. Eski ou kapav dire sans hesitation ki ‘avant tou kitsoz ou pé rod le royaume ek justice Jéhovah’?​—Mat. 6:33.

“MO CONSIDERE TOUSALA COUMA ENN TAS SALETÉ”

10, 11. (a) Avant ki Paul ti vinn chretien, ki kitsoz ti important pou li? (b) Kifer Paul ti change net so l’objectif?

¹⁰ Finalement, anou examine l’exemple Paul. Avant ki Paul ti vinn chretien, li ti ena seki beaucoup dimoune ti considere couma enn bon l’avenir. Li ti etudié la loi juif avek enn parmi bann pli grand professeur ki ti ena dan so lepok. Grand pretre juif ti donne li beaucoup pouvoir. Ek li ti pé faire plus progré dan religion juif ki bann dimoune dan so lepok. (Actes 9:1, 2; 22:3; 26:10; Gal. 1:13, 14) Pourtant, tousala ti changé kan Paul ti realisé ki Jéhovah ti’nn rejette bann Juif en tant ki nation.

¹¹ Paul ti rann-li compte ki enn carriere dan systeme juif pa ti ena okenn valeur devant lizié Jéhovah; pa ti ena okenn l’avenir ladan. (Mat. 24:2) Paul, ki avant ti enn Pharisien, ti mem dire ki li ti considere bann kitsoz ki avant li ti trouve important, couma enn “tas saleté” kan li ti compare zot ar nouveau connaissance ki li ti’nn gagné lor projet Bondié ek privilege ki li ti ena pou preche la bonne nouvelle. Paul ti abandonne bann l’objectif ki li ti ena dan religion juif ek ti consacré le reste so la vie pou preche la bonne nouvelle.​—Lire Philippiens 3:4-8, 15; Actes 9:15.

EXAMINE OU BANN PRIORITÉ

12. Lor ki kitsoz Jésus ti fixé so l’attention apré so bapteme?

¹² Noé, Moïse, Jérémie, Paul, ek beaucoup lezot encore, finn servi enn grand partie zot le temps ek zot la force pou poursuive bann l’objectif spirituel. Zot bann bon l’exemple pou nou. Bien sur, pli grand l’exemple ki nou ena parmi bann serviteur Jéhovah ki’nn baptisé, c’est Jésus. (1 Pierre 2:21) Apré so bapteme, Jésus ti consacré le reste so la vie lor la terre pou preche la bonne nouvelle ek pou honore Jéhovah. Alors, pou enn chretien ki’nn faire Jéhovah vinn so Maitre, li clair ki servi Jéhovah, sa-mem ki bizin vinn enn priorité dan so la vie. Eski ou aussi ou ena sa priorité-la? Couma nou kapav poursuive bann l’objectif spirituel ek en mem temps occupe bann lezot responsabilité ki nou ena dan nou la vie?​—Lire Psaume 71:15; 145:2.

13, 14. (a) Ki tou chretien baptisé encouragé pou examiné? (b) Ki la joie bann serviteur Bondié kapav ena?

¹³ Pendant plusieurs l’année, l’organisation Jéhovah pa finn arrete encourage bann chretien pou examine zot situation dan la priere pou guetté si zot kapav faire pionnier. Pou plusieurs raison, situation certain serviteur Jéhovah ki fidele pa permette zot pou consacré 70 heure dan predication, chaque mois. Fodé pa ki zot senti-zot decouragé a cause sa. (1 Tim. 5:8) Mais ki ou kapav dire lor ou? Eski vrai-mem ou situation pa permette ou pou faire pionnier?

¹⁴ Anou reflechi lor la joie ki beaucoup parmi bann serviteur Bondié ti gagné pendant lepok Mémorial sa l’année-la. En mars, ti ena enn disposition special ki ti permette bann pionnier auxiliaire pou choisir si zot pou faire 30 ou-soit 50 heure dan zot service. (Ps. 110:3) Plusieurs million ti faire pionnier auxiliaire ek dan bann congregation ti ena enn grand la joie ek enn excitation. Eski ou kapav organise ou la vie pou gagne sa la joie-la pli souvent? Kan enn chretien baptisé faire pionnier, li tellement content ki, a la fin chaque la journée, li kapav dire: “Jéhovah, mo finn faire tou seki mo kapav dan to service.”

15. Ki l’objectif enn jeune chretien bizin ena kan li pé al lekol?

¹⁵ Kitfois ou enn jeune ki pré pou fini lekol, ou ena enn bon la santé ek ou pena beaucoup responsabilité. Eski ou finn reflechi avek serieux si ou kapav faire pionnier? Pena doute ki bann conseiller dan lekol zot sincere kan zot dire ou ki li dan ou l’interet pou faire bann longue l’etude ek enn carriere dan sa le monde-la. Selman, zot mette zot confiance dan bann l’organisation humain ek dan l’argent. Mais sa bann kitsoz-la pena okenn l’avenir. De lot coté, si ou poursuive enn carriere dan service Jéhovah, ou pou poursuive bann l’objectif ki vaut la peine ek ki ena enn l’avenir. Ek ou pou suive l’exemple parfait ki Jésus inn laissé. Enn decision sage coumsa pou faire ou heureux. Sa pou protege ou. Ek sa pou montré ki ou bien decidé pou vive en accord avek voeu ki ou finn faire ar Jéhovah.​—Mat. 6:19-21; 1 Tim. 6:9-12.

16, 17. Ki bann question nou kapav posé concernant nou service pou Jéhovah?

¹⁶ Plusieurs serviteur Jéhovah zordi passe beaucoup le temps dan travail pou zot kapav prend soin zot famille. Pourtant, certain kitfois travail plus ki necessaire. (1 Tim. 6:8) Le monde zordi pé faire tou seki li kapav pou convaink nou ki nou pa pou kapav vive si nou pena sa quantité produit ki li offert-la, ek tou bann nouveau kitsoz ki li produire. Mais bann vrai chretien pa envie ki le monde Satan choisir ki priorité zot bizin ena. (1 Jean 2:15-17) Concernant bann ki finn prend retraite dan zot travail, eski ena enn pli bon fason ki zot kapav servi zot le temps ki faire pionnier ek mette service Jéhovah en premier dan zot la vie?

¹⁷ Tou bann serviteur Jéhovah ki’nn baptisé kapav demann-zot-mem: ‘Ki mo priorité dan la vie? Eski mo pé mette bann l’interet Royaume Bondié en premier? Eski mo pé imite l’esprit sacrifice ki Jésus ti manifesté? Eski mo pé contigne suive Jésus pareil couma li ti demann nou pou faire? Eski mo kapav faire bann changement dan mo programme pou mo consacré plus le temps dan predication ou-soit dan lezot l’activité theocratik? Mem si mo situation pa permette moi asterla pou faire plus dan service Jéhovah, eski mo pé contigne manifesté enn l’esprit sacrifice?’

‘POU ZOT ENVIE EK POU ZOT AGIR’

18, 19. Concernant ki kitsoz ou kapav prié, ek kifer enn la priere coumsa pou faire Jéhovah plaisir?

¹⁸ C’est vrai-mem enn la joie pou trouve zele ki peuple Bondié ena. Mais selman, kitfois certain pena desir pou faire pionnier ou-soit pou qualifié-zot pou vinn pionnier​—mem si zot situation permette zot pou faire sa. (Ex. 4:10; Jér. 1:6) Si enn chretien dan sa situation-la, ki li kapav faire? Kitfois li kapav koz lor sa sujet-la dan la priere. Paul ti dire so bann compagnon ki Jéhovah, “pou so prop plaisir, pé influence zot pou ki zot envie ek agir toulé-deux.” (Phil. 2:13) Si ou pa senti-ou motivé pou faire plus dan ou ministere, demann Jéhovah pou donne ou desir ek aussi capacité pou faire sa.​—2 Pierre 3:9, 11.

¹⁹ Noé, Moïse, Jérémie, Paul, ek Jésus, zot tou zot ti bann zom devoué. Zot ti servi zot le temps ek zot l’energie pou preche bann l’avertissement Jéhovah. Zot pa ti laisse nanyin detourne zot l’attention. La fin sa systeme-la pré pou vini; alors, nou tou ki’nn voué nou la vie ar Bondié bizin faire sur ki nou pé contigne faire tou seki nou kapav pou suive sa bann bon l’exemple ki ena dan la Bible-la. (Mat. 24:42; 2 Tim. 2:15) Kan nou faire sa, nou kapav faire Jéhovah plaisir ek gagne so bann benediction.​—Lire Malaki 3:10.

[Note]

[Zimage page 22]

Bann dimoune pa ti ecoute l’avertissement Noé

[Zimage page 25]

Eski ou finn bien reflechi si ou kapav vinn pionnier permanent?