Jéhovah Donn Nu Seki Nu Bizin Tulezur

“Aret trakase; parski . . . zot Papa kone zot bizin sa bann kitsoz-la.”—LUC 12:29, 30.

 1. Kuma Jéhovah nuri bann zanimo?

ESKI u’nn deza obzerv enn mwano uswa enn lot zwazo pe rod manze lor enn terin vag kot pena nanyin? Sirman u’nn demann umem ki li’nn kapav truve pu manze dan enn plas kumsa. Dan so Sermon lor Montayn, Jésus ti dir ki nu kapav tir enn leson lor fason ki Jéhovah nuri bann zwazo. Li ti dir: “Obzerv byin bann zwazo, parski zot pa plante ni rekolte, purtan zot Papa ki dan lesyel nuri zot. Eski zot, zot pa vo plis ki [sa bann zwazo-la]?” (Matthieu 6:26) Jéhovah nuri tu so bann kreatir dan bann fason extraordiner.—Psaume 104:14, 21; 147:9.

2, 3. Ki bann leson nu kapav tire lor plan spirityel kan nu priye pu gayn “nu dipin pu zordi”?

² Kifer alor, dan lapriyer Notre Père, Jésus ti dir nu demann Bondye: “Donn nu nu dipin pu zordi”? (Matthieu 6:11) Se enn demann byin sinp, purtan ena bann leson spirityel byin profon ki nu kapav tire ladan. An premye, sa rapel nu ki se Jéhovah Limem ki furni nu tu seki nu bizin. (Psaume 145:15, 16) Dimunn kapav plante, me se selman Bondye ki kapav fer kitsoz puse, tan dan domenn spirityel ki fizik. (1 Corinthiens 3:7) Seki nu manze ek bwar, se enn don ki Bondye fer nu. (Actes 14:17) Kan nu demann Li donn nu seki nu bizin tulezur, nu montre Jéhovah ki nu pa konsider sa bann kitsoz-la kumadir Li oblize donn nu. Me, se pa parski nu demann Jéhovah pu donn nu seki nu bizin, ki nu kapav pa travay, mem si nu kondisyon permet nu.—Éphésiens 4:28; 2 Thessaloniciens 3:10.

³ Dezyeman, kan nu demann “nu dipin pu zordi” sa montre ki fode pa nu trakas nu plis ki bizin pu lavenir. Jésus ti dir ankor: “Fode pa ki zot trakase ek zot dir: ‘Ki nu pu manze?’ uswa, ‘Ki nu pu bwar?’ uswa, ‘Ki nu pu mete?’ Parski sa bann kitsoz-la, se bann nasyon ki kontiyn rod sa sanses. Me zot Papa ki dan lesyel kone ki zot bizin tusala. Donk, avan tu kitsoz, kontiyn rod le rwayom ek so la zistis, ek tu sa bann lezot kitsoz-la, zot pu gayne usi. Alor, zame pa bizin trakase pu demin, parski demin pu ena so prop traka.” (Matthieu 6:31-34) Kan nu demann “nu dipin pu zordi,” sa montre ki nu bizin amenn enn lavi sinp ki demontre nu “latasman avek Bondye, ek ki nu kontant nu avek seki nu ena.”—1 Timothée 6:6-8, not.

Nuritir Spirityel pu Sak Zur

 4. Ki levennman dan lavi Jésus ek bann Israélites, montre linportans pu pran la nuritir spirityel?

⁴ Kan nu priye pu gayn “nu dipin” pu sak zur, sa pu rapel nu usi ki tulezur nu bizin la nuritir spirityel. Mem si Jésus ti gayn fin apre enn long karem, li pa ti tom dan tantasyon Satan, ki ti demann li pu sanz bann ros an dipin. Li ti dir Satan: “Finn ekrir, ‘Enn zom bizin viv, pa zis avek dipin, me avek tu parol ki sorti dan labus Jéhovah.’ ” (Matthieu 4:4) Isi, Jésus ti pe sit bann parol ki Moïse ti dir bann Israélites: “[Jéhovah] finn abes twa ek Li finn les twa gayn fin ek Li finn donn twa lamann pu manze, enn kitsoz ki ni twa, ni to bann anset pa finn kone. Pu to kone ki enn dimunn pa viv zis ar dipin, me li viv ar tu parol ki sorti dan labus Jéhovah.” (Deutéronome 8:3) Kan Jéhovah ti donn bann Israélites lamann, sa ti donn zot kitsoz pu ranpli zot lestoma, me an mem tan sa ti anseyn zot bann leson spirityel. Enn leson, se ki lamann ti rapel bann Israélites ki zot ti bizin obeir Jéhovah. Kuma? Ebyin, “sakenn ti bizin ramas so kantite pu sak zur.” Si zot ti ramas anplis, sa ti kumans santi loder ek fer lever. (Exode 16:4, 20) Me purtan, sa pa ti arive lor sizyem zur, kan zot ti bizin ramas dub porsyon pu servi zur Sabbat. (Exode 16:5, 23, 24) Donk, sa ti aprann zot obeir Jéhovah, ek ti montre zot usi ki zot lavi pa ti depann zis lor manze, me lor “tu parol ki sorti dan labus Jéhovah.”

 5. Kuma Jéhovah donn nu la nuritir spirityel tulezur?

⁵ Nu’si parey, tulezur nu bizin pran la nuritir spirityel ki Jéhovah donn nu par lintermedyer so Garson. Se pu sa ki Jésus inn met an plas enn “esklav fidel ek avize” pu donn bann dimunn ki ena lafwa, “manze dan ler ki bizin.” (Matthieu 24:45) Sa esklav fidel-la donn enn gran kantite nuritir spirityel. Li donn nu bann piblikasyon pu etidye la Bib, me usi, li ankuraz nu pu lir la Bib tulezur. (Josué 1:8; Psaumes 1:1-3) Parey kuma Jésus, nu’si nu kapav nuri nu spirityelman, si nu fer zefor pu aprann ek pu fer volonte Jéhovah.—Jean 4:34.

Pardonn Nu Pese

 6. Ki det nu demann Jéhovah kennsel, ek ki nu bizin fer si nu’le ki Jéhovah kennsel nu det?

⁶ Prosin kitsoz ki nu demande dan lapriyer Notre Père se: “Kennsel nu bann det, parey kuma nu kennsel det bann ki dwa nu.” (Matthieu 6:12) Isi, Jésus pa ti pe koz lor det larzan, me li ti pe koz lor pardon nu bann pese. An rapor avek sa mem demann-la, dan lapriyer Notre Père ki raporte par Luc, nu lir: “Pardonn nu, nu pese, parski nu’si nu pardonn pese bann ki dwa nu.” (Luc 11:4) Donk, kan nu fer pese, se kumadir nu ena enn det anver Jéhovah. Me Bondye dispoze pu ‘efas’ uswa kennsel sa det-la, si nu repanti sinserman ek si nu “returne.” Nu bizin usi demann Li pardon ki nu kapav gayne grasa nu lafwa dan sakrifis Jésus Christ.—Actes 3:19; 10:43; 1 Timothée 2:5, 6.

 7. Kifer tulezur nu bizin priye pu demann pardon nu pese?

⁷ Fer pese, se “manquer le but,” setadir nu mank nu lobzektif pu obeir bann prinsip drwat Jéhovah. Akoz nu finn erit linperfeksyon, nu tu, nu fer pese an parol, an aksyon ek an panse, uswa usi, nu pa fer seki nu bizin fer. (Ecclésiaste 7:20; Romains 3:23; Jacques 3:2; 4:17) Donk, ki nu konsyan u non nu’nn fer pese pandan la zurne, tulezur dan nu lapriyer, nu bizin demann Jéhovah pardon pu nu bann pese.—Psaumes 19:12; 40:12.

 8. Apre ki nu finn priye pu demann pardon, ki nu bizin fer? Ki byinfe nu gayne an retur?

⁸ Apre ki nu finn demann pardon nu pese, nu bizin egzaminn numem onetman, nu bizin repanti ek konfes nu pese. Nu kapav fer sa grasa lafwa ki nu ena dan sakrifis Jésus, ki liber nu de nu pese. (1 Jean 1:7-9) Pu montre ki nu lapriyer sinser, nu bizin fer bann “aksyon ki montre ki nu’nn repanti.” (Actes 26:20) Lerla, nu kapav sir ki Jéhovah pu dispoze pu pardonn nu. (Psaume 86:5; 103:8-14) An retur, sa fer nu resanti enn kalm andan numem parski nu ena “lape Bondye, ki pli elve ki tu panse [ek ki] vey lor [nu] leker ek lor [nu] kapasite mantal par mwayin Christ Jésus.” (Philippiens 4:7) Me, lapriyer Notre Père anseyn nu ankor lezot kitsoz ki nu bizin fer pu gayn pardon nu pese.

Pu Nu Pese Pardone, Nu Bizin Pardonn Lezot

 9, 10. (a) Ki komanter Jésus ti azute dan lapriyer Notre Père, ek ki sa montre? (b) Ki legzanp Jésus ti done ankor pu montre nu linportans pardone?

⁹ Li interesan pu note ki sel plas dan lapriyer Notre Père kot Jésus inn azut enn komanter, se kan li ti dir: “Kennsel nu bann det, parey kuma nu kennsel det bann ki dwa nu.” Ala fin sa lapriyer-la, li ti azute: “Parski, si zot pardonn pese bann dimunn, zot Papa ki dan lesyel usi pu pardonn zot. Parkont, si zot pa pardone, zot Papa usi pa pu pardonn zot.” (Matthieu 6:14, 15) Donk, Jésus inn byin fer nu konpran ki pu Jéhovah pardonn nu, nu’si nu bizin pre pu pardonn lezot.—Marc 11:25.

¹⁰ Enn lot fwa, Jésus ti donn enn legzanp pu montre nu linportans pu pardone, si nu anvi ki Jéhovah pardonn nu. Li ti rakont zistwar enn le rwa ki ti kennsel enn gro det ki so esklav ti dwa li. Me, plitar, sa le rwa-la ti pini severman sa mem esklav-la. Kifer? Parski sa esklav-la pa ti’le kennsel enn ti det nanyin ditu, ki enn lot esklav ti dwa li. Gete ki Jésus ti dir pu terminn sa legzanp-la: “Kumsa-mem mo Papa pu tret zot, si zot pa pardonn [zot] frer avek tu zot leker.” (Matthieu 18:23-35) Leson-la kler: Pese ki nu fer devan Jéhovah li buku pli gran ki seki lezot arive fer kont nu. Purtan, Jéhovah pardonn nu tulezur. Donk nu’si, nu kapav pardonn nu bann frer ki detanzantan selman, ofans nu.

11. Si nu atann ki Jéhovah pardonn nu, ki konsey lapot Paul nu pu swiv, ek ki byinfe nu pu gayne?

¹¹ Lapot Paul ti ekrir: “Montre zot bon, sakenn anver so prosin, ena konpasyon ek pardonn volonterman sakenn so prosin, parey kuma Bondye finn pardonn zot volonterman par Jésus.” (Éphésiens 4:32) Kan bann Kretyin pardonn zot ant zot, sa favoriz lape. Paul ti donn sa lot konsey-la: “Kuma bann dimunn ki Bondye inn swazire, bann ki sin ek ki Li kontan, kuver zot avek bann kalite kuma konpasyon, bonte, limilite, duser ek pasyans. Kontiyne siport sakenn so kamarad, ek si kikenn ena enn kitsoz kont enn lot, li bizin pardone volonterman. Parey kuma Jéhovah inn pardonn zot volonterman, fer parey zot usi. Me, anplis tusala, kuver zot avek lamur parski se lamur ki pu gard zot byin ini.” (Colossiens 3:12-14) Wi, se sa ki Jésus inn anvi anseyn nu, kan li ti dir: “Kennsel nu bann det, parey kuma nu kennsel det bann seki dwa nu.”

Proteksyon kan Nu Tante

12, 13. (a) Kan nu demann Jéhovah “pa met nu devan tantasyon,” ki sa pu ule dir? (b) Kisannla le gran Tentateur ek kan nu dir Jéhovah pa met nu devan tantasyon, ki sa vedir?

¹² Avan-dernye kitsoz ki nu demande dan lapriyer Notre Père se: “Pa met nu devan tantasyon.” (Matthieu 6:13) Eski dapre Jésus, nu bizin demann Jéhovah pa tant nu? Non, pa posib, parski disip Jacques ti ekrir: “Fode ki personn kan li dan leprev, pa dir: ‘Se Bondye ki pe met mwa a leprev.’ Parski Bondye pa kapav tante par bann move kitsoz, ek Limem, Li pa tant personn kumsa.” (Jacques 1:13) Anplis, enn psalmist ti ekrir: “Si to ti pran kont nu bann erer, O Jah, O Jéhovah, kisannla ti pu kapav tini devan twa?” (Psaume 130:3) Jéhovah pa vey sak ti erer ki nu fer, ek zame Li pu tant nu pu fer le mal. Ki Jésus ti pe rod dir alor?

¹³ Si ena enn kikenn ki pe rod tant nu pu fer le mal, pu fer nu tonbe par so bann manigans, ek pu devor nu, se selman Satan le Diable. (Éphésiens 6:11, not) Limem le gran Tentateur. (1 Thessaloniciens 3:5) Kan nu priye Jéhovah pu pa met nu devan tantasyon, avredir, nu pe dir Li ed nu pu nu pa tonbe kan nu tante. Nu demann Li led pu ki nu ‘pa les nu tronpe par Satan,’ ek pu ki nu pa tom dan tantasyon. (2 Corinthiens 2:11) Nu priye pu ki nu kapav res “dan landrwa sekre le Très-Haut,” kot nu gayn proteksyon spirityel ki Jéhovah donn bann ki rekonet so suverennte dan tu seki zot fer.—Psaume 91:1-3.

14. Kuma lapot Paul donn nu lasirans ki Jéhovah pa pu abandonn nu si nu priye Li kan nu gayn tantasyon?

¹⁴ Si se sa nu dezir sinser, ki nu exprime dan nu lapriyer ek par nu bann aksyon, nu kapav sir ki Jéhovah pa pu abandonn nu. Lapot Paul donn nu sa lasirans-la: “Pena okenn tantasyon ki zot inn gayne ki lezot dimunn pa’nn gayne. Me Bondye Li fidel, ek li pa pu les zot gayn enn tantasyon ki zot pa pu kapav siporte, me avek sa tantasyon-la, Li pu usi donn zot enn mwayin pu sorti ladan, pu ki zot kapav siport li.”—1 Corinthiens 10:13.

“Delivre Nu du Méchant”

15. Kifer li pli inportan zordi ki nu priye pu ki Jéhovah delivre nu du méchant?

¹⁵ Dapre bann maniskri Lekritir Grecque pli sir ki ena, lapriyer Notre Père fini par sa bann parol-la: “Delivre nu du méchant.”a (Matthieu 6:13) Dan sa lepok la fin-la, li byin neseser ki Jéhovah protez nu kont Satan. Li ek so bann demon pe lager avek bann Kretyin oints ki ‘pe obzerv komannman Bondye ek pe rann temwaynaz lor Jésus,’ ek usi avek zot bann konpaynon, bann manb “la grand ful.” (Révélation 7:9; 12:9, 17) Lapot Pierre ti donn sa konsey-la bann Kretyin: “Gard zot bon zizman ek veye. Zot lennmi le Diable pe sirkile kuma enn lyon ki pe kriye, ek li pe rod kikenn pu li devore. Me reziste kont li, solid dan lafwa.” (1 Pierre 5:8, 9) Satan ti pu kontan fer aret nu laktivite predikasyon, ek li servi so bann azan lor later—dan sistem relizye, komersyal ek politik—pu rod fer nu kapitile. Me, si nu tini ferm, Jéhovah pu delivre nu. Disip Jacques ti ekrir: “Alor, sumet zot ar Bondye, me reziste kont le Diable, li pu sove ek li pu al lwin ar zot.”—Jacques 4:7.

16. Ki mwayin Jéhovah ena pu ed so bann serviter ki dan problem?

¹⁶ Jéhovah ti permet so Garson gayn bann tantasyon. Jésus ti reziste kont Satan, li ti servi Parol Bondye kuma enn proteksyon. Me, apre so tantasyon, Jéhovah ti avoy bann anz pu fortifye Jésus. (Matthieu 4:1-11) Pareyman, si nu priye Jéhovah avek lafwa ek nu rod so proteksyon, Li pu servi so bann anz pu ed nu. (Psaume 34:7; 91:9-11) Lapot Pierre ti ekrir: “Jéhovah kone kuma pu delivre bann dimunn ki atase ar Li, kan zot dan leprev, me Li rezerv bann dimunn inzis pu zur zizman, pu detrir zot.”—2 Pierre 2:9.

Enn Delivrans Konplet Pe Aprose

17. Kan Jésus ti montre lapriyer Notre Père, kuma li ti plas bann kitsoz dan lord ki bizin?

¹⁷ Dan lapriyer Notre Père, Jésus plas bann kitsoz dan lord ki bizin. Nu priorite se sanktifikasyon gran non Jéhovah. Etandone ki se Rwayom Messianique ki pu fer sa, nu priye pu ki Rwayom Bondye vini pu detrir tu bann rwayom, uswa guvernman imin inparfe. Rwayom Bondye pu veye ki volonte Bondye akonpli partu lor later parey kuma dan lesyel. Pu nu kapav viv eternelman dan paradi lor later depann, non Jéhovah pu bizin sanktifye ek liniver pu bizin aksepte so suverennte. Apre ki nu finn priye pu sa bann kitsoz inportan-la, nu kapav priye pu seki nu bizin tulezur, pu pardon nu pese, ek pu nu pa tom dan tantasyon ek dan pyez Satan le Diable.

18, 19. Kuma lapriyer Notre Père ed nu pu res lor nu gard ek pu gard nu lesperans “ferm ziska la fin”?

¹⁸ Byinto nu pu delivre konpletman du méchant ek so lemond puri. Satan byin kone ki li ena zis “enn tigit letan” pu tir “so gran koler” lor later, sirtu lor bann fidel serviter Jéhovah. (Révélation 12:12, 17) Dan siyn ki Jésus ti done lor ‘lepok la fin,’ li ti predir bann levennman extraordiner, ek ena sertin ki pankor akonpli. (Matthieu 24:3, 29-31) Amezir ki nu truv zot akonpli, sa ranforsi nu lespwar ki byinto nu pu delivre. Jésus ti dir: “Kan sa bann kitsoz-la kumans arive, redres zot ek lev zot latet, parski zot delivrans pe aprose.”—Luc 21:25-28.

¹⁹ Lapriyer Notre Père ki Jésus ti anseyn so bann disip, byin presi ek li enn bon gid ki fer nu kone ki nu bizin dir dan nu lapriyer amezir ki la fin pe aprose. Anu gard konfyans ki, ziska la fin, Jéhovah pu kontiyn donn nu seki nu bizin tulezur, lor plan spirityel ek materyel. Si, avek led lapriyer, nu res lor nu gard, sa pu ed nu “tini ferm ziska la fin, sa konfyans ki nu ti ena okumansman-la.”—Hébreux 3:14; 1 Pierre 4:7.

[Footnotes]

Revizyon

• Ki sa inplike kan nu priye pu nu “dipin pu zordi”?

• Explike ki sa vedir “kennsel nu bann det, parey kuma nu finn kennsel det bann ki dwa nu”?

• Kan nu demann Jéhovah pa met nu devan tantasyon, ki sa vedir?

• Kifer nu bizin priye Jéhovah pu “delivre nu du méchant”?

[Zimaz lor paz 25]

Nu bizin pardonn lezot pu ki Bondye pardonn nu

[Orizinn Zimaz lor paz 23]

Lydekker