Pa donne Satan l’occasion pou domine ou

“Pa donne Satan l’occasion.”—ÉPHÉSIENS 4:27.

 1. Kifer beaucoup dimoune finn demandé si Satan existé vrai-mem?

PENDANT plusieurs siecle beaucoup dimoune ti croire ki Satan le Diable, li enn creature ki ena bann corne, bann la-patte ki ena fente pareil couma certain zanimo, li habillé en rouge, ek li servi enn longue fourche pou envoye bann mauvais dimoune dan enn l’enfer difé. La Bible pa enseigne sa. Seulement, surement sa fausse croyance-la finn faire beaucoup dimoune demann zot-mem si Satan vrai-mem existé, ou-soit si li zis represente le mal ki existé dan bann dimoune.

 2. Cite certain kitsoz ki la Bible dire lor Satan.

² La Bible montré nou clairement ki Satan existé, ek ena dimoune ki finn trouve li. Jésus Christ ti trouve li dan le ciel, ek li ti koz ar li lor la terre. (Job 1:6; Matthieu 4:4-11) Mem si la Bible pa dire so vrai nom, li appel li Diable (setadir “Calomniateur,” enn kikenn ki koz menti pou gate reputation enn lot dimoune), parski li ti calomnié Bondié. La Bible appel li aussi Satan (setadir “Opposant”), parski li oppose-li ar Jéhovah. Enn lot nom ki la Bible donne li c’est “serpent originel,” surement parski li ti servi enn serpent pou embete Ève. (Révélation 12:9; 1 Timothée 2:14) Ek finalement, la Bible appel li “sa kikenn ki mauvais-la.”—Matthieu 6:13.a

 3. Ki question nou pou examiné?

³ Nou ki servi Jéhovah, dan okenn fason nou pa envie ressemblé Satan, pli grand l’ennemi sel vrai Bondié. Alors, nou bizin suive sa conseil Paul-la: “Pa donne Satan l’occasion.” (Éphésiens 4:27) Ki bann vilain qualité ki Satan ena, ki fodé pa nou imité?

Pa imite sa grand calomniateur-la

 4. Couma “sa kikenn ki mauvais-la” finn koz menti lor Bondié?

⁴ “Sa kikenn ki mauvais-la” merité ki appel li Diable, parski li enn calomniateur. Enn calomniateur dire kitsoz ki fausse, ki mauvais ek ki gate reputation enn lot dimoune. Bondié ti donne Adam sa l’ordre-la: “Mais, concernant pié connaissance bon ek mauvais, fodé pa ki to mange so fruit, parski jour ki to mange sa, vrai-mem to pou mort.” (Genèse 2:17) Ève ti konn sa l’ordre-la, mais Satan le Diable ti servi enn serpent pou dire li: “Non, zot pa pou mort zot. Bondié koné ki, jour ki zot mange sa fruit-la, zot lizié pou ouvert, ek vrai-mem zot pou vinn couma Bondié, zot pou konn seki bon ek seki pa bon.” (Genèse 3:4, 5) Là, Satan ti koz enn gros menti lor Jéhovah pou essaye gate So reputation!

 5. Kifer Diotréphès ti pou bizin rann compte?

⁵ Bann Israélite ti gagne sa l’ordre-la: “Fodé pa to al partout parmi le peuple, pou al koz menti lor lezot.” (Lévitique 19:16) Guette seki l’apotre Jean ti dire lor enn calomniateur ki ti vive dan so lepok: “Mo ti ecrire kitsoz pou congregation, mais Diotréphès, ki content ena premier place parmi zot, pa accepté nanyin ki sorti kot nou avek respé. A cause sa, si mo vini, mo pou rappel bann kitsoz ki li pé contigne faire, ek couma li pé contigne koz en mal lor nou.” (3 Jean 9, 10) Diotréphès ti pé koz menti lor Jean, ek li ti pou bizin rann enn compte pou sa. Surement, okenn chrétien fidel pa pou envie ressemblé Diotréphès ek imite Satan, sa calomniateur-la!

6, 7. Kifer nou pa envie koz menti ek gate reputation personne?

⁶ Souvent, dimoune faire bann fausse accusation kont bann serviteur Jéhovah pou essaye gate zot reputation. “Bann ki ti chef parmi bann pretre, ek bann scribe, touletan ti pé levé pou accuse [Jésus] avek colere.” (Luc 23:10) Grand pretre Ananias ek lezot dimoune ti mette bann fausse accusation lor Paul. (Actes 24:1-8) Ek la Bible appel Satan “sa kikenn ki accuse nou bann frere-[la], ek ki accuse zot la-nuit li-jour devant nou Bondié.” (Révélation 12:10) Sa bann frere kont ki ena sa bann fausse accusation-la, c’est bann chrétien oint ki lor la terre pendant lepok dernier jour.

⁷ Okenn chrétien pa pou envie koz menti lor personne pou gate so reputation, ou-soit faire bann fausse accusation kont li. Pourtant, sa kapav arrivé si nou al temoigne kont enn kikenn, ek ki nou pena tou bann renseignement ki bizin. Dapré la Loi mosaïk, enn dimoune ti kapav condamné a mort, si li ti koz menti par expré kan li temoigne kont so prochain. (Exode 20:16; Deutéronome 19:15-19) En plus, parmi bann kitsoz ki Jéhovah detesté, ena “enn fausse temoin ki koz menti.” (Proverbes 6:16-19) Oui, nou pa envie imite sa grand calomniateur ki faire bann fausse accusation-la.

Pa faire pareil couma sa premier criminel-la

 8. Dan ki sens Satan le Diable ti enn ‘criminel kan li ti commencé’?

⁸ Satan le Diable enn criminel. Jésus ti dire: “Kan li ti commencé, li ti enn criminel.” (Jean 8:44) Satan ti faire so premier mauvais action kan li ti detourne Adam ek Ève ar Bondié. C’est lerla ki li ti vinn enn criminel, parski li ti responsable zot la-mort ek la mort zot bann descendant. (Romains 5:12) Li bon nou remarké ki c’est zis enn kikenn ki réel ki ti kapav faire sa, ek pa le mal ki existé dan bann dimoune.

 9. Dapré 1 Jean 3:15, couma eski nou kapav vinn bann criminel?

⁹ Dan enn parmi les Dix Commandement ki Bondié ti donne Israël, Li ti dire: “Fodé pa to faire crime.” (Deutéronome 5:17) L’apotre Pierre ti donne sa conseil-la bann chrétien: “Fodé pa ki personne parmi zot souffert parski li’nn faire enn crime.” (1 Pierre 4:15) Alors, en tant ki bann serviteur Jéhovah, nou pa pou faire crime. Pourtant, si nou ena la haine pou enn lot chrétien ek nou souhaite so la-mort, nou pou coupable devant Bondié. L’apotre Jean ti ecrire: “Tou dimoune ki ena la haine pou so frere, li enn criminel, ek zot koné ki okenn criminel pena la vie eternel dan li.” (1 Jean 3:15) Bann Israélite ti gagne sa l’ordre-la: “Fodé pa ki to ena la haine pou to frere dan to leker.” (Lévitique 19:17) Alors, nou bizin reglé bien vite n’importe ki problem ki nou gagné avek enn lot chrétien pou ki Satan, sa criminel-la, pa detruire nou l’unité.—Luc 17:3, 4.

Tini ferme kont sa chef menteur-la

10, 11. Ki nou bizin faire pou tini ferme kont chef menteur, setadir Satan le Diable?

¹⁰ Satan le Diable, li enn menteur. Jésus ti dire: “Kan li koz menti, li pé suive so prop tendance, parski li enn menteur ek papa tou bann mensonge.” (Jean 8:44) Satan ti koz menti ar Ève, alors ki Jésus li, li’nn vinn dan le monde pou rann temoignage lor la verité. (Jean 18:37) Pou nou reussi tini ferme kont Satan ek reste bann disciple Jésus, nou pa pou koz menti ar nou prochain ek embete li. Nou bizin “dire la verité.” (Zekaria 8:16; Éphésiens 4:25) Jéhovah, “Bondié la verité” beni zis so bann Témoins ki dire toujours la verité. Bann mauvais dimoune pena okenn droit pou represente Li.—Psaume 31:5; 50:16; Isaïe 43:10.

¹¹ Si nou content ki nou finn liberé ar bann mensonge Satan grace a la verité ki sorti dan la Bible, nou pou reste attaché ar “chemin la verité,” setadir vrai religion chrétien. (2 Pierre 2:2; Jean 8:32) Tou seki Jésus ti enseigné, c’est sa “la verité ki concerne la bonne nouvelle.” (Galates 2:5, 14) Nou pou sauvé seulement si nou “marche dan la verité,” setadir si nou reste attaché ar la verité ek si nou tini ferme kont “papa tou bann mensonge.”—3 Jean 3, 4, 8.

Resisté kont pli grand apostat

12, 13. Couma eski nou bizin agir avek bann apostat?

¹² Sa creature spirituel ki finn vinn Satan le Diable-la, ti dan la verité avant. Mais Jésus ti dire ki “li pa’nn tini ferme dan la verité parski la verité pa dan li.” (Jean 8:44) Sa grand apostat-la pa finn arrete resisté kont “Bondié la verité.” Certain chrétien dan premier siecle ti tombe dan “piege Satan,” surement parski zot finn laisse-zot trompé par li ek zot finn detourne-zot ar la verité. Alors, Paul ti encourage so compagnon travail Timothée, pou enseigne zot avek douceur, pou ki zot kapav gueri lor plan spirituel ek liberé ar piege Satan. (2 Timothée 2:23- 26) Bien-sur, li pli bon ki nou reste bien attaché ar la verité, ek ki jamais nou pa laisse-nou trompé ek tombe dan piege bann apostat.

¹³ Adam et Ève finn vinn bann apostat parski zot finn ecoute Satan ek zot pa finn rejette so bann mensonge. Alors, eski nou bizin ecoute bann apostat, lire zot livre, ou-soit al lire seki zot ecrire lor bann site Internet? Si nou content Bondié ek la verité, nou pa pou faire sa. Fodé pa nou laisse bann apostat rente dan nou lakaz, ni mem dire zot bonjour, parski si nou faire sa, nou pou ‘participe dan zot bann mauvais action.’ (2 Jean 9-11) Fodé jamais nou laisse-nou trompé par bann manigance Satan ek abandonne “chemin la verité.” Li essaye faire nou suive bann fausse enseignant ki rod ‘glisse bann fausse doctrine’ parmi nou, ek essaye ‘exploite nou avek bann discours ki kapav embete nou.’—2 Pierre 2:1-3, Traduction Œcuménique de la Bible.

14, 15. Ki l’avertissement Paul ti donne bann ancien dan Éphèse, ek Timothée, so compagnon travail?

¹⁴ Paul ti dire bann ancien ki ti dan la ville Éphèse: “Veille bien lor zot-mem ek lor troupeau Bondié. Parmi sa troupeau-la, l’esprit saint finn etabli zot couma bann surveillant pou prend soin congregation Bondié ki Li finn acheté avek di-sang so prop Garson. Mo koné ki apré ki mo’nn fini allé, bann dimoune ki dominere ek sans pitié, pareil couma bann loup-loup, pou rente parmi zot; zot pa pou traite sa troupeau-la avek tendresse, ek parmi zot-mem, bann zom pou levé ek pou dire bann fausse kitsoz pou faire bann disciple suive zot.” (Actes 20:28-30) Avek le temps, ti ena vrai-mem bann apostat ki ti levé ek ki ti dire “bann fausse kitsoz.”

¹⁵ Vers l’an 65 n.l., l’apotre Paul ti encourage Timothée pou “servi parole la verité couma bizin.” Paul ti ecrire: “Mais, evite bann discours ki pena sens ek ki gate seki pur; parski pli allé, zot pou mank respé pou Bondié, ek zot parole pou fané pareil couma la gangrene. Hyménée ek Philète parmi zot. Sa bann zom-la finn detourne-zot ar la verité, zot dire ki resurrection [ki bann chrétien ti pé attann], inn fini arrivé; ek zot pé detourne la foi certain.” L’apostasie ti’nn commencé! Paul ti ajouté: “Malgré tou, sa fondation solid ki Bondié inn posé-la, pé tini ferme.”—2 Timothée 2:15-19.

16. Malgré bann manigance sa pli grand apostat-la, kifer nou finn reste fidel ar Bondié ek ar so Parole?

¹⁶ Souvent Satan finn servi bann apostat pou rod gate vrai l’adoration, mais li pa’nn reussi. Vers l’année 1868, Charles Taze Russell, ti commence examine bann doctrine ki bann l’Eglise la chrétienté ti’nn enseigné depuis longtemps. Li ti trouve enn serie fausse interpretation lor Bible. Avek lezot dimoune ki ti pé rod la verité, li ti forme enn group pou etudié la Bible, dan Pittsburgh, en Pennsylvanie (Amérique). Depuis sa, pendant preské 140 an, bann serviteur Jéhovah finn contigne augmente zot connaissance ek zot l’amour pou Bondié ek pou so Parole. Malgré tou bann manigance sa grand apostat-la, l’esclave fidel et avisé finn veillé lor plan spirituel, ek sa finn aide sa bann vrai chrétien-la pou reste fidel ar Jéhovah ek ar so Parole.—Matthieu 24:45.

Fodé jamais zot laisse chef sa lé-monde-la domine zot

17-19. Ki été le monde ki dan pouvoir Satan, ek kifer fodé pa ki nou content sa lé-monde-la?

¹⁷ Enn lot fason ki Satan rod piege nou c’est kan li rod faire nou content sa lé-monde-la, setadir le monde bann dimoune injuste ki eloigné ar Bondié. Jésus ti appel Satan “chef sa lé-monde-la” ek li ti dire: “Li pena okenn pouvoir lor moi.” (Jean 14:30) Fodé jamais ki nou laisse Satan ena pouvoir lor nou aussi! Bien-sur, nou koné ki “le monde entier li dan pouvoir Satan.” (1 Jean 5:19) C’est pou sa ki li ti kapav propose Jésus “tou bann gouvernement dan le monde,” si Jésus ti accepté pou vinn enn apostat ek adore li enn sel fois. Mais Jésus ti refusé dan enn fason categorik. (Matthieu 4:8-10) Le monde ki Satan pé dirigé ena la haine pou bann disciple Jésus. (Jean 15:18-21) Li pa etonnant ki l’apotre Jean ti conseil nou pou pa content le monde!

¹⁸ Jean ti ecrire: “Pa content le monde, ni bann kitsoz ki ena dan le monde. Si enn kikenn content le monde, l’amour nou Papa pa dan li; parski tou seki ena dan le monde—desir la chair, desir lizié, enn kikenn ki faire l’etalage ar seki so moyen permette li ena—tousala pa sorti kot nou Papa, mais sorti dan le monde. En plus, le monde pé al fini ek so desir aussi, mais celui ki faire volonté Bondié pou reste pou toujours.” (1 Jean 2:15-17) Fodé pa ki nou content le monde, parski li encourage nou pou vive dan enn fason ki pousse nou pou guette zis seki faire nou lekor plaisir. Sa fason vive-la, li completement opposé ar bann principe Jéhovah.

¹⁹ Mais ki nou pou faire si nou ena l’amour pou le monde dan nou leker? Nou bizin prié Bondié pou nou rejette sa l’amour-la ek bann mauvais desir ki ena enn rapport avek sa. (Galates 5:16-21) Si nou rappel ki c’est bann “mauvais l’esprit” ki pé ‘dirige le monde’ bann dimoune injuste, nou pou faire tou seki nou kapav pou ‘pa laisse sa lé-monde-la contamine nou.’—Jacques 1:27; Éphésiens 6:11, 12; 2 Corinthiens 4:4.

20. Kifer nou kapav dire ki nou pa “faire partie dan le monde”?

²⁰ Jésus ti dire lor so bann disciple: “Zot pa faire partie dan le monde, pareil couma moi mo pa faire partie dan le monde.” (Jean 17:16) Bann chrétien oint ek zot compagnon ki finn voué zot la-vie pou servi Jéhovah, faire zeffort pou reste pur lor plan moral ek spirituel, ek pou reste separé ar le monde. (Jean 15:19; 17:14; Jacques 4:4) Sa lé-monde injuste-la ena la haine pou nou parski nou reste separé ar li, ek parski nou bann “predicateur la justice.” (2 Pierre 2:5) C’est vrai ki nou pé vive parmi bann dimoune dan le monde, ek parmi, ena bann dimoune ki commette fornication, l’adultere, ki faire fraude, ki adore bann zidole, ki bann voleur, bann menteur ek bann soulard. (1 Corinthiens 5:9-11; 6:9-11; Révélation 21:8) Mais nou pa laisse-nou contaminé par ‘l’esprit sa lé-monde-la,’ parski nou pa laisse sa l’envie pou faire peché-la, domine nou.—1 Corinthiens 2:12.

Pa donne Satan l’occasion pou domine zot

21, 22. Couma eski nou kapav applik conseil Paul ki trouve dan Éphésiens 4:26, 27?

²¹ Nou pa laisse “l’esprit le monde” influence nou. Au contraire, nou laisse l’esprit Bondié guide nou ek produire bann bon qualité en nou, bann qualité couma l’amour ek capacité pou control nou-mem. (Galates 5:22, 23) Sa bann qualité-la aide nou pou repousse bann attak ki Satan faire kont nou la-foi. Li envie ki nou “bouilli ar colere zis pou nou faire seki mauvais,” mais l’esprit Bondié aide nou pou “rejette la colere ek la rage.” (Psaume 37:8) C’est vrai ki parfois nou kapav ena raison pou en colere, mais Paul donne nou sa conseil-la: “Zot kapav en colere, mais pa faire peché; pa laisse soleil couché lor zot colere, ek pa donne Satan l’occasion pou domine zot.”—Éphésiens 4:26, 27.

²² Si nou reste en colere, sa kapav faire nou faire peché. Kan nou dan sa condition-la, nou kapav donne Satan l’occasion pou fann bann desaccord dan la congregation, ou-soit pou pousse nou pou faire bann mauvais kitsoz. Sa vedir ki nou bizin reglé bien vite bann problem ki nou gagné avek lezot, ek nou bizin faire sa dan enn fason ki Bondié content. (Lévitique 19:17, 18; Matthieu 5:23, 24; 18:15, 16) Alors, anou toujours laisse l’esprit Bondié guide nou, ek anou control nou-mem. Ek mem si nou ena bann bon raison pou en colere, fodé jamais ki nou reste dan sa condition-la ziska ki nou vinn amer ek developpe enn mauvais sentiment ek la haine.

23. Ki nou pou examiné dan prochain lartik?

²³ Nou finn examine certain vilain qualité ki Satan ena ki fodé pa nou imité. Mais certain kapav demandé: Eski nou bizin peur Satan? Kifer li faire bann chrétien gagne persecution? Ek ki nou bizin faire pou ki Satan pa domine nou?

[Note]

Ki ou pou reponn?

• Kifer fodé jamais nou koz menti lor lezot pou gate zot reputation?

• En accord avek 1 Jean 3:15, couma nou kapav evité vinn bann criminel?

• Couma eski nou bizin considere bann apostat, ek kifer?

• Kifer fodé pa nou content le monde?

[Zimage, page 5]

Jamais nou pou donne Satan l’occasion pou detruire nou l’unité

[Zimage, page 7]

Kifer Jean ti conseil nou pou pa content le monde?