“Senyer, Montre Nu Kuma Priye”

“Enn parmi so bann disip ti dir li: ‘Senyer, montre nu kuma priye.’”—LUC 11:1.

 1. Kifer enn parmi bann disip Jésus ti demann li montre zot kuma priye?

ENN zur, an l’an 32 A.N.L., enn parmi bann disip Jésus ti pe obzerv li priye. Sa disip-la pa ti kapav tann seki Jésus ti pe dir So Papa, parski sirman Jésus ti pe priye dan so leker. Me, kan Jésus inn fini priye, disip-la dir li: “Senyer, montre nu kuma priye.” (Luc 11:1) Sa pa vedir ki lapriyer ti enn kitsoz etranz pu sa disip-la. Avredir, bann Juifs ti fer lapriyer regilyerman. Sa ti fer parti dan zot lavi ek dan zot ladorasyon. Anplis, les Écritures Hébraïques ranferm buku lapriyer, partikilyerman dan liv Psaumes. Me alor, kifer sa disip-la finn demann Jésus montre li priye? Ebyin, li finn al truv enn gran diferans ant fason ki Jésus priye ek fason ki bann sef relizye zot, zot priye. Bann rabbi ti abitye priye par pir formalite, zis pu lizye dimunn. Me kan get zot, kumadir pena pli sin ki zot!—Matthieu 6:5-8.

 2. (a) Kuma nu kone ki Jésus pa ti anvi ki bann dimunn aprann lapriyer Notre Père par ker? (b) Kifer nu interese pu kone kuma priye?

² Apepre 18 mwa avan, dan so Sermon lor montayn, Jésus ti montre so bann disip enn model lapriyer. (Matthieu 6:9-13) Me, li paret ki sa disip-la pa ti prezan sa ler-la. Donk an so prezans, Jésus ti repet bann pwin prinsipal ki ena dan sa lapriyer model-la, san ki li resit lapriyer-la mo pu mo. Se enn detay interesan ki montre ki Jésus pa ti anvi ki dimunn aprann sa lapriyer-la par ker. (Luc 11:1-4) Parey kuma sa disip-la, nu’si nu anvi aprann kuma priye Jéhovah pu vinn pli pros ar Li. Donk, anu egzaminn an detay lapriyer Notre Père ki truv dan l’Évangile Matthieu. Ena 7 demann dan sa lapriyer-la: trwa konsern volonte Bondye, ek kat konsern nu bann bezwin materyel ek spirityel. Dan sa lartik-la, nu pu egzaminn trwa premye demann.

Enn Papa Ranpli ar Lamur

3, 4. Ki sa inplike kan nu apel Jéhovah “nu Papa”?

³ Par fason ki Jésus ti kumans so lapriyer, li ti montre ki nu bizin apros Jéhovah avek buku respe ek sa bizin reflet relasyon intim ki nu ena avek li. Jésus ti pe koz sirtu pu so bann disip ki ti’nn rasanble otur-de-li lor montayn; li ti anvi ki so lanseynman profit zot. Jésus ti dir zot ki, kan zot priye Jéhovah, zot bizin apel Li “nu Papa ki dan lesyel.” (Matthieu 6:9) Dapre enn exper, ki Jésus ti pe koz Hébreu uswa Araméen, sa mo ‘Papa-la’ ena mem sans ki kan enn zanfan dir “Papi.” Kan nu apel Jéhovah: “nu Papa,” sa montre ki nu ena enn bon relasyon avek Li, ek ki nu fer Li konfyans.

⁴ Kan nu dir “nu Papa,” nu rekonet usi ki nu fer parti dan enn gran fami zom ek fam, ki rekonet Jéhovah kuma zot Kreater. (Isaïe 64:8; Actes 17:24, 28) Etandone ki Bondye finn adopte bann Kretyin oints kuma so bann garson, kan zot priye Li, zot kapav “kriye: ‘Abba, Père!’ ” (Romains 8:14, 15) Zot bann konpaynon usi, “lezot brebi,” kapav apros Jéhovah lor non Jésus ek apel Jéhovah “nu Papa,” etandone ki zot inn pran batem an sinbol de zot langazman avek Jéhovah. (Jean 10:16; 14:6) Nu kapav priye nu Papa regilyerman pu glorifye Li, pu remersye Li pu tu so bonte anver nu, ek pu zet nu fardo lor Li, parski nu sir ki Li pran nu kont.—Philippiens 4:6, 7; 1 Pierre 5:6, 7.

Lamur pu Non Jéhovah

 5. Ki kitsoz nu demande an premye dan lapriyer Notre Père, ek kifer se apropriye?

⁵ Premye demann dan lapriyer Notre Père montre nu ki kitsoz bizin enn priorite pu nu. Li dir: “Ki to non sanktifye.” (Matthieu 6:9) Wi, sanktifikasyon non Jéhovah bizin enn priorite pu nu, parski nu kontan Li ek nu pa kontan pu truv sa kantite repros ki ena lor so non-la. Kan Satan inn rebele ek li’nn insit premye kup imin pu dezobeir Jéhovah, sa inn dezonor non Jéhovah. Sa inn met an dut la fason ki Bondye egzers so suverennte dan liniver. (Genèse 3:1-6) Anplis, pandan plizir syek, bann dimunn ki pretann reprezant Jéhovah, inn dezonor so non par zot bann move aksyon ek par zot fos lanseynman.

 6. Ki nu pa pu fer, si nu priye pu ki non Jéhovah sanktifye?

⁶ Kan nu priye pu sanktifikasyon non Jéhovah, sa montre ki nu sutenir avek tu nu leker drwa ki Jéhovah ena pu guverne dan liniver. Jéhovah anvi ki liniver abite par bann anz ek bann dimunn ki sumet volonterman ar so suverennte, par amur pu Li ek pu tu seki so non reprezante. (1 Chroniques 29:10-13; Psaume 8:1; 148:13) Nu lamur pu Jéhovah pu anpes nu sali so non sakre. (Ézékiel 36:20, 21; Romains 2:21-24) Pu ki ena lape dan liniver, fode ki non Jéhovah sanktifye, ek fode ki so bann kreatir sumet zot avek amur ar so suverennte. Donk, kan nu priye “ki to non sanktifye,” sa montre ki nu ena konfyans ki proze Jéhovah pu realize ek sa pu enn glwar pu Li.—Ézékiel 38:23.

Nu Priye pu Rwayom Bondye

7, 8. (a) Ki Rwayom Jésus finn anseyn nu pu priye? (b) Ki nu aprann lor sa Rwayom-la dan liv Daniel ek Révélation?

⁷ Dezyem kitsoz ki nu demande dan lapriyer Notre Père se: “Ki to rwayom vini.” (Matthieu 6:10) Sa demann-la ena enn lyin direk avek premye demann. Kuma? Ebyin, pu sanktifye so non, Jéhovah pu servi Rwayom Messianique, so guvernman ki truv dan lesyel ek ki dirize par so Garson, Jésus Christ. (Psaume 2:1-9) Dan enn profesi, profet Daniel dekrir Rwayom Messianique kuma “enn ros” ki’nn sorti dan enn “montayn.” (Daniel 2:34, 35, 44, 45) Sa montayn-la reprezant suverennte iniversel, uswa reyn siprem Jéhovah. Donk sa ros-la, setadir Rwayom Messianique, li enn nuvo fason ki Jéhovah egzers so suverennte iniversel. Profesi-la montre pli lwin ki ros-la, a so tur “vinn enn gran montayn ek [li] ranpli later antye.” Sa montre nu ki Rwayom Messianique pu reprezant suverennte iniversel Jéhovah kan li pu guvern later.

⁸ Asosye avek Jésus Christ dan sa Rwayom-la, ena 144,000 dimunn ki’nn “aste parmi bann imin.” Zot pu reyn avek li kuma le rwa ek pret. (Révélation 5:9, 10; 14:1-4; 20:6) Daniel apel zot bann “saints du Suprême,” ek ansam avek Jésus Christ zot Sef, zot erit “le rwayom, guvernman ek grander bann rwayom dan tu liniver . . . Zot rwayom se enn rwayom ki pu dir pu enn letan indefini, ek tu bann guvernman pu servi zot ek pu obeir zot.” (Daniel 7:13, 14, 18, 27) Se pu sa guvernman-la ki Christ ti demann so bann disip priye.

Kifer Nu Bizin Kontiyn Priye pu Rwayom Bondye Vini?

 9. Kifer li neseser ki nu priye pu Rwayom Bondye vini?

⁹ Dan lapriyer Notre Père, Christ inn anseyn nu priye pu ki Rwayom Bondye vini. Realizasyon bann profesi la Bib montre ki sa Rwayom Messianique-la finn etabli dan lesyel an 1914.a Donk, eski li ankor tuzur neseser ki nu priye pu ki sa Rwayom-la “vini”? Wi, sertennman. Parski dan profesi Daniel, Rwayom Messianique ki sinbolize par enn ros, pe vinn direkteman lor bann guvernman politik ki sinbolize par enn gran zimaz. Sa ros-la pu fons drwat lor sa zimaz-la, ek li pu frakas li. Profesi Daniel dir: “Sa rwayom-la pa pu vinn pu enn lot pep. Li pu kraz tu bann lezot rwayom ek li pu detrir zot konpletman, ek limem pu res pu enn letan indefini.”—Daniel 2:44.

10. Kifer nu pe atann avek inpasyans ki Rwayom Bondye vini?

¹⁰ Nu pe atann avek inpasyans kan Rwayom Bondye vini pu detrir lemond move dirize par Satan. Parski lerla, non Jéhovah pu sanktifye ek tu bann ki kont so suverennte, pu detrir. Akoz sa, nu priye avek tu nu leker: “Ki to rwayom vini,” ek ansam avek lapot Jean, nu dir: “Amenn! Vini Senyer Jésus.” (Révélation 22:20) Wi, nu pe atann ki Jésus vini pu sanktifye non Jéhovah ek pu zistifye So suverennte. Lerla, bann parol sa psaume-la pu realize: “Pu bann dimunn kone ki twa, ki apel Jéhovah, to tusel le Très-Haut lor later antye.”—Psaume 83:18.

“Ki To Volonte Akonpli”

11, 12. (a) Ki nu pe demande kan nu priye pu ki volonte Bondye akonpli “lor later, parey kuma dan lesyel”? (b) Ki sa vedir ankor?

¹¹ Answit Jésus ti anseyn so bann disip pu priye: “Ki to volonte akonpli lor later parey kuma dan lesyel.” (Matthieu 6:10) Etandone ki se grasa volonte Jéhovah ki liniver egziste, bann anz ena rezon pu dir: “To merite, Jéhovah, wi nu Bondye, pu gayn la glwar ek loner ek pwisans, parski to finn kre tu kitsoz ek parski se akoz to volonte ki zot egziste ek ki zot finn kre.” (Révélation 4:11) Jéhovah ena enn proze pu “bann kitsoz ki dan lesyel ek bann kitsoz ki lor later.” (Éphésiens 1:8-10) Kan nu priye pu ki volonte Jéhovah akonpli lor later, an realite nu pe demann Jéhovah realiz so proze. Ek, sa montre ki nu inpasyan pu truv volonte Bondye akonpli dan tu liniver.

¹² Kan nu fer sa lapriyer-la, nu montre usi ki nu anvi viv an akor avek volonte Jéhovah. Jésus ti dir: “Mo manze se fer volonte sa kikenn ki’nn avoy mwa-la ek fini so travay.” (Jean 4:34) Pwiski nu’nn angaz nu lavi pu servi Jéhovah, nu pran plezir pu fer so volonte, parey kuma Jésus. Nu lamur pu Jéhovah ek Jésus pu insit nu “pu fer volonte Bondye” olye “fer dimunn plezir.” (1 Pierre 4:1, 2; 2 Corinthiens 5:14, 15) Nu fer tu pu evit fer kitsoz ki nu kone kontrer ar volonte Jéhovah. (1 Thessaloniciens 4:3-5) Kan nu ‘reaste letan’ pu lir ek etidye la Bib, nu pu “kontiyn konpran seki vedir volonte Jéhovah.” Ek volonte Bondye, setadir seki Li anvi nu fer usi, se kontiyn pres ‘la bonn nuvel lor Rwayom Bondye’ avek zel.—Éphésiens 5:15-17; Matthieu 24:14.

Volonte Jéhovah dan Lesyel

13. Kuma volonte Bondye ti pe fer byin avan ki Satan rebele?

¹³ Okumansman, volonte Jéhovah ti pe fer dan lesyel, byin avan ki enn kreatir spirityel rebele ek vinn Satan. Liv Proverbes dekrir Garson premye-ne Bondye kuma la sazes personifye. Proverbes dekrir kuma pandan enn long peryod letan indefini, Garson Bondye ti “tuletan dan lazwa devan Li,” ek li ti kontan pu fer volonte so Papa. Apre sa, kuma enn “zuvriye kalifye,” li’nn ed Jéhovah pu kre tu kitsoz “ki dan lesyel ek ki lor later, bann kitsoz vizib ek invizib.” (Proverbes 8:22-31; Colossiens 1:15-17) Jéhovah ti servi Jésus kuma so “Parol,” setadir so Port-Parol.—Jean 1:1-3.

14. Ki nu aprann dan Psaume 103 lor fason ki bann anz akonpli volonte Jéhovah dan lesyel?

¹⁴ Enn psaume explike ki Jéhovah egzers enn reyn siprem lor tu so bann kreatir. Tu bann anz ekut so bann instriksyon ek komannman. Nu lir dan sa psaume-la: “Jéhovah Limem inn byin etabli so tronn dan lesyel ek so rwayote dominn lor tu kitsoz. Beni Jéhovah, zot, so bann anz pwisan ki fer seki Li dir, kan zot ekut so parol. Beni Jéhovah zot tu, so bann larme, zot, so bann serviter ki fer so volonte. Beni Jéhovah, zot tu ki Li’nn kre, partu kot li egzers so dominasyon [uswa, “suverennte,” not].”—Psaume 103:19-22.

15. Kan Jésus ti vinn le Rwa, ki lefe sa ti ena dan lesyel an rapor avek lakonplisman volonte Bondye?

¹⁵ Liv Job montre nu ki Satan ti tuzur gayn akse dan lesyel, mem apre so rebelyon. (Job 1:6-12; 2:1-7) Selman, dapre enn profesi dan liv Révélation, ti pu ariv enn moman kot Satan ek so bann demon ti pu expilse dan lesyel. Li paret ki sa ti arive zis apre ki Jésus Christ ti vinn le Rwa, an 1914. Depi sa, pena okenn plas pu sa bann rebel-la dan lesyel. Zot gayn drwa res zis dan vwazinaz later. (Révélation 12:7-12) Asterla dan lesyel, pa tann personn met an dut suverennte Jéhovah; pe tann selman lavwa bann ki pe sant luanz pu “l’Agneau,” Christ Jésus, ek ki pe glorifye Jéhovah avek sumisyon. (Révélation 4:9-11) Wi, volonte Jéhovah pe akonpli dan lesyel!

Volonte Jéhovah pu Later

16. Dan ki fason lapriyer Notre Père kontredir lanseynman la Kretyinte konsernan lesperans bann imin?

¹⁶ La Kretyinte, setadir bann swadizan Kretyin, anseyne ki Bondye pena okenn proze pu later, parski dapre zot, tu bann bon dimunn pu al dan lesyel. Me purtan, Jésus ti anseyn nu pu priye: “Ki to rwayom vini, ki to volonte akonpli lor later, parey kuma dan lesyel.” (Matthieu 6:10) Me, kisannla pu oze dir ki zordi volonte Jéhovah pe akonpli lor later, alor ki li ranpli ar vyolans, linzistis, maladi ek lamor? Nu bizin donk priye avek tu nu leker pu ki volonte Jéhovah akonpli lor later, an akor avek seki lapot Pierre ti ekrir: “Dapre so promes, nu pe atann nuvo lesyel [Rwayom Messianique ki dirize par Christ] ek enn nuvo later [enn sosyete imin drwat], kot pu ena la zistis.”—2 Pierre 3:13.

17. Ki lintansyon Bondye ena pu later?

¹⁷ Jéhovah kone kifer Li’nn kre later. Atraver so profet Isaïe, Li’nn dir: “Samem ki Jéhovah, Kreater lesyel finn dir, Limem ki vre Bondye, ki finn form later ek ki finn fer li, Li ki finn etabli later solidman, ki pa finn kre li pu nanyin, me ki finn form later pu ki dimunn res lor la: ‘Mwa mo Jéhovah, ek pena personn apar mwa.’ ” (Isaïe 45:18) Bondye ti met premye kup imin dan enn paradi, ek Li ti donn zot sa lord-la: “Gayn buku zanfan, ranpli later ek kiltiv li.” (Genèse 1:27, 28; 2:15) Li kler ki lintansyon Bondye se ki later abite par bann dimunn parfe ek drwat, ki sumet volonterman ar So suverennte, ek ki bann dimunn viv eternelman dan paradi, parey kuma Jésus ti promet.—Psaume 37:11, 29; Luc 23:43.

18, 19. (a) Ki bizin fer avan ki volonte Bondye akonpli konpletman lor later? (b) Ki bann lezot kitsoz ena dan lapriyer Notre Père, ki nu pu egzamine dan prosin lartik?

¹⁸ Volonte ki Jéhovah ena pu later zame pa pu kapav akonpli konpletman, tanki later abite par bann dimunn ki pale aksepte so suverennte. Jéhovah pu servi bann kreatir spirityel byin pwisan ki dirize par Jésus Christ, pu “detrir bann dimunn ki pe detrir later.” Lemond move ki dirize par Satan, avek so fos relizyon, so sistem politik ranpli ar koripsyon, so komers malonet ek ki gurman larzan, ek so bann pwisans militer, tusala pu disparet pu tuletan. (Révélation 11:18; 18:21; 19:1, 2, 11-18) Suverennte Jéhovah pu zistifye, ek so non pu sanktifye. Se pu tusala ki nu priye kan nu dir: “Nu Papa ki dan lesyel, ki to non sanktifye. Ki to rwayom vini. Ki to volonte akonpli lor later parey kuma dan lesyel.”—Matthieu 6:9, 10.

¹⁹ Selman, dan lapriyer Notre Père, Jésus ti montre nu ki nu kapav priye usi pu bann kitsoz personel. Dan prosin lartik, nu pu egzaminn seki li ti dir lor la.

[Note]

Revizyon

• Kifer li bon ki nu apel Jéhovah “nu Papa” kan nu priye Li?

• Kifer li byin inportan ki nu priye pu sanktifikasyon non Jéhovah?

• Kifer nu priye pu ki Rwayom Bondye vini?

• Ki sa inplike kan nu priye ki volonte Bondye akonpli lor later ek dan lesyel?

[Zimaz lor paz 19]

Fason ki Jésus ti priye ti byin diferan avek fason priye bann Pharisiens, ki ti priye pu paret pli sin ki lezot

[Zimaz lor paz 20]

Bann Kretyin priye pu ki Rwayom Bondye vini, pu ki so non sanktifye ek pu ki so volonte akonpli