Eski Ou Kapav Faire Plis pou Averti Lezot?

Enn joli ti film ki ti appel Enn Promenade dan Market Street (A Trip Down Market Street) ti impressionne bann dimoune parski li ti montré couma lavi ti été dan San Francisco en Amérique, au commencement 20^eme siecle. Sa film-la pa ti ena son. Bann dimoune ki ti produire sa film-la ti servi enn camera avek manivelle ek zot ti place sa devant enn ti train. Pendant ki train-la ti pé avancé, zot ti filmé la route principal ki ti bien animé. Dan film-la ena bann caleche avek bann cheval ek bann premier modele l’auto. Nou kapav trouve aussi bann dimoune ki ti pé acheté kitsoz ek bann garson ki ti pé vann la gazette.

Seki ti faire sa film-la pli triste c’est ki kitfois zot ti filmé sa en Avril 1906, zis avant tremblement de terre ek difé ki ti ena le 18 Avril dan sa lavil-la. Sa l’evenement-la ti touye plusieurs millier dimoune ek ti preské detruire partie lavil ki parette dan sa film-la. Kitfois, certain dimoune dynamik ki nou trouvé dan sa film-la ti ena zis deux-trois jour pou vive. Scott Miles, descendant enn parmi bann ki ti produire sa film-la dire: “Mo trouve sa bann dimoune-la ek zot pa koné ki pou arrive zot. Ou pa kapav pa chagrin zot.”

Nou kapav compare seki’nn passé dan sa film-la avek seki pou arrivé bientot, ek sa faire nou reflechi. Nou aussi, nou pa kapav pa chagrin bann dimoune ki pé vive dan nou lepok. Toulé-jour, zot faire zot bann activité sans ki zot rann-zot compte ki ena enn grand malheur ki pré pou vini​—destruction sa systeme-la. Mais, alors ki personne pa kapav dire a l’avance kan enn tremblement de terre pou arrivé, nou, nou ena ankor enn tigit le temps pou averti bann dimoune concernant jour jugement Jéhovah. Surement ou reserve inpé le temps dan ou programme chaque semaine pou preche porte en porte, mais eski ou kapav faire plis pou averti bann dimoune?

Jésus inn donne nou enn bon l’exemple parski jamais li pa ti laisse enn l’occasion passé pou preché. Li ti preche avek tou dimoune: sa ti kapav enn missié ki ti ramasse taxe ki li ti zwenn lor chemin, ou-soit enn madame ki li ti zwenn kot enn puits pendant enn pause midi. (Luc 19:1-5; Jean 4:5-10, 21-24) Mem kan li ti reserve le temps pou li reposé, Jésus ti disposé pou change so programme pou preche avek lezot. Li ti ena enn grand compassion pou bann dimoune, ek sa ti pousse li pou enseigne zot, pa zis rann zot enn ti temoignage. (Marc 6:30-34) Jésus ti conscient ki li pa ti ena beaucoup le temps. Couma nou kapav imite li zordi?

Melika reste dan enn flat kot ena enn bon systeme securité. Beaucoup parmi so bann voisin, c’est bann etudiant etranger. Numero sa bann dimoune-la pa trouve dan l’annuaire telephone ek zot nom pa dan la liste ki ena dan reception sa flat-la. Li bien content possibilité ki li ena pou commence bann conversation spirituel avek bann dimoune ki reste dan so flat, kan li dan reception ek dan l’ascenseur. Li dire: “Dan enn certain fason, mo considere sa couma mo territoire.” Melika sarié bann publication dan diferan langue avek li ek beaucoup dimoune accepté bann tract ek bann periodik. Li aussi donne zot l’adresse nou site Internet, jw.org. Li finn commence plusieurs letid la Bible.

Sonia aussi saisi tou l’occasion pou rann temoignage ar tou dimoune ki li zwenn. Li travail dan enn clinik ek li fixé l’objectif pou rann temoignage ar so bann collegue travail. D’abord, li prend le temps pou koné seki interesse zot. Apré, li servi so pause midi pou gagne enn conversation spirituel avek sakenn. C’est coumsa ki Sonia ti reussi commence deux letid la Bible. Li pé aussi organise-li pou profite so bann pause pou koz avek bann dimoune ki pé attann pou gagne zot rendez-vous.

Enn survivant tremblement de terre ki ti ena en 1906, ti appel sa “pli pire catastrophe ki enn lavil kapav koné.” Pourtant, bientot tou bann catastrophe pou parette coumadir enn nanyé ditou comparé ar jour vengeance ki pou vinn lor tou “bann ki pa konn Bondié.” (2 Thess. 1:8) Jéhovah bien envie ki bann dimoune change zot l’attitude ek zot leker ek prend compte message l’avertissement ki so bann Témoins pé preché.​—2 Pierre 3:9, note; Rév. 14:6, 7.

Ou ena privilege pou faire bann dimoune comprend dan ki lepok nou pé vive. Ou kapav aussi aide zot pou arrete rod zot prop l’interet pou zot rod Jéhovah. (Tseph. 2:2, 3) Eski ou kapav saisi tou l’occasion pou rann temoignage ar ou bann camarade travail, ou bann voisin ek ar bann dimoune ki ou zwenn dan ou bann activité toulé-jour? Eski ou pou faire plis pou averti lezot?