Oppose-zot kont Satan, ek li pou sauvé!

“Soumette-zot ar Bondié, mais oppose-zot kont Satan, ek li pou sauvé, li pou al loin ar zot.”—JACQUES 4:7.

1, 2. (a) Ki vilain qualité ki Satan ena, nou trouvé dan Isaïe chapitre 14? (b) Ki question nou pou examiné?

SATAN le Diable, li-mem pli grand l’exemple enn kikenn ki ena l’orgueil. Prophete Isaïe ti koz lor sa l’orgueil-la. Plus ki enn siecle avant ki Babylone ti vinn enn puissance mondial, Isaïe ti koz lor enn declaration symbolik ki peuple Bondié ti faire kont “le roi Babylone.” Zot ti dire: “To finn dire dan to leker: ‘Mo pou monte dan le ciel. Mo pou mette mo trone pli haute ki bann zetoile Bondié [bann lé-roi ki descendant David] . . . Mo pou faire moi vinn pareil couma le Très-Haut.’ ” (Isaïe 14:3, 4, 12-15; Nombres 24:17) L’orgueil “le roi Babylone” ti pareil couma l’attitude ki Satan, “bondié sa system-la,” ti manifesté. (2 Corinthiens 4:4) Mais Satan pou detruire a cause so l’orgueil, pareil couma puissance Babylone ti disparette dan la honte.

² Mais tant ki Satan existé, nou kapav pose sa bann question-la: Eski nou bizin peur Satan? Kifer li pousse bann dimoune pou persecute bann chrétien? Ki nou bizin faire pou ki li pa domine nou?

Eski nou bizin peur Satan?

3, 4. Kifer bann chrétien oint ek zot bann compagnon pa peur Satan?

³ Bann parole Jésus Christ ti bien encourageant pou bann chrétien oint. Li ti dire: “Pa bizin peur bann kitsoz ki pou faire toi souffert. Guetté! Le Diable pou contigne jette certain parmi zot dan prison, pou testé zot completement ek pou faire zot gagne bann grand problem pendant dix jour. Reste fidel ziska la mort ek mo pou donne toi couronne la vie.” (Révélation 2:10) Bann chrétien oint ek zot bann compagnon ki ena l’esperance pou vive lor la terre, pa peur Satan. C’est pa parski zot ena enn grand courage par zot-mem ki zot pa peur, mais parski zot ena la crainte ek enn grand respé pou Jéhovah, ek zot ‘rod protection en-bas so lezel.’—Psaume 34:9; 36:7.

⁴ Bann disciple Jésus Christ dan premier siecle pa ti peur, ek malgré bann souffrance ki zot ti enduré, zot ti reste fidel ziska la mort. Zot pa ti peur bann kitsoz ki Satan le Diable ti pou kapav faire, parski zot ti koné ki Jéhovah jamais ti pou abandonne bann dimoune ki reste fidel envers Li. Li pareil zordi, kan bann chrétien oint ek zot bann compagnon faire face ar bann grand persecution, zot bien determiné pou reste fidel envers Bondié. Seulement, l’apotre Paul ti dire ki Satan kapav faire bann dimoune mort. Eski sa pa bizin faire nou peur?

 5. Ki nou aprann dan Hébreux 2:14, 15?

⁵ Paul ti expliké ki Jésus ti vinn enn dimoune ki’nn ‘faire ar la chair ek di-sang,’ pou ki “grace a so la-mort, li kapav detruire sa kikenn ki ena pouvoir pou faire dimoune mort-la, setadir le Diable; ek li kapav libere tou bann dimoune ki ti esclave pendant tou zot la-vie, parski zot ti peur la mort.” (Hébreux 2:14, 15) Satan, “sa kikenn ki ena pouvoir pou faire dimoune mort-la,” ti pousse Judas Iscariote pou faire so volonté, ek apré, li ti servi bann chef juif ek bann Romain pou touye Jésus. (Luc 22:3; Jean 13:26, 27) Mais Jésus, par sacrifice ki li’nn faire kan li’nn mort, sape bann dimoune imparfait dan la main Satan, ek donne nou possibilité pou gagne la vie eternel.—Jean 3:16.

6, 7. Ziska ki point Satan ena pouvoir pou touye bann dimoune?

⁶ Ziska ki point Satan ena pouvoir pou touye bann dimoune? Depuis ki li ti commence faire bann mauvais kitsoz, so bann mensonge ek so l’influence inn faire bann dimoune mort. Sa arrivé parski Adam ti faire peché, ek lerla li ti transmette peché ek la mort ar tou so bann descendant. (Romains 5:12) En plus, bann serviteur Satan ki lor la terre, finn persecute bann adorateur Jéhovah, parfois ziska la mort, pareil couma zot ti faire ar Jésus Christ.

⁷ Mais seulement, fodé pa nou pensé ki Satan kapav touye n’importe ki dimoune ki li envie. Bondié protege so bann serviteur, ek jamais Li pou laisse Satan elimine tou so bann vrai adorateur lor la terre. (Romains 14:8) Li vrai ki Jéhovah permette ki tou so bann serviteur gagne persecution, ek parfois li arrivé ki certain mort kan Satan attak zot. Mais, la Bible donne nou enn l’esperance extraordinaire: Bondié pou ressuscite bann dimoune ki dan so “livre souvenir” ek Satan pa pou kapav faire nanyin pou empeche zot regagne la vie!—Malaki 3:16; Jean 5:28, 29; Actes 24:15.

Kifer Satan persecute nou?

 8. Kifer Satan pé persecute bann serviteur Bondié?

⁸ Si nou pé servi Bondié avek fidelité, ena enn grand raison kifer Satan pé persecute nou. Seki li pé rod faire c’est pousse nou pou agir kont nou la-foi. Nou ena bann bon relation avek nou Papa Jéhovah, ek Satan envie detruire sa. Fodé pa ki sa etonne nou. En Éden, Jéhovah ti annoncé ki ti pou ena enn la-haine entre so “femme” symbolik ek sa ‘serpent-la,’ ek entre zot “descendance.” (Genèse 3:14, 15) La Bible faire nou koné ki Satan le Diable, c’est li-mem sa ‘serpent originel-la,’ ki li ena zis enn tigit lé-temps-mem, ek ki li bien en colere. (Révélation 12:9, 12) Bann ki servi Jéhovah avek fidelité kapav attann pou gagne persecution, parski encore ena la haine entre “descendance” la “femme” symbolik ek “descendance” Satan. (2 Timothée 3:12) Eski ou konn vrai raison kifer Satan pé persecute bann serviteur Bondié?

9, 10. Ki kitsoz Satan finn mette en doute, ek couma conduite bann dimoune ena enn rapport avek sa?

⁹ Satan ti mette en doute droit ki Bondié ena pou dirige l’univers. En rapport avek sa sujet-la, li ti mette aussi en doute fidelité bann dimoune envers zot Createur. Satan ti persecute Job, ki ti enn dimoune juste. Kifer? Li ti envie detruire fidelité ki Job ti ena envers Jéhovah. Pou li kapav faire sa, li ti servi femme Job, ek trois dimoune ki ti bann “mauvais consolateur.” Livre Job montré nou ki Satan finn defié Bondié. Li ti pretann ki okenn dimoune pa pou reste fidel si li gagne permission pou testé sa dimoune-la. Mais Job ti tini ferme ek li ti reste fidel, ek sa finn prouvé ki Satan enn menteur. (Job 1:8–2:9; 16:2; 27:5; 31:6) Satan persecute bann Témoins de Jéhovah zordi, parski li envie detruire zot fidelité ek prouvé ki li ena raison.

¹⁰ En realité, kan nou koné ki Satan pé persecute nou parski avant tou li envie ki nou vinn infidel envers Jéhovah, sa donne nou courage ek faire nou vinn pli fort. (Deutéronome 31:6) Nou Bondié, Li pli grand le Roi dan l’univers, ek Li pou aide nou pou reste fidel. Anou toujours rod faire leker Jéhovah content, ek reste fidel envers Li, pou ki Li kapav reponn Satan, ki touletan pé provok Li.—Proverbes 27:11.

“Delivré nou ar sa kikenn ki mauvais-la”

11. Kan nou prié Bondié pou “pa mette nou devant tentation,” ki nou pé demann Li?

¹¹ Li pa facile pou reste fidel. Pou nou kapav faire sa, nou bizin prié Jéhovah avek sincerité. La priere ‘Notre Père’ ki Jésus ti montré nou, aide nou bien dan sa domaine-la. Dan sa la-priere-la, Jésus ti dire: “Pa mette nou devant tentation, mais delivré nou ar sa kikenn ki mauvais-la.” (Matthieu 6:13) Jéhovah pa tente nou pou faire peché. (Jacques 1:13) C’est vrai ki parfois la Bible dire nou ki Li faire kitsoz, mais en realité, Li zis permette ki sa bann kitsoz-la arrivé. (Ruth 1:20, 21) Kan nou prié pou ki Jéhovah pa mette nou devant tentation, nou pé demann Li pou pa laisse nou tombe dan tentation. Ek Li pou ecoute nou la-priere, parski la Bible donne nou sa l’assurance-la: “Bondié, Li fidel, ek Li pa pou laisse zot gagne enn tentation ki zot pa pou kapav supporté, mais avek sa tentation-la, Li pou aussi donne zot enn moyen pou sorti ladan, pou ki zot kapav supporte sa.”—1 Corinthiens 10:13.

12. Kifer nou prié Bondié pou “delivré nou ar sa kikenn ki mauvais-la”?

¹² Dan la priere model, kan Jésus ti fini koz lor tentation, li ti dire: “Delivré nou ar sa kikenn ki mauvais-la.” Certain traduction la Bible dire: “Delivré nou ar le mal.” (Bible annotée ; La Bible, par P. de Beaumont) “Protege nou kont le mal.” (Contemporary English Version) Seulement, la Bible servi mot ‘delivré,’ surtout en rapport avek bann dimoune, ek l’Evangile Matthieu montré nou ki Satan le Diable, li enn “Tentateur,” setadir enn kikenn ki réel. (Matthieu 4:3, 11) Alors, li important ki nou prié pou ki Bondié delivré nou ar “sa kikenn ki mauvais-la” setadir ar Satan le Diable. Li essaye mette nou dan enn situation kot nou pou faire peché. (1 Thessaloniciens 3:5) Kan nou demann Bondié “delivré nou ar sa kikenn ki mauvais-la,” nou pé demann Li pou guide nou ek aide nou pou ki Satan pa domine nou.

Pa laisse Satan domine zot

13, 14. Kifer bann Corinthien ti bizin change maniere ki zot ti pé traite enn dimoune dan congregation ki ti’nn commette l’immoralité?

¹³ Kan Paul ti encourage bann chrétien dan Corinthe pou pardonne lezot, li ti ecrire: “Pou n’importe ki kitsoz zot pou pardonne enn kikenn, moi aussi mo pou pardonne li. Oui, pou moi, seki mo’nn pardonné, si ena kitsoz ki mo’nn pardonné, c’est pou zot profit devant Jésus Christ; pou ki nou pa laisse Satan domine nou, parski nou konn bien so bann l’intention.” (2 Corinthiens 2:10, 11) Satan kapav domine nou dan plusieurs fason, mais kifer Paul ti dire sa bann parole-la?

¹⁴ Paul ti corrige bann Corinthien parski dan la congregation, zot ti pé tolere enn kikenn ki ti pé commette l’immoralité. Sa ti surement faire Satan plaisir, parski sa ti gate l’honneur la congregation, ‘alors ki mem parmi bann nation, pa ti ena enn fornication coumsa.’ Finalement, dimoune-la ti exclu. (1 Corinthiens 5:1-5, 11-13) Plitar, li ti repenti. Si bann Corinthien ti refuse pou pardonne li ek reintegré li dan la congregation, Satan ti pou kapav domine zot dan enn lot fason. Couma? Zot ti pou montré-zot dur ek sans pitié pareil couma Satan li-mem. Si sa missié ki ti repenti-la ti “tellement triste ki li ti perdi courage,” ek li ti arrete servi Bondié, lerla, sa bann chrétien-la ek surtout bann ancien ti pou ena enn part responsabilité devant Jéhovah, enn Bondié ki ena misericorde. (2 Corinthiens 2:7; Jacques 2:13; 3:1) Bien-sur, okenn vrai chrétien pa ti pou content imite Satan ek montré li cruel, dur ek sans pitié.

Equipement ki Bondié donné pou protege nou

15. Ki la guerre nou pé faire, ek ki nou bizin faire pou gagne la victoire?

¹⁵ Si nou envie ki Bondié delivré nou ar Satan, nou bizin faire enn la-guerre spirituel kont bann mauvais l’esprit. Pou nou kapav gagne la victoire kont sa bann l’ennemi ki bien fort-la, nou bizin mette ‘l’equipement complet ki Bondié donne nou.’ (Éphésiens 6:11- 18) Dan sa l’equipement-la ena “cuirasse la justice.” (Éphésiens 6:14) En Israël, le roi Saül ti desobeir Bondié, ek li ti perdi l’esprit saint. (1 Samuel 15:22, 23) Mais nou, si nou pratik la justice ek mette nou l’equipement spirituel complet, nou pou gagne l’esprit saint Bondié ek Li pou protege nou kont Satan ek kont so bann mauvais ange, setadir bann demon.—Proverbes 18:10.

16. Couma nou kapav contigne protege-nou kont bann mauvais l’esprit?

¹⁶ Pou ki Bondié contigne protege nou kont bann mauvais l’esprit, parmi bann kitsoz ki nou bizin faire, c’est lire ek etudié so Parole regulierement, ek servi bien bann publication ki ‘l’esclave fidel et avisé’ donne nou. (Luc 12:42) Lerla, nou pou rempli nou l’esprit ar bann pensée spirituel ki pou faire nou di-bien. C’est seki Paul ti conseil nou kan li ti dire: “Frere, tou kitsoz ki vrai, ki serieux, ki droite, ki pur, ki merité ki nou content zot, ki dimoune koz en bien, si ena kitsoz ki bon lor plan moral ek ki merite louange, contigne prend compte sa bann kitsoz-la.”—Philippiens 4:8.

17. Ki pou aide nou pou vinn bann bon proclamateur la bonne nouvelle?

¹⁷ Grace a Jéhovah, nou ‘mette dan nou li-pied l’equipement la bonne nouvelle lor la paix.’ (Éphésiens 6:15) Kan nou assisté reunion regulierement, sa forme nou pou preche la bonne nouvelle lor Royaume Bondié. Nou ressenti vrai-mem enn grand la-joie kan nou aide nou prochain pou aprann la verité, ek pou gagne la liberté spirituel! (Jean 8:32) “L’epée l’esprit, setadir parole Bondié,” li bien necessaire pou protege nou kont bann fausse l’enseignement ek pou “renverse bann kitsoz ki’nn bien enraciné.” (Éphésiens 6:17; 2 Corinthiens 10:4, 5) Si nou servi bien Parole Bondié, la Bible, sa pou aide nou pou enseigne la verité ek sa pou protege nou pou ki nou pa tombe dan bann manigance Satan.

18. Couma nou kapav “tini ferme kont bann manigance Satan le Diable”?

¹⁸ Paul ti commence decrire nou l’equipement spirituel, par sa bann parole-la: “Contigne gagne la puissance par nou Seigneur ek dan puissance so la-force. Mette lor zot l’equipement complet ki Bondié donné, pou ki zot kapav tini ferme kont bann manigance Satan le Diable.” (Éphésiens 6: 10, 11) Mot grec ki traduire par “tini ferme” ena enn rapport avek enn soldat ki tini ferme dan so position. Nou pou tini ferme dan la guerre spirituel, mem si Satan servi tou sorte qualité manigance pou detruire nou l’unité, pou gate nou bann l’enseignement, ek pou essaye faire nou vinn infidel. Mais ziska l’heure, Satan pa finn reussi gagne enn victoire complet—ek jamais li pa pou reussi!a

Oppose-zot kont Satan, ek li pou sauvé

19. Couma nou kapav montré-nou ferme kan nou oppose-nou kont Satan?

¹⁹ Nou kapav gagne la victoire dan la guerre spirituel kont Satan ek kont bann mauvais l’esprit ki li dirigé. Nou pena okenn raison pou tremblé ar la peur devant Satan, parski disciple Jacques ti ecrire: “Soumette-zot ar Bondié, mais oppose-zot kont Satan, ek li pou sauvé, li pou al loin ar zot.” (Jacques 4:7) Enn fason ki nou kapav montré ki nou ferme kan nou oppose Satan ek so bann mauvais l’esprit, c’est kan nou rejette net bann kitsoz ki ena enn rapport avek la sorcellerie, ou avek la magie. Fodé pa aussi ki nou ena contact avek bann dimoune ki pratik sa. La Bible bien clair kan li dire ki bann serviteur Jéhovah bizin refuse pou rod bann signe ki soit-disant pou faire zot konn l’avenir. Fodé pa aussi ki zot guette horoscope, ek servi lezot moyen pou konn l’avenir, ek faire la sorcellerie. Si nou bien actif ek fort lor plan spirituel, nou pa pou peur ki dimoune faire nou mechanceté ek jette enn sort lor nou.—Nombres 23:23; Deutéronome 18:10-12; Isaïe 47:12-15; Actes 19:18-20.

20. Couma eski nou kapav oppose-nou kont Satan le Diable?

²⁰ Nou ‘oppose-nou kont Satan’ kan nou obeir bann principe ek bann verité ki trouve dan la Bible, ek kan nou tini ferme kont li. Le monde reflete l’attitude Satan, parski c’est Satan ki so bondié. (2 Corinthiens 4:4) Alors, nou rejette bann mauvais kitsoz ki ena dan le monde, couma l’orgueil, l’egoïsme, l’immoralité, la violence ek materialisme. Nou koné ki, kan Satan ti tente Jésus dan desert, Jésus ti resisté kont so l’attak ek li ti cite bann passage l’Ecriture, ek sa ti faire Satan sauvé. (Matthieu 4:4, 7, 10, 11) Li pareil aussi pou nou, Satan pou ‘sauvé ek pou al loin ar nou,’ ek nou pou gagne la victoire lor li, si nou soumette-nou net ar Jéhovah ek compte lor Li dan la priere. (Éphésiens 6:18) Avek l’aide Jéhovah ek so Garson, personne pa pou kapav faire nou di-tort dan enn fason permanent—non, mem pa Satan le Diable!—Psaume 91:9-11.

[Note]

Ki ou pou reponn?

• Eski nou bizin peur Satan le Diable?

• Kifer Satan faire bann chrétien gagne persecution?

• Kifer nou prié pou ki nou delivré ar “sa kikenn ki mauvais-la”?

• Couma nou kapav gagne la victoire dan la guerre spirituel?

[Zimage, page 8]

Bann chrétien premier siecle pa ti peur: zot ti reste fidel ziska la mort

[Zimage, page 9]

Satan pa kapav empeche Jéhovah ressuscite bann dimoune ki dan So memoire

[Zimage, page 10]

Eski ou prié pou ki ou delivré ar “sa kikenn ki mauvais-la”?

[Zimage, page 11]

Eski ou pé mette ‘l’equipement complet ki Bondié donne nou’?