Konsolasyon pu Bann Ki Deprime

“Ziska ler, kreasyon antye pe kontiyn pleyne ek sufer ansam.” (Romin 8:22) Kan ti finn ekrir sa bann parol la, 1,900 an avan, bann dimunn ti pe konn buku sufrans. Buku ti deprime. Akoz sa, bann Kretyin ti gayn sa konsey la: “Konsol bann [dimunn] ki deprime.”—1 Tesalonisyin 5:14.

Zordi, dimunn konn ankor plis sufrans, ek ena buku plis dimunn ki deprime. Me eski sa bizin etonn nu? Pa vreman, parski Labib idantifye lepok kot nu pe viv kuma bann “dernye zur” ek li apel sa bann zur la “bann letan kritik pu fer fas.” (2 Timote 3:1-5) Zezi ti anonse ki dan bann dernye zur ti pu ena “bann spektak ki fer per.”—Lik 21:7-11; Matye 24:3-14.

Kan bann dimunn konn traka, laper, sagrin ek bann santiman negatif pandan enn bon but letan, suvan zot fer depresyon. Zot deprime uswa zot tom dan enn profon sagrin parski zot finn perdi enn pros dan lamor, akoz enn divors, parski zot finn perdi travay, uswa parski zot pe bizin viv avek enn maladi. Bann dimunn fer depresyon usi kan zot devlop santiman ki zot pa vo nanyin, ki zot initil ek ki tuletan zot fer lezot perdi pwin. Ninport kisannla kapav santi li abat par enn sityasyon byin-byin difisil. Me, kan enn kikenn nepli ena okenn lespwar ek li pa reysi truv enn simin pu sorti dan so sityasyon difisil, li riske fer enn depresyon byin grav.

Dan lepase, ti ena bann dimunn ki ti ena sa bann mem santiman la. Zob ti sufer enn move maladi ek li ti konn bann lezot maler. Li ti santi ki Bondye ti abandonn li, ek akoz sa li ti kumans degut so lavi. (Zob 10:1; 29:2, 4, 5) Kan Zakob ti krwar ki so garson finn mor, li ti deprime; li ti refiz gayn konsolasyon ek li ti mem swete mor. (Zenez 37:33-35) Lerwa David ti santi li kupab akoz enn erer grav ki li ti komet. Alor, li finn dir avek buku remor: “Tutlong lazurne mo finn mars avek sagrin. Mo finn angurdi.”—Psom 38:6, 8; 2 Korintyin 7:5, 6.

Zordi, buku dimunn deprime parski zot met tro buku pwa lor zot, zot sey swiv enn program tro sarze ki depas zot kapasite mantal, afektif, ek fizik. Li paret ki stres, melanze avek bann panse negatif ek bann lemosyon kapav afekte lekor enn dimunn ek kre enn debalansman simik dan so servo. Lerla, dimunn la sufer depresyon.—Konpar avek Proverb 14:30.

Led Ki Zot Bizin

Dan premye syek, Epafrodit, enn Kretyin ki ti res dan lavil Filip, ti “deprime parski [so bann kamarad] ti tann dir ki li finn tom malad.” Epafrodit ti tom malad apre ki so bann kamarad ti avoy li Rom avek bann komisyon pu lapot Pol. Alor, devet li finn santi ki li finn desevwar so bann kamarad ek ki devan lizye bannla, li enn kikenn ki pa kapav fer enn komisyon kuma bizin. (Filipyin 2:25-27; 4:18) Kuma eski lapot Pol finn ed li?

Li finn return Epafrodit kot li avek enn let pu so bann kamarad Filipyin. Dan sa let la li finn dir zot: “Donn [Epafrodit] lakey ki zot abitye done dan Senyer avek tu zot lazwa, ek kontiyn donn loner sa bann kalite zom la.” (Filipyin 2:28-30) Kan Pol finn koz an byin lor Epafrodit ek kan bann Filipyin finn akey li avek buku santiman ek lamur, sirman Epafrodit finn gayn konsolasyon ek led pu geri so depresyon.

Wi pena dut, konsey ki Labib done pu “konsol bann nam deprime,” sa li vremem pli bon konsey ki kapav ena. Enn madam ki ti sufer depresyon finn dir: “U bizin kone ki lezot interese ar u personelman. U bizin tann kikenn dir u, ‘Mo konpran; to pu byin.’”

Suvan sa dimunn deprime la mem ki bizin fer premye pa pu rod enn kikenn avek ki li kapav konfye li, ek ki pu konpran li. Sa kikenn la bizin enn dimunn ki byin konn ekute ek ki ena buku pasyans. Li bizin evit pres moral avek sa kikenn ki deprime la, uswa evit ziz li par bann parol kuma, ‘Fode pa to ena sa bann santiman la’ uswa, ‘Sa li enn move latitid sa.’ Enn kikenn deprime ena bann santiman byin frazil, ek sa bann kalite kritik la pu fer li perdi ankor plis lestim ki li ena pu li mem.

Enn kikenn ki deprime kapav ena santiman ki li pa vo nanyin. (Yona 4:3) Me, enn dimunn bizin tuzur rapel ki valer ki li ena devan lizye Bondye, sa mem ki pli inportan. Pu bann dimunn, Zezi Kris ti enn “nanyin ditu,” me sa pa finn sanz vre valer ki li ti ena devan Bondye. (Izai 53:3) Alor, u kapav sir ki parey kuma Bondye kontan so Garson byineme, Li kontan u’si parey.—Zan 3:16.

Zezi ti ena pitye pu bann ki ti pe sufer ek li ti sey ed zot pu regayn zot prop lestim. (Matye 9:36; 11:28-30; 14:14) Li ti explike ki mem de ti mwano ena valer devan lizye Bondye. Li finn dir: “Mem enn parmi zot Bondye pa bliye.” Asterla, mazine ki kantite plis valer bann dimunn ki fer volonte Bondye, ena devan so lizye! Konsernan sa bann dimunn la Zezi finn dir: “ Li kont mem bann seve lor zot latet.”—Lik 12:6, 7.

Selman, li vre ki li byin dir pu enn kikenn krwar ki li ena enn gran valer devan lizye Bondye si li byin deprime ek dekuraze par so bann febles ek so bann erer. Sa dimunn la, li finn fini met dan so latet ki li pa merit lamur ek latansyon Bondye. Sa mem seki Parol Bondye rekonet: “Nu leker kapav kondann nu.” Me eski nu leker ki deside si nu ena valer devan lizye Bondye? Non. Bondye kone ki bann dimunn ki fer pese kapav devlop bann panse negatif ek al ziska kondann zot mem. Akoz sa, so Parol sulaz zot kan li dir: “Bondye pli gran ki nu leker ek Li konn tu kitsoz.”—1 Zan 3:19, 20.

Wi, nu Papa ki dan lesyel ek ki kontan nu pa get zis nu bann pese ek nu bann erer. Li konn nu bann febles, nu lavi antye, ek nu bann lintansyon. Li kone ki nu finn erit pese, maladi ek lamor; akoz sa, nu ena bann febles. Si nu ena buku remor ek nu ankoler ar nu mem, sa li enn prev ki nu pa anvi fer pese ek ki nu pa finn al tro lwin. Labib dir ki limanite finn “perdi so valer,” ek la usi kont so volonte. Alor, Bondye konpran nu sityasyon tris, ek avek pitye li pran kont nu bann febles.—Romin 5:12; 8:20.

Labib donn nu lasirans ki “Zeova ena pitye ek Li ena konpasyon. Parey kuma soley leve byin lwin ar soley kuse, kumsa mem Li finn met nu bann pese byin lwin ar nu. Parski Li mem Li konn byin kuma nu finn forme, Li rapel ki nu finn fer ar lapusyer. (Psom 103:8, 12, 14) Wi, Zeova Li “Bondye tu konsolasyon, ki sulaz nu dan tu nu maler.”—2 Korintyin 1:3, 4.

Bann ki deprime gayn led ki zot pli bizin kan zot vinn pros ar Bondye ek kan zot aksepte linvitasyon pu ‘zet zot fardo lor Li.’ Li kapav fer “reviv leker bann ki kraze.” (Psom 55:22; Izai 57:15) Akoz sa, Parol Bondye ankuraz nu pu priye, kan li dir: “Zet tu zot traka lor [Zeova], parski Li pran zot kont.” (1 Pyer 5:7) Wi, par lapriyer ek siplikasyon, bann dimunn kapav vinn pros avek Bondye ek zwir “ lape Bondye ki depas tu bann panse.”—Filipyin 4:6, 7; Psom 16:8, 9.

Enn kikenn kapav reysi sirmont so laspe deprime si li fer bann sanzman pratik dan so lavi. Legzersis fizik, enn manze nurisan, pran ler fre, enn bon repo, ek evit get tro buku televizyon, tusala zot bann kitsoz byin-byin inportan. Enn madam finn ed bann dimunn deprime kan li finn invit zot pu fer inpe lamars. Enn fwa enn madam ki ti deprime finn dir li: “Mo pa anvi al marse.” Lerla, li finn dir madam la avek enn ton dus, me ferm: “Me non, mo kone u pu vinn ar mwa.” Li rakonte: ‘Nu finn mars 6 kilomet. Kan nu finn returne, li ti fatige, me li ti santi pli byin. Si u pa seye, zame u pa pu kone ki kantite legzersis fizik kapav ede.’

Me defwa li inposib pu konbat depresyon net, mem si finn sey tu mwayin ek tu tretman avek dokter. Enn madam ki ena plis ki 60 an finn dir: “Mo finn sey tu kitsoz, me depresyon la pale kit mwa.” Parey kumsa mem, suvan li inposib zordi pu geri bann aveg, bann surd uswa bann ki andikape. Me selman, bann ki deprime kapav gayn konsolasyon ek enn lesperans si zot lir regilyerman Parol Bondye, ki donn nu lasirans ki enn zur bann dimunn pu sulaze net ar tu bann maladi.—Romin 12:12; 15:4.

Kan Personn Pu Nepli Deprime Ankor

Kan Zezi ti dekrir bann kitsoz terib ki ti pu arive lor later dan bann dernye zur, li ti azute: “Kuma sa bann kitsoz la kumans arive, redres zot ek lev zot latet, parski zot delivrans pe koste.” (Lik 21:28) Zezi ti pe koz lor delivrans ki pu permet bann dimunn rant dan nuvo lemond Bondye kot pu ena lazistis, ek kot “kreasyon pu libere ar lesklavaz pese ek li pu gayn enn liberte extraordiner kuma bann zanfan Bondye.”—Romin 8:21.

Wi, li pu vremem enn sulazman pu limanite kan bann dimunn pu libere ar bann fardo ki ti pe pez lor zot. Lerla, sak zur zot pu leve avek enn lespri kler kuma kristal ek zot pu prese pu kumans zot laktivite pu lazurne! Personn ankor pa pu gayn depresyon. Bondye finn fer enn promes sir avek tu dimunn ki Li “pu suy tu larm dan zot lizye, ek pa pu ena lamor; pu nepli ena dey, kriye ek duler. Bann kitsoz ansyin finn disparet.”—Revelasyon 21:3, 4.

Amwin deza indike, tu bann tex Labib ki site finn tradir depi New World Translation of the Holy Scriptures.