Proze Zeova Pou Realize!

1, 2. (a) Ki Zeova finn fer nou kone? (b) Ki promes nou trouve dan Izai 46:10, 11 ek 55:11?

“O-KOUMANSMAN, Bondie ti kree lesiel ek later.” (Zenez 1:1) Sa se bann premie mo ki ena dan Labib ki explik enn kitsoz sinp me ki bien profon. Nou, bann imin, nou trouv zis enn tigit kitsoz dan tou seki Zeova finn kree dan liniver, ek nou pa konpran preske nanye lor lespas, lalimier ek lafors gravite. (Ekleziast 3:11) Me Zeova finn fer nou konn so proze pou later ek pou bann dimounn. Li ti kree bann dimounn dan so resanblans, ek Li ti anvi ki zot viv ere lor later. (Zenez 1:26) Zot ti pou vinn so bann zanfan, ek Li ti pou vinn zot Papa.

² Me, dapre Zenez sapit trwa, nou trouve ki ena enn kitsoz ki’nn blok proze Zeova. (Zenez 3:1-7) Selman, pena okenn problem ki Zeova pa kapav regle. Personn pa kapav met baton dan So larou. (Izai 46:10, 11; 55:11) Alor, nou kapav sir ki proze ki Zeova ti ena o-koumansman pou realize exakteman dan ler ki bizin!

 3. (a) Ki bann lansegnman inportan ed nou pou konpran mesaz ki ena dan Labib? (b) Kifer nou pou examinn sa bann lansegnman-la? (c) Ki bann kestion nou pou reponn dan sa lartik-la?

³ Sirman nou konn proze ki Bondie ena pou later ek pou bann dimounn, ek osi rol ki Zezi ena dan sa proze-la. Se bann verite ki bien inportan, ek kitfwa se bann premie kitsoz ki nou ti aprann kan nou ti fek koumans etidie Labib. Asterla, nou anvi ed lezot pou konn sa bann lansegnman-la. Nou pou gagn lokazion pou fer sa pandan lepok Memoryal, kan nou pou invit bann dimounn pou asiste laniverser lamor Zezi. (Lik 22:19, 20) Si zot asiste sa levennman inportan la, zot pou aprann plis lor proze extraordiner ki Zeova ena. Alor, pandan sa lepok-la, li bon ki nou reflesi lor bann kestion bien presi ki nou kapav servi pou ankouraz bann dimounn pou asiste sa levennman-la. Dan sa lartik-la, nou pou reponn trwa kestion: Ki proze Zeova ena pou later ek pou bann dimounn? Ki problem ti arive? Ek kifer eski sakrifis Zezi se samem lakle ki ouver laport pou ki proze Zeova realize?

 4. Kouma eski kreasion “pe anons laglwar Bondie”?

⁴ Zeova enn Kreater extraordiner. Tou seki Li’nn kree pena so segon. (Zenez 1:31; Zeremi 10:12) Kan nou get bote ek lord ki ena dan kreasion, ki nou aprann? Nou aprann ki tou seki Zeova inn kree, depi so pli tipti ziska so pli gran, tou ena zot linportans. Anplis kan to reflesi lor bann selil extraordiner ki ena dan lekor enn dimounn, kan to obzerv enn tibaba, ouswa kan to get enn zoli kouse soley, ki to resanti? Nou admir sa bann kitsoz-la parski Zeova finn donn nou kapasite pou apresie bann zoli kitsoz.​—Lir Psom 19:1; 104:24, NW.

 5. Ki Zeova inn fer pou ki tou so kreasion mars bien ansam?

⁵ Zeova inn fixe bann limit bien presi pou tou so kreasion. Li’nn etabli bann lalwa dan lanatir, ek osi bann lalwa moral. Li finn etabli sa bann lalwa-la pou ki tou kitsoz dan liniver mars bien ansam. (Psom 19:7-9) Tou kitsoz dan liniver ena enn plas ek enn rol bien presi. Par exanp, lalwa gravite fer ki latmosfer otour Later pa disparet, ek li kontrol osi bann losean ek lamare. San lalwa gravite, lavi pa ti pou existe lor later. Gras-a bann limit ki Zeova inn fixe pou tou so kreasion, ena enn lord parfe dan liniver. Sa montre ki Zeova ena enn proze pou later ek pou bann dimounn. Kan nou al prese, nou kapav ed bann dimounn pou konn Kreater sa liniver extraordiner la.​—Revelasion 4:11.

6, 7. Ki kado Zeova ti donn Adan ek Ev?

⁶ Proze ki Zeova ti ena pou bann dimounn se ki zot viv pou touletan lor later. (Zenez 1:28; Psom 37:29) Zeova, Li enn Bondie zenere. Li ti donn Adan ek Ev bann kado ki ena boukou valer. (Lir Zak 1:17.) Zeova ti donn zot liberte pou swazir, kapasite pou reflesi, kapasite pou kontan, ek pou fer kamarad. Zeova ti koz avek Adan ek ti explik li kouma pou fer seki bon. Adan ti aprann osi kouma pou pran limem swin, pran swin bann zanimo, ek kiltiv later. (Zenez 2:15-17, 19, 20) Zeova ti donn Adan ek Ev kapasite pou goute, touse, trouve, tande, ek santi bann bon kitsoz ki Li ti fer pou zot. Gras-a tousala, zot ti kapav profit lavi dan paradi. Adan ek Ev ti ena boukou travay bien interesan pou fer. Zot ti pou kapav kontign aprann ek dekouver bann nouvo kitsoz pou touletan.

⁷ Ki kitsoz ankor ti form parti dan proze Bondie? Zeova ti donn Adan ek Ev kapasite pou gagn bann zanfan parfe. Zot zanfan osi ti pou gagn bann zanfan, ziska ki later ranpli ar dimounn. Zeova ti anvi ki bann paran kontan zot zanfan, parey kouma Li ti kontan so bann premie zanfan imin, Adan ek Ev. Li ti donn bann dimounn planet Later ek tou bann kitsoz ki ena lor la. Later ti pou vinn zot lakaz, ek zame pa ti pou pran sa ar zot.​—Psom 115:16.

 8. Kifer Bondie ti donn Adan ek Ev lalwa ki ena dan Zenez 2:16, 17?

⁸ Bann kitsoz pa ti pas kouma Zeova ti anvi. Ki ti arive? Zeova ti donn Adan ek Ev enn lalwa bien sinp pou ki zot kone ki zot liberte ena enn limit. Li ti dir zot: “To kapav manz frwi tou bann pie ki ena dan zardin, kantite ki to anvi. Me, konsernan pie konesans bon ek move, fode pa ki to manz so frwi, parski zour ki to manz sa, vremem to pou mor.” (Zenez 2:16, 17) Sa lalwa-la pa ti difisil pou konpran. Ek li pa ti pou difisil pou obeir, parski ti ena boukou lezot bon kitsoz pou manze dan sa zardin-la.

9, 10. (a) Kouma Satan ti akiz Zeova? (b) Ki Adan ek Ev ti desid pou fer? (Get zimaz dan koumansman lartik.)

⁹ Satan Lediab ti servi enn serpan pou anbet Ev pou ki li dezobeir so Papa, Zeova. (Lir Zenez 3:1-5a; Revelasion 12:9) Satan ti pretann ki Zeova ti interdi So bann zanfan imin pou manz “frwi tou bann pie ki ena dan zardin.” Se koumadir Satan ti pe dir Ev: ‘To pe rod dir ki zot pa kapav fer seki zot anvi?’ Apre sa li ti dir Ev: “Non, zot pa pou mor zot.” Me li ti pe koz manti. Lerla Satan ti esey konvink Ev ki li pa ti bizin obeir Bondie. Satan ti dir: “Bondie kone ki zour zot manz sa frwi-la, zot lizie pou ouver.” Dapre Satan, Zeova pa ti anvi ki Adan ek Ev manz frwi sa pie-la parski sa ti pou donn zot enn konesans spesial. Alafin, Satan ti fer sa fos promes-la: “Zot pou vinn kouma Bondie, zot pou konn seki bon ek seki pa bon.”

¹⁰ Adan ek Ev ti bizin deside ki zot ti pou fer. Eski zot ti pou obeir Bondie, ouswa zot ti pou ekout serpan-la? Malerezman, zot ti desid pou dezobeir Bondie. Zot ti rezet Zeova kouma zot Papa, ek zot ti al dan kote Satan. Apartir sa moman-la, zot ti bizin debrouy zot par zotmem, san proteksion Zeova.​—Zenez 3:6-13.

11. Kifer Zeova ti bizin pran bann dispozision akoz pese Adan ek Ev?

¹¹ Kan Adan ek Ev ti dezobeir lalwa Zeova, zot ti vinn inparfe. Anplis, zot ti vinn bann lennmi Zeova parski Li deteste lemal. An realite, So “lizie tro pir pou get seki move.” (Abakouk 1:13) Si Zeova pa ti pran bann dispozision akoz pese Adan ek Ev, sa ti pou anpes tou so bann kreatir pou viv ere. Bann anz ek bann dimounn ti pou’nn demann zotmem si zot kapav fer konfians bann parol Zeova. Me Zeova, Li fidel ar so bann prinsip ek zame Li pa al kont sa bann prinsip-la. (Psom 119:142) Mem si Adan ek Ev ti ena liberte pou swazir, zot pa ti kapav evit konsekans zot rebelion kont Zeova. Ek finalman, zot ti mor ek zot ti revinn lapousier.​—Zenez 3:19.

12. Ki ti ariv bann zanfan Adan?

¹² Kan Adan ek Ev ti manz sa frwi-la, Zeova ti nepli konsider zot kouma bann manb so fami. Li ti met zot deor depi zardin Edenn, ek zame zot pa ti pou kapav retourn laba. (Zenez 3:23, 24) Zeova ti fer zot sibir bann konsekans zot desizion. (Lir Deteronom 32:4, 5.b) Rezilta: Adan ek Ev ti nepli kapav imit bann kalite Zeova dan enn fason parfe. Adan ti perdi enn zoli lavenir ek so bann zanfan osi ti perdi sa lavenir-la. Sel leritaz ki li’nn kapav donn so bann zanfan se linperfeksion, pese, ek lamor. (Romin 5:12) Akoz Adan, zot ti nepli ena posibilite pou viv pou touletan. Adan ek Ev pa ti kapav gagn bann zanfan parfe, ek zot zanfan osi pa ti kapav gagn bann zanfan parfe. Depi ki Satan inn fer Adan ek Ev rebel kont Zeova, li finn esey inflians tou dimounn pou fer parey.​—Zan 8:44.

13. Ki Zeova anvi pou bann dimounn?

¹³ Zeova ankor kontan bann dimounn. Mem si Adam ek Ev ti rezet Li, Zeova ankor anvi ki bann dimounn ena enn bon relasion avek Li. Ek Li pa anvi ki okenn parmi zot mor. (2 Pier 3:9) Akoz sa, deswit Li ti pran bann dispozision pou ki bann dimounn kapav revinn so bann kamarad. Kouma Li ti fer sa san ki Li al kont so bann prinsip? Anou gete.

14. (a) Dapre Zan 3:16, ki Zeova inn fer pou sov bann dimounn ar pese ek lamor? (b) Ki kestion nou kapav examine avek bann dimounn?

¹⁴ Lir Zan 3:16. Boukou parmi bann dimounn ki pou asiste Memoryal pou konn bien sa verse-la. Me kouma sakrifis Zezi permet bann dimounn gagn lavi pou touletan? Nou gagn lokazion pou ed bann dimounn gagn repons sa kestion-la kan nou invit zot pou Memoryal, kan zot asiste Memoryal ansam avek nou, ek kan nou revizit zot apre. Plis zot konpran laranson, plis zot pou realize ki kantite Zeova kontan bann dimounn, ek ki kantite Li enn Bondie ki ena sazes. Ki kitsoz konsernan laranson nou kapav montre zot?

15. Kouma Zezi ti diferan ar Adan?

¹⁵ Zeova finn pran bann dispozision pou ki enn zom parfe donn so lavi kouma enn ranson. Sa zom parfe la ti bizin fidel ar Zeova. Ek li ti bizin dispoze donn so lavi pou bann dimounn. (Romin 5:17-19) Zeova ti transfer lavi Zezi (so premie kreasion) depi dan lesiel ek ti avoy li lor later. (Zan 1:14) Alor, Zezi ti vinn enn imin parfe, parey kouma Adan ti ete. Me Zezi ti diferan ar Adan. Li ti fer seki Zeova ti atann ki enn zom parfe fer, setadir swiv So bann prinsip. Ek mem dan bann leprev bien difisil, zame Zezi pa finn dezobeir bann lalwa Zeova.

16. Kifer laranson li enn kado ki ena enn gran valer?

¹⁶ Kan li’nn mor kouma enn zom parfe, Zezi finn kapav sov bann dimounn ar pese ek lamor. Zezi ti exakteman kouma Adan ti bizin ete. Zezi ti enn zom parfe, fidel, ek obeisan anver Bondie. (1 Timote 2:6) Li’nn mor pou nou, ek so sakrifis donn tou dimounn, bann zom, bann fam, ek bann zanfan, posibilite pou viv pou touletan. (Matie 20:28) Laranson samem lakle ki ouver laport pou ki proze Bondie realize.​—2 Korintien 1:19, 20.

17. Ki kitsoz laranson permet nou gagne?

¹⁷ Laranson finn kout Zeova bien ser. (1 Pier 1:19) Nou ena telman boukou valer pou Zeova ki Li ti dispoze les so Garson, ki Li bien kontan, mor pou nou. (1 Zan 4:9, 10) Dan enn sertin fason, Zezi inn vinn nou papa dan plas Adan. (1 Korintien 15:45) Zezi pa finn zis donn nou posibilite pou gagn lavi pou touletan, me osi pou revinn bann manb fami Bondie enn zour. Gras-a laranson, bann dimounn pou vinn parfe, ek Zeova pou kapav re-aksepte zot dan so fami san ki Li al kont so bann lalwa. Esey mazine kouma li pou extraordiner kan tou bann ki fidel ar Zeova pou vinn parfe! Ek alafin, tou dimounn dan lesiel ek lor later pou dan linite, kouma enn sel fami. Nou tou nou pou vinn bann zanfan Bondie.​—Romin 8:21.

18. Kan eski Zeova pou vinn “tou kitsoz pou zot tou”?

¹⁸ Mem si nou bann premie paran finn rezet Zeova, Li pa finn aret kontan bann dimounn, ek Li finn donn nou laranson. Ek mem si nou inparfe, Satan pa kapav anpes nou res fidel ar Zeova. Gras-a laranson, Zeova pou ed nou vinn bann dimounn ki zis. Mazine kouma lavi pou ete kan tou dimounn “ki rekonet Garson [Bondie] ek ena lafwa an li” pou gagn lavi eternel! (Zan 6:40, NW.) Nou Papa ki bien kontan nou ek ki ena sazes pou realiz so proze ek pou ed bann dimounn vinn parfe. Lerla, Zeova pou vinn “tou kitsoz pou zot tou.”​—1 Korintien 15:28, NW.

19. (a) Ki nou rekonesans pou laranson bizin motiv nou pou fer? (Get lankadre “Anou Kontign Rod Bann Ki Dign.”) (b) Ki nou pou examine dan prosin lartik?

¹⁹ Nou rekonesans pou Zeova bizin motiv nou pou koz lor sa kado ki ena enn gran valer la ar lezot. Tou dimounn bizin kone ki Zeova donn posibilite pou viv pou touletan gras-a laranson. Me laranson fer boukou plis ki sa. Dan prosin lartik, nou pou trouve kouma laranson regle bann kestion ki Satan ti souleve dan zardin Edenn.