Anou glorifié nom Jéhovah ensam

“Ensam avek moi, faire konn grandeur Jéhovah, ek anou glorifié so nom ensam.”—Psaume 34:3.

 1. Pendant so ministere lor la terre, ki bon l’exemple Jésus inn donne nou?

Dan la soirée le 14 Nisan l’an 33 n.l., Jésus avek so bann zapotre ti rassemblé dan enn la-chambre la-haut dan enn lakaz, dan Jérusalem. Zot ti chante bann cantik pou loué Jéhovah. (Matthieu 26:30) C’est dernier fois ki Jésus ti faire sa avek so bann zapotre. Mais, li ti bien approprié ki li termine sa reunion-la coumsa. En realité, toute longue so ministere lor la terre, Jésus inn loué so Papa ek li’nn faire konn So nom avek zèle. (Matthieu 4:10; 6:9; 22:37, 38; Jean 12:28; 17:6) Li ti reprend enn l’invitation bien touchant ki enn psalmiste ti faire: “Ensam avek moi, faire konn grandeur Jéhovah, ek anou glorifié so nom ensam.” (Psaume 34:3) C’est vrai-mem enn bon l’exemple pou nou suive, pa vrai?

2, 3. (a) Couma nou koné ki Psaume 34 ena enn signification prophetik? (b) Ki nou pou examiné dan sa lartik-la ek dan prochain lartik?

² Enn tipé apré ki l’apotre Jean ti chante bann cantik avek Jésus, li ti assisté enn l’evenement bien different. Li ti trouve bann soldat couloute Jésus ek deux bandit lor bann poteau souffrance pou zot mort. Bann soldat romain ti casse lipié sa deux criminel-la pou zot mort pli vite. Mais, Jean ti dire ki zot pa ti casse lipié Jésus, parski kan zot ti vinn pré kot li, li ti’nn fini mort. Dan l’evangile ki Jean ti ecrire, li ti expliké ki sa ti arrivé pou realise enn lot partie Psaume 34 ki dire: “Pa enn sel so lezo inn crasé.”—Jean 19:32-36; Psaume 34:20, Septante.

³ Ena beaucoup lezot point bien interessant dan Psaume 34 pou bann chrétien. Dan sa lartik-la ek dan prochain lartik, nou pou guetté dan ki circonstance David ti ecrire sa psaume-la ek bann verset encourageant ki ena ladan.

David ti sauvé a cause Saül

 4. (a) Kifer Jéhovah ti choisir David pou vinn prochain lé-roi en Israël? (b) Kifer Saül inn arrivé “bien content” David?

⁴ Kan David ti jeune, Saül ti le roi en Israël. Mais, avek le temps, Saül ti commence desobeir Jéhovah ek li ti perdi So faveur. A cause sa, prophete Samuel ti dire li: “Zordi, Jéhovah inn rass sa pouvoir pou règne lor Israël-la ar toi, ek vrai-mem Li pou donne sa enn lot dimoune ki pli bon ki toi.” (1 Samuel 15:28) Plitar, Jéhovah ti donne l’ordre Samuel pou al choisir David, pli jeune garson Jessé, pou li vinn prochain lé-roi en Israël. Entre-temps, le roi Saül ti perdi l’esprit saint Bondié, ek parfois so l’humeur pa ti bon ditou. Alors, bann serviteur Saül ti faire amenn David, ki ti enn bon musicien, pou vinn Guibéa pou servi le roi. Le roi Saül ‘ti bien content David’ parski so la-musik ti soulage li beaucoup.—1 Samuel 16:11, 13, 21, 23.

 5. Kifer Saül ti change so l’attitude envers David, ek ki David ti obligé faire?

⁵ A mesure ki le temps ti passé, li ti clair ki Jéhovah ti avek David. Jéhovah ti aide David pou touye Goliath, enn geant Philistin, ek Li ti donne David so soutien kan le peuple ti loué David pou so bann capacité militaire. Mais parski Jéhovah ti beni David, Saül ti commence jaloux ek li ti ena la haine pou David. Dan deux l’occasion, alors ki David ti pé joué la harpe devant li, Saül ti envoye so lance pou touye David. Toulé-deux fois, David ti reussi tiké pou ki Saül pa gagne li. Kan Saül ti essaye touye li enn troisieme fois, David, futur le roi Israël ti comprend ki li ti bizin sauvé pou protege so la-vie. Finalement, parski Saül ti pé contigne faire tou seki li ti kapav pou attrape li ek pou touye li, David ti decidé pou al cachiette en dehors territoire Israël.—1 Samuel 18:11; 19:9, 10.

 6. Kifer Saül ti faire touye bann habitant Nob?

⁶ Kan David ti arrive pré kot la frontiere Israël, li ti arrete dan la ville Nob kot tabernacle Jéhovah ti été. Li parette ki ti ena bann jeune-homme ki ti accompagne li kan li ti pé sauvé. David ti al rod mangé pou zot ek pou li. Saül ti aprann ki grand pretre ti donne David ek so bann zom, mangé, ek l’epée ki David ti prend apré ki li ti’nn touye Goliath. Dan so colere, Saül ti faire touye tou bann habitant la ville Nob, parmi ti ena 85 pretre.—1 Samuel 21:1, 2; 22:12, 13, 18, 19; Matthieu 12:3, 4.

David sap dan la mort encore enn fois

 7. Kifer Gath pa ti enn l’endroit kot David ti pou en securité?

⁷ David ti quitte Nob, ek li ti sauvé, li ti al 40 kilometre dan l’ouest, dan territoire bann Philistin. Li ti al rod enn place pou cachiette dan la ville Gath, kot Akish ti le roi, ek kot Goliath ti sorti. Alors, kitfois David ti pensé ki c’est dernier place kot Saül ti pou vinn rod li. Mais, bann serviteur Akish pa finn tardé pou reconette David. Kan David ti aprann sa, “li ti gagne bien peur a cause Akish, le roi Gath.”—1 Samuel 21:10-12.

 8. (a) Ki Psaume 56 montré nou lor seki’nn arrive David dan la ville Gath? (b) Couma David ti reussi sapé kan li ti passe pré ar la mort?

⁸ Lerla, bann Philistin ti attrape David. Kitfois, c’est lerla ki David ti compose enn psaume bien touchant kot li ti suppliye Jéhovah par sa bann parole-la: “Mette mo larme dan to bouteille en la peau.” (Psaume 56:8 ek note ki ena dan commencement Psaume 56) Dan sa verset-la, li ti dire ki li ena confiance ki Jéhovah pa pou blié so malheur, mais ki Li pou prend li bien soin ek pou protege li. David ti aussi rod enn fason pou trompe le roi bann Philistin. Li ti declare fou. Kan Akish ti trouve sa, li ti bien en colere ar so bann serviteur parski zot ti amenn enn dimoune “fou” devant li. Pena doute ki Jéhovah ti beni seki David ti faire. Bann zom Akish ti amenn li en dehors la ville, ek, encore enn fois, li ti sap dan la mort.—1 Samuel 21:13-15.

 9, 10. Ki ti pousse David pou ecrire Psaume 34, ek kisannla kitfois li ti pé pensé kan li ti ecrire sa psaume-la?

⁹ La Bible pa dire nou si bann zom David zot aussi zot ti al cachiette dan la ville Gath ensam avek li. Li pa dire aussi si zot ti reste en Israël dan bann village, ki pa ti trop loin, pou veille David ek pou protege li. Mais n’importe couma sa ti passé, surement zot ti bien content kan zot ti joinde David ek kan li ti raconte zot couma Jéhovah ti delivré li encore enn fois. C’est sa l’evenement-la ki ti inspire David pou ecrire Psaume 34, couma nou lire dan note ki ena dan commencement sa psaume-la. Dan sept premier verset sa psaume-la, David loué Bondié parski Li ti’nn delivré li. Li invite so bann camarade pou glorifié Jéhovah ensam avek li parski Li enn Bondié ki sauve So peuple.—Psaume 34:3, 4, 7.

¹⁰ Apré sa, David ek so bann zom ti al cachiette dan la grotte Adoullam, dan enn l’endroit kot ti ena bann montagne, en Israël, apepré 15 kilometre dan l’est Gath. La-bas, bann Israélite ki pa ti satisfait ar bann condition ki ti ena kan Saül ti pé regné, ti vinn joinde zot. (1 Samuel 22:1, 2) Kan David ti ecrire bann parole ki trouve dan Psaume 34:8-22, kitfois li ti pé pense certain parmi sa bann dimoune-la. Bann rappel ki ena dan sa bann verset-la zot bien important pou nou zordi, ek pena doute ki nou pou gagne bann grand bienfait si nou examine sa joli psaume-la en detail.

Seki ti pli important pou David, eski sa-mem ki important pou ou aussi?

11, 12. Ki raison nou ena pou loué Jéhovah touletan?

¹¹ “Touletan mo pou beni Jéhovah, so louange pou reste touletan dan mo la-bouche.” (Psaume 34:1) Pendant ki David ti pé vive couma enn dimoune ki rejeté par la societé, surement ki li ti tracassé concernant bann kitsoz ki li ti bizin lor plan materiel. Mais couma sa verset-la montré nou, li pa ti laisse bann difficulté materiel ki li ti ena toulé-jour, passe avant so determination pou loué Jéhovah. Li vrai-mem enn bon l’exemple pou nou kan nou passe par bann difficulté! Ki nou dan lekol, dan travail, avek nou bann frere ek soeur, ou-soit dan predication, seki bizin pli important pou nou, c’est loué Jéhovah. Mazinn tou bann raison ki nou ena pou faire sa! Par exemple, jamais nou pa pou fini aprann ek apprecié bann kitsoz ki ena dan creation Jéhovah. Mazinn aussi tou seki Li’nn faire a travers so l’organisation ki lor la terre! Li’nn servi bann dimoune fidel, mem si zot imparfait, pou faire bann kitsoz extraordinaire dan nou lepok. Eski nou kapav compare seki Bondié faire avek seki bann dimoune faire, mem si certain considere sa bann dimoune-la couma bann zidole? Eski ou pa plutot d’accord avek seki David ti ecrire: “Pena personne couma toi parmi bann bondié, ah Jéhovah, ek pena nanyin ki pareil couma seki toi to faire”?—Psaume 86:8.

¹² Pareil couma David, bann kitsoz extraordinaire ki Jéhovah inn faire pousse nou pou loué Li. En plus, nou bien content pou koné ki dan nou lepok, Royaume Bondié dan la main Jésus Christ ki l’heritier permanent David. (Révélation 11:15) Sa vedir ki la fin sa lé-monde-la bien pré. Plus ki six milliard dimoune riské perdi possibilité pou gagne la vie eternel. Zordi plus ki avant, li bien important ki nou preche Royaume Bondié ek nou dire bann dimoune seki sa Royaume-la pou faire bientot pou bann dimoune lor la terre ek ki nou aide zot pou loué Jéhovah avek nou. Li clair ki seki bizin priorité dan nou la-vie, c’est saisi tou l’occasion pou encourage bann dimoune pou accepté ‘la bonne nouvelle’ avant ki li trop tard.—Matthieu 24:14.

13. (a) A cause kisannla David ti fiere ek ki qualité dimoune ti touché par seki li ti dire? (b) Couma bann dimoune ki ena l’humilité, zot attiré vers la congregation zordi?

¹³ “A cause Jéhovah mo nâme pou fiere; bann dimoune ki ena l’humilité pou tendé ek pou dan la joie.” (Psaume 34:2) Ici David pa ti fiere a cause bann kitsoz ki li ti’nn faire personnellement. Par exemple, li pa ti faire vantard parski li ti’nn reussi trompe le roi Gath. Li ti koné ki Jéhovah ti protege li kan li ti dan Gath ek ki li ti reussi sapé grace a So l’aide. (Proverbes 21:1) Oui, David pa ti fiere pou seki li ti’nn faire, mais li ti fiere a cause Jéhovah. A cause sa, bann dimoune ki ti ena l’humilité ti attiré vers Jéhovah. Jésus aussi ti loué nom Jéhovah ek grace a sa, bann dimoune ki ti ena l’humilité ek ki ti accepté pou laisse-zot enseigné, ti attiré vers Jéhovah. Zordi, bann dimoune humble ki sorti dan tou nation, zot attiré vers congregation mondial bann chrétien oint, ek Jésus la Tête sa congregation-la. (Colossiens 1:18) Leker sa bann dimoune-la bien touché kan zot tann bann serviteur Bondié glorifié so nom avek l’humilité. Zot touché aussi kan zot tann message ki ena dan la Bible ki l’esprit saint Bondié permette zot pou comprend.—Jean 6:44; Actes 16:14.

Bann reunion fortifié nou la-foi

14. (a) Eski David ti contente-li pou loué Jéhovah zis kan li ti tousel? (b) Ki l’exemple Jésus inn donne nou concernant bann reunion kot nou adore Jéhovah?

¹⁴ “Ensam avek moi, faire konn grandeur Jéhovah, ek anou glorifié so nom ensam.” (Psaume 34:3) David pa ti contente-li pou loué Jéhovah zis kan li ti tousel. Li ti invite lezot dimoune pou loué nom Jéhovah ensam avek li. Jésus Christ, Grand David aussi pareil, li ti trouve plaisir pou loué Jéhovah en publik—dan bann synagogue, dan temple Jérusalem pendant bann fête, ek avek so bann disciple. (Luc 2:49; 4:16-19; 10:21; Jean 18:20) Nou ena vrai-mem enn grand privilege ek la joie pou imite Jésus ek pou loué Jéhovah chaque fois ki nou ensam avek nou bann frere ek soeur, surtout zordi, alors ki nou “trouve jour-la pé kosté”!—Hébreux 10:24, 25.

15. (a) Ki l’effet seki’nn arrive David, finn ena lor so bann zom? (b) Ki bienfait nou gagné kan nou assisté reunion?

¹⁵ “Mo ti tourne-moi vers Jéhovah ek Li’nn reponn moi, ek Li’nn delivré moi ar tou bann kitsoz ki ti faire moi peur.” (Psaume 34:4) Sa ti bien touche David kan Jéhovah ti delivré li. A cause sa, li ti ajouté: “Sa kikenn ki ena enn grand chagrin-la inn criyé, ek Jéhovah Li-mem inn tendé, ek Li’nn sap li dan tou so bann malheur.” (Psaume 34:6) Kan nou rassemblé avek nou bann frere ek soeur, nou gagne beaucoup l’occasion pou raconte bann l’experience encourageant lor fason ki Jéhovah inn aide nou pou endure bann situation difficile. Sa fortifié la foi nou bann frere ek soeur, pareil couma bann parole David ti fortifié la foi so bann camarade. Dan cas David, so bann compagnon ti “tourne zot regard vers [Jéhovah] ek zot inn vinn joyeux, ek pa ti kapav ena la honte lor zot figure.” (Psaume 34:5) Mem si sa bann zom-la ti pé sauvé a cause le roi Saül, zot pa ti honté. Zot ti koné ki Jéhovah ti pé soutenir David, ek sa ti faire zot figure parette joyeux. Li pareil aussi pou bann nouveau ki pé interessé ar la verité ek aussi bann ki longtemps dan la verité, ek ki tourne-zot vers Jéhovah pou Li soutenir zot. Parski zot inn gagne so l’aide, la joie ki ena lor zot figure montré ki zot bien decidé pou reste fidel.

Montré nou reconnaissance pou l’aide ki bann ange donne nou

16. Couma Jéhovah finn servi so bann ange pou delivré so bann serviteur?

¹⁶ “Ange Jéhovah pé campe autour bann ki ena la crainte pou Li, ek li delivré zot.” (Psaume 34:7) David pa ti pensé ki c’est zis li tousel ki Jéhovah ti delivré. Li vrai ki Jéhovah ti choisir David pou ki enn jour li règne lor Israël; mais David ti koné ki Jéhovah servi So bann ange pou veille lor tou so bann adorateur fidel, ki zot ena enn grand position ou non. Dan nou lepok, bann vrai adorateur Jéhovah aussi finn gagne so protection. Dan l’Allemagne nazi—ek aussi dan Angola, dan Malawi, dan Mozambique ou-soit dan beaucoup lezot pays—bann gouvernement finn faire tou seki zot kapav pou elimine bann Témoins de Jéhovah. Mais tou seki zot inn faire, pa’nn servi nanyin. Au contraire, dan sa bann pays-la, bann serviteur Jéhovah pé contigne prosperé lor plan spirituel pendant ki zot pé loué nom Jéhovah ensam. Kifer? Parski Jéhovah servi so bann ange pou protege so peuple ek pou guide zot.—Hébreux 1:14.

17. Dan ki fason bann ange aide nou?

¹⁷ En plus, bann ange kapav dirige bann l’evenement pou tire parmi peuple Bondié, n’importe ki chrétien ki faire lezot tombé lor plan spirituel. (Matthieu 13:41; 18:6, 10) Ek mem si parfois nou pa rann-nou compte, bann ange tire bann l’obstacle ki kapav empeche nou pou servi Jéhovah couma bizin, ek zot protege nou kont bann kitsoz ki kapav mette nou relation avek Jéhovah en danger. Mais avant tou, bann ange guide nou pou preche “enn bon nouvel eternel” ar tou bann dimoune, mem dan bann l’endroit kot li bien dangereux pou preché. (Révélation 14:6) Dan bann publication bann Témoins de Jéhovah, souvent ena bann l’experience kot nou trouvé couma bann ange inn aide bann dimoune.a Ena trop beaucoup l’experience coumsa, pou nou dire ki c’est zis bann coincidence.

18. (a) Ki nou bizin faire pou nou gagne l’aide bann ange? (b) Ki nou pou examiné dan prochain lartik?

¹⁸ Pou nou contigne gagne direction ek protection bann ange, fodé ki nou contigne loué nom Jéhovah mem si nou gagne persecution. Rappel bien ki ange Bondié campe zis “autour bann ki ena la crainte pou [Jéhovah].” Ki sa vedir? Ki été la crainte pou Bondié ek couma nou kapav developpe sa? Kifer enn Bondié ki ena l’amour pou nou, envie ki nou ena la crainte pou Li? Nou pou examine sa bann question-la dan prochain lartik.

[Note]

Couma ou pou reponn?

• Ki bann l’epreuve David finn enduré kan li ti jeune?

• Pareil couma David, ki kitsoz bizin pli important pou nou?

• Couma nou considere bann reunion?

• Couma Jéhovah servi so bann ange pou aide nou?

[Map, page 25]

(guette publication)

Rama

Gath

Tsiqlag

Guibéa

Jérusalem

Adoullam

Qéïla

Hébrôn

Ziph

Horesh

Maôn

Nob

Bethléhem

En-Guédi

Karmel

La Mer Salée

[Remerciement photo]

Map: Basé lor bann map lor ki Pictorial Archive (Near Eastern History) Est. ek Survey of Israel inn acheté bann droit

[Zimage, page 25]

Mem kan David ti enn fugitif li ti glorifié nom Jéhovah