Bann Leson ki Nou Kapav Aprann ar “Disip ki Zezi Ti Kontan la”

 1. Kan to reflesi lor lamour Bondie, ki to resanti?

LAPOT Zan ti ekrir: “Bondie limem lamour.” (1 Zan 4:8) Sa bann parol-la rapel nou enn verite bien inportan: Bondie, ki Lasours lavi, Li osi Lasours lamour. Zeova kontan nou! So lamour fer nou santi nou an sekirite, ere, ek satisfe.

 2. Dapre Matie 22:37-40, ki de pli gran komannman, ek kifer nou kapav gagn difikilte pou obeir deziem komannman-la?

² Bann Kretien pa kapav swazir si zot pou montre lamour ouswa non. Se enn komannman ki zot bizin obeir. (Lir Matie 22:37-40.) Kan nou aprann konn Zeova bien, li fasil pou nou obeir premie komannman. Kifer? Parski Zeova Li parfe, Li gagn nou traka, ek Li azir avek bonte anver nou. Me nou kapav gagn difikilte pou obeir deziem komannman. Kifer? Parski Labib dir nou ki nou bizin kontan nou prosin, ek sa inplik osi nou bann frer ek ser ki inparfe. Parfwa, zot kapav azir dan enn move fason anver nou ouswa dir nou bann kitsoz ki bles nou. Zeova ti kone ki nou ti pou gagn difikilte pou obeir sa komannman-la. Akoz sa, Li ti servi bann dimounn pou ekrir bann liv Labib ki ansegn nou kifer nou bizin montre lamour anver nou kamarad ek kouma nou kapav fer sa. Zan li enn parmi sa bann ekrivin-la.​—1 Zan 3:11, 12.

 3. Ki Zan ti dir konsernan lamour?

³ Dan bann liv ki Zan ti ekrir, Zan ti montre ki li bien inportan ki bann Kretien montre lamour. Dan so Levanzil, ki koz lor lavi Zezi, Zan ti koz lor lamour plis ki lezot Levanzil ki ti ekrir par Matie, Mark, ek Lik. Zan ti ena apepre san-t-an kan li ti ekrir liv ki port so nom ek so trwa let. Sa bann liv Labib la montre nou ki lamour bizin inflians tou seki enn Kretien fer. (1 Zan 4:10, 11) Selman, Zan ti pran letan pou konpran sa.

 4. Eski Zan ti touletan montre lamour pou lezot?

⁴ Kan Zan ti zenn, li pa ti touletan montre lamour. Par exanp, enn fwa, Zezi ek so bann disip ti al Zerizalem ek zot ti pas par Samari. Dan enn ti lavil dan Samari, bann dimounn ti refiz montre lospitalite anver zot. Kouma Zan ti reazir? Zan ek so frer Zak ti demann Zezi si li ti anvi ki zot fer dife sorti depi lesiel pou detrir tou bann dimounn ki ti res dan sa lavil-la. (Lik 9:52-56) Enn lot fwa, Zan pa ti montre lamour anver lezot zapot. Li ek so frer Zak kitfwa ti fer zot mama al koz ar Zezi pou ki zot gagn enn plas inportan dan Rwayom Bondie. Kan bann lezot zapot ti aprann seki Zan ek Zak ti fer, zot ti bien ankoler! (Mat. 20:20, 21, 24) Pourtan, malgre bann erer ki Zan ti fer, Zezi ti kontan li.​—Zan 21:7.

 5. Ki nou pou examine dan sa lartik-la?

⁵ Dan sa lartik-la, nou pou examinn lexanp Zan ek sertin kitsoz ki li’nn ekrir konsernan lamour. Sa pou aprann nou kouma pou montre lamour anver nou bann frer ek ser. Nou pou examinn osi enn kitsoz inportan ki enn sef fami bizin fer pou ki li montre ki li kontan so fami.

 6. Kouma Zeova inn montre ki Li kontan nou?

⁶ Souvan, nou panse ki lamour se enn santiman lafeksion ki nou exprime avek bann mo ki zanti. Me se nou bann aksion ki montre ki nou lamour li sinser. (Konpar Zak 2:17, 26.) Par exanp, Zeova kontan nou. (1 Zan 4:19) Li montre nou so lamour atraver seki Li dir nou dan Labib. (Ps. 25:10; Rom. 8:38, 39) Selman, nou kone ki Li kontan nou pa zis par seki Li dir, me osi par seki Li fer. Zan ti ekrir: “Ala kouma Bondie finn montre so lamour pou nou: Li finn avoy so sel garson dan lemonn pouki nou gagn vre lavi par li.” (1 Zan 4:9) Zeova ti avoy so Garson ki Li bien kontan pou ki li soufer ek donn so lavi pou nou. (Zan 3:16) Alor, nou kapav sir ki Zeova kontan nou!

 7. Kouma Zezi inn montre so lamour pou nou?

⁷ Zezi ti dir so bann disip ki li ti kontan zot. (Zan 13:1; 15:15) Li ti montre ki kantite li ti kontan zot, pa zis par seki li ti dir, me osi par seki li ti fer. Zezi ti dir: “Pena pli gran lamour ki existe ler kikenn donn so lavi pou so bann kamarad.” (Zan 15:13) Kan nou reflesi lor seki Zeova ek Zezi inn fer pou nou, ki sa motiv nou pou fer?

 8. Ki 1 Zan 3:18 motiv nou pou fer?

⁸ Nou montre ki nou kontan Zeova ek Zezi kan nou obeir zot. (Zan 14:15; 1 Zan 5:3) Zezi inn donn nou lord pou kontan sakenn nou kamarad. (Zan 13:34, 35) Fode pa nou zis dir nou bann frer ek ser ki nou kontan zot. Nou bizin montre par nou bann aksion ki nou kontan zot. (Lir 1 Zan 3:18.) Ki bann kitsoz nou kapav fer pou montre ki nou kontan nou bann frer ek ser?

 9. Lamour ti motiv Zan pou fer ki kitsoz?

⁹ Zan ti kapav res ar so papa ek gagn boukou kas ar zot biznes familial. Me olie sa, li ti servi so lavi pou ed lezot konn laverite lor Zeova ek Zezi. Lavi ki Zan ti swazir pa ti enn lavi fasil. Li ti gagn bann persekision ek kan li ti bien vie, li ti al an exil. (Zist. 3:1; 4:1-3; 5:18; Rev. 1:9) Mem kan li ti dan prizon parski li ti pe prese, Zan ti montre ki li ti pans lezot. Par exanp, kan li ti lor lil Patmos, li ti ekrir liv Revelasion ek li ti avoy sa bann lasanble pou ki zot kapav kone “seki pou arive biento.” (Rev. 1:1) Apre sa, kitfwa kan li ti libere depi lil Patmos, Zan ti ekrir so Levanzil ki koz lor lavi ek minister Zezi. Li ti osi ekrir trwa let pou ankouraz ek fortifie so bann frer ek ser. Kouma to kapav imit lespri sakrifis ki Zan ti ena?

10. Kouma to kapav montre ki to ena lamour pou bann dimounn?

¹⁰ To kapav montre ki to ena lamour pou bann dimounn par seki to swazir pou fer ar to lavi. Lemond Satan anvi ki to pans zis tomem, ki to esey gagn boukou kas, ouswa ki to vinn seleb. Parkont, dan lemond antie, bann Kretien fer bann gran zefor pou pres bonn nouvel ek ed bann dimounn pou vinn pros ar Zeova. Ena mem sertin parmi zot ki prese ek ansegn bann dimounn aplintan.

11. Kouma bann Kretien fidel montre ki zot kontan Zeova ek zot bann frer ek ser?

¹¹ Boukou Kretien bizin travay aplintan pou pran swin zot fami. Me kanmem sa, sa bann Kretien fidel la fer tou seki zot kapav pou soutenir lorganizasion Bondie. Par exanp, ena sertin ki al ede kan ena bann katastrof natirel, ena lezot ki travay dan bann proze konstriksion, ek nou tou nou kapav fer bann kontribision pou soutenir bann laktivite ki pe fer dan lemond antie. Nou fer tou sa bann kitsoz-la parski nou kontan Bondie ek bann dimounn. Sak semenn, nou montre ki nou ena lamour pou nou bann frer ek ser kan nou asiste bann renion ek nou partisipe. Mem si kitfwa nou fatige, nou asiste nou bann renion. Mem si kitfwa nou per, nou fer bann komanter. Mem si nou tou nou ena nou bann problem, nou ankouraz lezot avan ek apre bann renion. (Ebre 10:24, 25) Nou vremem rekonesan pou tou seki nou bann frer ek ser pe fer!

12. Dan ki lot fason Zan ti montre so lamour pou so bann frer ek ser?

¹² Zan ti montre so lamour pou so bann frer ek ser pa zis kan li ti ankouraz zot, me osi kan li ti donn zot bann konsey. Par exanp, dan so bann let, Zan ti felisit so bann frer ek ser pou zot lafwa ek zot bon travay, me li ti osi donn zot bann konsey bien ferm konsernan pese. (1 Zan 1:8–2:1, 13, 14) Dan mem fason, nou bizin felisit nou bann frer ek ser pou bann bon kitsoz ki zot fer. Me si nou trouve ki enn kikenn pe devlop enn move latitid ouswa enn move labitid, nou kapav montre lamour kan nou dir li avek takt seki li bizin tande. Sa kapav demann nou boukou kouraz pou donn enn konsey enn kamarad, me Labib dir ki bann vre kamarad konsey zot kamarad.​—Prov. 27:17.

13. Ki kitsoz fode pa nou fer?

¹³ Parfwa, nou montre ki nou kontan nou bann frer ek ser par seki nou pa fer osi. Par exanp, nou pa ofanse vit par seki zot dir. Anou get seki ti arive dan bann dernie moman ki Zezi ti lor later. Li ti dir so bann disip ki zot ti pou gagn lavi si zot ti manz so laser ek bwar so disan. (Zan 6:53-57) Boukou parmi bann disip Zezi pa ti kontan seki li ti dir. Alor, zot ti aret swiv li. Me bann vre kamarad Zezi, parey kouma Zan, ti res avek li. Zot pa ti konpran seki Zezi ti dir ek kitfwa zot ti mem etone par seki li ti dir. Selman, bann kamarad Zezi ki ti fidel, pa ti panse ki li ti dir enn move kitsoz ek zot pa ti ofanse. Okontrer, zot ti fer li konfians, parski zot ti kone ki li koz laverite. (Zan 6:60, 66-69) Li bien inportan ki nou pa ofanse vit par seki nou bann kamarad dir! Okontrer, nou bizin donn zot lokazion pou explik seki zot pe rod dir.​—Prov. 18:13; Ekle. 7:9.

14. Kifer fode pa nou ena laenn pou nou bann frer ek ser?

¹⁴ Zan inn osi ankouraz nou pou nou pena laenn pou nou bann frer ek ser. Si nou pa ekout sa konsey-la, se koumadir nou pe les Satan inflians nou. (1 Zan 2:11; 3:15) Se seki ti ariv sertin Kretien dan premie siek. Sa lepok-la, Satan ti fer boukou zefor pou ki ena laenn ek divizion parmi bann serviter Bondie. Kan Zan ti ekrir so bann let, ti ena bann dimounn ki ti rant dan lasanble ek zot ti ena mem fason panse ki Satan. Par exanp, Diotrefes ti pe kree bann gran divizion dan enn lasanble. (3 Zan 9, 10) Li pa ti ena respe pou bann ansien ki Komite Santral ti avoye. Kan bann frer ek ser ti montre lospitalite anver bann dimounn ki li pa ti kontan, Diotrefes ti mem esey met sa bann Kretien-la deor dan lasanble. Diotrefes ti bien arogan! Azordi, Satan ankor pe fer boukou zefor pou kree divizion dan pep Bondie. Me fode zame ki nou ena laenn pou nou bann frer ek ser, ek ki nou aret soutenir zot.

15. Ki kitsoz enn sef fami bizin rapel?

¹⁵ Enn fason ki enn sef fami montre ki li kontan so fami, se kan li donn zot seki zot bizin lor plan materyel. (1 Tim. 5:8) Selman, li bizin rapel osi ki li pli inportan ki li ed so fami pou ena enn bon relasion avek Zeova. (Mat. 5:3) Mazinn bon lexanp ki Zezi ti done pou bann sef fami. Dapre Levanzil Zan, kan Zezi ti pe soufer lor poto, li ti kontign pans so fami. Dan sa moman-la, Zezi ti trouv so mama pe deboute akote ar Zan. Mem si dan sa ler-la li ti pe bien soufer, Zezi ti demann Zan pou okip so mama. (Zan 19:26, 27) Zezi ti ena bann frer ek ser ki ti pou kapav okip Mari, me li paret ki okenn parmi zot pa ti ankor vinn so disip. Alor, Zezi ti anvi fer sir ki Mari ti pou gagn seki li ti bizin lor plan fizik, me osi lor plan spiritiel.

16. Ki bann responsabilite Zan ti ena?

¹⁶ Zan ti ena boukou responsabilite. Li ti enn zapot, alor li ti bizin bien zele dan travay predikasion. Kitfwa li ti osi marye, alor li ti bizin donn so fami seki zot ti bizin lor plan materyel, me osi ed zot pou ena enn bon relasion avek Bondie. (1 Kor. 9:5) Ki bann sef fami kapav aprann ar so lexanp?

17. Kifer li inportan ki enn sef fami pran swin so fami lor plan spiritiel?

¹⁷ Enn frer ki enn sef fami kapav ena boukou responsabilite. Par exanp, li bizin serye dan so travay pou ki sa donn laglwar Zeova. (Efe. 6:5, 6; Tit 2:9, 10) Kitfwa li ena osi bann responsabilite dan lasanble, kouma par exanp ankouraz ek pran swin bann frer ek ser, ek li bizin pran latet dan travay predikasion. Li bien inportan osi ki li etidie Labib regilierman avek so madam ek so bann zanfan. So fami pou bien apresie tou bann zefor ki li fer pou kontign okip zot lor plan fizik, emosionel, ek spiritiel.​—Efe. 5:28, 29; 6:4.

18. Ki lasirans Zan ti ena?

¹⁸ Zan ti viv bien lontan ek li ti viv boukou zoli lexperyans. Li ti osi pas par bann difikilte ki ti kapav afebli so lafwa. Me li ti touzour fer so maximum pou obeir bann komannman Zezi, ek sa inplik osi kontan so bann frer ek ser. Parski li ti fer sa, Zan ti sir ki Zeova ek Zezi ti kontan li, ek ki zot ti pou donn li lafors pou sirmont ninport ki difikilte. (Zan 14:15-17; 15:10; 1 Zan 4:16) Satan ek so lemond pa ti kapav anpes Zan pou kontan so bann frer ek ser ek pou montre zot sa par so bann parol ek so bann aksion.

19. Ki 1 Zan 4:7 ankouraz nou pou fer, ek kifer?

¹⁹ Parey kouma Zan, nou pe viv dan enn lemond ki domine par Satan, ki pena lamour pou personn. (1 Zan 3:1, 10) Mem si li anvi ki nou aret kontan nou bann frer ek ser, Satan pa pou kapav fer sa amwin ki nou, nou les li fer sa. Alor, anou res bien determine pou kontan nou bann frer ek ser, ek pou montre sa lamour-la par seki nou dir ek seki nou fer. Lerla, nou pou gagn lazwa pou form parti dan fami Zeova, ek nou pou ena enn lavi bien ere.​—Lir 1 Zan 4:7.