Perdi enn Papa​—Gagn enn Lot Papa

MO PAPA ti ne dan Graz, an Autriche, an 1899, alor pandan Premie Ger Mondial li ti ankor zenn. Deswit kouma Deziem Ger Mondial ti deklanse an 1939, larme Alman ti apel li. Li ti mor an 1943 kan li ti pe lager dan la Russie. Malerezman, se koumsa ki mo’nn perdi mo papa alor ki mo ti ena anviron de-z-an. Zame mo’nn gagn lokazion konn li, ek sa ti mank mwa boukou ki mo pena enn papa, sirtou kan mo ti trouv laplipar bann garson dan lekol ena zot papa. Me plitar, kan mo ti adolesan, sa ti konsol mwa kan mo ti aprann konn nou Papa ki dan lesiel, enn Papa pli siperyer ek ki pa mor.​—Hab. 1:12.

Kan mo ti ena set an, mo ti rant dan Skout. Skout se enn lorganizasion mondial ki ti forme an 1908 dan Grande Bretagne par enn lietnan zeneral dan larme Britanik, Robert Stephenson Smyth Baden-Powell. An 1916, li ti form Louveteau pou bann ti-garson dan mo laz.

Mo ti kontan kan dan wikenn, nou ti al kanpe anplener dan lakanpagn​—dormi dan bann latant, met bann iniform, ek marse pandan ki pe tap tanbour. Mo ti sirtou kontan bann moman ki nou ti pase avek lezot Skout, sirtou kan nou ti pe sante otour dife aswar ek fer bann zwe dan lafore. Nou ti osi aprann boukou lor lanatir, ek sa ti fer mwa apresie seki nou Kreater fer.

Ankouraz bann Skout pou fer enn bon aksion sak zour. Se sa ki motiv zot. Nou ti salie sakenn nou kamarad par sa bann parol-la: “Touzour Pare.” Mo ti kontan fer sa. Dan nou group ti ena plis ki 100 garson. Anviron lamwatie ti Katolik, lamwatie ti Protestan, ek enn ti Boudis.

Depi 1920, apepre toule de-trwa-z-an, organiz bann renion internasional pou bann Skout, ouswa bann rasanbleman. Mo ti asiste setiem Rasanbleman Mondial Bann Skout dan Bad Ischl, dan l’Autriche, an Out 1951, ek neviem Rasanbleman Mondial Bann Skout dan Sutton Park, pre ar Birmingham, dan l’Angleterre, an Out 1957. Dernie fwa-la, ti ena anviron 33,000 Skout ki ti sorti 85 pei ek teritwar. Ti ena osi anviron 750,000 dimounn ki ti vinn get nou pandan sa rasanbleman-la, parmi ti ena Larenn Elizabeth. Pou mwa, sa ti koumadir enn fami internasional. Me, mo pa ti kone ki biento mo ti pou konn enn fami internasional pli inpresionan ankor​—enn fami spiritiel.

An printan 1958, mo ti preske fini mo formasion antan ki server dan Grand Hotel Wiesler dan Graz, an Autriche. Laba, Rudolf Tschiggerl, enn koleg travay ek sef patisie, ti rann mwa temwaniaz dan enn fason informel. Avan, zame mo ti’nn tann koz lor laverite. Premie kitsoz lor ki li ti koze se doktrinn Latrinite ek li ti dir ki pena sa dan Labib. Mo ti defann sa doktrinn-la ek mo ti anvi montre li ki li ena tor. Mo ti apresie mo koleg travay ek mo ti anvi konvink li pou retourn dan Legliz Katolik.

Rudolf, ki nou ti apel Rudi, ti anvi amenn enn Labib pou mwa. Selman, mo ti obliz li amenn enn Labib Katolik. Mo ti koumans lir Labib-la, ek mo pa’nn tarde pou trouve ki Rudi ti met enn trak ki’nn inprime par Sosiete Watchtower ladan. Mo ti refiz pran sa trak-la parski mo ti panse ki finn ekrir sa piblikasion-la dan enn fason ki li paret exakt, alor ki li pa exakt. Me, mo ti anvi koz lor Labib avek li. Rudi ti fer atansion ek li pa ti redonn mwa bann piblikasion. Pandan trwa mwa, detanzantan nou ti gagn bann konversasion lor Labib ki parfwa ti fini bien tar aswar.

Apre ki mo ti terminn mo formasion dan lotel ki ti trouv dan Graz, mo mama ti pey enn ledikasion pli avanse pou mwa dan enn lekol otelie. Alor, mo ti al res Bad Hofgastein, enn lavil dan vale bann Alpes kot ti ena sa lekol-la. Sa lekol-la ti an kontak avek Grand Hotel dan Bad Hofgastein, ek parfwa mo ti al travay laba pou gagn enn tipe plis lexperyans.

Rudi ti’nn avoy mo nouvo ladres biro nasional dan Vienne, ek an retour, biro nasional ti avoy sa ladres-la de ser misioner, Ilse Unterdörfer ek Elfriede Löhr.a Enn zour, resepsionis lotel ti apel mwa ek ti dir mwa ki ena de madam dan enn loto deor ki ti pe anvi koz ar mwa. Mo pa ti kone ki pou fer parski mo pa ti konn zot. Me, mo ti al get zot. Plitar, mo ti aprann ki zot servi kouma mesaze pou bann Temwin dan l’Allemagne Nazi kan ti interdi travay predikasion avan Deziem Ger Mondial. Avan lager koumanse, lapolis sekre an Allemagne (Gestapo) ti atrap zot ek ti avoy zot dan kan konsantrasion Lichtenburg. Apre sa, pandan lager, ti transfer zot dan kan Ravensbrück, pre ar Berlin.

Sa de ser-la ti ena preske mem laz ki mo mama, alor mo ti respekte zot. Se akoz sa ki mo pa ti anvi ena bann konversasion avek zot pou perdi zot letan, ek kitfwa apre de-trwa semenn ouswa de-trwa mwa, dir zot ki mo pa ti anvi kontigne. Alor, mo ti demann zot si zot kapav zis donn mwa enn lalis bann verse ki koz lor siksesion apostolik, enn doktrinn Katolik. Mo ti dir zot ki mo ti pou montre sa pret dan mo landrwa ek koz lor la avek li. Mo ti panse ki lerla mo ti pou kone kot sa laverite ete.

Lansegnman Katolik Romin lor siksesion apostolik pretann ki depi lapot Pierre, finn touletan ena bann lepap ki’nn vini enn apre lot. (Legliz mal interpret bann parol ki Jésus ti dir dan Matthieu 16:18, 19.) Legliz pretann osi ki lepap pa fer erer dan bann doktrinn kan li koz ex cathedra, setadir dan so fonksion ofisiel. Mo ti krwar ladan ek mo ti panse ki lepap, ki bann Katolik apel Saint Père, pa fer erer konsernan bann doktrinn ek si li’nn dir ki Latrinite existe, alor sa bizin vre. Me, si li fer erer, alor sa doktrinn-la osi kapav fos. Alor, sa pa etonn nou ki pou boukou Katolik, lansegnman lor siksesion apostolik se lansegnman pli inportan. Se sa lansegnman-la ki determine si lezot lansegnman ki baze lor la zot exakt ouswa non!

Kan mo ti al get sa pret-la, li pa ti kapav reponn mo bann kestion, me li ti tir enn liv ki koz lor bann doktrinn Katolik lor so letazer, ek parmi sa bann doktrinn-la ti ena siksesion apostolik. Mo ti amenn liv-la kot mwa parey kouma li ti demande, mo ti lir li, ek mo ti retourne avek ankor plis kestion. Alafin, kan pret-la pa ti pe kapav reponn mo bann kestion, li ti dir: “Mo pa kapav konvink twa, ek to pa kapav konvink mwa. . . . Mo swet twa bonn sans!” Li ti nepli anvi koz lor la ankor.

Sa moman-la, mo ti’nn pare pou etidie Labib avek Ilse ek Elfriede. Zot ti aprann mwa boukou kitsoz lor nou vre Papa ki Sin, Jéhovah. (Jean 17:11) Sa lepok-la, pa ti ankor ena kongregasion dan sa landrwa-la, alor sa de ser-la ti fer renion dan lakaz enn fami ki ti interese ar laverite. Zis de-trwa dimounn ti asiste renion. Bann ser-la ti examinn laplipar bann size ant zot dan renion parski pa ti ena frer batize pou pran latet. Detanzantan, enn frer ti sorti enn lot kongregasion ek ti fer enn diskour piblik dan enn plas ki nou ti lwe.

Ilse ek Elfriede ti koumans etidie Labib avek mwa an Oktob 1958, ek trwa mwa plitar, an Zanvie 1959 mo ti batize. Avan mo batem, mo ti demann zot si mo kapav akonpagn zot dan predikasion lakaz-lakaz pou gete kouma sa travay-la deroule. (Actes 20:20) Apre ki mo’nn akonpagn zot pou premie fwa, mo ti demann zot si mo kapav gagn mo prop teritwar pou travay. Zot ti donn mwa enn vilaz, ek mo ti al laba par momem ek mo ti pres tousel lakaz-lakaz, ek al vizit bann dimounn interese. Plitar, sirveyan sirkonskripsion ti vinn vizit nou ek se premie frer ki mo ti akonpagne dan predikasion lakaz-lakaz.

An 1960, kan mo ti terminn lekol otelie, mo ti retourn lavil kot mo ti reste pou esey ed mo bann fami konn laverite. Ziska zordi, personn parmi zot pa’nn vinn dan laverite, me sertin pe montre enn sertenn lintere.

An 1961, biro nasional ti fer lir bann let dan bann kongregasion pou ankouraz bann frer ek ser fer pionie. Mo ti selibater ek an bonn sante, alor mo pa ti trouv okenn rezon pou pa fer pionie. Mo ti demann sirveyan sirkonskripsion, Kurt Kuhn, ki li panse si mo kontign travay pandan de-trwa mwa ankor pou mo kapav aste enn loto, ki pou ed mwa fer pionie. Li ti dir mwa: “Eski Jésus ek bann zapot ti bizin enn loto pou fer servis aplintan?” Samem ti ase pou mwa! Mo ti desid pou koumans fer pionie pli vit posib. Me parski mo ti travay 72 er-tan par semenn dan enn restoran, mo ti bizin koumans fer sertin sanzman.

Mo ti demann mo patron si li ti pou kapav les mwa travay 60 er-tan olie 72. Li ti aksepte ek li ti donn mwa mem lapey. Enn tigit apre, mo ti demann li si mo kapav travay zis 48 er-tan par semenn. Sa osi li ti aksepte ek li ti donn mwa mem lapey. Apre mo ti demann li pou travay zis 36 er-tan par semenn, setadir 6 er-tan par zour pandan 6 zour, ek sa osi li ti aksepte. Seki ti etonn mwa, mo ti ankor pe gagn mem kantite kas! Li paret ki mo patron pa ti anvi mo kit travay. Avek sa program-la, mo ti koumans fer pionie permanan. Sa lepok-la, enn pionie ti bizin fer 100 er-tan par mwa.

Kat mwa plitar, mo ti al fer pionie spesial ek serviter kongregasion dan enn tipti kongregasion dan Provins Carinthie, dan lavil Spittal an der Drau. Sa lepok-la, enn pionie spesial ti bizin fer 150 er-tan par mwa. Mo pa ti ena konpagnon servis, me mo ti bien apresie led ki mo ti gagne dan minister avek enn ser ki ti apel Gertrude Lobner, ki ti pe servi kouma asistan serviter kongregasion.b

An 1963, ti demann mwa pou fer sirveyan sirkonskripsion. Parfwa, pou al dan lezot kongregasion, mo ti bizin vwayaz par trin ek amenn bann valiz bien lour. Laplipar bann frer pa ti ena loto, alor personn pa ti kapav vinn sers mwa lagar. Pou pa fer bann frer santi zot malalez, mo pa ti anvi pran taxi pou al kot mo ti pou reste, alor mo ti marse.

An 1965, alor ki mo ti ankor selibater, ti invit mwa pou asiste 41^em klas Lekol Guiléad. Boukou bann ki ti dan mo klas ti selibater. Kan mo ti gagn mo diplom, sa ti etonn mwa kan mo ti aprann ki mo ti pou retourn dan mo pei, l’Autriche, pou kontign fer sirveyan sirkonskripsion. Selman, avan ki mo kit l’États-Unis, ti demann mwa pou akonpagn sirveyan sirkonskripsion pandan kat semenn. Mo ti bien kontan travay avek Anthony Conte, enn bon frer ki ti kontan prese ek ki ti bien efikas dan so minister. Nou ti travay ansam dan rezion Cornwall dan New York.

Kan mo ti retourn l’Autriche, mo ti al servi dan enn sirkonskripsion kot mo ti zwenn Tove Merete, enn zoli ser selibater. Li’nn grandi dan laverite depi laz sink an. Kan bann frer demande kouma nou’nn zwenn, an badinaz nou dir: “Se biro nasional ki’nn fer sa laranzman-la.” Nou ti marye enn an plitar, an Avril 1967, ek lorganizasion ti permet nou res dan servis sirkonskripsion.

Lane apre, mo ti realize ki dan so faver ki nou pa merite, Jéhovah ti adopte mwa kouma so garson spiritiel. Depi sa, mo finn devlop bann relasion spesial avek mo Papa ki dan lesiel ek avek bann ki, dapre Romains 8:15, “kriye: ‘Abba, Papa!’”

Antan ki sirveyan sirkonskripsion ek sirveyan distrik, mo ti kontign vizit bann kongregasion ansam avek Merete ziska 1976. Parfwa an iver, nou ti bizin dormi dan bann lasam kot pa ti ena sofaz ek kot tanperatir ti mwins ki zero. Enn zour kan nou ti leve, nou ti trouve ki parti nou molton ki ti kot nou latet ti’nn konzele ek ti’nn vinn blan akoz nou respirasion ti extra glase! Alafin, nou ti desid pou amenn enn ti sofaz elektrik pou kapav siport tanperatir lanwit. Dan sertin plas, pou al twalet aswar, nou ti bizin mars dan lanez pou al dan enn lot batiman deor kot ti ena kourander. Ek nou pa ti ena enn lapartman, alor dan Lindi nou ti bizin res dan mem lakaz kot nou ti pe reste pandan nou vizit. Lerla, Mardi gramatin nou ti al dan prosin kongregasion.

Mo kontan pou dir ki pandan tou sa lane-la, mo madam ki mo bien kontan finn touletan soutenir mwa. Li ti kontan predikasion, ek zame inn arive kot mo’nn bizin ankouraz li pou al prese. Li osi kontan bann frer ek ser ek li interese ar lezot. Sa finn vremem ed mwa.

An 1976, lorganizasion ti invit nou pou al servi dan biro nasional l’Autriche ki trouv dan Vienne, ek mo ti servi kouma manb Komite Biro Nasional. Sa lepok-la, biro nasional l’Autriche ti pe siperviz travay plizir pei dan Les l’Europe ek an kasiet ti pe organize pou transport bann piblikasion dan sa bann pei-la. Se Frer Jürgen Rundel ki ti responsab sa travay-la ek li ti bien konn pran linisiativ. Mo ti ena privilez pou travay avek li, ek plitar lorganizasion ti demann mwa siperviz travay tradiksion dis lang dan Les l’Europe. Jürgen ek so madam, Gertrude, pe kontign servi Jéhovah fidelman antan ki pionie spesial dan l’Allemagne. Apartir 1978, biro nasional l’Autriche ti koumans konpoz bann magazinn avek foto ek ti inprim zot dan sis lang lor enn ti lapres offset. Nou ti osi avoy bann labonnman dan bann diferan pei ki ti pas komann. Otto Kuglitsch, ki asterla pe servi avek so madam, Ingrid, dan biro nasional dan l’Allemagne ti okip tou sa bann travay-la.

Pou prodir bann piblikasion dan zot prop pei, bann frer dan Les l’Europe ti servi bann masinn ki ti rekopie bann piblikasion an plizir kopi ouswa zot ti reprodir bann piblikasion apartir bann fim. Malgre sa, zot ti bizin led andeor zot pei. Jéhovah ti protez sa travay-la, ek dan biro nasional, nou ti devlop lamour pou sa bann frer-la, ki ti pe bizin travay dan bann kondision difisil ek kot ti ena linterdiksion pandan plizir lane.

An 1989, mo ti gagn privilez pou akonpagn Frer Theodore Jaracz, enn manb Komite Santral, dan Roumanie. Nou ti ena lobzektif pou ed enn gran kantite frer pou retourn dan lorganizasion. Depi 1949, akoz plizir rezon zot ti aret frekant lorganizasion ek zot ti form zot bann prop kongregasion. Pourtan, zot ti kontign prese ek batize. Zot ti osi al dan prizon parski zot pa ti partisip dan bann lager, parey kouma bann frer ki ti form parti dan lorganizasion ki ti aprouve par biro mondial. Ti ankor ena linterdiksion dan Roumanie, alor an kasiet nou ti zwenn kot Frer Pamfil Albu avek kat ansien ek bann reprezantan ki ti aprouve par Komite Pei Roumanie. Nou ti osi amenn avek nou enn interpret depi l’Autriche, Rolf Kellner.

Deziem lanwit kot nou ti gagn bann konversasion, Frer Albu ti konvink sa kat ansien la pou retourn dan lorganizasion kan li ti dir: “Si nou pa fer sa asterla, kitfwa zame nou pa pou gagn enn lot lokazion.” Apre sa, anviron 5,000 frer ti retourn dan lorganizasion. Wi, Jéhovah ti gagn enn viktwar alor ki Satan ti gagn enn kalot!

Ver lafin 1989, avan ki Kominism dan Les l’Europe perdi pouvwar, Komite Santral ti invit mo madam ek mwa pou kontign nou servis dan biro mondial dan New York. Sa ti enn sirpriz pou nou. Nou ti koumans nou servis dan Béthel Brooklyn an Ziliet 1990. Apartir 1992, mo ti servi kouma asistan dan Komite Servis ki dan Komite Santral ek depi Ziliet 1994, mo finn ena privilez pou form parti dan Komite Santral.

Mo nepli pe viv lepok kot mo ti pe fer server dan enn lotel. Azordi, mo kontan privilez ki mo ena pou prepar ek donn nouritir spiritiel tou lafami nou bann frer. (Mat. 24:45-47) Mo finn fer plis ki 50 an dan servis aplintan. Kan mo repans sa bann lane-la, mo kapav zis exprim mo gran rekonesans ek lazwa ki mo ena pou benediksion ki Jéhovah inn devers lor tou lafami nou bann frer. Mo kontan asiste nou bann lasanble internasional ki met laksan lor linportans pou aprann konn nou Papa ki dan lesiel, Jéhovah, ek bann verite ki ena dan Labib.

Mo priye ki dan lavenir plizir milyon dimounn ankor pou etidie Labib, aksepte laverite, ek servi Jéhovah ansam avek fami internasional bann frer. (1 Pierre 2:17; not) Mo pe atann osi avek inpasians moman kot depi lesiel mo pou get rezireksion lor later ek anfin trouv mo papa. Mo swete ki li, mo mama, ek lezot fami ki mo bien kontan pou anvi ador Jéhovah dan Paradi.