Kontign Form To Konsians pou ki To Fer Zeova Plezir

1. Ki ete konsians, ek kouma li kapav ed nou pou fer Zeova plezir?

ZEOVA inn donn nou kapasite pou reflesi ek gete si nou bann aksion ek nou latitid zot bon ouswa pa bon. Sa kapasite-la se nou konsians, ek se enn zoli kado ki Zeova inn donn nou. (Rom. 2:14, 15) Kan nou les bann bon kitsoz inflians nou konsians, sa ed nou pou pran bann desizion ki fer Zeova plezir. Selman, fode pa nou bliye ki ena boukou kitsoz ki kapav inflians nou konsians dan enn move fason.

2. Kouma nou konsians li ed nou?

² Kan nou bien form nou konsians, li ed nou pou konpran si enn kitsoz ki nou’nn fer li bon ouswa pa bon. Li kapav osi anpes nou pou fer bann move kitsoz ek pou “res atase ar seki bon.” (Rom. 12:9) Dan sa lartik-la, nou pou gete kouma nou konsians kapav anpes nou pou fer enn move kitsoz. Apre sa, nou pou examinn bann kitsoz ki kapav ena enn bon linflians lor nou konsians.

TO KONSIANS KAPAV ANPES TWA POU FER ENN MOVE KITSOZ

3-4. (a) Kifer nou kapav konpar nou konsians ar enn detekter lafime? (Get zimaz osi.) (b) Kouma enn konsians ki forme par Labib kapav protez nou? Servi enn lexanp pou explike.

³ Nou kapav konpar nou konsians ar enn detekter lafime. Parey kouma nou konsians, enn detekter lafime kapav averti nou kan ena enn danze. Selman, ena osi enn diferans. Par exanp, se zis apre ki li’nn detekte lafime, ki alarm-la pou deklanse. Me antretan, kitfwa dife inn fini pran dan enn lakaz. Parkont, enn konsians ki forme par Labib, li diferan! Nou konsians averti nou kont enn danze avan mem ki nou fer enn move kitsoz ki kapav gat nou lamitie avek Zeova. Anplis, li osi averti nou kont bann sitiasion ki kapav pous nou pou fer enn move kitsoz, ouswa mem enn pese grav.

⁴ Pou nou konpran sa, anou reflesi lor enn lexanp. Enn zenn frer inn al res dan enn nouvo landrwa. Li normal ki li pou anvi gagn bann kamarad, ek dan so lasanble, ena bann zenn ki ena mem laz ki li. Fer koumadir zot invit li dan enn ti-program. Li aksepte linvitasion-la, me selman, dan program-la li trouve ki ena de-trwa zenn ki pe koz lor bann kitsoz imoral ek zot pe bwar boukou lalkol. Eski li pou rod vinn bon kamarad avek sa bann zenn-la? Non! Kifer? Parski so konsians inn averti li ki ena enn kitsoz ki pa bon, ek li bizin ekout so konsians. Ek si li pa ekout so konsians, sa kapav pous li pou fer enn move kitsoz ki kapav amenn li pou fer enn pese grav.—Zak 1:14, 15.

5-6. Ki kitsoz ti kapav ed Adan ek Ev pou obeir Zeova?

⁵ Dan sertin sitiasion, Zeova dir nou dan enn fason kler ki kitsoz ki bon ek ki kitsoz ki pa bon. (Iza. 33:22) Se seki Li ti fer avek Adan ek Ev. Bondie ti dir zot ki fode pa zot “manz frwi pie konesans bon ek move.” (Zen. 2:17) Avredir, Zeova ti donn zot lord pou pa mem tous sa pie-la. (Zen. 3:3) Selman, enn serpan ti dir Ev ki li ti pou pli ere si li ti dezobeir Zeova. Ev ti kone ki li pa ti gagn drwa manz sa frwi-la, me kanmem sa, li pa ti ekout so konsians ek li ti dezobeir Zeova. Ek olie ki li ti reziste kont seki sa serpan-la ti dir li fer, li ti ekout li ek li ti fer pese kont Zeova.

⁶ Ki nou kapav dir lor Adan? Labib dir ki “se pa Adan ki Lediab ti anbete.” (1 Tim. 2:14) Kan li ti aprann ki Ev ti manz sa frwi-la, li ti kone ki li ti bizin obeir Zeova ek pa fer mem erer ki so madam inn fer. Me kanmem sa, li pa ti ekout so konsians ek li ti manz frwi-la. Ek parski Adan ek Ev ti dezobeir Zeova, “pese finn rant dan lemond . . . ek lerla lamor finn fane parmi tou bann dimounn, parski zot tou finn fer pese.” (Rom. 5:12) Nou kapav tir leson ar zot lexanp: Li bien inportan ki nou ekout bien nou konsians pou ki nou pa fer pese.

KONPRAN SEKI ZEOVA ANVI TO FER

7. Ki nou kapav aprann ar konsey ki ena dan Efezien 5:15-17?

⁷ Parfwa, Zeova dir nou dan enn fason kler ki kitsoz ki bon ek ki kitsoz ki pa bon, parey kouma Li ti fer avek Adan ek Ev. Me pou sertin sitiasion, pena enn lalwa presi dan Labib ki dir nou seki nou bizin fer. Akoz sa, nou bizin “kontign konpran ki volonte Zeova ete.” (Lir Efezien 5:15-17.) Kifer? Parski bann desizion ki nou pran swa pou fer Zeova plezir swa pou fer so leker fermal. Alor, nou konsians kapav ed nou pou konpran volonte Zeova ek pou fer Li plezir.

8. Kifer de Kretien ki dan mem sitiasion kapav pran diferan desizion ek kanmem sa fer Zeova plezir? Explike.

⁸ Kan pena enn lalwa presi dan Labib, ki kitsoz kapav ed enn Kretien pou pran enn desizion? Dan sa sitiasion-la, li bizin les so konsians ki’nn forme par Labib gid li. Kan li pe pran enn desizion, li bon ki li reflesi lor bann kestion kouma par exanp, ‘Kifer mo anvi fer sa kitsoz-la?,’ ouswa ‘Dan landrwa kot mo reste, ki koutim bann dimounn swiv?’ Alor nou konpran ki si arive ki de Kretien pe pas par mem sitiasion, zot kapav pran diferan desizion. Me kanmem sa, si zot desizion li an-akor avek bann prinsip Labib, zot toule-de kapav fer Zeova plezir ek ena enn bon konsians.

9. Explike kouma de frer ki dan mem sitiasion inn met an pratik Galat 6:4 pou pran enn desizion. (Get zimaz osi.)

⁹ Anou pran enn lexanp. Fer koumadir de frer ki ena matirite ek ki viv dan diferan pei, zot invite pou enn dine avek zot patron ek zot bann koleg travay. Toule-de viv dan enn pei kot lev ver ouswa tap ver, se bann koutim ki montre ki enn kikenn ena respe ek bon manier. Par exanp, enn frer kapav desid pou tap ver parski li konpran ki zot tou pe fer sa pou selebre progre ki zot konpagni inn fer. Parkont, enn lot frer kapav refiz pou lev so ver, parski so patron inn donn so lopinion lor enn kitsoz politik. Li per tansion ki si li swiv sa koutim-la, li pa pou reisi gard so netralite. Mem si zot inn pran diferan desizion, lobzektif nou de frer se pou azir an-akor avek volonte Zeova ek pou fer Li plezir. Alor, toule-de inn pran enn bon desizion.—Lir Galat 6:4.

APRANN POU PRAN BANN BON DESIZION

10-11. Dapre Ebre 5:13, 14, kouma “manze solid” ed enn Kretien pou form so konsians?

¹⁰ Dan Ebre 5:13, 14, Labib montre ki nou bizin form nou konsians. (Lir.) Mem si pa’nn servi mo “konsians” dan sa bann verse-la, nou konpran ki nou lobzektif se pou form nou-mem pou ki nou kapav “fer diferans ant seki bon ek seki move.” Ek pou ki nou kapav form nou konsians, nou bizin manz bann ‘manze ki solid.’ Ki savedir?

¹¹ “Manze solid” se bann lansegnman profon ki bann Kretien “ki ena matirite” konpran. (1 Kor. 2:14, 15) Li osi inplik bann prinsip Labib ki kapav ed nou kone seki Zeova panse lor enn sitiasion. Alor, kan pena enn lalwa presi dan Labib ki konsern enn sitiasion, enn Kretien bizin fer bann resers ek reflesi lor bann prinsip Labib ki kapav ed li pou pran enn desizion ki fer Zeova plezir.—Prov. 2:4, 5.

12. Ki kitsoz ankor nou aprann dan Ebre 5:14?

¹² Bann Kretien “ki ena matirite,” konn Zeova bien ek zot konpran so fason panse. Ek parski zot inn form zot konsians dapre bann prinsip Labib, zot kone ki kitsoz bon ek ki kitsoz pa bon. Zot osi kone ki lefe zot bann desizion kapav ena lor Zeova. Akoz sa, avan ki zot pran ninport ki desizion, zot touletan examinn bann prinsip Labib pou konpran fason panse Zeova. Ek sak fwa ki zot fer sa, zot form zotmem “pou fer diferans ant seki bon ek seki move.”

PA LES TWA INFLIANSE PAR BANN MOVE KITSOZ

13. Ki kapav arive si nou pa form nou konsians dapre bann prinsip Labib?

¹³ Nou konsians li pa touletan enn gid ki fiab. Kifer nou dir sa? Parski si nou pa form nou konsians dapre bann prinsip Labib, nou pou les nou inflianse par seki lezot dimounn panse ek osi par nou prop dezir. (1 Tim. 4:1, 2) Par exanp, nou kapav les nou konsians inflianse par bann fos krwayans, bann prezize, ouswa bann move dezir. (Iza. 5:20) Anplis, bann defo ki nou ena kapav ena enn move lefe lor nou konsians. Par exanp, nou kapav koumans vinn egois, ena lanvi pou gagn plis, ek panse ki nou pli inportan ki lezot. Si nou les tou sa bann kitsoz-la inflians nou, nou konsians pa pou gid nou kouma bizin. Ek lerla, nou pa pou reisi pran bann bon desizion.

14. (a) Mem si zot ti kone seki zot ti bizin fer, ki kitsoz kitfwa ti inflians Adan ek Ev pou fer seki move? (b) Sit lexanp sertin dimounn ki pa ti form zot konsians kouma bizin. (Get lankadre “Zot Pa Ti Form Zot Konsians Kouma Bizin.”)

¹⁴ Anou reflesi lor seki Ev ti fer. Li pa ti satisfe avek tou seki Zeova ti donn li, ek li ti anvi gagn plis. Li ti osi vinn orgeye ek li ti anvi vinn kouma Bondie. Akoz sa, li ti koumans panse ki personn pena drwa dir li seki bon ek seki pa bon. Li ti mem panse ki Zeova pena sa drwa-la. Anou reflesi lor Adan osi. Li ti egois, parski seki ti pli inportan pou li se so prop dezir. Li ti anvi kontign res avek Ev olie ki li fer Zeova plezir. Nou kapav reflesi osi lor bann lezot lexanp. Labib koz lor bann dimounn ki ti konn bien Zeova ek so fason panse, me selman zot ti koumans fer bann kitsoz ki Zeova pa kontan parski zot ti vinn egois, zot ti ena lanvi pou gagn plis, ek zot ti panse ki zot pli inportan ki lezot.

15. Ki kitsoz kapav inflians nou konsians dan enn move fason, ek ki Labib konsey nou pou fer?

¹⁵ Bann move frekantasion osi kapav inflians nou konsians dan enn move fason. (1 Kor. 15:33) Bann dimounn ki pa interese pou kone ki kitsoz Zeova kontan ek ki kitsoz Li pa kontan kapav ena enn move linflians lor nou. Se akoz sa ki Labib konsey nou pou pa frekant bann ki “viv dapre zot bann panse ki pena valer” ek bann ki “zot lespri dan nwarte.” (Efe. 4:17-19) Alor, li bien inportan ki nou “res lwin” ar sa bann dimounn-la.—2 Tim. 3:1-5.

LES ZEOVA FORM TO KONSIANS

16. Dan ki sitiasion sirtou nou konsians kapav ed nou pou fer Zeova plezir? (Get lankadre “Kouma to Kapav Form To Konsians dan enn Bon Fason?”)

¹⁶ Mem si nou inparfe, nou konsians kapav ed nou pou fer Zeova plezir. Li kapav ed nou sirtou dan bann sitiasion kot Labib pa donn nou enn lalwa presi lor seki nou bizin fer. (1 Kor. 10:31) Akoz sa, nou bizin kontign form nou konsians dapre bann prinsip Labib. Lerla, nou konsians pou gid nou kouma bizin ek nou pou pran bann desizion ki fer Zeova plezir.

17. Dapre Romin 12:2, kouma Zeova form nou?

¹⁷ Dan Labib, Zeova ansegn nou so fason panse. Ek si nou les Li ansegn nou, Li kapav ed nou pou pans parey kouma Li. (Iza. 64:8; lir Romin 12:2.) Avredir, dan Labib ena boukou lexanp ki montre kouma Zeova inn ed ouswa inn koriz so bann serviter. (2 Tim. 3:16) Ek nou kapav aprann plis lor fason panse Zeova kan nou etidie lor lexanp Zezi ek so bann lansegnman.—1 Kor. 2:16.

18. Ki nou bizin fer pou ki nou ere ek servi Zeova “avek enn konsians kler”?

¹⁸ Nou kapav protez nou konsians kan nou pa les nou inflianse par bann move kitsoz. Nou kapav osi kontign form nou konsians pou fer diferans ant seki bon ek seki move kan nou etidie Labib pou ki nou konpran bien fason panse Zeova. (Ps. 1:1-3) Si nou fer sa bann kitsoz-la, nou pou ere ek nou pou servi Zeova “avek enn konsians kler.”—2 Tim. 1:3.