Kan Sem an Gran Kantite Sa Amenn Enn Kantite Benediksyon
1 Nu tu nu pe atann avek inpasyans pu truv lakonplisman bann gran promes ki ena dan Parol Bondye. Mem asterla, Zeova donn nu buku benediksyon ki azut plezir dan nu lavi. Me kantite nu tir profi personelman depann buku lor zefor ki nu fer. Kuma lapot Pol ti dir, “sa kikenn ki sem an gran kantite la pu usi rekolte an gran kantite.” (2 Kor. 9:6) Anu egzaminn de domenn kot sa prinsip la aplike.
2 Nu Minister Personel: Partaz labonn nuvel avek bann dimunn kan li dan nu posibilite pu donn enn temwaynaz, amenn buku benediksyon. (Pro. 3:27, 28) Dan enn fason ki merit luanz, buku pe sem an gran kantite kan zot pe ogmant zot partisipasyon dan minister, si posib kuma pyonye oxilyer uswa permanan. Nu tu nu kapav sem an gran kantite kan nu pran lapenn pu returne pu kiltiv tu lintere ki’nn manifeste ek kan nu ofer enn letid Labib kan li posib. (Rom. 12:11) Kan nu fer zefor dan sa bann fason la, sa fer gayn bann lexperyans ankurazan ek sa ogmant lazwa dan nu minister.
3 Sutenir Bann Lintere Rwayom: Pol fer so komanter lor ‘sem an gran kantite’ an rapor avek fer bann don materyel. (2 Kor. 9:6, 7, 11, 13) Zordi, nu kapav fer buku pu sutenir bann lintere Rwayom dan enn fason fizik ek materyel. Nu kapav ede dan konstriksyon bann Lasal DiRwayom ek bann Lasal Lasanble. Nu kapav volonter pu partisip dan netwayaz ek lantretyin sa bann landrwa rezerve pu vre ladorasyon la. Anplis, nu kapav kontribye lor plan finansye pu bann depans kongregasyon lokal ek usi pu travay predikasyon Rwayom ek travay fer bann disip ki pe fer dan lemond antye. Si nu tu nu fer nu par, nu pu gayn buku lazwa kan nu truv labondans benediksyon Zeova lor sa travay ki Bondye finn ordone pu fer la!—Mal. 3:10; Lik 6:38.
4 Parol Bondye ankuraz nu “pu fer dibyin, pu vinn ris dan bann bon travay, pu vinn bonker, ek pre pu partaze.” Si nu obeir sa lord la, nu pu zwir bann ris benediksyon asterla mem. An mem tan, nu pe “ramas pu [numem] enn trezor pu lavenir [ek] vre lavi” ki pu vini.—1 Tim. 6:18, 19.