Eski U “Anvi” Ed Lezot?
1 Zezi ti vremem pran kont bann dimunn. Kan enn misye ki ti ena lalep ti sipliy Zezi pu ed li, li ti avans so lamin, li ti tus misye la, ek li ti dir: “mo anvi. Vinn pir.” (Mark 1:40-42) Dan ki fason eski nu kapav imit latitid Zezi konsernan ed lezot?
2 Bann Dimunn Interese: Sak manb dan kongregasyon ena enn par pu ed bann dimunn interese ki vinn bann adorater Zeova. Kan bann nuvo vinn bann reynion, akey zot ek fer zot konesans. Rod bann fason pu ankuraz zot. Felisit zot pu bann komanter ki zot fer. Felisit zot pu bann zefor ki zot fer pu aplik bann prinsip Labib dan zot lavi. Ed zot pu truv bann posibilite ki zot ena pu fer bann vre kamarad dan kongregasyon.
3 Bann Konpaynon Kretyin: “Bann ki nu fami dan lafwa” sirtu merit nu led dan buku fason. (Gal. 6:10) Buku pe lite avek bann problem lasante. Si u rann zot enn vizit ankurazan, u kapav fer zot profit relasyon fraternel ki inportan ek u kapav usi ed zot dan bann domenn pratik. Kitfwa sertin pe fer fas ar lezot problem dan zot lavi. Montre ki u interese kan u pran letan pu ekut zot ek afermi zot. (1 Tes. 5:14) Bann ansyin usi bizin nu korperasyon pu asim zot responsabilite. (Ebre 13:17) Kan nu manifeste enn lespri dispoze ek pre pu ede, nu kapav “vinn enn led ki fortifye” nu bann konpaynon krwayan.—Kol. 4:11.
4 Bann Manb Lafami: Nu bizin usi fer zefor pu imit lintere ki Zezi ti ena pu bann dimunn anver bann manb nu prop fami. Enn lintere profon pus bann paran pu ‘kontiyn elve zot zanfan dan disiplinn ek dan bann manyer panse Zeova.’ (Efe. 6:4) Bann zanfan kapav fer zot par letan zot fini pare kan ler pu fer letid familyal, pu bann reynion kongregasyon, uswa pu predikasyon. Bann zanfan ki’nn vinn adilt kapav reflekte konpasyon Zezi kan zot ed zot bann paran avek duser pu reysi fer fas avek bann problem ki gayne akoz laz. Dan sa bann fason la ek dan lezot ankor, nu tu nu kapav “pratik latasman pu Bondye dan [nu] prop lakaz.”—1 Tim. 5:4.
5 Kan nu imit Zezi ki ti ed lezot, kitfwa nu kapav diminye problem ek fer nu fami ek kongregasyon tulede vinn pros. Pli inportan dan tusala, nu donn loner Zeova, “Papa ki ena buku mizerikord avek tandres.”—2 Kor. 1:3.